পোষ্ট কৰা হৈছে:
31 OCT 2026 7:59PM by PIB Guwahati
যুৱ পৰিক্ৰমা আৰু ক্ৰীড়া মন্ত্ৰালয়ৰ যুৱ পৰিক্ৰমা বিভাগৰ অধীনস্থ মেৰা যুৱ ভাৰত ( এম ৱাই ভাৰত)-ৰ উদ্যোগত ৩১/১০/২০২৬ তাৰিখে ১৬খন ৰাজ্য আৰু কেন্দ্ৰীয় শাসিত অঞ্চলত আয়োজিত ‘বিকশিত ভাৰত যুৱ সংবাদ: নিজৰ ভোটাধিকাৰক জানক’ শীৰ্ষক ৬২টা কাৰ্যসূচীত ১১,০০০ৰো অধিক যুৱক-যুৱতীয়ে অংশগ্ৰহণ কৰে। দেশজুৰি চলি থকা এই অভিযানৰ অংশ হিচাপে ৬২খন মহাবিদ্যালয় আৰু শিক্ষানুষ্ঠানত কাৰ্যসূচীসমূহ অনুষ্ঠিত হয়। ২৬/১০/২০২৬ৰ পৰা ০৫/১১/২০২৬লৈ চলিবলগীয়া এই অভিযানৰ জৰিয়তে দেশৰ ৫০০খন বিশ্ববিদ্যালয়, মহাবিদ্যালয় আৰু শিক্ষানুষ্ঠানক সামৰি লোৱাৰ লক্ষ্য নিৰ্ধাৰণ কৰা হৈছে।
এই পদক্ষেপৰ মূল উদ্দেশ্য হৈছে যুৱ প্ৰজন্মৰ মাজত, বিশেষকৈ প্ৰথমবাৰৰ বাবে ভোটদান কৰিবলৈ ওলোৱা ভোটাৰসকলৰ মাজত নিৰ্বাচন সম্পৰ্কীয় সজাগতা বৃদ্ধি কৰা আৰু গণতান্ত্ৰিক প্ৰক্ৰিয়াত তেওঁলোকৰ জ্ঞানভিত্তিক অংশগ্ৰহণক উৎসাহিত কৰা। ইয়াৰ জৰিয়তে যুৱক-যুৱতীসকলক ভোটাধিকাৰ, নিৰ্বাচনী পদ্ধতি আৰু নাগৰিক হিচাপে তেওঁলোকৰ দায়িত্ব সম্পৰ্কে অৱগত কৰোৱাৰ লগতে গণতান্ত্ৰিক অংশগ্ৰহণ আৰু ৰাষ্ট্ৰ নিৰ্মাণৰ বিষয়ত নিৰ্বাচিত জনপ্ৰতিনিধি, যুৱ আইকন আৰু অন্যান্য বিশিষ্ট ব্যক্তিৰ সৈতে মত বিনিময়ৰ সুযোগ প্ৰদান কৰা হৈছে।
এই অভিযানৰ পৰিসৰ যথেষ্ট বিস্তৃত। উত্তৰ ভাৰতৰ হাৰিয়ানা, হিমাচল প্ৰদেশ, জম্মু আৰু কাশ্মীৰ, পঞ্জাব, উত্তৰাখণ্ড আৰু উত্তৰ প্ৰদেশত কাৰ্যসূচী অনুষ্ঠিত হোৱাৰ সমান্তৰালভাৱে উত্তৰ-পূৰ্বাঞ্চলৰ অৰুণাচল প্ৰদেশ আৰু অসম, পূব ভাৰতৰ বিহাৰ, ঝাৰখণ্ড আৰু ওড়িশা, মধ্য ভাৰতৰ মধ্য প্ৰদেশ, পশ্চিম ভাৰতৰ মহাৰাষ্ট্ৰ আৰু ৰাজস্থান তথা দক্ষিণ ভাৰতৰ তামিলনাডু আৰু তেলেংগানাতো এই কাৰ্যসূচী অনুষ্ঠিত হয়।
শেহতীয়া পৰ্যায়ৰ কাৰ্যসূচীসমূহৰ পাছত এই পৰ্যন্ত ২৮খন ৰাজ্য আৰু কেন্দ্ৰীয় শাসিত অঞ্চলত মুঠ ১৫৮টা ‘যুৱ সংবাদ’ কাৰ্যসূচী অনুষ্ঠিত হৈছে। ইয়াৰ জৰিয়তে প্ৰায় ৩২,০০০ গৰাকী যুৱক-যুৱতী আৰু ১৫৮ গৰাকী যুৱ আইকনক সামৰি লোৱা হৈছে।
