ಭಾರತದ ಸಾಂಪ್ರದಾಯಿಕ ವೈದ್ಯಕೀಯ ಪದ್ಧತಿಗಳಲ್ಲಿ ಪ್ರಮಾಣೀಕರಣವನ್ನು ಉತ್ತೇಜಿಸುವ ಪ್ರಮುಖ ಪ್ರಯತ್ನವಾಗಿ, ಭಾರತೀಯ ಮಾನಕ ಬ್ಯೂರೋದ 'ಆಯುಷ್' ಇಲಾಖೆಯು ಆಯುರ್ವೇದ, ಯೋಗ ಮತ್ತು ಸೋವಾ-ರಿಗ್ಪ ಪ್ರಮಾಣೀಕರಣದ ಕುರಿತು ಎರಡು ರಾಷ್ಟ್ರೀಯ ಕಾರ್ಯಕ್ರಮಗಳನ್ನು ನಡೆಸಿತು. ಸಾಂಪ್ರದಾಯಿಕ ಪರಂಪರೆಯನ್ನು ವೈಜ್ಞಾನಿಕ ಗುಣಮಟ್ಟ ನಿಯಂತ್ರಣದೊಂದಿಗೆ ಸಂಯೋಜಿಸುವ ಮೂಲಕ, ಗ್ರಾಹಕರ ನಂಬಿಕೆಯನ್ನು ಹೆಚ್ಚಿಸುವುದು ಮತ್ತು ಆಯುಷ್ ಕ್ಷೇತ್ರಕ್ಕೆ ಅಂತಾರಾಷ್ಟ್ರೀಯ ಮಾನ್ಯತೆಯನ್ನು ತರುವುದು ಬಿಐಎಸ್‌ನ ಗುರಿಯಾಗಿದೆ. ಈ ದೇಶವ್ಯಾಪಿ ಅಭಿಯಾನವು ಪ್ರಮುಖ ಸಂಶೋಧಕರು, ಉದ್ಯಮದ ಹಿರಿಯರು, ಶೈಕ್ಷಣಿಕ ನಾಯಕರು ಮತ್ತು ವೃತ್ತಿಪರರು ಸೇರಿದಂತೆ 600 ಕ್ಕೂ ಹೆಚ್ಚು ಪ್ರಮುಖ ಪಾಲುದಾರರನ್ನು ಒಂದೆಡೆ ತಂದಿತು:

ಪ್ರಗತಿ 2026: ಆಯುರ್ವೇದ ಮತ್ತು ಯೋಗದಲ್ಲಿ ಪ್ರಮಾಣೀಕರಣ ಕುರಿತ ರಾಷ್ಟ್ರೀಯ ವಿಚಾರಸಂಕಿರಣ

ಕರ್ನಾಟಕದ ಬೆಳಗಾವಿಯಲ್ಲಿ 'ಕೆಎಲ್‌ಇ ಶ್ರೀ ಬಿಎಮ್‌ಕೆ ಆಯುರ್ವೇದ ಮಹಾವಿದ್ಯಾಲಯ' ಮತ್ತು 'ಕೆಎಲ್‌ಇ ಉನ್ನತ ಶಿಕ್ಷಣ ಮತ್ತು ಸಂಶೋಧನಾ ಅಕಾಡೆಮಿ' ಸಹಯೋಗದೊಂದಿಗೆ ಬಿಐಎಸ್ ಆಯೋಜಿಸಿದ್ದ 'ಪ್ರಗತಿ 2026' ವಿಚಾರಸಂಕಿರಣವು ಆಯುರ್ವೇದ ಮತ್ತು ಯೋಗ ಕ್ಷೇತ್ರಗಳನ್ನು ಬಲಪಡಿಸುವಲ್ಲಿ ಭಾರತೀಯ ಪ್ರಮಾಣಗಳ ಪಾತ್ರವನ್ನು ಚರ್ಚಿಸಲು 600 ಪ್ರತಿನಿಧಿಗಳನ್ನು ಒಂದೆಡೆ ಸೇರಿಸಿತು. ಬಿಐಎಸ್‌ನ ವಿಜ್ಞಾನಿ-ಇ ಮತ್ತು ಮುಖ್ಯಸ್ಥರು (ಆಯುಷ್) ಶ್ರೀಮತಿ ಸೃಷ್ಟಿ ದೀಕ್ಷಿತ್ ಅವರು ಭಾರತೀಯ ಪ್ರಮಾಣಗಳನ್ನು ರೂಪಿಸುವಲ್ಲಿ ಬಿಐಎಸ್‌ನ ಕಾರ್ಯವೈಖರಿ ಮತ್ತು 'ಐಎಸ್‌ಒ' (ISO) ಮೂಲಕ ಜಾಗತಿಕ ಪ್ರಮಾಣೀಕರಣದಲ್ಲಿ ಭಾರತದ ಪಾತ್ರವನ್ನು ವಿಸ್ತರಿಸುತ್ತಿರುವ ಬಗ್ಗೆ ಬೆಳಕು ಚೆಲ್ಲಿದರು. ವಿಚಾರಸಂಕಿರಣದ ಸಮಯದಲ್ಲಿ, ಸುಸ್ಪಷ್ಟವಾಗಿ ವ್ಯಾಖ್ಯಾನಿಸಲಾದ ಪ್ರಮಾಣಗಳು ಗುಣಮಟ್ಟದ ಭರವಸೆ, ರೋಗಿಗಳ ಸುರಕ್ಷತೆ, ವಿಶ್ವಾಸಾರ್ಹ ಸಂಶೋಧನೆ ಮತ್ತು ಪರಿಣಾಮಕಾರಿ ನಿಯಂತ್ರಣಕ್ಕೆ ಅತ್ಯಗತ್ಯ ಎಂದು ಗಣ್ಯರು ಒತ್ತಿಹೇಳಿದರು. ವಿಚಾರಸಂಕಿರಣದಲ್ಲಿ ಚರ್ಚಿಸಲಾದ ಪ್ರಮುಖ ವಿಷಯಗಳು:

