পোলেন্দগী প্রধান মন্ত্রীগা লোয়ননা পুন্না প্রেসতা ৱা ঙাংবদা প্রধান মন্ত্রীনা ফোঙদোকখিবা ৱারোল

ইকায়খুম্নরবা প্রধান মন্ত্রী,

লৈবাক অনিমক্কী মীহুৎ কাংবুশিং,

মেদিয়াগী মরুপশিং,

খুরুমজরি!

পোলেন্দগী প্রধান মন্ত্রী ভারত্ত তরাম্না ওকপা অসি ঐ য়াম্না অপেনবা ফাওই।

২০২৪ দা ঐগী পোলেন্দ খোঙচৎ মনুংদা, মহাক ঐ অমসুং ঐগী মীহুৎ কাংবু তরাম্না ওকখি। খোঙচৎ মনুংদা, ঐখোয়গী ঐখোয়গী মরীশিং ষ্ট্রাতেজিক পার্তনরশিপ অমগী থাক্ত পুখৎখি।

অকনবা য়ুম্ফম অসিদা শাগৎতুনা, হৌখিবা চহি অনি হেনবদা ঐখোয়গী মরী নৌনা খোঙজেল য়াংখৎলে। ঙসি প্রধান মন্ত্রীগা মীফম পাংথোকখিবগা লোয়ননা, ঐখোয়গী ষ্ট্রাতেজিক পার্তনরশিপ মখা তানা ফগৎনবা ঐখোয়না মরুওইবা ৱারেপ কয়া লৌরে।

মরুপশিং,

ভারত অমসুং পোলেন্দগী মরক্ত লৈনরিবা মরুপ-মপাংগী মরী অসি কুতনিতিগী মরীশিং খক্ত নত্তে, মসিদা ঐখোয়গী মান্নবা মীওইবা খুন্নাইগী নাৎ-চৎনবী অমসুং মীনুংশিসু য়াওরি।

মালেমগী অনিশুবা লাঞ্জাউদা, জাম্নগর অমসুং কোলহাপুরগী নিংথৌকোনগী ইমুংশিংনা পোলিস অঙাং অমসুং ইমুং লিশিং কয়া ভারত্ত চঙজফম পীখি। ঙসি ফাওবা, পোলেন্দগী মীয়াম্না জাম সাহেব অসি “দোব্রি মহারাজ” হায়বদি “অফবা মহারাজ” হায়না ইকায়খুম্নরি।

২০২২ দা, ঐখোয়গী মহৈরোয়শিং য়ুক্রেন্দগী অশোই-অঙাম য়াওদনা পুরকপদা মতেং পাংদুনা মীওইবগী মীনুংশিগী চপ মান্নবা ৱাখল্লোন অসি পোলেন্দনা থবক ওইনা পাংথোকখি। জাম সাহেব য়ুথ একচেঞ্জ প্রোগ্রামগী খুৎথাংদা পোলেন্দগী নহারোলশিং ভারত্ত লাকপা অমসুং তুংগী মীরোলদা ঐখোয়গী পুৱারি ওইরবা মরুপ-মপাংগী মরী অসি পুখৎলকপদা ঐ অপেনবা ফাওই।

মরুপশিং,

ঙসিদি, মালেম অসি তম্বা ঙমদবা অমসুং অহোংবগী তাঙ্কক অমা ফাওদুনা চৎলি। অৱাবা মতমশিং অসি ফাওবদা, ভারত অমসুং পোলেন্দ অনিমক চাউখৎপা, তেক্নোলোজি অমসুং ইন্নোবেসনগী মরুওইবা মফমশিং ওইরক্লে।

হৌখিবা চহিদা, পোলেন্দগী জি.দি.পি দোল্লার ত্রিল্লিয়ন ১ য়ৌখি। মাইপাকপা অসিদা ঐনা প্রধান মন্ত্রী থাগৎপা ফোঙদোকচরি। চৈরক অসিদা, ভারতসু হৌখিবা ক্বার্তরদা চাদা ৭.৮ গী গ্রোথ রেত অমা লৈখি।

ঐখোয়গী শেন-থুমগী মপাঙ্গল কনখৎলকপা অসিনা ভারত-পোলেন্দ মরীগী অনৌবা খুদোংচাবশিং পীরে। ইন্দিয়া-য়ুরোপিয়ান য়ুনিয়ন ফ্রি ত্রেদ এগ্রিমেন্তনা হায়রিবা খুদোংচাবশিং অসি মখা তানা পাকথোক-চাউথোকহল্লে। এগ্রিমেন্ত হেক চৎনবা হৌবদগী, পোলেন্দদা মেছিন্নরি, কেমিকেলশিং, প্লাষ্টিক্স অমসুং ইঞ্জিনিয়ারিংগী পোৎলমশিং থাদোক্নবা ভারতকী অনৌবা খুদোংচাবশিং ফংলগনি। হায়রিবা মতম অসিদা, রেলৱেজ অমসুং মোবিলিতি, এদভান্স মেনুফেকচরিং, চীঞ্জাক শেম-শাবা অমসুং বাইওতেক্নোলোজিগুম্বা হিরমশিংদা পোলেন্দগী নৌনা শেন থাদরক্নবা ঐখোয়না হোৎনগনি।

