পোষ্ট কৰা হৈছে:
02 NOV 2026 11:53AM by PIB Guwahati
প্ৰতিৰক্ষা মন্ত্ৰালয়ে ভাৰতীয় নৌবাহিনীৰ বাবে ৮টা পৰৱৰ্তী প্ৰজন্মৰ কৰভেট (এন জি চি) অধিগ্ৰহণৰ বাবে গাৰ্ডেন ৰিচ শ্বিপবিল্ডাৰ্ছ এণ্ড ইঞ্জিনিয়াৰ্ছ লিমিটেড (জি আৰ এছ ই) আৰু গোৱা শ্বিপয়াৰ্ড লিমিটেড (জি এছ এল)ৰ সৈতে ৫৩,৮৬৬.৫০ কোটি টকাৰ চুক্তিত স্বাক্ষৰ কৰিছে। ২০২৬ চনৰ ২ নৱেম্বৰত নতুন দিল্লীৰ কৰ্তব্য ভৱন-২ত প্ৰতিৰক্ষা সচিব শ্ৰী ৰাজেশ কুমাৰ সিঙৰ উপস্থিতিত এই চুক্তিসমূহ স্বাক্ষৰিত হয়।
এই চুক্তিৰ অধীনত জি আৰ এছ ইয়ে পাঁচটা আৰু জি এছ এলে বাকী তিনিটা কৰভেট নিৰ্মাণ কৰিব।এই প্ৰকল্পটো ভাৰতৰ থলুৱা যুদ্ধ জাহাজৰ আৰ্হি আৰু নিৰ্মাণ দক্ষতাত গুৰুত্বপূৰ্ণ মাইলৰ খুঁটি হিচাপে চিহ্নিত হ'ব। কিয়নো ই হৈছে এইধৰণৰ প্ৰথম প্ৰকল্প য'ত জাহাজবোৰ ভাৰতীয় নৌসেনাই থলুৱাভাৱে ডিজাইন কৰিব আৰু প্ৰতিযোগিতামূলক প্ৰক্ৰিয়াৰ জৰিয়তে নিৰ্বাচিত প্ৰতিৰক্ষা ৰাজহুৱা খণ্ডৰ উদ্যোগ (ডি পি এছ ইউ)-ৰ দ্বাৰা নিৰ্মাণ কৰা হ'ব।
এন জি চিসমূহ উন্নত ক্ষেপণাস্ত্র, অস্ত্ৰ-শস্ত্ৰ আৰু ছেন্সৰ সঁজুলিকে ধৰি অত্যাধুনিক ব্যৱস্থাৰে সজ্জিত হ'ব। ইয়াৰ ফলত সৈন্যবাহিনীয়ে বায়ু, ভূমি আৰু উপভূমি ক্ষেত্ৰত অভিযান চলাবলৈ সক্ষম হ'ব। এই জাহাজসমূহৰ অন্তৰ্ভুক্তিয়ে সামুদ্ৰিক বাণিজ্য পথ সুৰক্ষিত কৰা, ভূপৃষ্ঠ-বিৰোধী আৰু ছাবমেৰিনবিৰোধী যুদ্ধ অভিযান চলোৱা, উপকূলীয় প্ৰতিৰক্ষা শক্তিশালী কৰা, উপকূলীয় যুদ্ধ অভিযান চলোৱা তথা সামুদ্ৰিক উপস্থিতি আৰু নিৰীক্ষণ অভিযান চলোৱাৰ ক্ষেত্ৰত ভাৰতীয় নৌবাহিনীৰ কাৰ্যকৰী সামৰ্থ্য যথেষ্ট বৃদ্ধি কৰিব।
এন জি চি প্ৰকল্পটোৱে ডিপিএছইউ, ব্যক্তিগত শ্বিপয়াৰ্ড আৰু এমএছএমইকে ধৰি ভাৰতীয় ঔদ্যোগিক অংশীদাৰসকলৰ মাজত সহযোগিতা শক্তিশালী কৰি ভাৰতৰ থলুৱা জাহাজ নিৰ্মাণ পৰিৱেশ ব্যৱস্থাক গুৰুত্বপূৰ্ণ গতি প্ৰদান কৰিব। এই জাহাজসমূহৰ নিৰ্মাণ কাৰ্যই অহা ১০ বছৰত শ্বিপয়াৰ্ডসমূহত প্ৰায় ৭২লাখ কৰ্মদিন আৰু আনুষংগিক উদ্যোগ আৰু এম এছ এম ইসমূহত ৪৬০ লাখ কৰ্মদিনৰ সৃষ্টি কৰিব বুলি আশা কৰা হৈছে।
'মেড-ইন-ইণ্ডিয়া' সামগ্ৰী আৰু সঁজুলি, থলুৱা প্ৰযুক্তি, আৰু ভাৰতীয় দক্ষতা আৰু দক্ষতাৰ ব্যৱহাৰৰ জৰিয়তে এই প্ৰকল্পটোৱে প্ৰতিৰক্ষা উৎপাদনত আত্মনিৰ্ভৰতা অৰ্জন কৰাৰ দিশত গুৰুত্বপূৰ্ণ পদক্ষেপ হ'ব আৰু ই প্ৰধানমন্ত্ৰী শ্ৰী নৰেন্দ্ৰ মোদী নেতৃত্বাধীন চৰকাৰৰ মেক-ইন-ইণ্ডিয়াৰ প্ৰতিশ্ৰুতিক শক্তিশালী কৰিব।
SR/Savvy/PK