ਇਲੈਕਟ੍ਰੌਨਿਕਸ ਅਤੇ ਸੂਚਨਾ ਤਕਨਾਲੋਜੀ ਮੰਤਰਾਲੇ (MeitY) ਅਧੀਨ ਇੱਕ ਪ੍ਰਮੁੱਖ ਵਿਗਿਆਨ ਅਤੇ ਤਕਨਾਲੋਜੀ ਸੰਗਠਨ, ਸਾਫਟਵੇਅਰ ਤਕਨਾਲੋਜੀ ਪਾਰਕਸ ਆਫ਼ ਇੰਡੀਆ (STPI)  ਅਤੇ ਆਈਆਈਟੀ ਬੀਐੱਚਯੂ ਦੇ ਸੈਂਟਰ ਫਾਰ ਇਨੋਵੇਸ਼ਨ, ਇਨਕਿਊਬੇਸ਼ਨ ਐਂਡ ਐਂਟਰਪ੍ਰਨਿਓਰਸ਼ਿਪ (CIIE) ਨੇ ਵਾਰਾਣਸੀ ਸਥਿਤ ਆਈਆਈਟੀ ਬੀਐੱਚਯੂ ਵਿੱਚ “ ਏਆਈ ਫਾਰ ਹੈਲਥ ਐਂਡ ਐਸਿਸਟਿਵ ਟੈਕਨੋਲੋਜੀ" ਵਿਸ਼ੇ 'ਤੇ ਇੱਕ ਤਕਨੀਕੀ ਸੰਮੇਲਨ ਦਾ ਆਯੋਜਨ ਕੀਤਾ। ਇਸ ਸਮਾਗਮ ਵਿੱਚ ਸਰਕਾਰੀ ਪ੍ਰਤੀਨਿਧੀਆਂ, ਅਕਾਦਮਿਕ ਮਾਹਰਾਂ, ਸਿਹਤ ਸੰਭਾਲ ਪੇਸ਼ੇਵਰਾਂ ਅਤੇ ਸਟਾਰਟਅੱਪਸ ਨੇ ਸ਼ਿਰਕਤ ਕੀਤੀ। ਇਸ ਦਾ ਉਦੇਸ਼ ਵਿਵਹਾਰਕ ਅਤੇ ਵਿਆਪਕ ਤੌਰ 'ਤੇ ਲਾਗੂ ਹੋਣ ਵਾਲੇ ਹੱਲਾਂ ਰਾਹੀਂ ਸਿਹਤ ਸੰਭਾਲ ਸੇਵਾਵਾਂ ਨੂੰ ਅੱਗੇ ਵਧਾਉਣ, ਪਹੁੰਚਯੋਗਤਾ ਵਿੱਚ ਸੁਧਾਰ ਕਰਨ ਅਤੇ ਨਾਗਰਿਕਾਂ ਦੀ ਸ਼ਮੂਲੀਅਤ ਅਤੇ ਤੰਦਰੁਸਤੀ ਨੂੰ ਉਤਸ਼ਾਹਿਤ ਕਰਨ ਵਿੱਚ ਆਰਟੀਫਿਸ਼ੀਅਲ ਇੰਟੈਲੀਜੈਂਸ ਦੀ ਭੂਮਿਕਾ 'ਤੇ ਵਿਚਾਰ-ਵਟਾਂਦਰਾ ਕਰਨਾ ਸੀ।

ਉਦਘਾਟਨੀ ਸੈਸ਼ਨ ਦੀ ਸ਼ੁਰੂਆਤ ਦੀਪ ਜਗਾਉਣ ਨਾਲ ਹੋਈ। ਇਸ ਤੋਂ ਬਾਅਦ, ਪ੍ਰੋਫੈਸਰ ਮਨੋਜ ਕੁਮਾਰ ਮੇਸ਼ਰਾਮ, ਫੈਕਲਟੀ ਇੰਚਾਰਜ, ਸੀਆਈਆਈਈ, ਆਈਆਈਟੀ ਬੀਐੱਚਯੂ, ਨੇ ਸਵਾਗਤੀ ਭਾਸ਼ਣ ਦਿੱਤਾ। ਇਸ ਸੈਸ਼ਨ ਵਿੱਚ, ਸ਼੍ਰੀ ਐੱਸ. ਕ੍ਰਿਸ਼ਣਨ, ਸਕੱਤਰ, ਐੱਮਈਆਈਟੀਵਾਈ, ਭਾਰਤ ਸਰਕਾਰ ਨੇ ਮੁੱਖ ਭਾਸ਼ਣ ਦਿੱਤਾ। ਇਸ ਤੋਂ ਬਾਅਦ, ਸ਼੍ਰੀ ਅਰਵਿੰਦ ਕੁਮਾਰ, ਡਾਇਰੈਕਟਰ ਜਨਰਲ, ਐੱਸਟੀਪੀਆਈ ਅਤੇ ਪ੍ਰੋਫੈਸਰ ਅਮਿਤ ਪਾਤਰਾ, ਡਾਇਰੈਕਟਰ, ਆਈਆਈਟੀ ਬੀਐੱਚਯੂ, ਨੇ ਵਿਸ਼ੇਸ਼ ਭਾਸ਼ਣ ਦਿੱਤਾ। ਸ਼੍ਰੀ ਸੁਮਿਤ ਮਹਾਜਨ, ਸੀਈਓ, ਉੱਤਰ ਪ੍ਰਦੇਸ਼ ਸਟਾਰਟਅੱਪ ਮਿਸ਼ਨ, ਆਈਟੀ ਅਤੇ ਇਲੈਕਟ੍ਰੌਨਿਕਸ ਵਿਭਾਗ, ਉੱਤਰ ਪ੍ਰਦੇਸ਼ ਸਰਕਾਰ ਅਤੇ ਡਾ. ਮਲਿਕਾ ਤਿਵਾਰੀ, ਪ੍ਰੋਫੈਸਰ, ਓਨਕੋਲੋਜੀ ਵਿਭਾਗ, ਇੰਸਟੀਟਿਊਟ ਆਫ਼ ਮੈਡੀਕਲ ਸਾਇੰਸਿਜ਼, ਬੀਐੱਚਯੂ ਨੇ ਵੀ ਵਿਸ਼ੇਸ਼ ਭਾਸ਼ਣ ਦਿੱਤੇ।

ਮੁੱਖ ਭਾਸ਼ਣ ਦਿੰਦੇ ਹੋਏ, ਭਾਰਤ ਸਰਕਾਰ ਦੇ MeitY ਦੇ ਸਕੱਤਰ, ਸ਼੍ਰੀ ਐੱਸ. ਕ੍ਰਿਸ਼ਣਨ ਨੇ ਕਿਹਾ “ਆਰਟੀਫਿਸ਼ੀਅਲ ਇੰਟੈਲੀਜੈਂਸ ਸਿਹਤ ਸੰਭਾਲ ਨੂੰ ਵਧੇਰੇ ਪਹੁੰਚਯੋਗ ਬਣਾਉਣ , ਕਲੀਨਿਕਲ ਫੈਸਲੇ ਲੈਣ ਨੂੰ ਮਜ਼ਬੂਤ ​​ਕਰਨ ਅਤੇ ਸੇਵਾਵਾਂ ਦੀ ਉਪਲਬਧਤਾ ਅਤੇ ਡਿਲੀਵਰੀ ਨੂੰ ਬਿਹਤਰ ਬਣਾਉਣ ਵਿੱਚ ਇੱਕ ਮਹੱਤਵਪੂਰਨ ਭੂਮਿਕਾ ਨਿਭਾ ਸਕਦੀ ਹੈ। ਇਹ ਸਿਹਤ ਸੰਭਾਲ ਤੱਕ ਸੀਮਤ ਪਹੁੰਚ ਵਾਲੇ ਭਾਈਚਾਰਿਆਂ ਲਈ ਖਾਸ ਤੌਰ 'ਤੇ ਮਹੱਤਵਪੂਰਨ ਹੈ।” ਉਨ੍ਹਾਂ ਨੇ ਵੱਖ-ਵੱਖ ਵਿਸ਼ਿਆਂ ਵਿੱਚ AI ਸਿੱਖਿਆ ਨੂੰ ਏਕੀਕ੍ਰਿਤ ਕਰਨ ਅਤੇ ਵਿਵਹਾਰਕ ਹੱਲ ਵਿਕਸਿਤ ਕਰਨ ਲਈ ਤਕਨਾਲੋਜੀ, ਮੈਡੀਕਲ ਵਿਗਿਆਨ ਅਤੇ ਖੋਜ ਦੇ ਕਨਵਰਜੈਂਸ ਦਾ ਲਾਭ ਉਠਾਉਣ ਦੀ ਜ਼ਰੂਰਤ 'ਤੇ ਜ਼ੋਰ ਦਿੱਤਾ। ਉਨ੍ਹਾਂ ਨੇ ਬਿਮਾਰੀ ਦੀ ਜਾਂਚ, ਚਿਕਿਤਸਾ ਨਿਦਾਨ, ਰਿਮੋਟ ICU ਨਿਗਰਾਨੀ ਅਤੇ AI- ਸਹਾਇਤਾ ਪ੍ਰਾਪਤ ਸਰਜੀਕਲ ਯੋਜਨਾਬੰਦੀ ਵਰਗੀਆਂ ਐਪਲੀਕੇਸ਼ਨਾਂ ਰਾਹੀਂ ਸਿਹਤ ਸੰਭਾਲ ਦੀ ਪਹੁੰਚਯੋਗਤਾ, ਕਿਫਾਇਤੀਤਾ ਅਤੇ ਗੁਣਵੱਤਾ ਵਿੱਚ ਸੁਧਾਰ ਕਰਨ ਲਈ AI ਦੀ ਪਰਿਵਰਤਨਸ਼ੀਲ ਸੰਭਾਵਨਾ ਨੂੰ ਉਜਾਗਰ ਕੀਤਾ। ਉਨ੍ਹਾਂ ਨੇ IITs ( BHU ), STPI , ਉਦਯੋਗ ਅਤੇ ਸਟਾਰਟਅੱਪਸ ਵਿਚਕਾਰ ਸਿਹਤ ਸੰਭਾਲ ਅਤੇ ਸਹਾਇਕ ਤਕਨਾਲੋਜੀ ਹੱਲ ਵਿਕਸਿਤ ਕਰਨ ਲਈ ਵਧੇਰੇ ਸਹਿਯੋਗ ਨੂੰ ਉਤਸ਼ਾਹਿਤ ਕੀਤਾ ਜੋ ਵੱਡੇ ਪੱਧਰ 'ਤੇ ਤਾਇਨਾਤ ਕੀਤੇ ਜਾ ਸਕਦੇ ਹਨ। ਉਨ੍ਹਾਂ ਨੇ ਇੰਡੀਆ AI ਮਿਸ਼ਨ ਅਤੇ ਹੋਰ MeitY ਪਹਿਲਕਦਮੀਆਂ ਰਾਹੀਂ ਉਪਲਬਧ ਸਹਾਇਤਾ 'ਤੇ ਵੀ ਚਾਨਣਾ ਪਾਇਆ। ਉਨ੍ਹਾਂ ਨੇ ਸਟਾਰਟਅੱਪਸ ਨੂੰ ਨਿਵੇਸ਼ਕਾਂ, ਉੱਦਮ ਪੂੰਜੀ ਨੈੱਟਵਰਕਾਂ ਅਤੇ ਇੱਕ ਟਿਕਾਊ ਨਵੀਨਤਾ ਈਕੋਸਿਸਟਮ ਬਣਾਉਣ ਲਈ ਮਾਰਕਿਟ ਮੌਕਿਆਂ ਨਾਲ ਜੋੜਨ ਵਿੱਚ ਐੱਸਟੀਪੀਆਈ ਦੀ ਭੂਮਿਕਾ 'ਤੇ ਵੀ ਜ਼ੋਰ ਦਿੱਤਾ ।

ਐੱਸਟੀਪੀਆਈ ਦੇ ਡਾਇਰੈਕਟਰ ਜਨਰਲ ਸ਼੍ਰੀ ਅਰਵਿੰਦ ਕੁਮਾਰ ਨੇ ਪਿਛਲੇ ਤਿੰਨ ਦਹਾਕਿਆਂ ਦੌਰਾਨ ਭਾਰਤ ਦੇ ਤਕਨਾਲੋਜੀ ਈਕੋਸਿਸਟਮ ਵਿੱਚ ਆਏ ਬਦਲਾਵਾਂ 'ਤੇ ਚਾਨਣਾ ਪਾਇਆ। 1991 ਤੋਂ ਭਾਰਤ ਦੇ ਆਈਟੀ/ ਆਈਟੀਈਐੱਸ ਉਦਯੋਗ ਦੇ ਵਿਕਾਸ ਵਿੱਚ ਐੱਸਟੀਪੀਆਈ ਦੀ ਮਹੱਤਵਪੂਰਨ ਭੂਮਿਕਾ ਨੂੰ ਉਜਾਗਰ ਕਰਦੇ ਹੋਏ , ਉਨ੍ਹਾਂ ਨੇ ਸਵਦੇਸ਼ੀ ਨਵੀਨਤਾ ਅਤੇ ਉੱਦਮਤਾ ਰਾਹੀਂ ਆਰਟੀਫਿਸ਼ੀਅਲ ਇੰਟੈਲੀਜੈਂਸ ਦੇ ਖੇਤਰ ਵਿੱਚ ਇਸ ਸਫਲਤਾ ਨੂੰ ਦੁਹਰਾਉਣ ਦੇ ਮੌਕੇ 'ਤੇ ਜ਼ੋਰ ਦਿੱਤਾ। ਉਨ੍ਹਾਂ ਯਾਦ ਕੀਤਾ ਕਿ ਕਿਵੇਂ ਪਹਿਲਾਂ ਵਿਦਿਆਰਥੀ ਮੁੱਖ ਤੌਰ 'ਤੇ ਕੈਂਪਸ ਪਲੇਸਮੈਂਟ ਦੀ ਇੱਛਾ ਰੱਖਦੇ ਸਨ, ਪਰ ਅੱਜ ਦਾ ਸਟਾਰਟਅੱਪ ਈਕੋਸਿਸਟਮ ਨੌਜਵਾਨ ਨਵੀਨਤਾਕਾਰਾਂ ਨੂੰ ਨੌਕਰੀਆਂ ਪੈਦਾ ਕਰਨ ਵਾਲੇ ਬਣਨ ਦੇ ਯੋਗ ਬਣਾਉਂਦਾ ਹੈ। ਐੱਸਟੀਪੀਆਈ ਦੇ ਉਦਯੋਗਿਕ ਸਬੰਧਾਂ ਅਤੇ 27 ਉੱਦਮਤਾ ਕੇਂਦਰਾਂ ਨੂੰ ਉਜਾਗਰ ਕਰਦੇ ਹੋਏ, ਉਨ੍ਹਾਂ ਨੇ ਲਾਗੂ ਖੋਜ, ਬੌਧਿਕ ਸੰਪਤੀ ਸਿਰਜਣਾ ਅਤੇ ਮਾਰਕਿਟ ਪਹੁੰਚ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ। ਉਨ੍ਹਾਂ ਨੇ ਸਥਾਪਿਤ ਤਕਨਾਲੋਜੀ ਕੇਂਦਰਾਂ ਤੋਂ ਪਰੇ, ਖਾਸ ਕਰਕੇ ਉਭਰ ਰਹੇ ਖੇਤਰਾਂ ਵਿੱਚ, ਸਟਾਰਟਅੱਪ ਈਕੋਸਿਸਟਮ ਨੂੰ ਮਜ਼ਬੂਤ ​​ਕਰਨ ਦੀ ਜ਼ਰੂਰਤ 'ਤੇ ਹੋਰ ਜ਼ੋਰ ਦਿੱਤਾ, ਜਿਸ ਲਈ ਆਈਆਈਟੀ (ਬੀਐੱਚਯੂ), ਉਦਯੋਗ ਅਤੇ ਸਰਕਾਰ ਵਰਗੇ ਅਕਾਦਮਿਕ ਸੰਸਥਾਨਾਂ ਵਿਚਕਾਰ ਨਜ਼ਦੀਕੀ ਸਹਿਯੋਗ ਦੀ ਲੋੜ ਹੈ ।

ਸਿਹਤ ਸੰਭਾਲ ਅਤੇ ਸਹਾਇਕ ਤਕਨਾਲੋਜੀਆਂ ਲਈ ਏਆਈ 'ਤੇ ਐੱਸਟੀਪੀਆਈ ਟੈਕ ਕਨਕਲੇਵ ਨੂੰ ਸੰਬੋਧਨ ਕਰਦੇ ਹੋਏ, ਆਈਆਈਟੀ ਬੀਐੱਚਯੂ ਦੇ ਡਾਇਰੈਕਟਰ, ਪ੍ਰੋਫੈਸਰ ਅਮਿਤ ਪਾਤਰਾ ਨੇ ਸੈਂਟਰ ਫਾਰ ਇਨੋਵੇਸ਼ਨ, ਇਨਕਿਊਬੇਸ਼ਨ ਐਂਡ ਐਂਟਰਪ੍ਰਨਿਓਰਸ਼ਿਪ (ਸੀਆਈਆਈਈ) ਦੀ ਸਥਾਪਨਾ ਰਾਹੀਂ ਆਈਆਈਟੀ ਬੀਐੱਚਯੂ ਦੇ ਆਪਣੇ ਸਟਾਰਟਅੱਪ ਅਤੇ ਐਂਟਰਪ੍ਰਨਿਓਰਸ਼ਿਪ ਈਕੋਸਿਸਟਮ ਨੂੰ ਮਜ਼ਬੂਤ ​​ਕਰਨ ਦੇ ਯਤਨਾਂ 'ਤੇ ਚਾਨਣਾ ਪਾਇਆ। ਉਨ੍ਹਾਂ ਨੇ ਵਿਦਿਆਰਥੀਆਂ, ਫੈਕਲਟੀ ਅਤੇ ਚਾਹਵਾਨ ਨਵੀਨਤਾਕਾਰਾਂ ਵਿੱਚ ਉੱਦਮੀ ਸੋਚ ਨੂੰ ਪਾਲਣ ਲਈ ਇੱਕ ਢਾਂਚਾਗਤ ਸੰਸਥਾਗਤ ਢਾਂਚਾ ਬਣਾਉਣ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ, ਜਿਸ ਨਾਲ ਉਹ ਨਵੀਨਤਾਕਾਰੀ ਵਿਚਾਰਾਂ ਨੂੰ ਸਫਲ ਸਟਾਰਟਅੱਪ ਵਿੱਚ ਬਦਲ ਸਕਣ। ਉਨ੍ਹਾਂ ਨੇ ਚਾਹਵਾਨ ਉੱਦਮੀਆਂ ਨੂੰ ਵੱਖ-ਵੱਖ ਫੰਡਿੰਗ ਸਰੋਤਾਂ ਨਾਲ ਜੋੜਨ ਅਤੇ ਸਟਾਰਟਅੱਪਸ ਦੀ ਇੱਕ ਟਿਕਾਊ ਪਾਈਪਲਾਈਨ ਬਣਾਉਣ ਦੀ ਜ਼ਰੂਰਤ 'ਤੇ ਜ਼ੋਰ ਦਿੱਤਾ ਅਤੇ ਨਵੀਨਤਾ ਅਤੇ ਤਕਨਾਲੋਜੀ-ਅਧਾਰਿਤ ਉੱਦਮਤਾ ਨੂੰ ਉਤਸ਼ਾਹਿਤ ਕਰਨ ਲਈ ਆਈਆਈਟੀ ਬੀਐੱਚਯੂ ਦੀ ਵਚਨਬੱਧਤਾ ਦੀ ਪੁਸ਼ਟੀ ਕੀਤੀ ।

ਕਾਨਫਰੰਸ ਵਿੱਚ ਦੋ ਪੈਨਲ ਚਰਚਾਵਾਂ ਵੀ ਸ਼ਾਮਲ ਸਨ - “ਏਆਈ ਰਾਹੀਂ ਨਾਗਰਿਕਾਂ ਨੂੰ ਸਸ਼ਕਤ ਬਣਾਉਣਾ : ਸਿਹਤ, ਸ਼ਮੂਲੀਅਤ ਅਤੇ ਤੰਦਰੁਸਤੀ” ਅਤੇ “ਨਵੀਨਤਾ ਤੋਂ ਪ੍ਰਭਾਵ ਤੱਕ: ਏਆਈ ਖੋਜ ਨੂੰ ਵਿਵਹਾਰਕ ਸਿਹਤ ਸੰਭਾਲ ਅਤੇ ਸਹਾਇਤਾ ਹੱਲਾਂ ਵਿੱਚ ਬਦਲਣਾ”। ਇਨ੍ਹਾਂ ਚਰਚਾਵਾਂ ਵਿੱਚ ਸਰਕਾਰ, ਅਕਾਦਮਿਕ, ਸਿਹਤ ਸੰਭਾਲ ਖੇਤਰ ਅਤੇ ਸਟਾਰਟਅੱਪਸ ਦੇ ਮਾਹਰਾਂ ਨੇ ਹਿੱਸਾ ਲਿਆ ਅਤੇ ਏਆਈ ਦੀ ਸੰਭਾਵਨਾ ਅਤੇ ਇਸ ਨੂੰ ਵਿਵਹਾਰਕ ਅਤੇ ਵਿਆਪਕ ਤੌਰ 'ਤੇ ਲਾਗੂ ਹੋਣ ਵਾਲੇ ਹੱਲਾਂ ਵਿੱਚ ਕਿਵੇਂ ਬਦਲਣਾ ਹੈ ਬਾਰੇ ਚਰਚਾ ਕੀਤੀ। ਸ਼੍ਰੀ ਪ੍ਰਵੀਨ ਕੁਮਾਰ ਦਿਵੇਦੀ, ਵਧੀਕ ਨਿਦੇਸ਼ਕ ਅਤੇ ਇੰਚਾਰਜ ਅਧਿਕਾਰੀ (ਓਆਈਸੀ), ਐੱਸਟੀਪੀਆਈ ਲਖਨਊ ਨੇ ਧੰਨਵਾਦ  ਮਤਾ ਪੇਸ਼ ਕੀਤਾ।