য়াম্লবা ললোন-ইতিক্কী মীহুৎ কাংবু অমগা লোয়ননা প্রধান মন্ত্রীনা ভারত্ত লাকপদা ঐ অপেনবা ফাওই। মালেমগীদমক থাজবা লৈরবা সপ্লাই চেনশিং শেমগৎনবা অমসুং ২০৩০ ফাওবদা লৈবাক অনিগী ললোন-ইতিক শরুক অনি হেনগৎনবা লৈবাক অনিমক্কী কম্পেনিশিংনা পুন্না থবক তৌমিন্নগনি হায়না ঐখোয়না থাজৈ।

মরুপশিং,

ঙসি, দিফেন্স, স্পেস, অমসুং ন্যুক্লিয়ার ইনর্জিদা ঐখোয় মতেং পাংনবা হেনগৎহনবা হায়না ঐখোয় য়ানরে। মরুওইবা হিরমশিং অসিদা, পুন্না শেমগৎমিন্নবা অমসুং পুন্না পোৎথোক পুথোকমিন্নবদা ভারতকা লোয়ননা থবক তৌমিন্ননবা ঐখোয়না পোলিস কম্পেনিশিংদা হায়জরি।

ক্রিতিকেল মিনরেলশিং অমসুং কোএল গ্যাসতিফিকেসনদা ঐখোয়না নৌনা থবক তৌমিন্নগনি, পোলেন্দগী হৈথোই-শিংথোইবা শীজিন্নগনি।

পোলেন্দা ভারতকী আই.তি কম্পেনিশিং থবক তৌদুনা, আই.তি অমসুং সাইবরসেকুরিতিদা লৈনবা ঐখোয়গী মরীশিং হান্নদগী মপাঙ্গল কন্দুনা লৈরি। মতেং পাংনবা অসিদা য়ুম্ফম ওইদুনা, ইন্দিয়া-পোলেন্দ ষ্টার্দঅপ ব্রিজ অমা লিংখৎপদা ঐখোয় য়ানরে।

হায়রিবা থবকশিং অসিনা ঐখোয়না এ.আই, সাইবরসেকুরিতি, ফিনতেক অমসুং অতোপ্পা নৌনা থোক্লকপা তেক্নোলোজিশিংদা মতেং পাংনবগী অনৌবা ইনোৎ অমা হাপ্লগনি, লোয়ননা লৈবাক অনিমক্কী নহারোলশিংগী অনৌবা খুদোংচাবশিং শেম্লে।

মরুপশিং,

নাৎ অমসুং মীগা মীগা লৈনবা মরীশিং ঐখোয়গী মরীগী খ্বাইদগী কনবা মপাঙ্গলনি। পোলেন্দা সংস্কৃত তম্বা অমসুং ইন্দোলোজিগী ইনাকখুল্লবা চৎনবী অমা লৈবদা ঐখোয় অপেনবা ফাওই। 

ঐখোয়না ক্রাকো সিতিদা ইন্দিয়ান ষ্টদিজ চিয়ার অমা লিংখৎলে। ঙসি, নাৎ অমসুং লাইরিক-লাইশু, শান্নবা অমসুং তুরিজমদা ঐখোয় মতেং পাংনবা মখা তানা মপাঙ্গল কনখৎহনবা হায়নসু ঐখোয়না ৱারেপ লৌরে।

মরুপশিং,

ঙসি, ঐখোয়না লমদম লমদমগী অমসুং মালেমগী ওইরক্লিবা ফিবমশিংগী মতাংদসু খন্নখ্রে। ভারত অমসুং পোলেন্দ অনিমক্না গনতন্ত্রগী গুনশিং অমসুং আইন্দা য়ুম্ফম ওইবা নিয়মদা থাজবা লৈরি। মালেমগী লুপশিং হেন্না মপাঙ্গল কনখৎনবা অমসুং হেন্না মপুংফানা থবক তৌনবা অওনবশিং পুরকপা দরকার ওইরে হায়না ঐখোয়না থাজৈ।

য়ুক্রেন নত্ত্রগা নোংচুপ এসিয়া ওইবা য়াই, শান্তি পুরক্নবা পায়খৎপা থবক খুদিংমক ভারতনা মখা তানা শৌগৎকনি।

ইকায়খুম্নরবা,

ঐখোয়গী পুৱারি অসি মীওইবা খুন্নাই অমসুং মীনুংশিদা য়াম্না চেৎনা মরা তারি, লোয়ননা ঐখোয়গী তুংলমচৎতা ইন্নোবেসন অমসুং তেক্নোলোজিদা মতেং পাংন্নবা ওইথোকপশিং মরাংকাইনা লৈরি।

অদোমগী খোঙচৎ অসিনা ইন্দিয়া-পোলেন্দ ষ্ট্রাতেজিক পার্তনরশিপদা অনৌবা ইনোৎ অমা পীগনিক অমসুং মসি অনৌবা থাকশিংদা পুখৎকনি। অমুক হন্না, অদোম অমসুং অদোমগী মীহুৎ কাংবু তরাম্না ওকচরি।

অদোম থাগৎচরি।

দিসক্লেমর: মসি প্রধান মন্ত্রীগী ৱারোলদগী চাউরাকপা হন্দোকপনি। অশেংবা ৱারোল হিন্দীদা ফোঙদোকখি।

***