ஒடிசாவின் புவனேஸ்வரில் ரிசர்வ் வங்கியின் வசதிகளைத் தொடங்கி வைக்கும் நிகழ்வில் பிரதமர் நிகழ்த்திய உரையின் ஆங்கில வடிவம்

ஜெய் ஜெகன்னாதா!

ஒடிசா ஆளுநர் திரு. பிரஜ்மோகன் ராம் அவர்களே; முதலமைச்சர் திரு. மோகன் சரண் மாஜி அவர்களே; மத்திய அமைச்சரவையில் எனது சக அமைச்சர்களான திருமதி நிர்மலா சீதாராமன் அவர்களே, திரு. ஜுவல் ஓரம் அவர்களே; இந்திய ரிசர்வ் வங்கியின் ஆளுநர் திரு. சஞ்சய் மல்ஹோத்ரா அவர்களே; ஒடிசா துணை முதலமைச்சர்களான திருமதி பிரவதி பரிதா அவர்களே, திரு. கனக் வர்தன் சிங் தியோ அவர்களே; வங்கி மற்றும் நிதித் துறையைச் சேர்ந்த பெருமைக்குரிய விருந்தினர்களே, உங்கள் அனைவருக்கும் வணக்கம்.

ஏன் இவ்வளவு தீவிரமான சூழல் நிலவுகிறது? வங்கித் துறையில் இவ்வளவு அழுத்தமா, அல்லது தொழில்நுட்பத் துறையில் இவ்வளவு அழுத்தமா? தயவுசெய்து நிம்மதியாக, சௌகரியமாக அமருங்கள்.

மகாபிரபுவின் ஆசியுடன், இன்று புவனேஸ்வரம் ஒரு 'புதிய இந்தியா'விற்கு ஒரு புதிய நிறுவனத்தை வழங்குகிறது. புவனேஸ்வரத்தில் இந்திய ரிசர்வ் வங்கியின் தரவு மற்றும் சைபர் பாதுகாப்பு பயிற்சி நிறுவனம் ஆகிய இரண்டையும் தொடங்கி வைப்பது ஒரு முக்கியமான நிகழ்வாகும். இது ஒடிசா மக்களுக்கும், ஒட்டுமொத்த நாட்டிற்கும் பெரும் பயனை அளிக்கப்போகிறது. இந்திய ரிசர்வ் வங்கிக்கும், இந்தத் திட்டத்துடன் தொடர்புடைய அனைவருக்கும் எனது மனமார்ந்த வாழ்த்துகளைத் தெரிவித்துக் கொள்கிறேன்.

நண்பர்களே,

இன்றைய நிகழ்ச்சி, இந்தியாவில் நிர்வாக அணுகுமுறை எவ்வாறு மாறிவருகிறது என்பதற்கும், அது எவ்வளவு விரைவாக பரிணமித்து வருகிறது என்பதற்கும் ஒரு சான்றாகும். இதில் எங்கள் கவனம், வளர்ச்சிக்கு முன்னுரிமை அளிப்பது, வளர்ச்சியை விரிவுபடுத்துவது மற்றும் வளர்ச்சியின் பலன்களை கடைசி மனிதர் வரை கொண்டு சேர்ப்பதில் தான் உள்ளது.