ৰাজস্থানৰ জয়পুৰত অনুষ্ঠিত কাৰ্যসূচীত ৰাজ্যসভাৰ সাংসদ শ্ৰী ঘনশ্যাম তিৱাৰী আৰু জয়পুৰ চহৰৰ সাংসদ শ্ৰীমতী মঞ্জু শৰ্মাই অংশগ্ৰহণ কৰি গণতান্ত্ৰিক প্ৰক্ৰিয়াত অংশগ্ৰহণ আৰু ভোটদানৰ গুৰুত্ব সন্দৰ্ভত ছাত্ৰ-ছাত্ৰীসকলৰ সৈতে মত বিনিময় কৰে। যুৱ আইকন মিছ দিব্যাংশী শেখাৱাটে ‘নিজৰ ভোটাধিকাৰক জানক’ বিষয়ত এটা উপস্থাপন আগবঢ়োৱাৰ বিপৰীতে ক্ৰীড়া ক্ষেত্ৰৰ আইকন মিছ ভূমিকা শুক্লাই অংশগ্ৰহণকাৰীসকলৰ সৈতে নিজৰ অভিজ্ঞতা বিনিময় কৰে। আজমেৰ আৰু ধোলপুৰত অনুষ্ঠিত কাৰ্যসূচীতো নিৰ্বাচিত জনপ্ৰতিনিধিৰ সৈতে মত বিনিময়, ভোটাৰ সজাগতা কাৰ্যসূচী আৰু ‘গণতান্ত্ৰিক শপত গ্ৰহণ’ৰ ব্যৱস্থা কৰা হয়।
অসমত ৰাজ্য চৰকাৰৰ জলসম্পদ মন্ত্ৰী শ্ৰী সুশান্ত বৰগোহাঁয়ে শিৱসাগৰত যুৱক-যুৱতীসকলৰ সৈতে মত বিনিময় কৰাৰ লগতে তেওঁলোকৰ প্ৰশ্নৰ উত্তৰ দিয়ে। কাৰ্যসূচীত এজন যুৱ আইকনৰ সৈতে দায়িত্বশীলভাৱে সামাজিক মাধ্যম ব্যৱহাৰৰ বিষয়েও মত বিনিময় কৰা হয়। বিশ্বাস কৰা বা আনৰ সৈতে আদান-প্ৰদান কৰাৰ পূৰ্বে তথ্যৰ সত্যতা পৰীক্ষা কৰিবলৈ যুৱ প্ৰজন্মক উৎসাহিত কৰাই আছিল এই আলোচনাৰ উদ্দেশ্য। উত্তৰ লখিমপুৰত অনুষ্ঠিত কাৰ্যসূচীতো যুৱ আইকনসকলে অংশগ্ৰহণকাৰীসকলৰ সৈতে মত বিনিময় কৰি ভোটদান আৰু নাগৰিকৰ দায়িত্ব সম্পৰ্কীয় প্ৰশ্নৰ উত্তৰ দিয়ে।
পঞ্জাবৰ ফিৰোজপুৰ, কপুৰথলা, ছাংৰুৰ, এছ এ এছ নগৰ আৰু শ্ৰী মুক্তছৰ চাহিবত অনুষ্ঠিত ‘যুৱ সংবাদ’ কাৰ্যসূচীসমূহত ছাত্ৰ-ছাত্ৰীসকলে উৎসাহজনকভাৱে অংশগ্ৰহণ কৰে আৰু যুৱ আইকন তথা শিক্ষাবিদসকলৰ সৈতে মত বিনিময় কৰে। ফিৰোজপুৰত প্ৰায় ২৫০গৰাকী যুৱক-যুৱতীয়ে ‘গণতান্ত্ৰিক শপত’ গ্ৰহণ কৰে আৰু যুৱ আইকন মিছ জাহ্নৱী শৰ্মাই তেওঁলোকৰ সৈতে মত বিনিময় কৰে। কপুৰথলাত যুৱ আইকন শ্ৰী সত্যপ্ৰকাশে যুৱ প্ৰজন্মক ৰাষ্ট্ৰ নিৰ্মাণত অৰিহণা যোগোৱাৰ প্ৰতি উৎসাহিত কৰে। লাভলী প্ৰফেশছনেল ইউনিভাৰ্ছিটিৰ শিক্ষাবিদসকলেও এই কাৰ্যসূচীত অংশগ্ৰহণ কৰে। ছাংৰুৰত যুৱ আইকন মিছ ফালাক মাছুমৰ নেতৃত্বত অনুষ্ঠিত মত বিনিময়মূলক অধিৱেশনত ছাত্ৰ-ছাত্ৰীসকলে সচেতন আৰু দায়িত্বশীলভাৱে ভোটদানৰ বিষয়ত অংশগ্ৰহণ কৰে। এই কাৰ্যসূচীসমূহত নাগৰিকৰ দায়িত্ব আৰু ‘গণতান্ত্ৰিক শপত’ সম্পৰ্কেও আলোচনা কৰা হয়।
