সরদার বল্লভভাই পতেলগী ১৫১ শুবা মপোক নুমিত্ত পাংথোকপা রাষ্ট্রিয়া এক্ত দিবসতা প্রধান মন্ত্রী শ্রী নরেন্দ্র মোদী শরুক য়াখ্রে

ঙসি প্রধান মন্ত্রী শ্রী নরেন্দ্র মোদীনা গুজরাতকী এক্ত নগরদা সরদার বল্লভভাই পতেলগী ১৫১ শুবা মপোক নুমিত্ত পাংথোকপা রাষ্ট্রিয়া এক্ত দিবস থৌরম শরুক য়াখ্রে। মীয়ামদা ৱা ঙাংবদা, মহৌশাদগী হৌনা অয়ুক্ত পাংথোকপা থৌরম অসি নুমিদাংৱাইরমদা পাংথোকপা হৌরকপা অদু প্রধান মন্ত্রীনা পনখি, হৌখিবা নুমিদাংৱাইরম ভারত পর্ব পেভিলিয়ন্দা উৎখিবা চিংলেম্লবা থৌরম অমসুং অয়ুক্কী রন ফোর য়ুনিতিদা অপুনবগী শক্তম ঙাক্নবা মীওই লাখ কয়া শরুক য়াবা থোক্লকখিবা অদু নিংশিংখি। 

মালেমদা খ্বাইদগী ৱাংবা মীতম, ষ্টেচু ওফ য়ুনিতি শাবদা লৈবাক শীনবা থুংনা শরুক য়াখিবা, মফম অসিগী মশেক-মঙাল অমসুং এক্তা দিবসকী পুক্নিং থৌগৎপা শক্তি পল্লদুনা, প্রধান মন্ত্রীনা হায়খি মদুদি মফম অসিদা লাকপদা ভারতকী নাগরিক অমা ওইবগী চাউথোকচবনা থম্মোয়দা থনখি অমসুং সরদার বল্লভভাই পতেলগী মফমদা ইকায়খুম্নবা উৎচরি। নিংতম্লবা মতুংদা, মহাক্না নিংথৌ পানবা লৈবাক ৫৫০ হেন্না পুনশিনখি অমসুং অচেৎপা ফিরেপ অমগা লোয়ননা লৈবাক অসিগী অপুনবগী লংলানা পুনখি।

প্রধান মন্ত্রীনা হায়খি মদুদি নিংতম্বনা লৈবাক অমগী মরাইবক মশানা শেমজবা ঙমহল্লি অমসুং মশানা লৈবাক ঙাকচরবা লৈবাক অমনা মীয়ামগী থবক মরম চানা পাংথোক্নবা সংবিধানগী মনুংদা ৱারেপশিং লৌবদা লমজিংই। লৈবাক অমা ওইনা পুন্না মাঙলোমদা চঙশিনবদা অপুনবনা অচৌবা মপাঙ্গল অমা হাপ্পী। মরম অদুনা, হৌজিক ঐখোয়গী লৈবাক্ত, গনতন্ত্র দিবস, নিংতম্বা নুমিৎ অমসুং এক্ত দিবস, লৈবাক্কী কুহ্মৈ অহুম অসি মপুংফানা হরাও-তয়াম্না পাংথোক্লে।

পুলিস অমসুং সেকুরিতি ফোর্সশিংগী থৌনা ফবদা কৎথোক্লবা চহি অসিগী নেসনেল য়ুনিতি পেরেদগী খুৎথাংদা এক্তা নগরদা লৈবাক্কী অপুনবগী শক্তম চাউনা উৎপা অমসুং ভারতকী হেরিতেচ অমসুং অনিংবশিং তেব্লোশিংদা উৎখিবা অদু পল্লদুনা, প্রধান মন্ত্রীনা হায়খি মদুদি এক্তা দিবস অসি ইচম চম্বা থৌরমশিং ওইরম্বদগী মীয়াম শরুক য়াদুনা মীয়ামগী চাউথোকচবা থৌরম অমা ওইরে। থৌরম অসিদা, এক্তা দিবস অসিদা ইরৈচাশিং ঐনা থাগৎচরি অমসুং সরদার বল্লভভাই পতেলগী খুয়াদা ঐনা কোক নোঞ্জরি।

