નશા મુક્ત યુવા અભિયાનના 7મા સપ્તાહ દરમિયાન માય ભારતે 30 રાજ્યો/કેન્દ્રશાસિત પ્રદેશોમાં 93,000થી વધુ સહભાગીઓને સાંકળ્યા

યુવા બાબતો અને રમતગમત મંત્રાલય હેઠળના મેરા યુવા ભારત (માય ભારત)ના કામચલાઉ અહેવાલ મુજબ, ‘વિકસિત ભારત માટે નશા મુક્ત યુવા’ અભિયાનના 7મા સપ્તાહ દરમિયાન 30 રાજ્યો અને કેન્દ્રશાસિત પ્રદેશોમાં યોજાયેલા 447 કાર્યક્રમો અને 1,002 પ્રવૃત્તિઓમાં 93,000 થી વધુ સહભાગીઓએ ભાગ લીધો હતો. 31.10.2026 ના રોજ પૂર્ણ થયેલી આ પ્રવૃત્તિઓમાં તંદુરસ્ત જીવનશૈલીને પ્રોત્સાહન આપવા, નશાખોરી વિશે જાગૃતિ લાવવા અને યુવાનોને વ્યસન સામે એકત્રિત કરવા પર ધ્યાન કેન્દ્રિત કરવામાં આવ્યું હતું.

આ અભિયાનમાં દિલ્હી, બિહાર, હિમાચલ પ્રદેશ, ગુજરાત, હરિયાણા, છત્તીસગઢ, ઓડિશા, રાજસ્થાન અને ઉત્તર પ્રદેશ સહિત અન્ય કેટલાક પ્રદેશોને આવરી લેવામાં આવ્યા હતા. પ્રવૃત્તિઓમાં મીની મેરેથોન, શપથ વિધિ, મોક યુથ પાર્લામેન્ટ્સ અને સ્લોગન-લેખનનો સમાવેશ થાય છે. બે રાજ્ય મંત્રીઓ અને ત્રણ ધારાસભ્યો સહિત પાંચ લોક પ્રતિનિધિઓએ આ કાર્યક્રમોમાં હાજરી આપી હતી.

અભિયાનના ભાગરૂપે, માય ભારતે ફિટ ઇન્ડિયા, સ્પોર્ટ્સ ઓથોરિટી ઓફ ઇન્ડિયા (SAI) અને ભાગીદાર સંસ્થાઓના સહયોગથી 70,566 સહભાગીઓ સાથે 401 પ્રવૃત્તિઓ ધરાવતા 267 મીની મેરેથોન કાર્યક્રમોનું આયોજન કર્યું હતું. ભાગીદાર સંસ્થાઓમાં બ્રહ્મા કુમારીઝ, હાર્ટફુલનેસ, સીઆઈપીયુ, એસોચેમ (ASSOCHAM) અને ફિક્કી (FICCI) નો સમાવેશ થાય છે. દિલ્હીમાં, માય ભારત દક્ષિણ દિલ્હી અને નવી દિલ્હી દ્વારા આયોજિત મીની મેરેથોન દરમિયાન દિલ્હી સરકારના કેબિનેટ મંત્રી શ્રી રવિન્દર ઇન્દ્રજ સિંહે યુવાનોને પ્રોત્સાહિત કર્યા હતા. બિહારના ગોપાલગંજમાં, જિલ્લા મેજિસ્ટ્રેટની ઉપસ્થિતિમાં સહભાગીઓએ શપથ લીધા અને દોડમાં ભાગ લીધો હતો.

પાયાના સ્તરે, નેબરહુડ યુથ પાર્લામેન્ટ્સ (NYPs) એ 31.10.2026 ના રોજ ‘વિકસિત ભારત માટે નશા મુક્ત યુવા પર પરિચર્ચા’ નું આયોજન કર્યું હતું. 22,488 સહભાગીઓ સાથે 601 પ્રવૃત્તિઓ ધરાવતા કુલ 180 કાર્યક્રમો યોજવામાં આવ્યા હતા. આ ચર્ચાઓએ યુવાનોને નશાખોરીથી ઉદ્ભવતા પડકારોને સમજવા અને સંભવિત પ્રતિભાવો અંગે ચર્ચા કરવાની તક પૂરી પાડી હતી.

દરેક નેબરહુડ યુથ પાર્લામેન્ટમાં માય ભારત પોર્ટલ, નશાખોરી અને ભારતના યુવાનો સામેના પડકારો, જાગૃતિથી ક્રિયા તરફ આગળ વધવાના સાધનો અને નશા મુક્ત ભારત તરફ પરિવર્તનની વાર્તાઓને આવરી લેતા ચાર સત્રોનો સમાવેશ થતો હતો. સપ્તાહની પ્રવૃત્તિઓ દરમિયાન તેટલી જ સંખ્યામાં – 93,054 – શપથ પણ લેવામાં આવ્યા હતા.

SM/IJ/JD