ਪਹਿਲੀ ਪੈਨਲ ਚਰਚਾ, " ਏਆਈ ਰਾਹੀਂ ਨਾਗਰਿਕਾਂ ਨੂੰ ਸਸ਼ਕਤ ਬਣਾਉਣਾ : ਸਿਹਤ, ਸ਼ਮੂਲੀਅਤ ਅਤੇ ਤੰਦਰੁਸਤੀ" ਵਿੱਚ ਪ੍ਰੋ. ਮਨੋਜ ਕੁਮਾਰ ਮੇਸ਼ਰਾਮ, ਕੋਆਰਡੀਨੇਟਰ, ਸੀਆਈਆਈਈ-ਆਈਆਈਟੀ ਬੀਐਚਯੂ; ਡਾ. ਸੰਜੈ ਕੁਮਾਰ ਸਿੰਘ, ਪ੍ਰੋਫੈਸਰ, ਕੰਪਿਊਟਰ ਸਾਇੰਸ ਅਤੇ ਇੰਜੀਨੀਅਰਿੰਗ ਵਿਭਾਗ, ਆਈਆਈਟੀ ਬੀਐੱਚਯੂ; ਪ੍ਰੋ. ਅਵਨੀਸ਼ ਸਿੰਘ ਪਰਮਾਰ, ਪ੍ਰੋਫੈਸਰ, ਭੌਤਿਕ ਵਿਗਿਆਨ ਵਿਭਾਗ , ਆਈਆਈਟੀ ਬੀਐੱਚਯੂ ; ਡਾ. ਸ਼ਿਰੂ ਸ਼ਰਮਾ, ਪ੍ਰੋਫੈਸਰ, ਬਾਇਓਮੈਡੀਕਲ ਇੰਜੀਨੀਅਰਿੰਗ ਵਿਭਾਗ, ਆਈਆਈਟੀ ਬੀਐੱਚਯੂ; ਡਾ. ਰੁਚੀ ਚਾਵਲਾ, ਐਸੋਸੀਏਟ ਪ੍ਰੋਫੈਸਰ, ਫਾਰਮਾਸਿਊਟੀਕਲ ਇੰਜੀਨੀਅਰਿੰਗ ਅਤੇ ਤਕਨਾਲੋਜੀ ਵਿਭਾਗ, ਆਈਆਈਟੀ ਬੀਐਚਯੂ; ਸ਼੍ਰੀ ਸ਼ਾਹਬਾਜ਼ ਅਹਿਮਦ, ਸੰਸਥਾਪਕ, ਆਰਕਸ਼ਨ ਏਆਈ ਪ੍ਰਾਈਵੇਟ ਲਿਮਿਟੇਡ; ਅਤੇ ਸ਼੍ਰੀ ਅਮਿਤ ਕੁਮਾਰ ਵਰਮਾ, ਐਡੀਸ਼ਨਲ ਡਾਇਰੈਕਟਰ, ਐੱਸਟੀਪੀਆਈ ਸ਼ਾਮਲ ਸਨ। ਚਰਚਾ ਵਧੇਰੇ ਪਹੁੰਚਯੋਗ ਅਤੇ ਸਮਾਵੇਸ਼ੀ ਸਿਹਤ ਸੰਭਾਲ ਸੇਵਾਵਾਂ ਪ੍ਰਦਾਨ ਕਰਨ ਅਤੇ ਨਾਗਰਿਕਾਂ ਦੀ ਭਲਾਈ ਨੂੰ ਬਿਹਤਰ ਬਣਾਉਣ ਵਿੱਚ ਏਆਈ ਦੀ ਸੰਭਾਵਨਾ 'ਤੇ ਕੇਂਦ੍ਰਿਤ ਸੀ। ਵੱਖ-ਵੱਖ ਵਿਸ਼ਿਆਂ ਦੇ ਮਾਹਰਾਂ ਦੀ ਭਾਗੀਦਾਰੀ ਨੇ ਲੋਕਾਂ ਦੀਆਂ ਜ਼ਰੂਰਤਾਂ ਨੂੰ ਪੂਰਾ ਕਰਨ ਵਾਲੇ ਹੱਲ ਲੱਭਣ ਲਈ ਤਕਨੀਕੀ ਮੁਹਾਰਤ ਇਕੱਠੇ ਲਿਆਉਣ ਦੇ ਮਹੱਤਵ ਨੂੰ ਉਜਾਗਰ ਕੀਤਾ।