সরদার বল্লভভাই পতেল অসি মহাক য়াওদনা অনৌবা ভারত ৱাখলদা ফাওবা খল্লোইদবা পুৱারিগী শক্নাইরবা মীওই অমনি হায়না শিংথারদুনা, লৈবাক্কী হৌজিক লৈরিবা লম্মিৎ-তুম্মিৎ অমসুং রাজনিতিগী মশক অসি মহাক্না শেমখিবনি হায়না প্রধান মন্ত্রীনা ফোঙদোকখি। প্রধান মন্ত্রীনা হায়খি মদুদি লৈবাক খায়দোক্নরবা মতুংদা ফাওবা, হিমালয়শিংদগী ভারত মহাসাগর ফাওবা ভারত অশোই-অঙাম থোকহন্দনা থমখিবা মীওই অদু সরদার বল্লভভাই পতেল মশামক্নি।

প্রধান মন্ত্রীনা হায়খি মদুদি মহাক্না ভারতকী মরমচৎ অমসুং ৱাখল্লোন মমুৎ তানা খঙবদগী সরদার বল্লভভাই পতেল মাইপাকখিবনি। খেন্নবা মশক খঙবা লুচিংবা অদু খুরৌ থাংবা অমা নত্তে, লৈবাক্কী অপুনবগী অশেংবা য়ুম্ফম ওইনা ভারতকী সভেত্য চহি লিশিং কয়া লৈরক্লি। মসিগী মপাঙ্গল অসিগা লোয়ননা, ঐখোয় চাউখৎপা অমসুং নুংঙাই-য়াইফবগী মতোলশিং লোম্লে।

প্রধান মন্ত্রীনা হায়খি মদুদি লম অমসুং থম্মোয় অনিমক্ত লৈবাক অসি অমতা ওইনা পুনশিন্দুনা সরদার বল্লভভাই পতেলনা অনৌবা ভারতকী য়ুম্ফম থোনখি। লৈবাক অসিগী নাৎ অমসুং চৎনবী অমুক হিঙ্গৎহনবদা মহাক্না মরুওইবা থৌদাং লৌখি। গুজরাত্ত সোমনাথ লাইশঙ অমুক হন্না শাগৎতুনা, মহাক্না লৈবাক অসিদা নাৎ অমসুং চৎনবী অমুক মতোল চোংহনবা হৌদোকখি।

চহি অসিদা সোমনাথ লাইশঙ অমুক হন্না শেমজিনখিবগী চহি ৭৫ মপুংফারকপা অসি পল্লদুনা, প্রধান মন্ত্রীনা হায়খি মদুদি য়েক্নবশিং নমখায়দুনা চহি লিশিং অমা লাইশঙগী ফিরাল চাউথোকচনা পাইহনখিবা অদুনা হৌজিক লৈবাক শীনবা থুংনা সোমনাথ শ্বাভিমান পর্ব চৎথরিবা অসিগী ইথিল পীরে। চৎলিবা চহি অসিদসু লৈবাক অসিনা চপ মান্নবা হরাও-তয়াম্বগা লোয়ননা কুহ্মৈ অসি পাংথোক্লি।

লৈবাক্কী অপুনবা শক্তমগী অচৌবা থৌরমশিং, মালেমদা ভারতকী ফিবম ফগৎলকপা, য়াংনা শেন-থুম চাউখৎলকপা অমসুং কাসি বিশ্বনাথতগী হৌরগা রাম মন্দির ফাওবা নাৎ অমসুং চৎনবী অমুক হিঙ্গৎলকপা অদু পল্লদুনা, প্রধান মন্ত্রীনা হায়খি মদুদি সরদার পতেলনা পামজরম্বা লম্বীদা লৈবাক অসি মাঙলোমদা চঙশিল্লি। মসিগীদমক, লৈবাক অসিনা মতম পুম্নমক্ত মহাক্কী লমন তোল্লগনি।

চহি অনি লৈবাক শীনবা থুংনা সরদার পতেলগী ১৫০শুবা মপোক কুমওন পাংথোকপা মনুংদা লৈবাক অসিনা লৌখিবা মরুওইবা ৱারেপশিং নিংশিংলদুনা, প্রধান মন্ত্রীনা হায়খি মদুদি অতেনবা মতম অমগী মনুংদা হায়রিবা ৱাশকশিং অদু থবক ওইনা পাংথোক্তুনা ১৫১শুবা মপোক কুমওন থৌরম পাংথোকপদা অপেনবা ফাওই। হায়রিবা চহি অনি অদুদা, লৈবাক অসিনা মমাংদা অমুক্ত ওইখিদ্রিবা খুমাঙচাউশিনবশিং ফংবা ঙমখি।

