লেফ্তেনেন্ত গভর্নর শ্রী ভি.কে.সক্সেনা জী, বি.আর.ও অমসুং এয়রপোর্ত ওথোরিতীগী সেনিয়র ওফিসিএল পুম্নমক, য়ুনিয়ন তেরিতোরী অসিগী ওফিসিএল পুম্নমক, অতোপ্পা শক্নাইরবা মীথুংলেনশিং, নুংশিরবা ঐহাক্কী ইচিল-ইনাওশিং।

“লদাখ সি মি-মাংস কুন্লা, জুল্লে!”

ঙসি, লদাখকী খুমাঙ চাওশিনবা অমসুং চাওখৎপগী অনৌবা তাঙ্কক অমা হাপচিল্লে। তেক্নোলোজীগী খুত্থাঙদা ঐহাক্না থৌরম অসিদা শরুক য়াবা ফংজবদা নুংঙাইবা ফাওই। ঙসি, লদাখতা মরুওইবা চাওখৎ-থৌরাংগী প্রোজেক্ত কয়া লৈবাক মীয়ামদা কত্থোকখ্রে। প্রোজেক্তশিং অসিনা মীওই কয়াগী চৎথোক-চৎশিনবু লায়হনগনি, মফম খরদনা মৈগী খুদোংচাবশিং ফগৎহনগনি, অমসুং অতোপ্পা মফমশিংদনা ঈশিং ফংবগী চাং হেনগৎহনগনি, লোয়ননা ঐখোয়গী অরিবা হেরিতেজ য়োকখৎপদসু অনৌবা পাঙ্গল অমা পীগনি। হন্দক, জংস্কারদা উন তাবা ঐহাক্না য়েংজরম্মী, অমসুং উন তারিঙৈদা ফাওবা লৈবাক্কী ফিরাল ৱাংনা পাইদুনা জংস্কারগী মীয়াম্না উৎখিবা পুক্নিং থৌগৎপা অমসুং হরাও-তয়াম্বা অদু ঐহাক্না উখি।

মরুপশিং,

মসি ঐহাক্কী লেহনি, ঐহাক্কী লদাখনি। প্রোজেক্তশিং অসিগীদমক লদাখকী মীয়াম পুম্নমক্তা ঐহাক্না থম্মোয় শেংনা য়াইফ-পাউজেল পীজরি। প্রোজেক্তশিং অসিদা শরুক য়াখিবা ইঞ্জিনিয়রশিং, শিন্মীশিং অমসুং লমদম অদুগী মরুপ পুম্নমক্তসু ঐহাক্না য়াইফ-পাউজেল পীজরি। ঐহাক্না অখন্ননা পি.আর.ও.গী মরুপশিংবু থাগৎচরি।

মরুপশিং,

মতম খরগী মমাঙদা, লেহদা লৈবা কুশোক বকুলা রিম্পোচে এয়রপোর্তকী তর্মিনেল শঙলেনগী উরেপ-উয়ুং তমবগী খুদোংচাবা ঐহাক্না ফংখি। অমসুং ঙসি মরুওইবা প্রোজেক্ত অসি লৈবাক মীয়ামদা কত্থোকপগী খুদোংচাবসু ফংজবা অসি ঐহাক্কী লাইবক ফবনি। লুপা করোর চাতরুক মখায় রোম চঙনা শাখিবা তর্মিনেল অসিনা এয়রপোর্ত অসিগী চহিগী ওইবা পেসেঞ্জর কেপাসিতী অসি মিলিয়ন অমদগী মিলিয়ন অহুম মখায় ফাওবা হেনগৎহনগনি। মফম অসিদা পাইবা ফ্লাইতশিংগী মশিং অদুসু শরুক অহুম ফাওবা হেনগৎপা য়াগনি। তর্মিনেল অসিগী তোপ-তোপ্পা মশক অমসু লৈ। লদাখকী শাথিরবা অইং-অশাগী ফীভমশিং অদুবু পুক্নিংদা থম্লদুনা, মসিদা জিওথর্মেল তেক্নোলোজী শীজিন্নরি। সোলার ইনর্জীসু য়াওহল্লে। মসি ভারত্তা জিওথর্মেল হীতিংগী খুদোংচাবা য়াওবা লৈবাক অসিগী অহানবা এয়রপোর্ত তর্মিনেলনি। ময়াম পুম্নমক্তা য়াইফ-পাউজেল পীজরি। ঐখোয়না হোৎনরিবা অসি মফম অসিগী অকোয়বগী ফীভমবু চেকশিন্না য়োকখৎপগা লোয়ননা লদাখতা মোদর্ন ইনফ্রাস্ত্রকচর চাওখৎহনবনি। এয়রপোর্ত তর্মিনেল অসিনা লদাখকী তুরিজম সেক্তরদসু অনৌবা ইনোৎ অমা হাপ্লগনি। মোদর্ন এয়রপোর্ত তর্মিনেল অসিগীদমক লদাখকী ঐহাক্কী ইচিল-ইনাও পুম্নমক্তা থম্মোয় শেংনা য়াইফ-পাউজেল পীজরি।