நண்பர்களே,

சுதந்திரத்திற்குப் பிறகு, நாட்டில் பெரிய நகரங்கள் உருவாக்கப்பட்டன, பிரம்மாண்டமான நிறுவனங்கள் நிறுவப்பட்டன, பெரிய மருத்துவமனைகள் கட்டப்பட்டன, மேலும் பிரம்மாண்டமான விமான நிலையங்கள் அமைக்கப்பட்டன. இருப்பினும், நாட்டின் ஒரு பெரும் பகுதி மக்கள் அடிப்படை வசதிகளுக்காகக் காத்திருக்க வேண்டியிருந்தது. தில்லியில் பெரிய மருத்துவமனைகள் இருந்தன, ஆனால் சிறிய நகரங்களிலும் தொலைதூரப் பகுதிகளிலும் வசிக்கும் மக்கள், சிறந்த மருத்துவ சிகிச்சைக்காக நீண்ட தூரம் பயணம் செய்ய வேண்டியிருந்தது. பெரிய நகரங்களில் விமானப் போக்குவரத்து வசதிகள் இருந்தன, ஆனால் சிறிய நகரங்களை விமானப் போக்குவரத்துடன் இணைப்பதில் போதிய கவனம் செலுத்தப்படவில்லை. பெரிய நகரங்களில் சில வசதிகள் இருந்தன; அதே சமயம், பல கிராமங்களில் சாலைகள், மின்சாரம் மற்றும் குடிநீர் போன்ற அடிப்படைத் தேவைகளைப் பூர்த்தி செய்வதே ஒரு பெரும் சவாலாக இருந்தன.  ரயில் நிலையங்கள் சாதாரண மக்களின் பயணத்தில் மிக முக்கியமான இணைப்பாக இருந்தன, இருப்பினும் இந்த நிலையங்களில் நவீன வசதிகள் குறைவாகவே இருந்தன. வேறு விதமாகக் கூறினால், வளர்ச்சியின் பலன்கள் ஒவ்வொரு பகுதிக்கும், ஒவ்வொரு குடிமகனுக்கும் சமமாகச் சென்றடைவதை உறுதி செய்வது ஒரு பெரும் சவாலாக இருந்தது. இந்த மனநிலையை மாற்ற நாங்கள் முயற்சி செய்தோம். 'மக்கள் நலன் சார்ந்த, செயலூக்கமிக்க, சிறந்த நிர்வாகம்' என்ற மாதிரியின் அடிப்படையில் நாங்கள் செயல்பட்டோம். எங்களைப் பொறுத்தவரை, வளர்ச்சி என்பது இந்தியா முழுவதும் சமமான முன்னேற்றத்தைக் குறிக்கிறது. அதாவது கிராமங்களுக்கும் சிறிய நகரங்களுக்கும் சமமான வாய்ப்புகளை வழங்குவதாகும். தொலைதூரப் பகுதிகளுக்குச் சிறந்த போக்குவரத்து இணைப்புகளைக் கொண்டு சேர்ப்பது, பின்தங்கிய குடும்பங்கள் கண்ணியத்துடன் வாழ்வதற்கான வசதிகளை வழங்குவது, மேலும் வளர்ச்சியின் பயணத்தில் தாங்கள் பின்தங்கிவிட மாட்டோம் என்ற நம்பிக்கையை ஒவ்வொரு குடிமகனிடமும் தொடர்ந்து விதைப்பது என்பதே எங்கள் இலக்காகும். இன்று, நாட்டின் விரைவுச் சாலைகள் சிறிய நகரங்களை ஒன்றிணைக்கின்றன. எய்ம்ஸ் போன்ற முதன்மையான நிறுவனங்கள் பல மாநிலங்களுக்கு விரிவுபடுத்தப்பட்டுள்ளன. சிறிய நகரங்களில் மருத்துவக் கல்லூரிகள் திறக்கப்படுகின்றன. கிராமங்களில் சுமார் 1.75 லட்சம் 'ஆயுஷ்மான் சுகாதார மையங்கள்' நிறுவப்பட்டுள்ளன. டிஜிட்டல் இணைப்பு வசதிகள் தொலைதூரப் பகுதிகளுக்கும் விரிவடைந்து வருகின்றன. இதுவே இன்றைய நிர்வாகத்தின் உண்மையான நோக்கம்: குடிமக்களின் வாழ்க்கையை எளிதாக்குவதும், அவர்களின் எதிர்பார்ப்புகளை நிறைவேற்ற புதிய வாய்ப்புகளை உருவாக்குவதும் ஆகும்.

