Ha ka:
01 NOV 2026 3:09PM by PIB Shillong
Ka Employees’ Provident Fund Organisation (EPFO) mynta ka sngi ka 1 tarik u Naiwieng 2026 ka la rakhe ïa ka sngi seng ne ka Foundation Day kaba 74 jong ka ha ka jingïalang kaba la pynlong ha Dr. Ambedkar International Centre, New Delhi. Kane ka jingrakhe ka pynkynmaw ïa ka jingïaid lynti jong ka kynhun, naduh ba ka long ka tnat ba pura kaba la seng katkum ka aiñ ban pynïaid ïa ka pisa Provident Fund (PF), haduh ka khyllipmat ba ka la kylla long kawei na ki seng/ophis treikam kaba kongsan tam jong ka Ri India ha ka liang ka jingshngaiñ hapoh ka imlang sahlang. Ka EPFO ka la pynpaw biang ïa ki jingkular jong ka ban pynkhlaiñ ïa ki lad jingshakri lyngba ka juk stad teknoloji, kaba don ïa ka bor synshar bad jingsngewlem bad ka jingpynbiang ïa ki jingdonkam jong ki klur ngut ki nongtrei bad ki nongïoh ïa ka bai bam tymmen (pension).
Ïa kane ka jingrakhe la pynïaid da u Myntri ka sorkar pdeng U Dr. Mansukh Mandaviya, ba dei khmih ïa ka tnad Labour and Employment, ka Sports and Youth Affairs, uba long ruh hakajuh ka por u Shongknor (Chairman) jong ka Central Board of Trustees (EPF). Ha kane ka jingïalang la donlang ruh u Chandra Bhushan Kumar, Secretary jong ka Ministry of Labour and Employment, u Ramesh Krishnamurthi, Central Provident Fund Commissioner, ki dkhot jong ka Central Board of Trustees, ki nongtrei, ki nongai kam bad kiwei kiwei pat ki nongïashim bynta.
Haba ai jingkren, na ka liang U Myntri ka sorkar pdeng, u Dr. Mansukh Mandaviya, u la pynpaw ba ha kine ki 74 tylli ki snem jong ka jingïaid lynti, ka EPFO ka la kylla long ka kynhun treikam kaba ki nongtrei ha ka Ri baroh ki shaniah. U la kdew ruh da kaba ong ba ka jingkyrmen bad jingshaniah jong ki briew ïa kane ka kynhun treikam ka paw lyngba ka pisa kaba la lum lang haduh T. 32 lak klur, kaba la mih lyngba ka jingnoh synñiang jong palat 8 klur ngut ki dkhot bad kane ka lah ban long dei namar ka jingaiti lut, ka jingtrei shitom bad ka jingkitkhlieh jong ki nongtrei ka EPFO.
Haba ban jur pat ha kaba ïadei bad ka jingshngaiñ ha ka imlang sahlang, U Myntri sorkar ula ong ba ka dei ban ïaid ryngkat bad ka jingsngewlem ïa ki briew bad u Dr. Mandaviya u la ong ruh ba dei ban shimkhia ïa kawei pa kawei ka jingeh bad ki jingujor jong ki nongtrei da ka jingsngewlem bad jingsngewthuh ïa ki jingeh jong ki. Dei ban burom ïa uwei pa uwei u nongtrei bad ai ruh ïa ka burom ka jingïaroh bad ka kyrdan kaba ki dei ban ïoh kum ki nongtei ïa ka Ri. Haba ai jingïaroh ïa ka jingtrei shitom kaba khlem sangeh ban pynkylla ïa ka juk stad teknoloji, kum ka CITES 2.01, U kongsan ha kane ka sngi u la kyntu ïa baroh ki ophisar ba kin buh hakhmat eh ïa ka jingmyntoi jong ki nongtrei, khamtam ïa kito kiba don ha ki khep ban shongthait noh. U la kyntu ruh ïa ki ophisar ba kin shim ïa ka jingïoh mynsiem na ki ‘Panch Pran’ kiba la pynbna da u Myntri Rangbahduh ka Ri U Narendra Modi kaba ong “Ka jingshakri ka dei ka rukom im jong ngi,” la bynrap U Dr. Mandaviya, bad ha kajuh ka por u la kyntu ruh ïa baroh ban ïanoh synñiang bad ban pynurlong ïa ka thong jong ka Viksit Bharat.
