পোষ্ট কৰা হৈছে:
22 OCT 2026 2:38PM by PIB Guwahati
মান্যবৰ শ্ৰীযুত প্ৰধানমন্ত্ৰী,
দুয়ো দেশৰ প্ৰতিনিধিবৃন্দ,
সংবাদ মাধ্যমৰ বন্ধুসকল,
নমস্কাৰ!
পোলেণ্ডৰ প্ৰধানমন্ত্ৰীক ভাৰতলৈ আন্তৰিক স্বাগতম জনাবলৈ পাই মই অতিশয় আনন্দিত হৈছোঁ। ২০২৪ চনত মোৰ পোলেণ্ড ভ্ৰমণৰ সময়ত তেওঁ মোক আৰু মোৰ প্ৰতিনিধি দলটোক উষ্ম আদৰণি জনাইছিল। সেই ভ্ৰমণৰ সময়তে আমি আমাৰ সম্পৰ্কক "কৌশলগত অংশীদাৰিত্ব"ৰ পৰ্যায়লৈ উন্নীত কৰিছিলোঁ।
এই শক্তিশালী আধাৰৰ ওপৰত ভিত্তি কৰি যোৱা দুবছৰত আমাৰ অংশীদাৰিত্বই নতুন গতি লাভ কৰিছে। আৰু আজি প্ৰধানমন্ত্ৰীৰ সৈতে হোৱা বৈঠকত আমি আমাৰ এই কৌশলগত অংশীদাৰিত্বক অধিক সুদৃঢ় কৰিবলৈ কেইবাটাও গুৰুত্বপূৰ্ণ সিদ্ধান্ত গ্ৰহণ কৰিছোঁ।
বন্ধুসকল,
ভাৰত আৰু পোলেণ্ডৰ বন্ধুত্ব কেৱল কূটনৈতিক সম্পৰ্কৰ ওপৰতে আধাৰিত নহয়, বৰঞ্চ ই মানৱতা আৰু সহানুভূতিৰ এক উমৈহতীয়া ঐতিহ্যৰ ওপৰত প্ৰতিষ্ঠিত।
দ্বিতীয় বিশ্বযুদ্ধৰ সময়ত জামনগৰ আৰু কোলহাপুৰৰ ৰাজপৰিয়ালে পোলেণ্ডৰ হাজাৰ হাজাৰ শিশু আৰু পৰিয়ালক ভাৰতত আশ্ৰয় দিছিল। আজিও পোলেণ্ডৰ জনসাধাৰণে জাম চাহেবক অতি শ্ৰদ্ধাৰে "দাব্ৰি মহাৰাজা", অৰ্থাৎ "ভাল মহাৰাজ" বুলি স্মৰণ কৰে।
২০২২ চনত ইউক্ৰেইনৰ পৰা আমাৰ ছাত্ৰ-ছাত্ৰীসকলক সুৰক্ষিতভাৱে ঘূৰাই অনাৰ ক্ষেত্ৰত সহায় হাত আগবঢ়াই পোলেণ্ডেও মানৱতাৰ এই একেই ভাৱনাক আগবঢ়াই লৈ গৈছিল। মই আনন্দিত যে 'জাম চাহেব যুৱ বিনিময় কাৰ্যসূচী'ৰ জৰিয়তে পোলেণ্ডৰ যুৱক-যুৱতীসকল ভাৰতলৈ আহিছে আৰু আমাৰ এই ঐতিহাসিক বন্ধুত্বক নতুন প্ৰজন্মৰ কাষলৈ লৈ গৈছে।
বন্ধুসকল,
আজি বিশ্বই অনিশ্চয়তা আৰু পৰিৱৰ্তনৰ মাজেৰে গতি কৰিছে। এনে এক সময়তো ভাৰত আৰু পোলেণ্ড—দুয়োখন দেশেই বিকাশ, প্ৰযুক্তি আৰু উদ্ভাৱনৰ গুৰুত্বপূৰ্ণ কেন্দ্ৰ হিচাপে আত্মপ্ৰকাশ কৰিছে।
