সৰ্ব-মহিলা প্ৰশিক্ষক পাঠ্যক্ৰমৰ ভাষণত ভাৰতীয় ক্ৰীড়াত মহিলাসকলৰ শক্তিশালী অৱস্থানৰ বাবে আহ্বান কেন্দ্ৰীয় ৰাজ্য মন্ত্ৰী ৰক্ষা খাড়ছেৰ

 কেন্দ্ৰীয় যুৱ পৰিক্ৰমা আৰু ক্ৰীড়া ৰাজ্য মন্ত্ৰী ৰক্ষা খাড়ছেই শনিবাৰে নতুন দিল্লীৰ দিল্লী লন টেনিছ এছ’চিয়েশ্যন (ডিএলটিএ) টেনিছ ষ্টেডিয়ামত সৰ্বভাৰতীয় টেনিছ এছ’চিয়েশ্যনৰ (এআইটিএ) এচিই ২০৩২ পদক্ষেপৰ অধীনত সৰ্ব-মহিলা প্ৰশিক্ষক পাঠ্যক্ৰমত ভাষণ দিয়ে। তেওঁ তৃণমূল পৰ্যায়ৰ অংশগ্ৰহণ আৰু প্ৰশিক্ষণৰ পৰা উচ্চ প্ৰদৰ্শন প্ৰতিযোগিতা আৰু নেতৃত্বলৈকে ক্ৰীড়াত মহিলাসকলৰ বাবে সুযোগ সম্প্ৰসাৰণৰ প্ৰয়োজনীয়তাৰ ওপৰত গুৰুত্ব আৰোপ কৰে।

ডিএলটিএৰ অধ্যক্ষ শ্ৰী ৰোহিত ৰাজপাল, এআইটিএৰ প্ৰশিক্ষণ সঞ্চালক শ্ৰীকৱলজিৎ সিং, ডেভিছ কাপৰ প্ৰশিক্ষক শ্ৰী আশুতোষ সিং, এআইটিএৰ সচিব শ্ৰী সুন্দৰ আয়াৰ, এআইটিএৰ কোষাধ্যক্ষ শ্ৰী দীনেশ অৰোৰা আৰু বি কে জে চি কাপৰ সৈতে জড়িত প্ৰশিক্ষক ৰাধিকা কানিতকাৰ অনুষ্ঠানত উপস্থিত থাকে । প্ৰশিক্ষক আৰু ক্ৰীড়া পেছাদাৰীসকলেও প্ৰশিক্ষকৰ শিক্ষা, তৃণমূল পৰ্যায়ৰ টেনিছ আৰু খেলুৱৈৰ বিকাশ শক্তিশালী কৰাৰ সন্দৰ্ভত দৃষ্টিভংগী বিনিময় কৰে।
যুৱ পৰিক্ৰমা আৰু ক্ৰীড়া মন্ত্ৰালয় (এম ৱাই এ এছ) আৰু ভাৰতীয় ক্ৰীড়া কৰ্তৃপক্ষ (ছাই)ৰ সমৰ্থনত এই পদক্ষেপৰ লক্ষ্য হৈছে প্ৰশিক্ষকৰ শিক্ষা, প্ৰতিভা চিনাক্তকৰণ আৰু উচ্চ প্ৰদৰ্শন প্ৰশিক্ষণৰ মাজৰ সম্পৰ্ক শক্তিশালী কৰা।
তৃণমূল পৰ্যায়ৰ পৰা উচ্চ প্ৰদৰ্শনলৈ মহিলাৰ অংশগ্ৰহণ সম্প্ৰসাৰণ 

কেন্দ্ৰীয় ৰাজ্য মন্ত্ৰী ৰক্ষা খাড়ছেই গুৰুত্ব আৰোপ কৰি কয় যে প্ৰতিভা সোনকালে চিনাক্ত কৰা আৰু মহিলা তথা কন্যাসকলে যাতে যোগ্য প্ৰশিক্ষক, উপযুক্ত আন্তঃগাঁথনি, নিয়মীয়া প্ৰতিযোগিতা আৰু বহনক্ষম সমৰ্থন লাভ কৰে সেয়া নিশ্চিত কৰাৰ ওপৰত ভাৰতৰ আগশাৰীৰ ক্ৰীড়া ৰাষ্ট্ৰত পৰিণত হোৱাৰ উচ্চাকাংক্ষা নিৰ্ভৰ কৰে।
 তেওঁ উল্লেখ কৰে যে গ্ৰাম্য, জনজাতীয়, অৰ্ধ-নগৰীয়া আৰু নগৰীয়া সম্প্ৰদায়সমূহত ক্ৰীড়া প্ৰতিভা বিদ্যমান। তেওঁ উল্লেখ কৰে যে ভাৰতৰ প্ৰতিভাৰ সম্প্ৰসাৰণৰ লগতে ৰাষ্ট্ৰীয় তথা আন্তঃৰাষ্ট্ৰীয় প্ৰতিযোগিতাত  সম্ভাৱনা শক্তিশালী কৰাৰ বাবে অংশগ্ৰহণৰ সম্প্ৰসাৰণ অতি গুৰুত্বপূৰ্ণ। তেওঁ লগতে গুৰুত্ব আৰোপ কৰে যে মহিলাসকলৰ বাবে সুযোগবোৰ খেলপথাৰৰ বাহিৰেও প্ৰশিক্ষণ, ক্ৰীড়া বিজ্ঞান, প্ৰশাসন, অনুষ্ঠান ব্যৱস্থাপনা আৰু অন্যান্য পেছাদাৰী ভূমিকালৈকে সম্প্ৰসাৰিত হ’ব লাগিব।