U Myntri sorkar u la kyntu ruh ïa ki ophisar ba kin pynleit jingmut ha kaba ïadei bad ki jingpynkylla thymmai kiba dei ban buh hakhmat eh ïa ki nongtrei ha baroh ki bynta jong ka kam, katba ka EPFO ka dang pynkhreh ban rakhe ïa ka snem kaba 75 jong ka. U la pynkynmaw ruh ba ki ophisar ki dei ban ïahap bad pynthymmai ïalade bad ki jingkylla jong ka por, ban pynkhlaiñ ïa ka bor ha kaban ïakhun ïa ki jingeh bad ruh ban pynbha ïa ki rukom treikam. U Dr. Mandaviya u phah ruh ïa u kyrwoh ka jingkhublei Diwali bad u kitbok kitrwiang ïa baroh ki ophisar, ki dkhot bad ki nongïoh myntoi na ka EPFO ba kin long ka jingshai bad ïoh ïa ka jingjop lem bad ka jingnangroi.
Na ka liang U Secretary jong ka Ministry of Labour and Employment, u Dr. Chandra Bhushan Kumar, haba ai jingkren u la ong ba ha ki palat hynñiew phew (70) snem jong ka jingshakri ïa ka Ri, ka EPFO ka la buh ïa ka nongrim bad pynkhlaiñ ïa ka rukom treikam jong ka India ha ka liang ka jingshngaiñ hapoh ka imlang sahlang ha ka liang ka pisa kaba long ruh ka nuksa kaba ki pateng ban wan ki lah ban bud. U la ban jur da kaba ong ba ki jingïada ha ka imlang ka sahlang bad ki jingpynkylla ha ka kam ba trei kam dei ban ktah tang ïa ki nongtrei ha ki bynta ba la dep pynbeit, hynrei ka dei ban poi ruh sha ki nongtrei jong ki bynta kibym pat pynbeit ruh, khamtam sha kito kiba la don ha ki khep ban shongthait noh. U la kdew shuh shuh da kaba ong ba ka EPFO ka pyni ïa ka nuksa kumno ban pynurlong ïa kane lyngba ki rukom treikam kiba la buh da ka kynhun ne ka ophis. U Dr. Chandra ula bynrap shuh shuh da kaba ong ba kane ka sngi ka ai lad ïangi ban pyrkhat biang sa shisien ïa ka lynti kaba la dep ban ïaid bad ïa ka lynti kaban sa ïaid, da kaba ong ba ka jingpynkylla ka dei ka bynta kaba pyni ïa ka jingïaid beit bad kaba donkam ïa ka jingpynbha man ka por, khamtam ha kum kane ka juk digital ba mynta, khnang ban lah ban weng ïa ki jingeh jong u paidbah. Ula kyntu ruh ïa ki ophisar kiba ïadon bynta ha kine ki jingpynkylla ban pynïahap ïa ka rukom pyrkhat bad ka jingsngewthuh jong ki bad katkum ki jingkylla jong ka por, da kaba buh hakhmat eh ïa ka jinglah ban ïoh bad ai jingshakri bad ruh ban pynsuk ïa ka jingim jong kiba ïoh myntoi namar kane ka long shi bynta jong ka jingïatreilang ban poi sha ka thong jong ka Viksit Bharat @2047.
Na ka liang U Central Provident Fund Commissioner haba ai jingkren u la phai dien sha ka jingïaid lynti jong ka EPFO ha kine ki 74 tylli ki snem, naduh ka jingthmu haba la seng ïa ka ha u snem 1952 haduh ka bynta kaba kongsan mynta kaba long kum ka kynhun jingshngaiñ ïa ka imlang sahlang jong ka Ri baroh kawei. Mynta, kane ka kynhun treikam ka shakri ïa kumba 8 klur ngut ki dkhot kiba la noh synñiang bad 85 lak ngut ki nongïoh bai ban tymmen (pension), katba ka dang shim ïa jingkitkhlieh ban sumar bad buh bha ïa ka pisa kaba la lum na ka bynta ka jingim hadien ba la shongthait, kaba la jan kot sha ka T. 32 lak klur. U la ai ruh ka jingïaroh ïa ka jingnoh synñiang jong ki ophisar bad ki nongtrei jong ka EPFO ha kylleng ki bynta jong ka Ri, kiba la pynneh ïa ka rukom ai jingshakri wat hapdeng ki jingkylla kiba khraw ha ka juk stad teknoloji bad ruh ka rukom pynïaid kam. Ula ban jur ruh halor ka jingdonkam ban pynlong ïa ka EPFO kum ka bynta kaba suk ban ïoh ïa ki jingshakri, kaba lah ban shaniah bad kaba don ka jingsngewlem bad ong ruh ba ka jingshaniah jong ki paidbah ïa ka kynhun ka shong lyngba ka jingpynbeit ïa ki jingpan pisa, man ka bai bam tymmen kaba la sam bad ruh man ka longïing kaba ïoh jingïarap ha ki por ba mad jingeh. Ula pynkynmaw biang ba ka jingjop kaba shisha jong ka EPFO ka dei ban thew lyngba ka rukom jong ka jingshaniah bad jingshngaiñ kaba ki dkhot bad ki nongïoh pension ki ïoh.