জম্মু আৰু কাশ্মীৰৰ উধমপুৰত অনুষ্ঠিত যুৱ সংবাদত বিধায়ক শ্ৰী সুনীল ভৰদ্বাজে অংশগ্ৰহণকাৰীসকলক সম্বোধন কৰি ভোটদান আৰু গণতান্ত্ৰিক প্ৰক্ৰিয়াত অংশগ্ৰহণৰ গুৰুত্বৰ বিষয়ে আলোকপাত কৰে। মধ্য প্ৰদেশৰ নৰসিংহপুৰ, নীমাচ আৰু ৰাইছেনত অনুষ্ঠিত কাৰ্যসূচীসমূহত যুৱ আইকন আৰু নিৰ্বাচিত জনপ্ৰতিনিধিৰ সৈতে মত বিনিময়, নেতৃত্ব আৰু ৰাষ্ট্ৰ নিৰ্মাণ সম্পৰ্কীয় আলোচনা তথা ‘গণতান্ত্ৰিক শপত’ গ্ৰহণৰ কাৰ্যসূচী অনুষ্ঠিত হয়। নৰসিংহপুৰত যুৱ আইকন মিছ মানসী শৰ্মাই অংশগ্ৰহণকাৰীসকলৰ সৈতে মত বিনিময় কৰি গণতান্ত্ৰিক মূল্যবোধ সম্পৰ্কীয় তেওঁলোকৰ প্ৰশ্নৰ উত্তৰ দিয়ে।
উত্তৰ প্ৰদেশৰ বাৰাবংকী, বুলন্দচহৰ, চান্দৌলী, গোৰখপুৰ, জালাউন, ঝান্সী, কনৌজ, কুশীনগৰ, মিৰ্জাপুৰ আৰু প্ৰয়াগৰাজত অনুষ্ঠিত কাৰ্যসূচীসমূহত যুৱক-যুৱতীসকলৰ সৈতে মত বিনিময়, উপস্থাপন, কুইজ, প্ৰতিযোগিতা আৰু নাগৰিক সজাগতা বৃদ্ধিৰ উদ্দেশ্যে বিভিন্ন কাৰ্যকলাপৰ আয়োজন কৰা হয়। বুলন্দচহৰত ছাত্ৰ-ছাত্ৰীসকলে এগৰাকী নিৰ্বাচিত জনপ্ৰতিনিধিৰ সৈতে মত বিনিময় কৰে। আনহাতে, চান্দৌলী আৰু গোৰখপুৰৰ কাৰ্যসূচীত ক্ৰীড়া, চাইকেল চলোৱাৰ গুৰুত্ব আৰু ‘খেলো ইণ্ডিয়া’ পদক্ষেপ সম্পৰ্কে আলোচনা কৰা হয়। অন্যান্য কাৰ্যসূচীৰ ভিতৰত আছিল ‘নিচামুক্ত ভাৰত’ আৰু ‘বিকশিত ভাৰত যুৱ নেতৃত্বৰ সংলাপ’ সম্পৰ্কীয় অধিৱেশন, বক্তৃতা আৰু শ্লোগান লিখা প্ৰতিযোগিতা তথা যুৱক-যুৱতীসকলৰ মাজত বিভিন্ন বিষয়ৰ আলোচনা।
বিহাৰৰ বাঁকা আৰু মুজাফ্ফৰপুৰত অনুষ্ঠিত কাৰ্যসূচীসমূহত ছাত্ৰ-ছাত্ৰীসকলে বিভিন্ন বিষয়ত প্ৰশ্ন উত্থাপন কৰাৰ লগতে নিজৰ নিজৰ মতামত প্ৰকাশ কৰি মত বিনিময়মূলক আলোচনাত অংশগ্ৰহণ কৰে। অংশগ্ৰহণকাৰীসকলে ‘গণতান্ত্ৰিক শপত’ গ্ৰহণ কৰি দায়িত্বশীল নাগৰিক হিচাপে নিজৰ কৰ্তব্য পালন আৰু গণতন্ত্ৰত সক্ৰিয় অংশগ্ৰহণৰ প্ৰতি অংগীকাৰবদ্ধ হয়।
দেশজোৰা এই অভিযান অহা ০৫/১১/২০২৬লৈ অব্যাহত থাকিব। এই সময়ছোৱাত দেশৰ বিভিন্ন বিশ্ববিদ্যালয়, মহাবিদ্যালয় আৰু শিক্ষানুষ্ঠানত পৰৱৰ্তী কাৰ্যসূচীসমূহ অনুষ্ঠিত কৰা হ’ব।
Gaurav Saini/UD