• ಪ್ರಮಾಣೀಕೃತ ಅಭ್ಯಾಸ ಮತ್ತು ಶಿಕ್ಷಣ: ಯೋಗ ಮತ್ತು ಆಯುರ್ವೇದದಲ್ಲಿ ಏಕರೂಪದ ಪರಿಭಾಷೆ, ಶೈಕ್ಷಣಿಕ ಮಾನದಂಡಗಳು ಮತ್ತು ಕ್ಲಿನಿಕಲ್ ಮಾರ್ಗಸೂಚಿಗಳ ಅಗತ್ಯವನ್ನು ಎತ್ತಿಹಿಡಿಯುವುದು.
• ಉದ್ಯಮ ಮತ್ತು ಸ್ಟಾರ್ಟ್‌ಅಪ್ ಬೆಂಬಲ: ಡಾ. ಬಿಂದು ಇಂದಿರಾ (ಹಿಮಾಲಯ ವೆಲ್ನೆಸ್ ಕಂಪನಿ) ಮತ್ತು ಡಾ. ಶ್ರೀನಿವಾಸ್ ಪಾಟೀಲ್ (ಕರ್ನಾಟಕ ಆಯುಷ್ ಡ್ರಗ್ಸ್ ಮ್ಯಾನುಫ್ಯಾಕ್ಚರರ್ಸ್ ಅಸೋಸಿಯೇಷನ್) ಸೇರಿದಂತೆ ಉದ್ಯಮದ ನಾಯಕರು ಬಿಐಎಸ್ ಪ್ರಮಾಣೀಕರಣವನ್ನು ಅಳವಡಿಸಿಕೊಳ್ಳುವುದು ಹೇಗೆ ಮಾರುಕಟ್ಟೆ ಪ್ರವೇಶವನ್ನು ವೇಗಗೊಳಿಸುತ್ತದೆ ಮತ್ತು ಗ್ರಾಹಕರ ನಂಬಿಕೆಯನ್ನು ನಿರ್ಮಿಸುತ್ತದೆ ಎಂಬ ಬಗ್ಗೆ ನೀಡಿದ ಮಾರ್ಗದರ್ಶನ.
• ಸಂವಾದಾತ್ಮಕ ಮುಕ್ತ ಗೋಷ್ಠಿ: ಪ್ರೊ. (ಡಾ.) ಕಾಶಿನಾಥ್ ಸಮಗಂಡಿ (ಅಖಿಲ ಭಾರತ ಆಯುರ್ವೇದ ಸಂಸ್ಥೆ) ಮತ್ತು ವೈದ್ಯ ಜಯಂತ್ ದೇವ್‌ಪೂಜಾರಿ (ಅಧ್ಯಕ್ಷರು, ಆಯುರ್ವೇದ ವಿಭಾಗೀಯ ಸಮಿತಿ, ಬಿಐಎಸ್) ನೇತೃತ್ವದ ತಜ್ಞರ ಸಮಿತಿಯು ಶಿಕ್ಷಣ, ಸಂಶೋಧನೆ, ಉತ್ಪಾದನೆ ಮತ್ತು ಕ್ಲಿನಿಕಲ್ ಅಭ್ಯಾಸದಲ್ಲಿ ಪ್ರಮಾಣಗಳನ್ನು ಅಳವಡಿಸಿಕೊಳ್ಳುವಲ್ಲಿನ ಪ್ರಾಯೋಗಿಕ ಸಮಸ್ಯೆಗಳ ಕುರಿತು ಪ್ರತಿನಿಧಿಗಳೊಂದಿಗೆ ಸಂವಾದ ನಡೆಸಿತು ಹಾಗೂ ವ್ಯಾಪಕ ಅನುಷ್ಠಾನಕ್ಕಾಗಿ ಪರಿಹರಿಸಬೇಕಾದ ಅಂತರಗಳ ಕುರಿತು ಚರ್ಚಿಸಿತು.