La pyni ruh ïa ki jingktah jong ka jingpynkylla katkum ka juk stad teknoloji jong ka EPFO lyngba ka CITES 2.01. Ha kane ka sngi la pynpaw ruh ïa ka jingbha kaba khraw kaba dei ha ka rukom pynbeit ïa ka bhah pisa ba dei ban ïoh, ha kaba ka jingshimpor ban pynbeit ïa ki jingpan/jingsei pisa ka la hiar sha ka 2.57 sngi ha u bnai Risaw 2026. Kane ka pyni ïa ki jingpyrshang jong ka kynhun ban kham pynkloi ban pynïoh ïa ka pisa Provident Fund (PF) bad kaba kham suk ruh ïa ki dkhot.
Ki sienjam kiba kongsan bad ki jingmyntoi jong ki na ka bynta ki dkhot EPF bad ki nongai kam
1. Ki lad jingshakri jong ka EPFO lyngba ka WhatsApp
Ki dkhot jong ka EPF kin lah ban peit ïa ka pisa kaba don ha ka PF jong ki, ïa ki san tylli ki jingpynrung/jingthep pisa kiba dang shen bad ïa ki jingtip ha ka passbook lyngba ka WhatsApp Service ba la pynshisha jong ka EPFO. Kin lah ruh ban ïoh ïa ki jingbthah bad jingïarap katkum ki jingdonkam jong ki, ban pyndep ïa ki kam kiba ïadei bad ka PMVBRY. Kane kan kham pynsuk ïa ki jingshakri kiba man ka sngi kiba lah ban ïoh lyngba ka rynsan ha ki mobile kaba ki paidbah ki ju pyndonkam, bad kan pynduna ruh ïa ka jingdonkam ban leit sha ki ophis jong ka EPFO.
2. Ka jingplie paidbah ïa ka rukom pynbeit hi ïa ki account jong ka EPF kiba la sangeh treikam bad kiba biang ban ïoh jingmyntoi
Ki dkhot kiba don ïa ki account EPF kiba la sangeh treikam, kiba pynshisha ïa u Aadhaar bad kiba don ïa ka pisa kaba haduh shi hajar tyngka (T. 1,000) kin ym donkam shuh ban hap leh ïa ki rukom jong ka jingpan pisa ba marwei marwei. Ka EPFO kan sdang ïa ka rukom ban pynbeit ïa kine ki account hadien ba la pynshisha ïa ka jingithuh jong ki briew bad ïa ki bank account katkum ki kyndon ba la buh bad kane kan pynsuk ruh ïa ka rukom phah pisa sha kiba dei hok ban ïoh. La khmih lynti ba kumba 1 lak tylli ki account, kiba don ïa ka pisa kaba kot haduh T. 5 klur, kin ïoh jingmyntoi na kane ka sienjam.
Ki kot bad ki jingthoh kiba la pynmih lem bad ka jingithuh ïa ka jingtrei ba bha
Ha kane ka sngi la pynmih ruh haduh hynñiew tylli ki kot bad ki jingthoh, kiba pyni ïa ka jingaiti jong ka EPFO ban pynmih ïa ki jingtip kiban pynkhlaiñ ïa ka jinghikai na ki jait jingtrei/kam ba la dep, ban pynsngewthuh katkum ki aiñ bad ruh ban pynïaid ïa ka jingsynshar da ka jingsngewlem:
1. Ka EPFO State Profile 2026: Ka pyni ïa ka jingdon jong ka EPFO ha ki jylla bapher-bapher, ka jingheh jong ka jingtrei kam, ka jingbun jong ki dkhot, ki jaka treikam, ki jingpan pisa bad ki nongïoh ïa ka baibam tymmen (pension) ha man la ki jylla.
2. Compendium of Judgements 2026 (Ka Jinglum Lang ïa Ki Rai jong Ki Ïingbishar 2026): Ka lum lang ïa ki rai kiba kongsan jong ki ïingbishar kiba ïadei bad ki aiñ jong ka jingshngaiñ ka imlang sahlang, khnang ban ïarap ïa ki briew kiba shim rai ban tip bad sngewthuh ïa ki rai kiba ïahap bad ka kam bad ruh bad kiwei pat.
3. Kendra Nidhi – Hindi Magazine 2026–27 (Ka Kendra Nidhi – Ka Makazin ha ka Ktien Hindi jong u snem 2026–27): Ka pyni ïa ki jingnoh synñiang ha ka thoh ka tar bad ki sap thaw jingmut jong ki ophisar bad ki nongtrei jong ka EPFO, bad ka pynshlur ïa ka rukom pyndonkam ïa ka ktien Hindi.
