سماجی انصاف و تفویضِ اختیارات کی وزارت کے مرکزی سکریٹری جناب سدھانش پنت نے آج کرناٹک کے شہر میسورو میں ریاستی محکمۂ سماجی بہبود کے افسران کے ساتھ ایک اجلاس میں وزارت کی زیرِ عمل اسکیموں، پروگراموں اور اقدامات کا جامع جائزہ لیا۔

اس اجلاس میں محکمۂ سماجی بہبود اور محکمۂ پسماندہ طبقات کی بہبود کے ریاستی اور ضلعی سطح کے سرکاری افسران نے شرکت کی۔ ٹانڈا ڈیولپمنٹ کارپوریشن کے منیجنگ ڈائریکٹر (ایم ڈی) بھی اجلاس میں شریک ہوئے۔

مرکزی سکریٹری نے اجلاس کے دوران منشیات کی طلب میں کمی کے لیے قومی لائحۂ عمل (این اے پی ڈی ڈی آر) اور نشہ مکت بھارت ابھیان (این ایم بی اے)، پردھان منتری انوسوچت جاتی ابھیودیہ یوجنا (پی ایم اجے)، مشینی صفائی کے نظام کے لیے قومی لائحۂ عمل (نمستے)، اٹل وایو ابھیودیہ یوجنا (اے وی وائی اے وائی) اور بزرگ شہریوں کے لیے دیگر اسکیموں کی پیش رفت کا جائزہ لیا۔

اجلاس میں درج فہرست ذاتوں (ایس سی)، دیگر پسماندہ طبقات (او بی سی)، معاشی طور پر پسماندہ طبقات (ای بی سی) اور خانہ بدوش و نیم خانہ بدوش قبائل (ڈی این ٹی) کے طلبہ کے لیے قبل از میٹرک اور بعد از میٹرک وظائف کی پیش رفت کا بھی جائزہ لیا گیا۔ اس کے علاوہ، شہری حقوق کے تحفظ کے قانون، 1955 اور مظالم کی روک تھام کے قانون، 1989 کے نفاذ کے لیے انتظامی نظام کو مضبوط بنانے کے اقدامات کی پیش رفت کا بھی جائزہ لیا گیا۔

اس اعلیٰ سطحی اجلاس میں بھیک مانگنے کے عمل میں مصروف افراد کی جامع بازآبادکاری (اسمائل)، خواجہ سرا افراد کی بہبود (اسمائل) اور دیگر پسماندہ طبقات کے لڑکوں اور لڑکیوں کے لیے ہاسٹلوں کی تعمیر سمیت مختلف اسکیموں اور پروگراموں کی پیش رفت کا بھی جائزہ لیا گیا۔

اجلاس سے خطاب کرتے ہوئے مرکزی سکریٹری نے اس بات پر زور دیا کہ مرکزی حکومت کی تمام اسکیموں اور اقدامات پر عمل درآمد کے لیے شفاف اور مؤثر تدابیر اختیار کی جائیں، تاکہ مختلف اسکیموں اور پروگراموں کے تحت تمام اہل ممکنہ مستفیدین کو ان کے فوائد فراہم کیے جا سکیں۔

انہوں نے تمام افسران اور اہلکاروں پر زور دیا کہ وہ مختلف اسکیموں، پروگراموں اور اقدامات کی خصوصیات کے بارے میں واضح معلومات کے ساتھ ممکنہ مستفیدین تک پہنچیں، تاکہ مرکزی حکومت کی مختلف اسکیموں کے فوائد اہل افراد کو ان کے گھر کی دہلیز پر فراہم کیے جا سکیں۔

جناب سدھانش پنت نے میسورو میں مختلف مقامات کا دورہ کیا اور عوام کے وسیع تر مفاد میں سرکاری پروگراموں کو آگے بڑھانے کے لیے افسران اور دیگر متعلقہ افراد کی مخلصانہ کوششوں اور خدمات کو سراہا۔

 

********

) ش ح ۔ا ک۔ش ت)

U.No. 6328

(ریلیز آئی ڈی: 2325217) وزیٹر کاؤنٹر : 6