যোৱা বছৰ পোলেণ্ডৰ জিডিপিয়ে এক ট্ৰিলিয়ন মাৰ্কিন ডলাৰৰ ঐতিহাসিক মাইলৰ খুঁটি অতিক্ৰম কৰিলে। ইয়াৰ বাবে মই প্ৰধানমন্ত্ৰীক বহুত বহুত অভিনন্দন জ্ঞাপন কৰিছোঁ। আনহাতে, ভাৰতেও যোৱা ত্ৰৈমাসিকত ৭.৮%ৰ চমকপ্ৰদ বিকাশৰ অভিলেখ ৰচনা কৰিছে।
আমাৰ ক্ৰমবৰ্ধমান অৰ্থনৈতিক শক্তিয়ে ভাৰত-পোলেণ্ড অংশীদাৰিত্বৰ বাবে নতুন সুযোগৰ সৃষ্টি কৰিছে। আৰু ভাৰত-ইউৰোপীয় ইউনিয়ন মুক্ত বাণিজ্য চুক্তিয়ে এই সুযোগসমূহক অধিক ব্যাপক কৰি তুলিছে। এই চুক্তি কাৰ্যকৰী হ’লে ভাৰতৰ পৰা পোলেণ্ডলৈ যন্ত্ৰপাতি, ৰাসায়নিক সামগ্ৰী, প্লাষ্টিক আৰু ইঞ্জিনিয়াৰিং সামগ্ৰী ৰপ্তানিৰ নতুন পথ মুকলি হ’ব। তদুপৰি ৰেলৱে আৰু গতিশীলতা, উন্নত উৎপাদন, খাদ্য সংসাধন আৰু জৈৱপ্ৰযুক্তিৰ দৰে খণ্ডসমূহত আমি পোলেণ্ডৰ পৰা নতুন বিনিয়োগ আকৰ্ষণ কৰিব পৰা হ’ম।
মই বিশেষভাৱে সুখী যে প্ৰধানমন্ত্ৰীয়ে এটা ডাঙৰ ব্যৱসায়িক প্ৰতিনিধি দলৰ সৈতে ভাৰতলৈ আহিছে। আমি বিশ্বাস কৰোঁ যে দুয়োখন দেশৰ কোম্পানীসমূহে মিলি বিশ্বৰ বাবে বিশ্বাসযোগ্য যোগান শৃংখলা গঢ়ি তুলিব আৰু ২০৩০ চনৰ ভিতৰত দ্বিপাক্ষিক বাণিজ্য দুগুণ কৰাৰ আমাৰ উমৈহতীয়া লক্ষ্যক বাস্তৱায়িত কৰিব।
বন্ধুসকল,
আজি আমি প্ৰতিৰক্ষা, মহাকাশ আৰু পাৰমাণৱিক শক্তিৰ ক্ষেত্ৰত সম্পৰ্ক সুদৃঢ় কৰাত সন্মতি প্ৰকাশ কৰিছোঁ। এই সকলোবোৰ কৌশলগত খণ্ডত আমি পোলেণ্ডৰ কোম্পানীসমূহক ভাৰতৰ সৈতে যৌথ বিকাশ আৰু যৌথ উৎপাদন কৰিবলৈ আমন্ত্ৰণ জনাইছোঁ।
গুৰুত্বপূৰ্ণ খনিজ পদাৰ্থ আৰু কয়লা গেছীকৰণতো আমি পোলেণ্ডৰ বিশেষজ্ঞতা লাভ কৰি নতুন অংশীদাৰিত্ব গঢ়ি তুলিম।