நண்பர்களே,

சாதாரணக் குடும்பங்கள், ஏழைகள் மற்றும் நடுத்தர வர்க்கத்தினர் பல ஆண்டுகளாக எவ்வாறு புறக்கணிக்கப்பட்டனர் என்பதற்கு நமது வங்கித் துறையே ஒரு சிறந்த உதாரணமாகும். 1960 மற்றும் 70களில், ஏழைகளின் பெயரால் வங்கிகள் தேசியமயமாக்கப்பட்டன. இருப்பினும், 2014ம் ஆண்டு வரை, நாட்டின் மக்கள் தொகையில் பாதிக்கும் மேற்பட்டோர் வங்கிச் சேவைகளைப் பெறும் வாய்ப்பைப் பெறவில்லை. நடுத்தர வர்க்கத்தினருக்குக் கூட வங்கிக் கடன்கள் என்பது எட்டாக்கனியாகவே இருந்தது; ஏழைகள், சிறு விவசாயிகள், நிலமற்றவர்கள் மற்றும் நமது சகோதரிகள், மகள்கள் ஆகியோர் இத்தகைய சேவைகளைப் பெறுவதைப் பற்றி நினைத்துக் கூடப் பார்க்க முடியாத சூழல் இருந்தது. இன்று, இந்தியாவில் டிஜிட்டல் வங்கிச் சேவை அனைவரையும் 24 மணி நேரமும் நிதிச் சேவைகளுடன் இணைத்துள்ளது. ஆனால், 2014-க்கு முன்பு, தொலைபேசி வழி வங்கிச் சேவை என்ற முற்றிலும் மாறுபட்ட ஒரு காலம் இருந்தது. தில்லியில் இருந்த ஒரு சில செல்வாக்கு மிக்க நபர்களுக்கு, வெறும் தொலைபேசி அழைப்பின் மூலமாகவே ஆயிரக்கணக்கான கோடி ரூபாய் மதிப்பிலான கடன்கள் வழங்கப்பட்டன. ஏழைகளும் நடுத்தர வர்க்கத்தினரும் ஒரு வங்கிக் கணக்கைத் தொடங்குவதற்குக்கூட ஒரு ஜாமீன்தாரரின் தேவை இருந்தது; அதே சமயம், காங்கிரஸின் இந்த ' தொலைபேசி வழி வங்கிச் சேவை' முறையின் கீழ், செல்வந்தர்களுக்கு ஆயிரக்கணக்கான கோடி ரூபாய் எப்போது வேண்டுமானாலும் தாராளமாகக் கிடைத்தது. இத்தகைய தவறான நிர்வாகத்தின் விளைவாகவே, இந்தியாவின் வங்கி அமைப்பு வாராக் கடன்களின் பிடியில் சிக்கி, அழிவின் விளிம்பிற்குத் தள்ளப்பட்டது.

நண்பர்களே,

எந்தவொரு குறிப்பிடத்தக்க மாற்றத்திற்கும், ஒரு விரிவான மனப்பான்மை இருப்பது அவசியம்; நோக்கங்கள் தூய்மையாகவும், உந்துதல்கள் உன்னதமாகவும் இருக்கும்போது, சாத்தியமற்றதாகத் தோன்றும் பணிகள் யதார்த்தமாகின்றன. பார்வை குறுகியதாக இருக்கும் இடத்தில், வாய்ப்புகளும் சுருங்குகின்றன. சமீபத்திய ஆண்டுகளில் தேசத்தால் கட்டமைக்கப்பட்ட கட்டமைப்புகளும், டிஜிட்டல் இந்தியா திட்டத்தின் கீழ் உருவாக்கப்பட்ட புதிய சூழலமைப்பும், வங்கிச் சேவையை ஒவ்வொரு குடிமகனுக்கும் விரிவுபடுத்தியுள்ளன. இன்று, இந்தியாவின் வங்கித் துறை உலகின் மிக வலிமையான துறைகளில் ஒன்றாகத் திகழ்கிறது. முன்னதாக, தொலைபேசி வங்கிச் சேவை மூலம், டெல்லியில் உள்ள ஒரு வசதியான குடும்பத்தை அணுகக்கூடியவர்கள் மட்டுமே பயனடைந்தனர். இன்று, டிஜிட்டல் வங்கிச் சேவை மூலம், நாடு முழுவதும் உள்ள ஒவ்வொரு குடும்பமும் பயனாளியாகியுள்ளது.

