ہندوستان اور آسٹریلیا کی مشترکہ فوجی مشق ’آسٹراہند 2026‘ کا پانچواں ایڈیشن آج کیرالہ کے تروواننت پورم میں واقع فارن ٹریننگ نوڈ میں شروع ہوا۔

19 اکتوبر سے یکم نومبر 2026 تک جاری رہنے والی اس مشق میں ہندوستانی فوج اور آسٹریلیا کی فوج کے تقریباً 120۔120 اہلکار حصہ لے رہے ہیں۔ اس مشق کا چوتھا ایڈیشن 13 سے 26 اکتوبر 2025 تک آسٹریلیا کے پرتھ میں واقع ارون بیرکس میں منعقد ہوا تھا۔

ہندوستانی فوج کے دستے میں گڑھوال رائفلز کے جوانوں کے علاوہ دیگر اسلحہ اور خدمات سے وابستہ اہلکار شامل ہیں، جبکہ آسٹریلوی فوج کے دستے میں 13 بریگیڈ کے فوجی شامل ہیں۔

مشق کا موضوع ’اقوام متحدہ کے منشور کے باب VII کے تحت جزائر اور ساحلی ماحول میں مشترکہ غیر روایتی کارروائیاں‘ ہے۔ اس کا مقصد دونوں افواج کے درمیان باہمی تعاون، مشترکہ طور پر کام کرنے کی صلاحیت اور آپریشنل تال میل کو بہتر بنانا ہے۔ اس کے علاوہ جزائر اور ساحلی علاقوں میں کارروائیوں کے لیے حکمت عملی، تکنیک اور طریقہ کار کی مشترکہ سمجھ پیدا کرنا بھی مشق کا مقصد ہے۔

مشق کے دوران دونوں ممالک کے فوجی حقیقی آپریشنل حالات میں مشترکہ منصوبہ بندی، حکمت عملی پر مبنی مشقوں اور جنگی نوعیت کی تربیت میں حصہ لیں گے، جس میں فضائی اور بحری پہلو بھی شامل ہوں گے۔ تربیت میں ساحلی اور جزیرائی علاقوں میں مربوط کارروائیاں، نگرانی اور جاسوسی، اہم تنصیبات کا تحفظ اور انسانی امداد و آفات سے نمٹنے کی ہنگامی صورتحال میں ردعمل کے علاوہ پیشہ ورانہ تجربات اور بہترین طریقہ کار کا تبادلہ شامل ہوگا۔ پہلی بار نیوزی لینڈ کا ایک مبصر وفد بھی اس مشق میں شرکت کرے گا۔

مشق ’آسٹراہند 2026‘ ہندوستان اور آسٹریلیا کے درمیان فوجی تعاون، باہمی آپریشنل صلاحیت اور اعتماد کو مزید مضبوط کرے گی۔ اس سے ہند-بحرالکاہل خطے میں امن، استحکام اور سلامتی کے لیے دونوں ممالک کے مشترکہ عزم کو بھی تقویت ملے گی۔

************

ش ح ۔   م  د ۔  م  ص

(U :6338  )