കേന്ദ്ര കായിക-യുവജന മന്ത്രാലയത്തിന് കീഴിലുള്ള 'മേരാ യുവ ഭാരത്' സംഘടിപ്പിക്കുന്ന 'വികസിത ഇന്ത്യയ്ക്കായി ലഹരിമുക്ത യുവത' (Nasha Mukt Yuva for Viksit Bharat) പ്രചാരണത്തിന്റെ ഏഴാം ആഴ്ചയിൽ വൻ പങ്കാളിത്തം രേഖപ്പെടുത്തി. 30 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി സംഘടിപ്പിച്ച 447 പരിപാടികളിലും 1,002 പ്രവർത്തനങ്ങളിലുമായി 93,000-ത്തിലധികം പേർ പങ്കെടുത്തതായി 'മൈ ഭാരത്' പുറത്തുവിട്ട താൽക്കാലിക റിപ്പോർട്ടിൽ വ്യക്തമാക്കുന്നു. ലഹരിക്കെതിരെ അവബോധം വളർത്താനും യുവാക്കളിൽ ആരോഗ്യകരമായ ജീവിതശൈലി പ്രോത്സാഹിപ്പിക്കാനുമാണ് ഒക്ടോബർ 31-ന് അവസാനിച്ച ഈ ഘട്ടത്തിൽ പ്രാധാന്യം നൽകിയത്.
ഡൽഹി, ബിഹാർ, ഹിമാചൽ പ്രദേശ്, ഗുജറാത്ത്, ഹരിയാന, ഛത്തീസ്ഗഡ്, ഒഡീഷ, രാജസ്ഥാൻ, ഉത്തർപ്രദേശ് ഉൾപ്പെടെ നിരവധി സംസ്ഥാനങ്ങളിലാണ് പ്രചാരണ പരിപാടികൾ നടന്നത്. മിനി മാരത്തോണുകൾ, ലഹരിവിരുദ്ധ പ്രതിജ്ഞയെടുക്കൽ ചടങ്ങുകൾ, മോക്ക് യൂത്ത് പാർലമെന്റുകൾ, മുദ്രാവാക്യ രചന എന്നിവ പരിപാടികളുടെ ഭാഗമായി സംഘടിപ്പിച്ചു. രണ്ട് സംസ്ഥാന മന്ത്രിമാരും മൂന്ന് എം.എൽ.എമാരും ഉൾപ്പെടെ അഞ്ച് ജനപ്രതിനിധികൾ വിവിധ ചടങ്ങുകളിൽ പങ്കെടുത്തു.
പ്രചാരണത്തിന്റെ ഭാഗമായി 'മൈ ഭാരത്', ഫിറ്റ് ഇന്ത്യ, സ്പോർട്സ് അതോറിറ്റി ഓഫ് ഇന്ത്യ, മറ്റ് പങ്കാളിത്ത സംഘടനകൾ എന്നിവയുമായി സഹകരിച്ച് 267 മിനി മാരത്തോൺ പരിപാടികൾ സംഘടിപ്പിച്ചു. 401 പ്രവർത്തനങ്ങൾ ഉൾപ്പെട്ട ഈ മാരത്തോണുകളിൽ 70,566 പേർ പങ്കെടുത്തു. ബ്രഹ്മകുമാരീസ്, ഹാർട്ട്‌ഫുൾനസ്, CIPU, ASSOCHAM, FICCI തുടങ്ങിയ സംഘടനകളാണ് ഇതിൽ സഹകരിച്ചത്. ഡൽഹിയിൽ സംഘടിപ്പിച്ച മിനി മാരത്തോണിൽ ഡൽഹി കാബിനറ്റ് മന്ത്രി ശ്രീ രവീന്ദർ ഇന്ദ്രജ് സിങ് പങ്കെ‌ടുത്ത് യുവാക്കൾക്ക് ആവേശം പകർന്നു. ബിഹാറിലെ ഗോപാൽഗഞ്ചിൽ ജില്ലാ മജിസ്‌ട്രേറ്റിന്റെ സാന്നിധ്യത്തിൽ നടന്ന ചടങ്ങിൽ പങ്കെടുത്തവർ ലഹരിവിരുദ്ധ പ്രതിജ്ഞയെടുക്കുകയും മാരത്തോണിൽ പങ്കാളികളാകുകയും ചെയ്തു.
പ്രാദേശികതലത്തിൽ അയൽപക്ക യൂത്ത് പാർലമെന്റുകളുടെ നേതൃത്വത്തിൽ 2026 ഒക്ടോബർ 31-ന് 'വികസിത ഇന്ത്യയ്ക്കായുള്ള ലഹരിമുക്ത യുവ ചർച്ച' സംഘടിപ്പിച്ചു. 601 പ്രവർത്തനങ്ങൾ ഉൾപ്പെടുത്തിയ 180 പരിപാടികളിലായി 22,488 പേർ പങ്കെടുത്തു. ലഹരി ഉപയോഗം ഉയർത്തുന്ന വെല്ലുവിളികളെക്കുറിച്ച് മനസ്സിലാക്കാനും അവയ്ക്കെതിരെയുള്ള പ്രതിരോധ മാർഗ്ഗങ്ങൾ ചർച്ച ചെയ്യാനും യുവാക്കൾക്ക് ഈ സംവാദങ്ങൾ അവസരമൊരുക്കി.
ഓരോ യൂത്ത് പാർലമെന്റിലും നാല് ഘട്ടങ്ങളിലായാണ് ചർച്ചകൾ നടന്നത്. 'മൈ ഭാരത്' പോർട്ടലിന്റെ പ്രവർത്തനം, ലഹരി ഉപയോഗവും ഇന്ത്യൻ യുവാക്കൾ നേരിടുന്ന വെല്ലുവിളികളും, ലഹരിവിരുദ്ധ ബോധവൽക്കരണത്തെ പ്രയോഗവൽക്കരിക്കാനുള്ള മാർഗ്ഗങ്ങൾ, ലഹരിമുക്ത ഭാരതത്തിനായുള്ള മാറ്റത്തിന്റെ പ്രചോദനാത്മക കഥകൾ എന്നിവയായിരുന്നു പ്രധാന വിഷയങ്ങൾ. ഈ ആഴ്ചയിലെ പ്രവർത്തനങ്ങളുടെ ഭാഗമായി പരിപാടിയിൽ പങ്കെടുത്ത 93,054 പേരും ലഹരിവിരുദ്ധ പ്രതിജ്ഞയും എടുത്തു.