நண்பர்களே,

ஒடிசா மண்ணிலிருந்தே, நாட்டின் முன்னாள் பிரதமர் ஒருவர் ஒருமுறை இவ்வாறு குறிப்பிட்டிருந்தார்: தில்லியிலிருந்து ஒரு ரூபாய் அனுப்பப்பட்டால், மக்களிடம் சென்றடைவது வெறும் 15 பைசா மட்டுமே. இது ஒரு பிரதமரின் கூற்று. அது ஒரு காலம்; இது இன்றைய காலம். இன்று, தில்லியிலிருந்து ஒரு ரூபாய் அனுப்பப்பட்டால், அந்த முழு ஒரு ரூபாயும் ஒவ்வொரு பயனாளியின் வங்கிக் கணக்கிற்கும் நேரடியாகச் சென்றடைகிறது. திருமதி. நிர்மலா அவர்கள் சற்றுமுன் குறிப்பிட்டது போல, நாட்டில் சுமார் 59 முதல் 60 கோடி மக்கள் நிதி திட்டத்தின் கீழ் வங்கிக் கணக்குகள் தொடங்கப்பட்டதன் மூலமே இது சாத்தியமாகியுள்ளது.

நண்பர்களே,

இன்று, வங்கிக்கு உத்தரவாதமாக எதையும் வழங்க முடியாத ஒருவர் கூட, தனது சொந்தத் தொழிலைத் தொடங்குவதற்கு குறைந்த வட்டியில் மற்றும் எளிதில் அணுகக்கூடிய கடனைப் பெற முடிகிறது. சிறு தொழில்முனைவோர் முதல் பாரம்பரிய கைவினைஞர்கள் வரை, தெருவோர வியாபாரிகள் முதல் அமைப்புசாரா துறையில் உள்ள தொழிலாளர்கள் வரை, அவர்கள் முதன்முறையாக முறைசார்ந்த வங்கிச் சேவையின் பலன்களைப் பெற்றுள்ளனர். முத்ரா திட்டத்தின் மூலம், 13 கோடி மக்கள் முதன்முறையாக தொழில்முனைவோராகியுள்ளனர். பிரதமரின் ஸ்வநிதி திட்டம் முதன்முறையாக லட்சக்கணக்கான தெருவோர வியாபாரிகளுக்கு கடன் வழங்கியுள்ளது. பிரதமரின் கைவினை கலைஞர்கள் திட்டம் லட்சக்கணக்கான திறமையான கைவினைஞர்களை வங்கிகளுடன் இணைத்துள்ளது. மேலும், 10 கோடி கிராமப்புறப் பெண்களை உள்ளடக்கிய சுயஉதவிக் குழுக்களுக்கு வங்கிகள் ஆயிரக்கணக்கான கோடி ரூபாய் மதிப்பிலான உதவியை வழங்கியுள்ளன.

நண்பர்களே,

ஒரு காலத்தில், டெபிட் மற்றும் கிரெடிட் கார்டுகள் செல்வந்தர்களுக்கு மட்டுமே உரிய சின்னங்களாக இருந்த அதே தேசம் இது. இன்று, அவை ஒவ்வொரு குடிமகனுக்கும் கிடைக்கின்றன. நாட்டில் கோடிக்கணக்கான ரூபே கிரெடிட் மற்றும் டெபிட் கார்டுகள் வழங்கப்பட்டு, சுயமரியாதை மற்றும் தற்சார்பு ஆகிய இரண்டின் சின்னங்களாகவும் மாறியுள்ளன. இவை அனைத்தும் உங்கள் கூட்டு ஒத்துழைப்பின் மூலமே சாத்தியமாகியுள்ளது. இந்திய ரிசர்வ் வங்கி, நாட்டின் ஒவ்வொரு வங்கி, அல்லது அவற்றில் பணியாற்றும் ஒவ்வொரு வங்கி ஊழியர் என நீங்கள் சாதித்த பணிகள், இந்த வெற்றிக்கு உங்களை உண்மையிலேயே தகுதியானவர்களாக்குகின்றன.