4. Beyond the Desk, Beyond the Ordinary (Palat ïa ki kam ophis, Palat ïa ka Jinglong ba tbit): Ka rakhe bad lehkmen ïa ka jingdon jong ki sap bapher bapher bad ki jingjjop jong ki nongtrei ka EPFO kaba long palat ïa ki kam kiba ki trei ha ki ophis.
5. Reimagining Governance: Discourse for Excellence (RGDE): Ka pynlang bad lum ïa ki jingmut na ki jingïakren kiba la sdang da ka PDUNASS shaphang ka jinglong nongïalam kaba don ïa ki jinglong babha, ka rukom synshar kaba don ka jingsngewlem bad ka jingpynkylla ïa ki kynhun treikam.
6. Shasan Vidhi Mein Karuna (Compassion in Governance – Ka Jingsngewlem ha ka Rukom Synnshar): Ka pyni ïa ki 83 tylli ki jingjia kiba la jia shisha na ki 62 tylli ki Regional Office, kiba pyni ïa ka jingsngewlem bad ki rukom treikam thymmai na ka bynta ban weng ïa ki jingeh bad ki jingujor jong ki dkhot.
7. The Indian Journal of Social Security – Volume 1, 2026 (Ka Jingthoh ba bniah jong ka India halor ka jingshngaiñ ka imlang sahlang – Ka bynta kaba 1, 2026): Ka don ïa ki jingthoh wad bniah na ki ophisar jong ka EPFO, kiba ïadei bad ki mat ba mynta shaphang ka jingshngaiñ jong ka imlang sahlang, ki ïew jong ki nongtrei, ka jingkylla katkum ka juk digital mynta bad ka rukom pynïaid ïa ka bai bam tymmen (pension).
Ha kane ka sngi la sam ruh ïa ki khusnam kiba la tip kum ka Bhavishya Nidhi Awards 2026 kum shi bynta ban ithuh bad ai jingïaroh ïa ka jingnoh synñiang kaba kyrpang jong ki Regional Office, Zonal Office, ki ophisar bad ki nongtrei. Kine ki khusnam ki kynthup ïa ka jingtrei kaba bha ha ki kam jong ki ophis la ka long ha ki thaiñ bad ki distrik, ka jingpynbeit ïa ki jingujor, ki lad jingshakri ha ka liang ka penshon, ka jingpynbeit ïa ki jingpan pisa jong kiba la khlad bad ka PRAYAAS, ka jingpyntreikam ïa ka PMVBRY, ki jingpynkylla thymmai katkum ka juk stad teknoloji, ka jingai jinghikai, ka jingpynbna paidbah, ka jingkhuid jingsuba, ki jaka treikam kiba la shah pyllait na ki kyndon jong ka EPFO bad ki jingïalehkai sport. Kine ki khusnam ki ithuh ïa ka jingaiti, ki jingpyrshang bathymmai bad ka jingkitkhlieh jong ki nongtrei ka EPFO ban pynkhlaiñ shuh shuh ïa ki lad jingshakri bad ka rukom trei ba paka jong ka kynhun.
Kumta ka jingrakhe ïa ka sngi seng kaba 74 snem jong ka EPFO ka la pynskhem biang ïa ka jingthmu ban ïasam lang ïa ki jingmut jong ki nongïalam: kaba mut ba ka jingkylla jong ka EPFO ka dei ban wanrah ïa ka jingshngaiñ, ka burom bad ka jingshaniah kaba kham khraw na ka bynta uwei pa uwei u nongtrei bad u nongïoh penshon. Katba ka kynhun treikam ka dang ïaid shakhmat, ka thong jong ka hi ka long ban pynïasoh ïa ka jingkiew ha ka liang ka teknoloji bad ka jingsngewlem ïa ki briew, ban pynbha shuh shuh ïa ka rukom ai jingshakri kaba lah ban shaniah, ka jingshngaiñ imlang sahlang, bad ban pynïasoh ïa ka rukom trei kaba kham paka bad ka jingsynshar kaba don ka jingsngewlem.
Ka jingïaid lynti jong ka EPFO kam dei tang ka jingïathuhkhana shaphang ka jingroi jong ka kynhun treikam; hynrei ka dei ka jingkular kaba ïai bteng ban pynthikna ba ka jingmyntoi kaba mih na ki snem kiba u/ka nongtrei ki la trei shitom kan wanrah ïa ka jingshngaiñ, ka burom bad ka jingsuk mynsiem ïa u/ka nongtrei bad ka longïing jong ki.
*****