ਦੂਜੇ ਪੈਨਲ ਚਰਚਾ ਸੈਸ਼ਨ, "ਨਵੀਨਤਾ ਤੋਂ ਪ੍ਰਭਾਵ ਤੱਕ : ਏਆਈ ਖੋਜ ਨੂੰ ਵਿਆਪਕ ਤੌਰ 'ਤੇ ਤਾਇਨਾਤ ਸਿਹਤ ਸੰਭਾਲ ਅਤੇ ਸਹਾਇਕ ਤਕਨਾਲੋਜੀ ਹੱਲਾਂ ਵਿੱਚ ਬਦਲਣਾ" ਵਿੱਚ ਸ਼੍ਰੀ ਰਾਜੇਸ਼ਵਰ ਸਿੰਘ ਜੇਨਵਰ, ਡਾਇਰੈਕਟਰ, ਐੱਮਈਆਈਟੀਵਾਈ; ਡਾ. ਆਕਾਸ਼ ਮਿਸ਼ਰਾ, ਸਹਾਇਕ ਪ੍ਰੋਫੈਸਰ, ਸੈਂਟਰ ਫਾਰ ਬਾਇਓਸਟੈਟਿਸਟਿਕਸ,ਆਈਐੱਮਐੱਸ- ਬੀਐੱਚਯੂ; ਡਾ. ਦੁਰਗੇਸ਼ ਨਾਰਾਇਣ ਸਿੰਘ, ਵਿਗਿਆਨਕ ਅਧਿਕਾਰੀ, ਬਾਇਓਨੈਸਟ, ਬੀਐੱਚਯੂ; ਸ਼੍ਰੀਮਤੀ ਤ੍ਰਿਪਤੀ ਵਰਮਾ, ਸੰਸਥਾਪਕ, ਲੈਮਿਨਏਆਈ; ਅਤੇ ਸ਼੍ਰੀ ਸ਼ਿਆਮ ਕੁਮਾਰ, ਸੀਓਓ, ਐੱਸਟੀਪੀਆਈ ਮੈਡਟੈਕ ਸੈਂਟਰ ਆਫ ਐਂਟਰਪ੍ਰਨਿਓਰਸ਼ਿਪ, ਐੱਸਜੀਪੀਜੀਆਈਐੱਮਐੱਸ, ਲਖਨਊ ਨੇ ਭਾਗ ਲਿਆ। ਸੈਸ਼ਨ ਸਿਹਤ ਸੰਭਾਲ ਅਤੇ ਸਹਾਇਕ ਤਕਨਾਲੋਜੀ ਵਿੱਚ ਖੋਜ ਅਤੇ ਨਵੀਨਤਾ ਤੋਂ ਵਿਵਹਾਰਕ ਅਤੇ ਵਿਆਪਕ ਤੌਰ 'ਤੇ ਲਾਗੂ ਹੋਣ ਵਾਲੇ ਹੱਲ ਵਿਕਸਿਤ ਕਰਨ ਵੱਲ ਵਧਣ ਦੀ ਪ੍ਰਕਿਰਿਆ 'ਤੇ ਕੇਂਦ੍ਰਿਤ ਸੀ। ਸੰਸਥਾਗਤ, ਵਿਗਿਆਨਕ ਅਤੇ ਸਟਾਰਟਅੱਪ ਦੁਨੀਆ ਦੇ ਵਿਭਿੰਨ ਦ੍ਰਿਸ਼ਟੀਕੋਣਾਂ ਨੂੰ ਸ਼ਾਮਲ ਕਰਨ ਨਾਲ ਵਾਅਦਾ ਕਰਨ ਵਾਲੇ ਵਿਚਾਰਾਂ ਨੂੰ ਵਿਵਹਾਰਕ ਵਰਤੋਂ ਵਿੱਚ ਅੱਗੇ ਵਧਾਉਣ ਲਈ ਸਹਿਯੋਗ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ ਗਿਆ।

ਇਸ ਕਾਨਫਰੰਸ ਨੇ ਸਰਕਾਰ, ਅਕਾਦਮਿਕ ਸੰਸਥਾਵਾਂ, ਸਿਹਤ ਸੰਭਾਲ ਸੰਸਥਾਵਾਂ ਅਤੇ ਸਟਾਰਟਅੱਪਸ ਵਿਚਕਾਰ ਸਹਿਯੋਗ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ ਤਾਂ ਜੋ ਪਹੁੰਚਯੋਗ ਸਿਹਤ ਸੰਭਾਲ, ਸਹਾਇਕ ਤਕਨਾਲੋਜੀਆਂ ਅਤੇ ਸਮਾਵੇਸ਼ੀ ਤੰਦਰੁਸਤੀ ਲਈ ਏਆਈ ਦੀ ਵਰਤੋਂ ਕੀਤੀ ਜਾ ਸਕੇ। ਨਿਰੰਤਰ ਸਹਿਯੋਗ, ਖੋਜ ਅਨੁਵਾਦ ਅਤੇ ਉੱਦਮਤਾ ਸਹਾਇਤਾ ਦੁਆਰਾ, ਐੱਸਟੀਪੀਆਈ ਅਤੇ ਸੀਆਈਆਈਈ, ਆਈਆਈਟੀ ਬੀਐੱਚਯੂ, ਇੱਕ ਨਵੀਨਤਾ ਈਕੋਸਿਸਟਮ ਵਿੱਚ ਯੋਗਦਾਨ ਪਾਉਣ ਦਾ ਉਦੇਸ਼ ਰੱਖਦੇ ਹਨ ਜੋ ਸਮਾਜਿਕ ਜ਼ਰੂਰਤਾਂ ਲਈ ਵਿਵਹਾਰਕ, ਜ਼ਿੰਮੇਵਾਰ ਅਤੇ ਸਕੇਲੇਬਲ ਤਕਨਾਲੋਜੀ ਹੱਲ ਵਿਕਸਿਤ  ਕਰਦਾ ਹੈ।

ਐੱਸਟੀਪੀਆਈ ਬਾਰੇ :

ਸਾਫਟਵੇਅਰ ਟੈਕਨਾਲੋਜੀ ਪਾਰਕਸ ਆਫ਼ ਇੰਡੀਆ (STPI) ਇਲੈਕਟ੍ਰੌਨਿਕਸ  ਅਤੇ ਸੂਚਨਾ ਤਕਨਾਲੋਜੀ ਮੰਤਰਾਲੇ (MeitY) ਦੇ ਅਧੀਨ ਇੱਕ ਪ੍ਰਮੁੱਖ ਵਿਗਿਆਨ ਅਤੇ ਤਕਨਾਲੋਜੀ ਸੰਗਠਨ ਹੈ, ਜੋ ਕਿ ਇੰਟਰਨੈੱਟ ਆਫ਼ ਥਿੰਗਜ਼, ਬਲੌਕਚੈਨ, ਆਰਟੀਫਿਸ਼ੀਅਲ ਇੰਟੈਲੀਜੈਂਸ, ਮਸ਼ੀਨ ਲਰਨਿੰਗ, ਕੰਪਿਊਟਰ ਵਿਜ਼ਨ, ਰੋਬੋਟਿਕਸ, ਔਗਮੈਂਟੇਡ ਅਤੇ ਵਰਚੁਅਲ ਰਿਐਲਿਟੀ, ਐਨੀਮੇਸ਼ਨ ਅਤੇ ਵਿਜ਼ੂਅਲ ਇਫੈਕਟਸ  ਅਤੇ ਡੇਟਾ ਸਾਇੰਸ ਅਤੇ ਵਿਸ਼ਲੇਸ਼ਣ ਸਮੇਤ ਉੱਭਰ ਰਹੇ ਤਕਨਾਲੋਜੀ ਖੇਤਰਾਂ ਵਿੱਚ IT / ITES ਉਦਯੋਗ, ਨਵੀਨਤਾ, ਖੋਜ ਅਤੇ ਵਿਕਾਸ, ਸਟਾਰਟਅੱਪਸ ਅਤੇ ਉਤਪਾਦ ਅਤੇ ਬੌਧਿਕ ਸੰਪਤੀ ਸਿਰਜਣ ਨੂੰ ਉਤਸ਼ਾਹਿਤ ਕਰਨ ਵਿੱਚ ਰੁੱਝਿਆ ਹੋਇਆ ਹੈ । STPI ਗੇਮਿੰਗ, ਫਿਨਟੈਕ, ਐਗਰੀਟੈਕ, ਮੈਡਟੈਕ, ਆਟੋਨੋਮਸ ਅਤੇ ਕਨੈਕਟਡ ਮੋਬਿਲਿਟੀ, ESDM, ਸਾਈਬਰ ਸੁਰੱਖਿਆ, ਉਦਯੋਗ 4.0 ਅਤੇ ਡਰੋਨ ਵਰਗੇ ਖੇਤਰਾਂ ਵਿੱਚ ਨਵੀਨਤਾ ਨੂੰ ਉਤਸ਼ਾਹਿਤ ਕਰਦਾ ਹੈ ।

*********

 ਵਿਨੋਦ ਕੁਮਾਰ/ਕਨਿਕਸ਼ ਸ਼ਰਮਾ/ਏਕੇ