நண்பர்களே,

கடந்த பத்தாண்டுகளில், நிதி அதிகாரமளித்தலுடன் இணைந்து, சமூகப் பாதுகாப்பு வலை முன்னெப்போதும் இல்லாத வகையில் விரிவடைந்துள்ளது. 'அடல் ஓய்வூதியத் திட்டம்' மூலம் 9 கோடி மக்கள் சமூகப் பாதுகாப்பு வளையத்திற்குள் கொண்டு வரப்பட்டுள்ளனர்; இதில் ஒடிசா மாநிலத்தில் மட்டும் 38 லட்சம் பேர் பயனடைந்துள்ளனர். சுமார் 10 முதல் 12 ஆண்டுகளுக்கு முன்பு, காப்பீடு என்பது ஒரு ஆடம்பரமான விஷயமாகக் கருதப்பட்டது; ஏழைகளும் நடுத்தர வர்க்கத்தினரும் அதைப் பற்றி நினைத்துப் பார்ப்பது கூட கடினமாக இருந்தது. எங்களைப் பொறுத்தவரை, குடிமக்களே தெய்வம் என்பதே சிறந்த நிர்வாகத்திற்கான வழிகாட்டும் மந்திரமாகும். விபத்துகளின் போது பாதுகாப்பை வழங்க, நாங்கள் பிரதமரின் முழு காப்பீட்டுத் திட்டத்தைத் தொடங்கினோம். ஆண்டுக்கு வெறும் 20 ரூபாய் என்ற மிகக் குறைந்த பிரீமியத்தில், 2 லட்சம் ரூபாய் வரையிலான காப்பீட்டுப் பாதுகாப்பு வழங்கப்படுகிறது. அதேபோல், ஆயுள் காப்பீட்டிற்காக, ஆண்டுக்கு 450 ரூபாய்க்கும் குறைவான பிரீமியத்தில் 'பிரதமரின் வாழ்நாள் பாதுகாப்பு ஆயுள் காப்பீட்டுத் திட்டத்தை’ அறிமுகப்படுத்தினோம். கோடிக்கணக்கான இந்தியர்கள் இந்தத் திட்டங்களில் இணைந்துள்ளனர். இதுவரை, 25,000 கோடி ரூபாய்க்கும் அதிகமான காப்பீட்டுத் தொகைகள் பொதுமக்களுக்கு வழங்கப்பட்டுள்ளன. வேறு ஏதேனும் ஒரு அரசாங்கம் 25,000 கோடி ரூபாயை வழங்கப்போவதாக அறிவித்திருந்தால், அது மிகப்பெரிய செய்தியாக மாறியிருக்கும்; மாதக்கணக்கில் கொண்டாட்டங்களும் ஆரவாரங்களும் நடந்திருக்கும். ஆனால், எங்கள் நிர்வாகத்தில், இத்தகைய ஆதரவு ஏழைகளுக்கும் நடுத்தர வர்க்கத்தினருக்கும் அவர்களின் கடினமான காலங்களில், எந்தவித ஆரவாரமும் இன்றி அமைதியாகச் சென்றடைகிறது. இதுவே சிறந்த நிர்வாகத்தின் அடையாளம்.

நண்பர்களே,

கடந்த பத்தாண்டுகளில், வங்கிச் சேவைகளைப் பெற வாய்ப்பு கிடைக்காதவர்களுக்கு அந்தச் சேவைகளை விரிவுபடுத்துவதில் கவனம் செலுத்தப்பட்டது. வரவிருக்கும் பத்தாண்டுகள், வங்கிச் சேவைகளை மேலும் திறமையானதாகவும், நம்பகமானதாகவும் மாற்றுவதற்கான காலமாகும். இந்த முயற்சியில், ஒடிசாவில் அமைக்கப்பட்டுள்ள இந்த புதிய தரவு மையம்  முக்கியப் பங்காற்றும். வங்கி அமைப்பைப் பாதுகாப்பாக வைத்திருக்க வேண்டுமானால், அதன் டிஜிட்டல் உள்கட்டமைப்பும் பாதுகாக்கப்பட வேண்டும். இதற்காக, வலுவான தரவு மையங்களும், மேம்பட்ட கணினி அமைப்புகளும் நமக்குத் தேவைப்படுகின்றன.