মরুপশিং,

ঙসি লৈবাক মীয়ামদা কত্থোকখিবা অতোপ্পা প্রোজেক্তশিং অদুসু য়াম্না মরুওইবা অমনি। ঙসি, নিম্মু-পদুম-দর্চা লম্বী অসি লদাখকী মীয়ামদা কত্থোকখ্রে। মসিদা লুপা করোর লিশিং অনিগা চমঙারোম চাদিং তৌখ্রে। হান্না পুং তরারোম চঙখিবা খোঙচৎ অদু হৌজিক পুং অহুমলোমদা লোইশিনবা ঙম্লগনি। মসিনা তাকপদি চৎথোক-চৎশিনগী মতম মাঙহন্দবখক নত্তনা, লম্বী অসিনা ললোন-ইতিক অমসুং কমর্সতসু চাউনা মতেং পাংগনি।

মরুপশিং,

হান্না, শ্রীনগর অমসুং লেহ শম্নহল্লিবা পাৱর ত্রান্সমিসন লাইনগী উরেপ-উয়ুং তমবা অমসুং লৈবাক মীয়ামদা কত্থোকপগী খুদোংচাবা ঐহাক্না ফংখি। ঙসিদি, হনু হাইদ্রোইলেক্ত্রিক প্রোজেক্ত অমসুং মসিবু শম্নহল্লিবা ত্রান্সমিসন লাইনসু লৈবাক মীয়ামদা কত্থোকখ্রে। থাজবা য়াবা মৈগী পথাপ অমনা মঙাল পীবখক্তা নত্তনা, পুন্সিশিংদসু মঙাল পুরক্কনি হায়বা ঐখোয় পুম্নমক খঙই। মসিনা পুন্সিদা অচৌবা অহোঙবশিং পুরক্কনি। খুঙ্গংশিংদা অনৌবা থবক-থৌরম কয়া পাঙথোকপা য়াহনগনি। অঙাংশিংগী মহৈ-মশিং তম্বা, হকশেলগী সর্বিসশিং অমসুং লমদম অদুগী অপীকপা বিজিনেসশিং য়াওনা সেক্তর খুদিংমক অসিনা কান্নবা ফংগনি। পুগা ভেলীদা মতমগা চুনবা মৈ পুথোকপগী প্রোজেক্ত অমদসু থবক খুমাঙ চাওশিন্না চঙশিল্লি।

মরুপশিং,

ঙসি, প্রোজেক্ত অমৃৎ হিম সরোবরগী মখাদা শাখিবা রিজার্ভর ৪০ সু লদাখকী মীয়ামদা কত্থোকখ্রে। মসিগা মরী লৈননা মথৌ তাবা মতমদা লৌমীশিংনা ঈথৈ-লৌখোংগী ঈশিং ফংবদা মতেঙ পাংগনি।

