وزیر دفاع کی فلپائن میں آسیان وزرائے دفاع کے اجلاس پلس کے موقع پر اپنے جاپانی ہم منصب سے ملاقات

وزیر دفاع جناب راج ناتھ سنگھ اور جاپان کے وزیر دفاع جناب شنجیرو کوئزومی نے 28 اکتوبر 2026 کو فلپائن کے شہر سیبو میں آسیان وزرائے دفاع کے اجلاس پلس کے موقع پر ملاقات کی۔ دونوں وزرا نے اگست میں اپنی ملاقات کے بعد سے دوطرفہ دفاعی تعاون میں ہونے والی مسلسل پیش رفت کا خیرمقدم کیا اور ان امور پر اتفاقِ رائے کے مطابق تعاون آگے بڑھانے پر تبادلۂ خیال کیا، جن میں شامل ہیں:

• بحری سلامتی کے شعبے میں ٹھوس تعاون سے متعلق بات چیت میں پیش رفت ہوئی، جس کا مقصد دونوں ممالک کی تزویراتی اور عملی ضروریات کو پورا کرنا ہے۔ اس میں سمندری بارودی سرنگوں کا سراغ لگانے اور انہیں ناکارہ بنانے کی صلاحیتوں کو بہتر بنانا، نیز جاپان کی تکنیکی مہارت اور بھارت کی پیداواری صلاحیتوں سے فائدہ اٹھاتے ہوئے بحری جہازوں کی تیاری اور ڈیزائن کے شعبے میں مشترکہ طور پر کام کرنے کے امکانات تلاش کرنا شامل ہے۔ اس سلسلے میں بھارتی بحریہ کے نائب سربراہ کے جاپان کے دورے جیسے مواقع سے بھی مدد ملی ہے۔
• بھارت اور جاپان کی فضائی افواج کے درمیان تعاون کو مضبوط بنانے کے لیے جاری بات چیت میں پیش رفت ہوئی۔ یہ پیش رفت بھارت-جاپان فضائی مشق ’’ویر گارجین 26‘‘ کے دوران جاپان کی فضائی خود دفاعی فوج کے لڑاکا طیاروں کے پہلی بار بھارت آنے اور اس مشق کے ساتھ ہی جاپان کی فضائی خود دفاعی فوج کے سربراہ کے بھارت کے دورے کے بعد سامنے آئی ہے۔
• ٹوکیو میں بھارتی سفارت خانے میں بھارت-جاپان دفاعی صنعت فورم کا کامیابی کے ساتھ انعقاد عمل میں آیا، جس میں دونوں ممالک کی تقریباً 40 کمپنیوں نے شرکت کی۔

دونوں وزرا نے اس سال کے اواخر میں ٹوکیو میں جاپان-بھارت وزرائے خارجہ و دفاع کی چوتھی مشترکہ میٹنگ (2+2) اور جاپان-بھارت وزرائے دفاع کی میٹنگ منعقد کرنے کے لیے بات چیت کو تیز کرنے پر بھی اتفاق کیا۔

ملاقات کے بعد وزیر دفاع جناب راج ناتھ سنگھ نے سوشل میڈیا پلیٹ فارم ایکس پر ایک پوسٹ میں کہا کہ بات چیت کے دوران بھارت-جاپان خصوصی تزویراتی اور عالمی شراکت داری کو مزید مضبوط بنانے کے نئے امکانات تلاش کیے گئے۔ انہوں نے مزید کہا کہ آزاد، کھلے اور پُرامن ہند-بحرالکاہل خطے کے لیے بھارت اور جاپان کا مشترکہ عزم بدستور نہایت اہم ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 (ش ح ۔رک)

U. No.6841