پوسٹ کرنے کی تاریخ:
31 OCT 2026 7:59PM by PIB Delhi
میرا یوا بھارت(مائی بھارت)کی جانب سے نوجوانوں کے امور کے محکمے، نوجوانوں کے امور اور کھیل کود کی وزارت کے تحت 31 اکتوبر 2026 کو 16 ریاستوں اور مرکز کے زیر انتظام علاقوں میں ’وکست بھارت یوا سمواد: اپنے ووٹ کو جانیں‘ کے 62 پروگرام منعقد کیے گئے، جن میں 11 ہزار سے زائد نوجوانوں نے شرکت کی۔ ملک گیر مہم کے تحت یہ پروگرام 62 کالجوں اور تعلیمی اداروں میں منعقد کیے گئے۔ یہ مہم 26 اکتوبر 2026 سے 5 نومبر 2026 تک جاری ہے، جس کا مقصد ملک بھر کی 500 یونیورسٹیوں، کالجوں اور تعلیمی اداروں تک پہنچنا ہے۔
اس اقدام کا مقصد نوجوانوں، بالخصوص پہلی مرتبہ ووٹ ڈالنے والے نوجوانوں میں انتخابی بیداری کو فروغ دینا اور جمہوری عمل میں ان کی باخبر شرکت کی حوصلہ افزائی کرنا ہے۔ اس کے ذریعے نوجوانوں کو حق رائے دہی، انتخابی طریقۂ کار اور شہری ذمہ داریوں سے روشناس کرایا جا رہا ہے۔ ساتھ ہی انہیں جمہوری عمل میں شرکت اور ملک کی تعمیر میں اپنے کردار سے متعلق منتخب نمائندوں، نوجوان رول ماڈلز اور دیگر ممتاز شخصیات کے ساتھ تبادلۂ خیال کے مواقع بھی فراہم کیے جا رہے ہیں۔
اس مہم کا دائرۂ کار وسیع جغرافیائی خطوں تک پھیلا ہوا ہے۔ شمالی خطے میں ہریانہ، ہماچل پردیش، جموں و کشمیر، پنجاب، اتراکھنڈ اور اتر پردیش میں پروگرام منعقد کیے گئے۔ اسی طرح شمال مشرقی خطے میں اروناچل پردیش اور آسام، مشرقی خطے میں بہار، جھارکھنڈ اور اڈیشہ، وسطی ہندوستان میں مدھیہ پردیش، مغربی خطے میں مہاراشٹر اور راجستھان، جبکہ جنوبی خطے میں تمل ناڈو اور تلنگانہ میں بھی یہ پروگرام منعقد ہوئے۔
پروگراموں کے تازہ ترین مرحلے کے ساتھ، اب تک 28 ریاستوں اور مرکز کے زیر انتظام علاقوں میں مجموعی طور پر 158 یوا سمواد منعقد کیے جا چکے ہیں، جن کے ذریعے تقریباً 32 ہزار نوجوانوں اور 158 نوجوان رول ماڈلز کو اس مہم سے جوڑا گیا ہے۔
راجستھان کے جے پور میں راجیہ سبھا کے رکن پارلیمنٹ جناب گھنشیام تیواری اور جے پور شہر کی رکن پارلیمنٹ محترمہ منجو شرما نے پروگرام میں شرکت کی اور جمہوری عمل میں شرکت اور ووٹ ڈالنے کی اہمیت کے حوالے سے طلبہ کے ساتھ تبادلۂ خیال کیا۔ یوتھ آئیکن محترمہ دیوانشی شیخاوت نے ’اپنے ووٹ کو جانیں‘ کے موضوع پر ایک پریزنٹیشن پیش کی، جبکہ اسپورٹس آئیکن محترمہ بھومیکا شکلا نے شرکاء کے ساتھ اپنے تجربات شیئر کیے۔ اجمیر اور دھول پور میں منعقدہ پروگراموں میں بھی منتخب نمائندوں کے ساتھ تبادلۂ خیال، ووٹر بیداری سے متعلق سرگرمیوں اور جمہوری عہد کی تقریب کا اہتمام کیا گیا۔
آسام میں آبی وسائل کے وزیر جناب سوشانت بورگوہین نے شیو ساگر میں نوجوانوں کے ساتھ تبادلۂ خیال کیا اور ان کے سوالات کے جوابات دیے۔ پروگرام میں سوشل میڈیا کے ذمہ دارانہ استعمال سے متعلق ایک یوتھ آئیکن کے ساتھ تبادلۂ خیال بھی شامل تھا، جس میں نوجوانوں کو ترغیب دی گئی کہ وہ کسی بھی معلومات پر یقین کرنے یا اسے دوسروں کے ساتھ شیئر کرنے سے پہلے اس کی تصدیق کریں اور حقائق کی جانچ کریں۔ نارتھ لکھیم پور میں یوتھ آئیکنز نے شرکاء کے ساتھ بات چیت کی اور ووٹنگ اور شہری ذمہ داریوں سے متعلق ان کے سوالات کے جوابات دیے۔