মরুপশিং,

মহৌশাগী ফিভম্না মরম ওইদুনা লদাখকী পুন্সি অসি য়াম্না অৱাবা ওই হায়না মতম পুম্নমক্তা হায়নরকই। মহৌশাগী ফীভমশিং অসিনা মশাগী ওইবা শিংনবশিং পুরকই। অদুবু লাইবক থিবদি, ফীভমশিং অসি লৈরবসু, মমাঙগী লৈঙাকশিংনা লদাখ চাওখৎহনবদা প্রাইওরিতী পীখিদবা অসিনি। অদুম ওইনমক ঙসিদি, লদাখ চাওখৎহনবা অসি কেন্দ্র লৈঙাক্কী অচৌবা প্রাইওরিতী অমনি। য়ুনিয়ন তেরিতোরী অমা ওইরকপদগী হৌনা, মসিগী চাওখৎ-থৌরাংগী মথৌ তাবশিংদা হেন্না পুক্নিং চঙদুনা লাক্লি। ২০১৯ ফাওবদা লদাখতা কিলোমিতর ১,৮০০ লোমগী লম্বী-থোংগী নেতৱর্ক লৈরম্মী। ঙসিদি, মসি কিলোমিতর ৪,০০০ হেল্লে। হান্না মফম অসিদা মরুওইবা থোং তরামাপল লৈরম্মি। ঙসিদি, মখোয়গী মশিং অদু ৭৫ রোমদা হেনগৎলে। হেলিপেদ মশিংসু ৭ তগী ৪০ হেনবদা হেনগৎলে। হান্না লদাখকী ইমুংশিংগী চাদা ৩.৫ রোমদা খক্তা তোতিগী ঈশিং ফংলম্মি। ঙসিদি, ইমুংশিংগী চাদা ৯৯ লোমনা তোতি ঈশিং ফংলে। লদাখকী হোস্পিতালশিংদা ফমুংশিংগী মশিং অদুনসু শরুক অনি হেনগৎলে। মসিগা লোয়ননা, জোজিলা তনেলগুম্বা মরুওইবা প্রোজেক্তশিংগী থবকশিংসু য়াম্না য়াঙনা খুমাঙ চাওশিন্না চঙশিল্লি। মসি লোইশিল্লবা মতমদা, মসিনা লদাখপু চহি চুপ্পা লৈবাক অসিগী অতৈ মফমশিংগা হেন্না ফবা মওংদা শম্নহনবা ঙম্লগনি।

মরুপশিং,

কেন্দ্র লৈঙাক অসিনা লদাখতা ইনাক খুনবগী অনৌবা লম্বীশিং শেমগৎপদা পুক্নিং চঙলি। ঙসি মফম অসিদা তুরিজমগী খুদোংচাবশিং হেনগৎলক্লি। নিংথমথাগী তুরিজম অমসুং এদভেঞ্চর তুরিজমবু য়োকখৎলি। ভাইব্রেন্ত ভিলেজেস প্রোগ্রামগী মখাদা, কেন্দ্র লৈঙাক অমসুং ঐখোয়না লদাখতা লৈবা ঙমখৈগী খুঙ্গং ৪০ হেন্না শেমগৎলি, অমসুং ঐখোয়না মখোয়বু ভারতকী “অহানবা খুঙ্গংশিং” হায়না কৌরি। মসিনা লাপ্না লৈবা মফমশিংদসু থবক ফংবগী খুদোংচাবশিং শেম্লি।

মরুপশিং,

হান্না লদাখতা হোমস্তে ১৫০ রোম লৈরম্মি। ঙসিদি, মখোয়গী মশিং অদু ৩,০০০ দা হেনগৎলে। লদাখতা গ্রীনহাউস ফার্মিংবুসু লেপ্পা লৈতনা য়োকখৎলকখি। ঙসি মফম অসিদা গ্রীনহাউস ১১,০০০ লৈরে। মসিগা মরী লৈননা লৌমীশিংগী শেন্থোক হেনগৎহন্নবগী অনৌবা ওইথোকপা য়াবশিং শেম্লে।

মরুপশিং,

লদাখতা হায় কোর্ত বেঞ্চ অমা লৈহন্নবগী তাল্লিবা ৱাফম অসিসু মতম কুইনদগী লৈরক্লবনি। ঐখোয়গী লৈঙাক অসিনা তাল্লিবা ৱাফম অদুবুসু মপুঙ ফাহনখ্রে। চহিসিগী ওগস্ত থাদা লদাখতা হায় কোর্ত বেঞ্চ অমা শেমগৎপদা অয়াবা পীখ্রে। মসিনা এদমিনিস্ত্রেসন অমসুং ৱায়েলগী পথাপ অনিমক নীংথিনা ফংহনবা ঙমহল্লগনি।

