پوسٹ کرنے کی تاریخ:
23 OCT 2026 3:20PM by PIB Delhi
فضائیہ کے سربراہ (سی اے ایس) ایئر چیف مارشل اے پی سنگھ نے 20 اکتوبر 2026 کو فضائیہ اکیڈمی، ڈنڈیگل میں نیشنل کیڈٹ کور (این سی سی) کی سینئر وِنگ کی کیڈٹ جکّولا تیجسوی ریڈی کے ساتھ طیارے میں پرواز کی۔ یہ پرواز ایئر چیف کی اپنے پہلے پرواز کے انسٹرکٹر کے ساتھ آخری پرواز سے قبل انجام دی گئی۔
پرواز سے قبل کی تیاریوں کے تحت کیڈٹ کو طیارے کے کاک پٹ سے واقف کرایا گیا، حفاظتی امور کے بارے میں ہدایات دی گئیں، ہنگامی صورتِ حال میں طیارے سے باہر نکلنے کے طریقۂ کار سے آگاہ کیا گیا اور طبی معائنہ کیا گیا۔ کرن طیارے میں سوار ہونے سے پہلے فضائیہ کے سربراہ نے انھیں طیارے کی خصوصیات، اس کے اہم حصوں، انجن کے کام کرنے کے طریقے، کاک پٹ میں اختیار کیے جانے والے طریقۂ کار اور حفاظتی نظاموں کے بارے میں بتایا۔ پرواز کے دوران انھوں نے مختلف فضائی کرتبوں، پرواز کے زاویوں اور تیز موڑ لینے کے طریقوں کی وضاحت کی۔ انھوں نے کیڈٹ کو اپنی رہنمائی میں ان کرتبوں کی مشق کرنے کا موقع بھی فراہم کیا۔
اس پرواز کے ذریعے کیڈٹ تیجسوی کو ہوابازی کے شعبے میں عملی تجربہ حاصل ہوا اور انھیں ہوا باز بننے کے اپنے خواب کو پورا کرنے کی ترغیب ملی۔ اس موقع نے این سی سی کے فضائی ونگ کے کیڈٹس کے لیے ہوابازی کے شعبے میں تجربہ حاصل کرنے اور دفاعی افواج میں اپنے مستقبل کے پیشے کے امکانات تلاش کرنے کے دستیاب مواقع کو بھی اجاگر کیا۔
نیشنل کیڈٹ کور کیڈٹس میں مہارتوں، خود اعتمادی اور قائدانہ صلاحیتوں کو فروغ دینے کے لیے اپنی تربیتی سرگرمیوں کو مسلسل وسعت دے رہی ہے۔ وِکست بھارت @2047 کے تصور کے مطابق، اس کا مقصد نوجوانوں کو اپنی صلاحیتیں نکھارنے اور قوم کی تعمیر و ترقی میں اپنا کردار ادا کرنے کے مواقع فراہم کرنا ہے۔
***
ش ح۔ش ت ۔ م الف
U. No- 6572