পোষ্ট কৰা হৈছে:
22 OCT 2026 1:47PM by PIB Guwahati
ভাৰতৰ উপ-ৰাষ্ট্ৰপতি শ্ৰী চি পি ৰাধাকৃষ্ণনে আজি নতুন দিল্লীৰ বিজ্ঞান ভৱনত ভাৰতৰ আইন আয়োগে আয়োজন কৰা ‘সমবায় ফেডাৰেলিজম আৰু আইন সংস্কাৰঃ ৰাষ্ট্ৰীয় আৰু ৰাজ্যিক দৃষ্টিভংগী’ সন্মিলন উদ্বোধন কৰে।
সমাৱেশত সম্বোধন কৰি উপ-ৰাষ্ট্ৰপতিয়ে কয় যে ভাৰতৰ আটাইতকৈ ডাঙৰ শক্তি হৈছে বৈচিত্ৰ্যৰ মাজত ঐক্য, য’ত সংবিধানে ৰাজ্যসমূহৰ দায়িত্ব আৰু বৈধ স্বায়ত্ততাৰ সৈতে ৰাষ্ট্ৰৰ শক্তিৰ ভাৰসাম্য বজাই ৰাখিবলৈ আন্তঃগাঁঠনি প্ৰদান কৰিছে। তেওঁ গুৰুত্ব আৰোপ কৰি কয় যে ভাৰতীয় ফেডাৰেলিজমৰ প্ৰকৃত শক্তি হৈছে উমৈহতীয়া ৰাষ্ট্ৰীয় উদ্দেশ্যৰ দিশত কাম কৰাৰ সময়ত বৈচিত্ৰ্যক সন্মান জনোৱা।
সহযোগিতামূলক আৰু প্ৰতিযোগিতামূলক ফেডাৰেলিজমৰ গুৰুত্বত আলোকপাত কৰি উপ-ৰাষ্ট্ৰপতিয়ে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত 'টিম ইণ্ডিয়া' দৃষ্টিভংগীয়ে কেন্দ্ৰ আৰু ৰাজ্যবোৰৰ মাজত পৰামৰ্শ, সমন্বয় আৰু অংশীদাৰী দায়িত্বৰ আহ্বান জনায়। তেওঁ কয় যে ৰাজনৈতিক পাৰ্থক্য কেতিয়াও বৃহত্তৰ জনস্বার্থৰ বাবে একেলগে কাম কৰাৰ পথত বাধা হ’ব নালাগে।
শ্ৰী চি পি ৰাধাকৃষ্ণনে ২০৪৭ চনত বিকশিত ভাৰতৰ লক্ষ্যত উপনীত হ'বলৈ আইনী সংস্কাৰত বিশেষ গুৰুত্ব আৰোপ কৰি কয় যে উন্নয়নক সুদৃঢ় আইন, স্বচ্ছ প্ৰতিষ্ঠান, দক্ষ প্ৰশাসন আৰু সকলোৰে বাবে ন্যায়ৰ দ্বাৰা সমৰ্থন কৰিব লাগিব।
ভাৰতৰ আইন ব্যৱস্থাৰ আধুনিকীকৰণৰ দিশত গুৰুত্বপূৰ্ণ পদক্ষেপ হিচাপে যোৱা বাৰ বছৰত ঔপনিৱেশিক যুগৰ ৩খন অপৰাধমূলক আইন সলনি কৰা আৰু ১৭০০ ৰো অধিক অপ্রচলিত আইন বাতিল কৰাৰ বিষয়ত আলোকপাত কৰে উপ-ৰাষ্ট্ৰপতিয়ে। তেওঁ ৰাজ্যিক আইন আয়োগসমূহক জীৱন ধাৰণৰ সুগমতা আৰু দক্ষ প্ৰশাসনৰ প্ৰসাৰৰ বাবে পুৰণি আইনসমূহৰ সংশোধন বা বাতিল কৰিব পৰাকৈ ব্যৱস্থা চিনাক্ত আৰু পৰামৰ্শ দিবলৈ আহ্বান জনায়।
আইন সংস্কাৰত সহযোগিতামূলক ফেডাৰেলিজমৰ অৰ্থ প্ৰতিটো বিষয়ত অনৈক্য নহয় বুলি মন্তব্য কৰি উপ-ৰাষ্ট্ৰপতিয়ে কয় যে কেন্দ্ৰ আৰু ৰাজ্যসমূহে একেলগে কাম কৰিব লাগিব যাতে তেওঁলোকৰ সাংবিধানিক দায়িত্ব একত্ৰিত হয়। তেওঁ লগতে ৰাজ্যসমূহৰ নিৰ্দিষ্ট প্ৰয়োজন পূৰণৰ বাবে বৈধ সুযোগ ৰক্ষা কৰাটো গুৰুত্ব দিয়ে। তেওঁ আন্তঃৰাজ্যিক পৰামৰ্শ, সৰ্বশ্ৰেষ্ঠ অনুশীলনৰ আদান-প্ৰদান আৰু পুৰণি আইনসমূহৰ পদ্ধতিগত পৰ্যালোচনাৰ জৰিয়তে ভাৰতৰ আইন আয়োগ, ৰাজ্যিক আইন আয়োগ আৰু ৰাজ্যিক আইন বিভাগসমূহৰ মাজত শক্তিশালী সমন্বয়ৰ আহ্বান জনায়।
সংসদত স্থাপন কৰা চেঙ্গলক ধৰ্মীয় কৰ্তৃত্ব আৰু নৈতিক শাসনৰ প্ৰতীক হিচাপে উল্লেখ কৰি শ্ৰী চি পি ৰাধাকৃষ্ণনে সুশাসন আৰু আইনৰ শাসনৰ আনুগত্যৰ বাবে তামিল সাধু-কবি থিৰুভাল্লুভাৰৰ কালজয়ী প্রজ্ঞাৰ প্ৰয়োগৰ আহ্বান জনায়। তেওঁ গুৰুত্ব আৰোপ কৰি কয় যে কেৱল ক্ষমতাৰ প্ৰয়োগ নহয়, তাৰ পৰিৱৰ্তে সুশাসন হৈছে স্থায়ী সফলতা আৰু সমৃদ্ধিৰ ভেটি।
উপ-ৰাষ্ট্ৰপতিয়ে আশা প্ৰকাশ কৰে যে সন্মিলনখনে এক সুসংগত, দায়বদ্ধ আৰু নাগৰিক-কেন্দ্ৰিক আইনী আন্তঃগাঁথনি নিৰ্মাণৰ দিশত দৃঢ় আৰু কাৰ্যকৰী পৰামৰ্শ প্ৰদান কৰিব।
এই অনুষ্ঠানত উপস্থিত বিশিষ্ট ব্যক্তিসকলৰ ভিতৰত আছিল আইন আৰু ন্যায় বিভাগৰ কেন্দ্ৰীয় ৰাজ্যিক মন্ত্ৰী (স্বতন্ত্ৰ) শ্ৰী অৰ্জুন ৰাম মেঘৱাল, ভাৰতৰ আইন আয়োগৰ অধ্যক্ষ ন্যায়াধীশ দীনেশ মহেশ্বৰী, ভাৰতৰ আইন আয়োগৰ সদস্য সচিব ডাঃ অঞ্জু ৰথী ৰাণা আৰু ভাৰতৰ আইন আয়োগৰ সদস্য অধ্যাপক ডি পি বাৰ্মা।
***
PR/ASM/VMJ/PK