এই আলোচনাত সংগঠিত ক্ৰীড়াৰ প্ৰৱেশাধিকাৰ সম্প্ৰসাৰণৰ ক্ষেত্ৰত খেলো ইণ্ডিয়া ৰূপৰেখাৰ অধীনত এএছএমআইটিএ মহিলা লীগৰ ভূমিকাৰ ওপৰত আলোকপাত কৰা হয়। ২০২১ চনত আৰম্ভ হোৱা লীগসমূহে তিনি লাখৰো অধিক মহিলাক সামৰি লোৱাৰ জৰিয়তে অঞ্চল আৰু সম্প্ৰদায়ৰ মাজত অংশগ্ৰহণ তথা প্ৰতিযোগিতাৰ সুযোগ সৃষ্টি কৰিছে।

 সম্ভাৱনাময় খেলুৱৈসকলক উচ্চ পৰ্যায়ৰ প্ৰদৰ্শনৰ দিশত আগবাঢ়ি যোৱাত সহায় কৰিবলৈ খেলো ইণ্ডিয়া কেন্দ্ৰ, স্বীকৃতিপ্ৰাপ্ত একাডেমী আৰু উৎকৃষ্টতা কেন্দ্ৰৰ সৈতে তৃণমূল পৰ্যায়ৰ পদক্ষেপসমূহক সংযোগ কৰাৰ প্ৰয়োজনীয়তাৰ ওপৰতো গুৰুত্ব আৰোপ কৰা হৈছে।

 শক্তিশালী মহিলা প্ৰশিক্ষণ কৰ্মচাৰী গোট গঠন 
এই পাঠ্যক্ৰমৰ মূল লক্ষ্য আছিল যোগ্য মহিলা প্ৰশিক্ষকৰ সংখ্যা বৃদ্ধি কৰা আৰু সমগ্ৰ ৰাজ্যতে প্ৰশিক্ষণ শিক্ষা  তথা প্ৰমাণপত্ৰৰ সুলভতা সম্প্ৰসাৰিত কৰা। প্ৰশিক্ষণত মহিলাৰ অধিক প্ৰতিনিধিত্বই খেলুৱৈৰ বিকাশৰ মান আৰু পৰিসৰ শক্তিশালী কৰাৰ লগতে কন্যাসকলক ক্ৰীড়াত অংশগ্ৰহণ কৰিবলৈ উৎসাহিত কৰাত সহায় কৰিব পাৰে। 
আইটা এচিই ২০৩২ পদক্ষেপে প্ৰতিভা চিনাক্তকৰণ আৰু অভিজাত খেলুৱৈৰ বিকাশৰ সৈতে প্ৰশিক্ষক শিক্ষাক সংযোগ কৰাৰ চেষ্টা কৰিছে। অংশগ্ৰহণকাৰীসকলে প্ৰতিযোগিতামূলক ক্ৰীড়াৰ চাহিদাৰ বাবে প্ৰশিক্ষক প্ৰস্তুত কৰাত ব্যৱহাৰিক প্ৰশিক্ষণ, পৰামৰ্শদাতা আৰু অবিৰত পেছাদাৰী বিকাশৰ গুৰুত্বৰ ওপৰত আলোকপাত কৰে। 
আলোচনাবোৰত উচ্চ-প্ৰদৰ্শন প্ৰশিক্ষণ আৰু বিশেষ প্ৰশিক্ষণ ক্ষমতাও সামৰি লোৱা হয়। উচ্চ-প্ৰদৰ্শন প্ৰশিক্ষণৰ সৈতে জড়িত শ্বেৰিকা বৰ্মনে এই ক্ষেত্ৰত দক্ষতা বিকাশৰ গুৰুত্বৰ ওপৰত আলোকপাত কৰে। কাৰ্যসূচীত বেংগালুৰুত ১০ ডিচেম্বৰৰ পৰা আৰম্ভ হ’বলগীয়া এটা পাঠ্যক্ৰম অনুষ্ঠিত কৰাৰ সম্ভাৱনাৰ বিষয়েও আলোচনা কৰা হয়।  এই চি এইচ পি পাঠ্যক্ৰমৰ বাবে ১৬ জন খেলুৱৈ বাছনি কৰা হ'ব।