ಲೇಹ್ ಮತ್ತು ಲಡಾಖ್‌ನಲ್ಲಿ ಸೋವಾ-ರಿಗ್ಪ ಪ್ರಮಾಣೀಕರಣವನ್ನು ಮುನ್ನಡೆಸುವುದು

ಲಡಾಖ್ ಕೇಂದ್ರಾಡಳಿತ ಪ್ರದೇಶದ ಲೇಹ್‌ನಲ್ಲಿರುವ ಸೋವಾ-ರಿಗ್ಪ ರಾಷ್ಟ್ರೀಯ ಸಂಸ್ಥೆಯಲ್ಲಿ (NISR) ಬಿಐಎಸ್ ತನ್ನ 5 ನೇ ಸೋವಾ-ರಿಗ್ಪ ವಿಭಾಗೀಯ ಸಮಿತಿ ಸಭೆಯ ಜೊತೆಗೆ ಮಂಥನ ಗೋಷ್ಠಿಯನ್ನು ಆಯೋಜಿಸಿತು. ಪ್ರತಿನಿಧಿಗಳಲ್ಲಿ ಪದ್ಮಶ್ರೀ ಡಾ. ಪದ್ಮ ಗುರ್ಮೇಟ್ (ಬಿಐಎಸ್ ಸೋವಾ-ರಿಗ್ಪ ವಿಭಾಗೀಯ ಸಮಿತಿಯ ಅಧ್ಯಕ್ಷರು ಮತ್ತು ಎನ್‌ಐಎಸ್‌ಆರ್‌ನ ಸಂಸ್ಥಾಪಕ ನಿರ್ದೇಶಕರು), ಡಾ. ಅರ್ಜುನ್ ಸಿಂಗ್ (ಆಯುರ್ವೇದ ವಿಜ್ಞಾನಗಳ ಸಂಶೋಧನಾ ಕೇಂದ್ರ ಮಂಡಳಿ), ಡಾ. ಉಸಾಮಾ ಅಕ್ರಮ್ (ಯುನಾನಿ ವೈದ್ಯಕೀಯ ಸಂಶೋಧನಾ ಕೇಂದ್ರ ಮಂಡಳಿ) ಮತ್ತು ಬಿಐಎಸ್‌ನ ಡಾ. ಮಹೇ ಆಲಂ ಸೇರಿದ್ದರು. ಚರ್ಚೆಗಳು ಈ ಕೆಳಗಿನ ವಿಷಯಗಳ ಮೇಲೆ ಗಮನ ಹರಿಸಿದವು:

• ಕಚ್ಚಾ ವಸ್ತುವಿನ ಗುಣಮಟ್ಟ ಮತ್ತು ಸುರಕ್ಷತೆ: ಔಷಧದ ಗುಣಮಟ್ಟ, ಸುರಕ್ಷತೆ ಮತ್ತು ದಕ್ಷತೆ, ಪ್ರಯೋಗಾಲಯ ಮತ್ತು ವಿಶ್ಲೇಷಣಾತ್ಮಕ ಅಗತ್ಯತೆಗಳು, ಫಾರ್ಮಾಕೋಪಿಯಲ್ ಪ್ರಮಾಣಗಳು ಮತ್ತು ಗುಣಮಟ್ಟದ ಭರವಸೆಯೊಂದಿಗೆ ಬಿಡಿ ಮೂಲಿಕೆಗಳು, ಕಚ್ಚಾ ವಸ್ತುಗಳು ಮತ್ತು ಸಿದ್ಧ ಸೂತ್ರೀಕರಣಗಳಿಗಾಗಿ ಕಟ್ಟುನಿಟ್ಟಾದ ಪರೀಕ್ಷಾ ನಿಯತಾಂಕಗಳನ್ನು ಸ್ಥಾಪಿಸುವುದು.