নেক্সালিজিম অমসুং মাওইষ্ট মপুংফানা মুৎথৎত্রিবা ফাওবা তুমিন্না লৈথোক্লোই হায়না ১৫০শুবা মপোক নুমিত্ত সরদার পতেলগী মখোঙদা ৱাশক লৌখিবা অদু নিংশিংলদুনা, প্রধান মন্ত্রীনা হায়খি চহি অমগী মনুংদা লেফ-ৱিং এক্সত্রিজমগী য়াংলেন শরুক থুদেক্লে, ২০১৫ দা নেক্সালনা শোকহনবা জিলা মশিং ১২৬ ওইরম্বদগী মার্চ ২০২৬ দা জিরো ওইরকখি। চহি কয়া ইহিং-নাহিং তাদুনা লৈরম্বা লমদমশিং লম্বীশিং, মোবাইল নেতৱার্কশিং, স্কুলশিং অমসুং অনা-লাইয়েংগী খুদোংচাবশিং ফগৎহন্দুনা চাউখৎপগী ইচেলদা শরুক য়ারে। মতম অমদা তম্বা ঙমদবা ফিবম মায়োক্নরম্বা নহারোলশিং, লাইরিক-লাইশু, থবক ফংবা অমসুং মাঙলোমদা চঙশিন্নবা অনৌবা খুদোংচাবশিং ফংলে।

হান্না নেক্সালনা শোকহল্লবা লমদমশিংগী ইমুংশিং অখন্নবা অতিথি ওইনা এক্ত দিবস থৌরম শরুক য়াবদা তরাম্না ওক্লদুনা অমসুং মখোয়গী তুংগী ফিবম ফনা লৈনবা য়াইফ পাউজেল পীরদুনা, প্রধান মন্ত্রীনা শান্তি পুরক্নবা মখোয়গী থৱায় কৎখিবা সেকুরিতি পর্সোনেলশিংদা ইকায়খুম্নবা উৎখি। লৈবাক অসিগী হিংশা লৈবা মফমশিংদা শান্তি থম্নবা থৱায় কৎখিবা থৌনা ফরবা লান্মীশিংগী মফমদা ঙসি ঐনা কোক নোঞ্জরি।

প্রধান মন্ত্রীনা হায়খি মদুদি ঙসি ভারত হেন্না শাফরে অমসুং লৈবাক্কী মাইপাকপশিং অমসুং মীয়ামগী খনবা লৈঙাক লৈবদগী মীয়ামগী থাজবা হেনগৎলকপা মরম্না অচেৎপা ফিরেপ হেন্না লৌরে। চহি কয়া লায়রবা কোকহনগদবনি হায়না লাউরগা মখোয় মশাম খক্ত ইনাকখুনখিবা নিংতম্বা মতুংগী হোত্রোং হোবা খোল্লাউশিংগী মতুংদা লায়রবা কোকহনবদা পুৱারি ওইনা মাইপাক্লে। ৱার্ল্দ বেঙ্কগী রিপোর্ত অমগী মতুংইন্না, হৌখিবা চহি ১০ দগী ১২ ফাওবগী মনুংদা ২০২৪ ফাওবদা , ভারতমচা করোর ৫০ লায়রবা কোক্লে। মসিনা তাক্লিবদি, মমাংদা মীওই ১০০গী মনুংদা মীওই ২৭ শাথিনা লাইরৈ হায়বনি, ঙসিদি মশিং অসি ৩ গী মখাদা লৈরে।

প্রধান মন্ত্রীনা হায়খি মদুদি নারোন্দা লৌথোকপা ঙমদবা দাইরেক্ত বেনিফিত ত্রান্সফর, লেম্না চেঙ য়েনবা, লেম্না লাইয়েংবা, পাক্কাগী য়ুম করোর কয়া, তোইলেতশিং, মৈখু চেন্দবা চাকখুমশিং অমসুং পাক-শান্না ইন্সুরেন্সনা কোনশিনবগী খুৎথাংদা হৌখিবা চহি ১২ দা লায়রবশিংগী ফিবম ফগৎহনবদগী মালেমগী ওইনা শিংথানবা মাইপাকপা অসি পুরকপা ঙমখিবনি। ২০১৪ গী মমাংদা মীওই করোর ২৫ গী মখা খুন্নাইগী ঙাক্লৌনা কোনশিল্লম্বা অদু ঙসিদি মীওই করোর ১০০ রোম য়ৌরে। সরদার পতেলগী থৌজালশিং ফংবগা লোয়ননা, লৈবাক অসিনা মহাক্কী মফমদা ইকায়খুম্নবা উৎলি। মপুংফানা লায়রবা কোকহন্নবা ৱাশক লৌরে। অসিগুম্বা থবকশিং খক্তনা, ঐখোয়না লৈবাক অসিদগী লায়রবা কোকহনগনি অমসুং লৈবাক অসি বিকসিত ভারত অমা ওইহনগনি।

প্রধান মন্ত্রীনা হায়খি মদুদি লৈবাক্কী ওইনা লিংজেল মান্নবনা তংদু-লৈতাবা পুরকপা ঙম্মী অমসুং লালশিং, শেন-থুমগী অৱাবশিং, দরকার ওইবা পোৎলমশিং ফংবা ৱাবা অমসুং সপ্লাই চেনশিং তৎলকপা য়াওনা মালেমগী ওইনা খ্বাইদগী অৱাবা চহিশিংদা মাইপাকপা ঙমখি। মালেমগী নোংলৈ-নুংশিৎ খুদিংমক থেংনবা ঙম্নবা ভারতমচাশিং অমতা ওইনা লৈবা অসিনা লৈবাক অসিগী খ্বাইদগী কনবা য়ুম্বী ওইরি। হন্দক মালেমগী ওইনা ইনর্জগী অৱাৎপা লৈবদগী লৈবাক কয়াদা অকক্নবা চাংদা থাউ পীখি অমসুং মীশিং য়াম্বা, মপান্দগী থাউ লৈবা ভারতকী মতাংদা ভারতকী মায়োক্ত লৈবা ফোর্সশিংনা অৱাবা কয়াগী মরমদা মাঙজৌননা লাউথোকখি। কুতনিতিগী থবক অমসুং মীয়াম্না অমতা ওইনা লেপ্পদগী মীয়াম অৱাবদগী কনখি।

চহি ১০ হেন্না রাজনিতিগী নিংবা কায়রবা, মীয়াম অমা অমগা খৎন্নবা শীনবা অমসুং তোকঙা শন্দোক্নবা সোসিএল মেদিয়া খুৎলায় ওইনা শীজিন্নবা ফোঙনা মপান থোক্লক্লবা ফোর্সশিংগী মথক্ত চেকশিনৱা পীরদুনা, প্রধান মন্ত্রীনা হায়খি মদুদি অরোনবা মপান লৈবাক্কী মীফমশিংগী মওং, ভারতকী মায়োক্ত লৈবশিংনা মপান্দগী শৌগৎলকপা অমসুং লৈবাক্কী য়েক্নবশিংনা শীজিন্নরিবা লোলশিং মীয়াম্না মশক খঙগদবনি। ঐখোয়না খুঙ্গংগী লমদমশিংদা নেক্সালিজম লোইশিনখ্রে অদুবু কা হেনবা ৱাখল্লোনশিংগী খুদোংথিবদি লৈবাক শীনবা থুংনা কোকপা লৈত্রি আমসুং অসিগুম্বা লুপশিং অসিদগী লৈবাক অসি মিকুপ-নাহুম শিংনা লৈগদবনি।

প্রধান মন্ত্রীনা হায়খি মদুদি মপাঙ্গল কনবা অমসুং থবক ঙম্বা ভারত অমা শেমগৎনবা মাইকৈদা চঙশিল্লিবা অচৌবা লৈবাক্কী অপুনবগী মিসন অমসুং খোঙচৎ খুদোংথিবা কয়া থেংনরবসু মখা চৎথগদবনি। মথংগী লৈবাক্কী মরুওইবা থবকশিংদি ভারতকী ঙমখৈশিং মপুংফানা ঙাক-শেনবা, নারোন্দা চঙলকপা অমসুং মীশিং হেনগৎলকপা থিংবা অমসুং সেকুলার সিবিল কোদ অমগী মাইকৈদা চঙশিনবনি। অচৌবা ৱারেপশিংনা লম্বী থিংবশিং অমসুং নোংলৈ-নুংশিৎশিং মায়োক্নবা ঙমগনি। লৈবাক অসিনা এক ভারত, শ্রেস্থ ভারত অমসুং বিকসিত ভারত অমগী ৱাশক লৌদনা তোক্লোইদবনি। ২০৪৭ গী পান্দম ফংনবা চোকথবা লৈতনা থবক পায়খৎলি। লোইশিল্লকপদা কুহ্মৈশিংগী য়াইফ পাউজেল পীখি অমসুং ভারত মাতা কি জয় লাউখি। প্রধান মন্ত্রীনা হায়খি মদুদি ঐখোয়না মতোল লোম্না থবক কন্না শুগনি, ঐখোয়না খোঙফম চেৎনা নোংলৈ-নুংশিৎশিং থেংনগনি, অদুবু ঐখোয়গী মীৎয়েংগী পান্দম অমা খক ওইগনি, ২০৪৭ দা মপাঙ্গল কনবা অমসুং তৌবা ঙম্বা ভারত অমা শেমগৎপা ওইগনি।

***