പോസ്റ്റഡ് ഓണ്‍:
28 OCT 2026 8:23PM by PIB Thiruvananthpuram
ഫിലിപ്പീൻസിലെ സെബുവിൽ നടക്കുന്ന 13-ാമത് ആസിയാൻ പ്രതിരോധ മന്ത്രിമാരുടെ യോഗത്തോടനുബന്ധിച്ച് (എഡിഎംഎം-പ്ലസ്) രക്ഷാമന്ത്രി ശ്രീ രാജ്‌നാഥ് സിംഗ്, 2026 ഒക്ടോബർ 28-ന് സിംഗപ്പൂർ പ്രതിരോധ മന്ത്രി ചാൻ ചുൻ സിംഗുമായി ഫലപ്രദമായ ഉഭയകക്ഷി ചർച്ച നടത്തി. ഇരു രാജ്യങ്ങളും തമ്മിലുള്ള ആഴത്തിലുള്ള ചരിത്രപരമായ ബന്ധവും ശക്തമായ തന്ത്രപ്രധാന പങ്കാളിത്തവും കൂടിക്കാഴ്ചയിൽ എടുത്തുകാട്ടി. നിലവിലെ പ്രതിരോധ സഹകരണ സംരംഭങ്ങൾ അവലോകനം ചെയ്യുന്നതിനും ഭാവിയിൽ സഹകരണം വ്യാപിപ്പിക്കാവുന്ന മേഖലകൾ കണ്ടെത്തുന്നതിനും ഇരു നേതാക്കൾക്കും ഈ കൂടിക്കാഴ്ച അവസരമൊരുക്കി.
ഉഭയകക്ഷി പ്രതിരോധ സഹകരണത്തിൽ കൈവരിച്ച മികച്ച പുരോഗതിയിൽ ഇരു മന്ത്രിമാരും സംതൃപ്തി പ്രകടിപ്പിച്ചു. സംയുക്ത പ്രവർത്തനക്ഷമതയും പരസ്പര ധാരണയും മെച്ചപ്പെടുത്തുന്നതിനായി കരസേന, നാവികസേന, വ്യോമസേന എന്നിവ തമ്മിലുള്ള സംയുക്ത സൈനികാഭ്യാസങ്ങൾ കൂടുതൽ വിപുലീകരിക്കുന്നതിലായിരുന്നു ചർച്ചകൾ പ്രധാനമായും ശ്രദ്ധ കേന്ദ്രീകരിച്ചത്.
ആസിയാൻ്റെ കേന്ദ്രസ്ഥാനത്തിനും സ്വതന്ത്രവും തുറന്നതും ഏവരെയും ഉൾക്കൊള്ളുന്നതുമായ ഇൻഡോ-പസഫിക് മേഖലയ്ക്കുമുള്ള ഇന്ത്യയുടെ പ്രതിബദ്ധത രക്ഷാമന്ത്രി ആവർത്തിച്ചു. ഇന്ത്യയുടെ 'ആക്ട് ഈസ്റ്റ്' നയത്തിലെ സുപ്രധാന സ്തംഭമാണ് സിംഗപ്പൂരെന്ന് അദ്ദേഹം വ്യക്തമാക്കി.
പ്രതിരോധ വ്യവസായ, സാങ്കേതിക മേഖലകളിലെ സഹകരണം കൂടുതൽ ശക്തിപ്പെടുത്തുന്നതിനായി, 2027 ഫെബ്രുവരിയിൽ ബെംഗളൂരുവിൽ നടക്കാനിരിക്കുന്ന 'ഏറോ ഇന്ത്യ 2027'-ൽ പങ്കെടുക്കാൻ ചാൻ ചുൻ സിംഗിനെ ശ്രീ രാജ്‌നാഥ് സിംഗ് ഔദ്യോഗികമായി ക്ഷണിച്ചു. 2027-ലെ എഡിഎംഎം-പ്ലസ് അധ്യക്ഷപദവി ഏറ്റെടുക്കുന്ന സിംഗപ്പൂർ പ്രതിരോധ മന്ത്രിയെ രക്ഷാമന്ത്രി അഭിനന്ദിക്കുകയും അദ്ദേഹത്തിന് ആശംസകൾ നേരുകയും ചെയ്തു.
***