মরুপশিং,

ঙসি, দিজিতেল তেক্নোলোজীনসু অনৌবা খুদোংচাবা কয়া মফমসিদা পুরক্লি। হোতেলশিং, রেস্তোরেন্তশিং, হোমস্তেশিং নত্রগা লমদম অসিগী পোত্থোকশিং ওইরো, ওনলাইন বিজিনেসনা শেন্থোক ফংনবগী অনৌবা লম্বীশিং হাংদোক্লি। মরম অসিনা ঐখোয়না লদাখ অমসুং অতৈ লাপ্না লৈবা মফমশিংদা ভারতনেত অমসুং হায়-স্পীদ ইন্তরনেত পাকথোক-চাউথোকহনখ্রে। লৈঙাক্কী সর্বিসশিং লায়না ফংহনবা ঙম্নবা, নহারোলশিংনা ওনলাইন্দা মহৈ-মশিং তমবা ঙমহন্নবা অমসুং লমদম অদুগী ওন্ত্রপ্রিন্যুরশিংবু লৈবাক্কী অমসুং মালেমগী কৈথেলশিংগা শম্নহন্নবগীদমক লেপ্পা লৈতনা থবকসু তৌরি।

মরুপশিং,

ঐখোয়না লদাখকী অনৌবা মীরোলদা অখন্নবা পুক্নিং চঙলি। মসিগী মরমদি মফম অসিগী নহারোলশিংনা মতিং লৈবা মহৈ-মশিং তম্বা, অনৌবা তেক্নোলোজীশিং তমশিনবগী খুদোংচাবশিং ফংগদবনি, অমসুং অতোপ্পা সহরশিংদা তাংদুনা লৈহন্দনবনি। মরম অসিনা লেহদা অচৌবা সেন্তর ওফ এক্সেলেন্স অমা শাগৎলি। আই.আই.তি. জম্মু অমসুং আই.আই.এম. জম্মুগী সেতলাইত কেম্পসশিংগী প্রপোজলশিং অদুসু খুমাঙ চাওশিন্না চঙশিল্লি। মসিগা মরী লৈননা লদাখকী নহারোলশিংনা মখোয়গী মশাগী লমদমদা অৱাংবা থাক্কী মহৈ-মশিং তম্বা, থিজিনবা অমসুং মাংজিল থাবা স্কিলশিংগী হেন্না ফবা খুদোংচাবশিং ফংগনি।

মরুপশিং,

লদাখতা শান্ন-খোৎনবগী লমদসু চাউরবা মপাঙ্গল লৈ। মফম অসিগী নহারোলশিংনা আইস হোকী, নিংথমথাগী মশান্নশিং অমসুং চীং কাবগুম্বা হীরমশিংদা তোপ-তোপ্পা মফম অমা কল্লি। লদাখকী অনৌবা শান্ন-খোৎনবগী পোলিসীগী খুত্থাঙদা শান্ন-খোৎনবগী হৈথোই-শিংথোইবশিংবু য়োকখৎনবা হোৎনরিবা অসিদা ঐহাক্না নুংঙাইবা ফাওই। ঐখোয়না হোৎনরিবা অসি মফম অসিগী নহারোলশিংনা লৈবাক্কী অমসুং মালেমগী থাকশিংদা অনৌবা পন্দোলশিং য়ৌবা ঙম্নবগীদমক মখোয়দা হেন্না ফবা ত্রেনিং অমসুং খুদোংচাবশিং ফংহন্নবনি।