• ಐಪಿಆರ್ (IPR) ಮತ್ತು ಸಾಂಪ್ರದಾಯಿಕ ಜ್ಞಾನ: ಗುಣಮಟ್ಟದ ಮೌಲ್ಯಮಾಪನಕ್ಕಾಗಿ ಪೇಟೆಂಟ್‌ಗಳು, ಟ್ರೇಡ್‌ಮಾರ್ಕ್‌ಗಳು ಮತ್ತು ಭೌಗೋಳಿಕ ಸೂಚಕಗಳ ಮೂಲಕ ದೇಶೀಯ ಜ್ಞಾನವನ್ನು ರಕ್ಷಿಸುವುದು.

ಈ ಉಪಕ್ರಮಗಳಿಗೆ ಅಖಿಲ ಭಾರತ ಆಯುರ್ವೇದ ಸಂಸ್ಥೆ, ಭಾರತೀಯ ವೈದ್ಯಕೀಯ ಪದ್ಧತಿಯ ರಾಷ್ಟ್ರೀಯ ಆಯೋಗ, ಯುನಾನಿ ವೈದ್ಯಕೀಯ ಸಂಶೋಧನಾ ಕೇಂದ್ರ ಮಂಡಳಿ ಮತ್ತು ಆಯುರ್ವೇದ ವಿಜ್ಞಾನಗಳ ಸಂಶೋಧನಾ ಕೇಂದ್ರ ಮಂಡಳಿ ಸೇರಿದಂತೆ ಉನ್ನತ ರಾಷ್ಟ್ರೀಯ ಸಂಸ್ಥೆಗಳು ಬೆಂಬಲ ನೀಡಿದವು. ಉದ್ಯಮ ಮತ್ತು ಶೈಕ್ಷಣಿಕ ಕ್ಷೇತ್ರದೊಂದಿಗೆ ನಿರಂತರವಾಗಿ ತೊಡಗಿಸಿಕೊಳ್ಳಲು ಹಾಗೂ ಹೊಸ ಪ್ರಮಾಣೀಕರಣ ಪ್ರಸ್ತಾಪಗಳಿಗಾಗಿ ಸರಳ ಆನ್‌ಲೈನ್ ಸಲ್ಲಿಕೆ ಪೋರ್ಟಲ್‌ಗಳನ್ನು ಸುಗಮಗೊಳಿಸಲು ಬಿಐಎಸ್ ತನ್ನ ಬದ್ಧತೆಯನ್ನು ಪುನರುಚ್ಚರಿಸಿತು.

ಭಾರತೀಯ ಮಾನಕ ಬ್ಯೂರೋ ಭಾರತದ ರಾಷ್ಟ್ರೀಯ ಪ್ರಮಾಣೀಕರಣ ಸಂಸ್ಥೆಯಾಗಿದ್ದು, ಪ್ರಮಾಣೀಕರಣ ಮತ್ತು ಅನುಸರಣೆ ಮೌಲ್ಯಮಾಪನ ಚಟುವಟಿಕೆಗಳ ಸಾಮರಸ್ಯ ಅಭಿವೃದ್ಧಿಗೆ ಜವಾಬ್ದಾರಿಯಾಗಿದೆ. ತನ್ನ ಸಂಸ್ಥೆಯ ಪ್ರತ್ಯೇಕ 'ಆಯುಷ್' ಇಲಾಖೆಯ ಮೂಲಕ, ಬಿಐಎಸ್ ಸಾಂಪ್ರದಾಯಿಕ ಭಾರತೀಯ ವೈದ್ಯಕೀಯ ಪದ್ಧತಿಗಳು ಜಾಗತಿಕ ಶ್ರೇಷ್ಠತೆಯನ್ನು ಸಾಧಿಸಲು ಅನುವು ಮಾಡಿಕೊಡುವ ಗುಣಮಟ್ಟದ ಪ್ರಮಾಣಗಳನ್ನು ರೂಪಿಸುತ್ತಿದೆ.

*****