پوسٹ کرنے کی تاریخ:
26 OCT 2026 6:38PM by PIB Delhi
سڑک نقل و حمل اور قومی شاہراہوں کی وزارت نے سنٹرل موٹر وہیکل رولز، 1989 میں ترمیم کا نوٹیفکیشن جاری کیا ہے، جس کا مقصد ای85 اور دیگر زیادہ ایتھنول والے ایندھن استعمال کرنے کی صلاحیت رکھنے والی فلیکس فیول گاڑیوں کو اپنانے میں معاونت فراہم کرنا ہے۔ ان ترامیم کے تحت اخراج سے متعلق سرٹیفیکیشن کی دفعات کو اپ ڈیٹ کرتے ہوئے ای85 کے ساتھ ای100 کو بھی واضح طور پر شامل کیا گیا ہے۔ ان ایندھن کے لیے سرٹیفائیڈ گاڑیوں کو اپنی متعلقہ زمرے کے لیے لاگو اخراج اور حفاظتی تقاضوں کو پورا کرنا ہوگا۔
ای85 پٹرول اور ایتھنول کا ایسا مرکب ہے جس میں حجم کے اعتبار سے 85 فیصد تک ایتھنول ہوتا ہے۔ حرف ’ای‘ ایتھنول کو ظاہر کرتا ہے، جبکہ عدد ایندھن میں اس کی مقدار کی نشاندہی کرتا ہے۔
فلیکس فیول ٹیکنالوجی پہلے ہی برازیل اور امریکہ جیسے ممالک میں استعمال کی جا رہی ہے۔ یہ گاڑیاں خصوصی طور پر ایتھنول اور پٹرول کے مختلف مرکبات پر ایک ہی ایندھن ٹینک کے ذریعے چلنے کے لیے تیار کی جاتی ہیں۔ گاڑی کے ڈیزائن اور سرٹیفیکیشن کے مطابق یہ حد ای85 یا ای100 تک ہو سکتی ہے، جس میں ای100 بنیادی طور پر ایتھنول پر مشتمل ایندھن ہے۔ ایندھن کے نظام کے اجزا اور مواد کو منظور شدہ مرکبات کے مطابق منتخب کیا جاتا ہے، جبکہ انجن کنٹرولز خودکار طور پر ایندھن کی ترکیب کے مطابق گاڑی کے آپریشن کو ایڈجسٹ کرتے ہیں۔ اس سے صارفین کو صنعت کار کی جانب سے سرٹیفائیڈ اور اعلان کردہ حد کے اندر مختلف ایندھن منتخب کرنے کی سہولت ملتی ہے۔
ملک میں تیار کردہ ایتھنول کے زیادہ استعمال سے درآمد شدہ خام تیل پر انحصار کم کرنے میں مدد مل سکتی ہے۔ مناسب طور پر ڈیزائن کی گئی گاڑیوں میں ایتھنول کا استعمال بعض اخراجی آلودگیوں کو کم کرنے اور ایندھن کی تیاری اور استعمال کے دوران گرین ہاؤس گیسوں کے اخراج کو کم کرنے میں بھی مددگار ہو سکتا ہے۔ تاہم اس کا انحصار ایتھنول کی تیاری میں استعمال ہونے والے خام مال اور پیداواری عمل پر ہوتا ہے۔
ای85/ای100 صرف ان گاڑیوں کے لیے ہے جو خاص طور پر اسے استعمال کرنے کے لیے ڈیزائن اور سرٹیفائیڈ کی گئی ہیں اور عام طور پر مارکیٹ میں دستیاب یا اب تک استعمال ہونے والی دیگر گاڑیوں پر اس کا اطلاق نہیں ہوگا۔ کسی گاڑی کا صرف ای10 یا ای20 کے ساتھ مطابقت رکھنا ای85 کے استعمال کے لیے موزوں ہونے کی ضمانت نہیں دیتا۔ اس نوٹیفکیشن کے تحت موجودہ گاڑیوں کے مالکان کو نہ تو فی الحال اور نہ ہی مستقبل میں ای85 استعمال کرنے یا اپنی گاڑیوں میں ترمیم کرنے کی ضرورت ہے۔ گاڑی مالکان کو ایندھن کا انتخاب کرتے وقت اپنی گاڑی پر موجود فیول کمپٹیبلٹی اسٹیکر چیک کرنا چاہیے اور مالک کے مینوئل میں صنعت کار کی ہدایات پر عمل کرنا چاہیے۔
نوٹیفکیشن میں بایو ڈیزل سے متعلق دفعات کو بھی اپ ڈیٹ کیا گیا ہے اور تکنیکی اصلاحات کی گئی ہیں۔ یہ قواعد سرکاری گزٹ میں شائع ہونے کی تاریخ سے نافذ العمل ہوں گے۔
************
ش ح ۔ م د ۔ م ص
(U :6724 )