پنجاب میں فیروزپور، کپور تھلہ، سنگرور، ایس اے ایس نگر اور سری مکتسر صاحب میں منعقدہ یوا سمواد پروگراموں میں طلبہ نے بھرپور شرکت کی اور یوتھ آئیکنز اور تعلیمی نمائندوں کے ساتھ تبادلۂ خیال کیا۔ فیروزپور میں تقریباً 250 نوجوانوں نے جمہوری عہد لیا، جبکہ یوتھ آئیکن محترمہ جانوی شرما نے شرکاء کے ساتھ بات چیت کی۔ کپور تھلہ میں یوتھ آئیکن جناب ستیہ پرکاش نے نوجوانوں کو ملک کی تعمیر میں اپنا کردار ادا کرنے کی ترغیب دی۔ اس موقع پر لولی پروفیشنل یونیورسٹی کے تعلیمی نمائندوں نے بھی شرکت کی۔ سنگرور میں طلبہ نے یوتھ آئیکن محترمہ فلک معصوم کی قیادت میں منعقدہ ایک تعاملی اجلاس میں حصہ لیا، جس میں باخبر اور ذمہ دارانہ طور پر ووٹ ڈالنے کی اہمیت پر تبادلۂ خیال کیا گیا۔ ان پروگراموں میں شہری ذمہ داریوں سے متعلق مباحثے اور جمہوری عہد کی تقریب کا اہتمام بھی کیا گیا۔
جموں و کشمیر میں ایم ایل اے جناب سنیل بھاردواج نے ادھم پور میں منعقدہ یوا سمواد پروگرام سے خطاب کیا اور ووٹ ڈالنے اور جمہوری عمل میں شرکت کی اہمیت کو اجاگر کیا۔ مدھیہ پردیش میں نرسنگھ پور، نیمچ اور رائسین میں منعقدہ پروگراموں میں یوتھ آئیکنز اور منتخب نمائندوں کے ساتھ تبادلۂ خیال، قیادت اور ملک کی تعمیر سے متعلق مباحثے اور جمہوری عہد کی تقریب کا اہتمام کیا گیا۔ نرسنگھ پور میں یوتھ آئیکن محترمہ مانسی شرما نے شرکاء کے ساتھ تبادلۂ خیال کیا اور جمہوری اقدار سے متعلق ان کے سوالات کے جوابات دیے۔
اتر پردیش میں بارہ بنکی، بلند شہر، چندولی، گورکھپور، جالون، جھانسی، قنوج، کشی نگر، مرزا پور اور پریاگ راج میں منعقدہ پروگراموں میں نوجوانوں کے ساتھ تبادلۂ خیال، پریزنٹیشنز، کوئز، مقابلوں اور شہری بیداری کو فروغ دینے والی سرگرمیوں کا اہتمام کیا گیا۔ بلند شہر میں طلبہ نے ایک منتخب عوامی نمائندے کے ساتھ تبادلۂ خیال کیا، جبکہ چندولی اور گورکھپور میں منعقدہ پروگراموں میں کھیلوں، سائیکلنگ کی اہمیت اور کھیلو انڈیا پہل سے متعلق مباحثے شامل تھے۔ دیگر سرگرمیوں میں نشہ مکت بھارت، وکست بھارت ینگ لیڈرز ڈائیلاگ سے متعلق اجلاس، تقریری اور نعرہ نویسی کے مقابلے اور نوجوانوں کے ساتھ تبادلۂ خیال کے پروگرام شامل تھے۔
بہار میں بانکا اور مظفر پور میں منعقدہ پروگراموں میں تعاملی مباحثے ہوئے، جن میں طلبہ نے سوالات اٹھائے اور اپنے خیالات کا اظہار کیا۔ شرکاء نے جمہوری عہد بھی لیا اور ذمہ دار شہری ہونے اور جمہوریت میں فعال شرکت کے اپنے عزم کا اعادہ کیا۔
ملک گیر مہم 5 نومبر 2026 تک جاری رہے گی، جس کے تحت یونیورسٹیوں، کالجوں اور تعلیمی اداروں میں مزید پروگرام منعقد کیے جائیں گے۔
***
(ش ح ۔ش ت۔ع ن)
U. No. 7075