நண்பர்களே,

நவீன காலப் போர் என்பது ஆயுதங்களால் மட்டுமே நடத்தப்படுவதில்லை என்பதை நாம் அனைவரும் அறிவோம். ஒரு நாட்டின் பொருளாதாரத்தைத் தாக்குவதன் மூலமும் அந்த நாட்டை வலுவிழக்கச் செய்ய முடியும். இந்தியா நிதி ரீதியாக வலுவடைந்து வரும் சூழலில், சைபர் குற்றவாளிகள் மற்றும் சைபர் பயங்கரவாதிகளிடமிருந்து நமது வங்கி அமைப்பைப் பாதுகாப்பது மிக அவசியமாகும். இன்றைய காலகட்டத்தில் சைபர் அச்சுறுத்தல்களின் தன்மை மாறி வருகிறது. காலாவதியான அமைப்புகள், பழமையான பயிற்சி முறைகள் அல்லது பழைய கருவிகளைக் கொண்டு இத்தகைய புதிய சவால்களை நம்மால் எதிர்கொள்ள முடியாது. இதற்கு நவீன உள்கட்டமைப்போடு, திறன்மிக்க மனித வளமும் தேவைப்படுகிறது. இந்தச் சூழலில்தான், இந்த புதிய சைபர் பாதுகாப்பு பயிற்சி நிறுவனத்தின்  பங்கு மிக முக்கியமானதாகிறது.

நண்பர்களே,

இந்திய ரிசர்வ் வங்கியின் இந்த புதிய வசதிகள், இந்தியாவின் முன்னுரிமைகளில் ஏற்பட்டுள்ள ஒரு புதிய மாற்றத்தைப் பிரதிபலிக்கின்றன. வளர்ந்த இந்தியாவை உருவாக்குவதில், கிழக்கு இந்தியா ஒரு வலிமையான வளர்ச்சி இயந்திரமாக உருவெடுத்து வருகிறது. ஒடிசாவில் 'இரட்டை என்ஜின்' அரசாங்கம் அமைக்கப்பட்டதைத் தொடர்ந்து, மாநிலத்தின் முன்னேற்றம் புதிய வேகத்தைப் பெற்றுள்ளது. இயற்கை வளங்களுடன், ஒடிசாவின் பொருளாதாரம் இப்போது தொழில்நுட்பத்தின் மூலமும் வலுப்படுத்தப்பட்டு வருகிறது. ஒருபுறம் கனிம வளங்களைச் சார்ந்த தொழில்கள் விரிவடைந்து வருகின்றன; மறுபுறம், செமிகண்டக்டர்கள் மற்றும் மின்னணுவியல் துறைகளுக்கான புதிய சூழல் அமைப்பை உருவாக்க தீவிர முயற்சிகள் மேற்கொள்ளப்பட்டு வருகின்றன. சுரங்கங்கள் முதல் மைக்ரோசிப்கள் வரை, ஒடிசா ஒரு புதிய எதிர்காலத்தை உருவாக்கத் தயாராகி வருவதை நீங்கள் காண்பீர்கள். தரவு மையங்கள் மற்றும் மேம்பட்ட கணினித் தொழில்நுட்பம் போன்ற துறைகளில் புதிய முதலீட்டு வாய்ப்புகள் உருவாகி வருகின்றன, இது ஒடிசா இளைஞர்களுக்குப் பல புதிய கதவுகளைத் திறந்து விடுகிறது. ஒடிசா இளைஞர்களுக்கு நான் உறுதியளிக்கிறேன் - நீங்கள் கண்ட பெரிய கனவுகள் நிச்சயமாக நனவாகும். நாம் இதைச் செய்து காட்டுவோம்; இதை நிறைவேற்ற நாங்கள் உறுதியுடன் இருக்கிறோம். இந்த உணர்வுடன், உங்கள் அனைவருக்கும் மீண்டும் ஒருமுறை எனது மனமார்ந்த வாழ்த்துகளைத் தெரிவித்துக் கொள்கிறேன்.

அனைவருக்கும் நல்வாழ்த்துகள்.

ஜெகன்நாதருக்கு ஜெ!

பொறுப்புத் துறப்பு: இது பிரதமர் ஆற்றிய உரையின் தோராயமான மொழிபெயர்ப்பாகும். அசல் உரை இந்தியில் நிகழ்த்தப்பட்டது.

(Release ID: 2328234)

***

AD/VK/PS