প্ৰশিক্ষণ আৰু খেলুৱৈ উন্নয়ন সন্দৰ্ভত  আঞ্চলিক দৃষ্টিভংগী 
অংশগ্ৰহণকাৰীসকলে তৃণমূল পৰ্যায়ৰ টেনিছক শক্তিশালী কৰা আৰু প্ৰশিক্ষণ অনুশীলন উন্নত কৰাৰ ওপৰত নিজ নিজ অঞ্চলৰ অন্তৰ্দৃষ্টি বিনিময় কৰে। 
তামিলনাডুৰ প্ৰীতি শ্ৰীনিবাসনে কেন্দ্ৰীভূত প্ৰশিক্ষণৰ মনোযোগ আৰু তৃণমূল পৰ্যায়ৰ টেনিছ বিকাশৰ গুৰুত্বৰ ওপৰত আলোকপাত কৰে। অৰুণাচল প্ৰদেশৰ মাৰ্নু ৰিবাই খেলুৱৈসকলৰ সামগ্ৰিক বিকাশ আৰু খেলুৱৈসকলে তেওঁলোকৰ সামৰ্থ্য গঢ়ি তোলাৰ লগে লগে ক্ৰীড়া উপভোগ কৰাটো নিশ্চিত কৰাৰ গুৰুত্বৰ ওপৰত আলোকপাত কৰে। জম্মু-কাশ্মীৰৰ হৰজোত কৌৰে বিশেষকৈ নৱাগতসকলৰ বাবে লেভেল ৱান ফিটনেছ কাৰ্যসূচী অধিক ব্যাপক কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। 
এই আলোচনাসমূহে বিকাশৰ বিভিন্ন পৰ্যায়ত আৰু বিভিন্ন আঞ্চলিক পৰিৱেশত খেলুৱৈসকলৰ প্ৰয়োজনীয়তা পূৰণ কৰা প্ৰশিক্ষণ আৰু সুস্থতা কাৰ্যসূচীৰ গুৰুত্বৰ ওপৰত আলোকপাত কৰে।

ক্ৰীড়াত নিৰাপদ আৰু বহনক্ষম কেৰিয়াৰ সৃষ্টি কৰা 

এই পাঠ্যক্ৰমত প্ৰশিক্ষণ, সুস্বাস্থ্যৰ প্ৰশিক্ষণ, ক্ৰীড়া বিজ্ঞান, অনুষ্ঠান ব্যৱস্থাপনা আৰু প্ৰশাসনকে ধৰি ক্ৰীড়াত পেছাদাৰী সুযোগৰ বৰ্ধিত পৰিসৰৰ ওপৰতো আলোকপাত কৰা হয়। অংশগ্ৰহণকাৰীসকলে এই ক্ষেত্ৰসমূহত প্ৰৱেশ কৰিবলৈ আৰু নেতৃত্বৰ ভূমিকালৈ আগবাঢ়ি যাবলৈ প্ৰয়োজনীয় দক্ষতা আৰু অৰ্হতাৰে অধিক মহিলাক সজ্জিত কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে।

 মহিলাৰ অংশগ্ৰহণ অব্যাহত ৰাখিবলৈ নিৰাপদ ক্ৰীড়া পৰিৱেশ, খেলুৱৈৰ কল্যাণ আৰু পেছাদাৰী দায়বদ্ধতাক অত্যাৱশ্যকীয় হিচাপে চিনাক্ত কৰা হয়। প্ৰশিক্ষক, ক্ৰীড়া সংস্থা আৰু পৰিচালনা সমিতিৰ সুৰক্ষা, আচৰণ আৰু খেলুৱৈৰ সুৰক্ষাৰ মান বজাই ৰখাৰ  যৌথ দায়িত্ব আছে।
 আইটা এচিই ২০৩২-ৰ অধীনত  সৰ্ব-মহিলা প্ৰশিক্ষক পাঠ্যক্ৰমত ভাৰতীয় ক্ৰীড়াত মহিলাৰ অংশগ্ৰহণ আৰু নেতৃত্ব শক্তিশালী কৰাৰ ব্যাপক প্ৰচেষ্টা প্ৰতিফলিত কৰা হৈছে। প্ৰশিক্ষণৰ সুযোগ সম্প্ৰসাৰণ কৰাৰ লগতে তৃণমূল পৰ্যায়ৰ প্ৰতিভাৰ সমৰ্থন কৰাৰ উপৰি উচ্চ-প্ৰদৰ্শন ক্ৰীড়াৰ পথ উন্নত কৰাৰ জৰিয়তে এই পদক্ষেপটোৱে ২০৩৬ চনৰ বাবে ভাৰতৰ ক্ৰীড়াৰ উচ্চাকাংক্ষা আৰু বিকশিত ভাৰতৰ দৃষ্টিভংগীলৈ অৰিহণা যোগাব ।
 

***
 

Ayushman Kumar/DD