মরুপশিং,

লদাখতা ময়াম পুম্নমক্না কন্না হোৎনদুনা শাবা পোত্থোকশিং অসি তশেংনমক য়াম্না ফজৈ। ঐহাক্না মপান লমগী মীথুংশিংগা উনবা খুদিংদা, লদাখতা শাবা পোত্থোকশিং খুদোল ওইনা তোয়না পী অমসুং মখোয়দা ময়াম পুম্নমক্কী মতাঙদসু তমই হায়বা অদোম হান্নদগী খঙলে। ঐহাক্না জর্মনীগী চান্সেলর, স্বীদেনগী প্রাইম মিনিস্তর অমসুং কিরগিজস্তানগী প্রেসিদেন্ততা লদাখতা শাবা পোত্থোকশিং খুদোল ওইনা পীখি। লমদম অসিগী পশমিনা, সী বকথোর্ন, লমদম অদুগী খুৎশা-হৈবা পোৎলমশিং অমসুং চুমব্রৈগুম্বা উহৈশিং অসিদা ললোন-ইতিক্কী অচৌবা খুদোংচাবা কয়া লৈরি। মরম অসিনা ঐখোয়না লদাখকী চুমব্রৈবু জি.আই. তেগ পীখিবনি। ঙসিদি, মালেম শিনবা থুংনা মখোয়গী দিমান্দ হেনগৎলক্লি। ঐখোয়না হোৎনরিবা অসি পোত্থোকশিং অসিগী অনৌবা কৈথেলশিং ফংহনবা, হেন্না ফবা ব্রান্দ শেমগৎপা অমসুং কান্নবশিং অসি পোত্থোক পুথোকপশিংগী মফমদা হকথেংননা য়ৌহনবনি। ঐখোয়না চাংপা কম্ম্যুনিতীগী শন-ইরোই লোইবশিংদসু অখন্নবা পুক্নিং চংলি। পশমিনাগা মরী লৈনরিবা মখোয়গী হোৎনবা কনবা অমসুং হান্নদগী চৎনরকপা খুৎ-শা হৈববু মখা তানা মপাঙ্গল কনখৎহন্নবা হোৎনরি। লদাখতা অৱাংবা চীংগী মফমশিংদা ললোন-ইতিক্কী ওইনা লৈ থাবগী থৌওংসু য়োকখৎলি।

মরুপশিং,

লদাখকী নাৎকী হেরিতেজ অসি ঐখোয়গী লৈবাক অসিগী মমল য়াম্লবা লন অমনি। মফম অসিগী অরিবা মোনাস্ত্রীশিং, বৌদ্ধ চৎনবীশিং অমসুং লমদম অসিগী কুহ্মৈশিং অসি তুংগী মীরোলগীদমক য়োকখত্তুনা থমগদবনি অমসুং ঙাক-শেনবিগদবনি। হীরম অসিদা, ইকায়খুম্নজরবা কুশোক বকুলা রিম্পোচে জীনা লৌখিবা থৌদাং অসি ঐখোয় পুম্নমক্কীদমক অচৌবা ইথিল অমনি। ঐখোয়গী লৈঙাক্না হোৎনরিবা অসি মালেম শিনবা থুংনা লৈরিবা মীয়াম্না লদাখকী নাৎ অমসুং চৎনবীশিং খঙহন্নবনি। মিসন অসিবু পুক্নিংদা থম্লদুনা, ঙসি ভারতকী অহানবা পেত্রোগ্লিফ কনজার্ভেসন পার্ক লেহদা লৈবাক মীয়ামদা কত্থোকখ্রে। মসিনা লদাখকী অরিবা হেরিতেজ য়োকখৎপনবা হোৎনরিবশিংবু হেন্না মপাঙ্গল কনখৎহনগনি। তুংগী মীরোলশিংনা হেরিতেজ অসি খঙবা ঙম্লগনি, অমসুং মালেম শিনবা থুংবদগী লাকপা মীওইশিংনসু লদাখকী ইনাক খুল্লবা পুৱারী অসি খঙবা ঙম্লগনি।

মরুপশিং,

ঐখোয়না অমত্তা ওইনা লদাখপু চাওখৎপগী অনৌবা অৱাংবা থাকশিংদা পুরক্কনি হায়বগী মপুং ফাবা থাজবা ঐহাক্না থম্লি। মসিগা লোয়ননা, চাওখৎ-থৌরাংগী থবক কয়া অসিগীদমক ময়াম পুম্নমক্তা ঐহাক্না অমুক হন্না থম্মোয় শেংনা য়াইফ-পাউজেল পীজরি।

য়াম্না থাগৎচরি। জুল্লে!

খঙহঞ্জবা: মসি প্রধান মন্ত্রীগী ৱারোলগী চাউরাকপা ৱাহন্থোক্নি। অশেঙবা ৱারোলদি হিন্দীদা পীখিবনি।

*****