তথ্য প্ৰযুক্তি আৰু চাইবাৰ সুৰক্ষাৰ ক্ষেত্ৰত আমাৰ সম্পৰ্ক ইতিমধ্যে মজবুত। কেইবাখনো ভাৰতীয় তথ্য প্ৰযুক্তি কোম্পানীয়ে পোলেণ্ডত কাম কৰি আছে। এই সহযোগিতাক আগবঢ়াই লৈ আমি "ভাৰত-পোলেণ্ড ষ্টাৰ্ট-আপ ব্ৰীজ" স্থাপন কৰিবলৈ সন্মত হৈছোঁ।
আমি দুয়োখন দেশৰ যুৱক-যুৱতীসকলৰ মাজত প্ৰযুক্তিগত হেকাথনৰো আয়োজন কৰিম। এই পদক্ষেপসমূহে এ আই, চাইবাৰ, ফিন-টেক আৰু অন্যান্য উদীয়মান প্ৰযুক্তিত আমাৰ সহযোগিতাক নতুন গতি প্ৰদান কৰিব আৰু দুয়োখন দেশৰ যুৱ প্ৰজন্মৰ বাবে নতুন সুযোগৰ সৃষ্টি কৰিব।
বন্ধুসকল,
সাংস্কৃতিক আৰু জনসাধাৰণৰ মাজৰ ক্ৰমবৰ্ধমান সম্পৰ্কই আমাৰ সম্বন্ধৰ আটাইতকৈ ডাঙৰ শক্তি। পোলেণ্ডত সংস্কৃত অধ্যয়ন আৰু ভাৰততত্ত্বৰ এক চহকী পৰম্পৰা থকা দেখি আমি অত্যন্ত আনন্দিত।
ক্ৰাকোভ চহৰত আমি 'ইণ্ডিয়ান ষ্টাডিজ চেয়াৰ' স্থাপন কৰিছোঁ। আজি আমি সংস্কৃতি আৰু শিক্ষাৰ লগতে ক্ৰীড়া আৰু পৰ্যটনৰ ক্ষেত্ৰতো সহযোগিতা অধিক সুদৃঢ় কৰাৰ সিদ্ধান্ত লৈছোঁ।
বন্ধুসকল,
আজি আমি আঞ্চলিক আৰু বিশ্বব্যাপী উন্নয়নৰ বিষয়েও বিশদভাৱে আলোচনা কৰোঁ। ভাৰত আৰু পোলেণ্ড—দুয়োখন দেশেই গণতান্ত্ৰিক মূল্যবোধ আৰু আইনৰ শাসনৰ ওপৰত বিশ্বাস ৰাখে।
আমাৰ বিশ্বাস যে বিশ্বজনীন প্ৰশাসন প্ৰতিষ্ঠানসমূহক অধিক শক্তিশালী আৰু কাৰ্যকৰী কৰিবলৈ সংস্কাৰৰ প্ৰয়োজন।
ইউক্ৰেইনেই হওক বা পশ্চিম এছিয়াই হওক, ভাৰতে শান্তিৰ দিশত কৰা প্ৰতিটো অৰ্থপূৰ্ণ প্ৰচেষ্টাক সমৰ্থন কৰি যাব।
মান্যবৰ,
আমাৰ উমৈহতীয়া ইতিহাসত মানৱতা আৰু সহানুভূতিৰ গভীৰ ছাপ আছে। আৰু আমাৰ উমৈহতীয়া ভৱিষ্যতত উদ্ভাৱন আৰু প্ৰযুক্তি সহযোগিতাৰ অপাৰ সম্ভাৱনা আছে।
মই বিশ্বাস কৰোঁ যে আপোনাৰ এই ভ্ৰমণে ভাৰত-পোলেণ্ড কৌশলগত অংশীদাৰিত্বক নতুন শক্তি আৰু নতুন উচ্চতা প্ৰদান কৰিব। আকৌ এবাৰ, আপোনাক আৰু আপোনাৰ প্ৰতিনিধি দলটোক আন্তৰিক স্বাগতম জনাইছোঁ।
আপোনাক অশেষ ধন্যবাদ।
MJPS/SS/PRK/DB