ಕೇಂದ್ರ ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ಸಚಿವಾಲಯದ ಕಾರ್ಯದರ್ಶಿ ಶ್ರೀ ಸುಧಾಂಶ್ ಪಂತ್ ಅವರು ನಾಳೆ (18.10.2026 ರಂದು) ಕರ್ನಾಟಕದ ಮೈಸೂರಿನಲ್ಲಿ ನಡೆಯುತ್ತಿರುವ ಒಂಬತ್ತು ದಿನಗಳ ಶಿಲ್ಪ ಸಮಗಂ ಪ್ರದರ್ಶನ (ಉತ್ಸವ/ಮೇಳ) 2026ಕ್ಕೆ ಭೇಟಿ ನೀಡಲಿದ್ದಾರೆ. ಈ ವಿಶೇಷ ಉತ್ಸವವನ್ನು ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ಸಚಿವಾಲಯ ಆಯೋಜಿಸುತ್ತಿದೆ.

ಮೈಸೂರಿನಲ್ಲಿ ಸಚಿವಾಲಯದ ಯೋಜನೆಗಳು, ಕಾರ್ಯಕ್ರಮಗಳು ಮತ್ತು ಅನುಷ್ಠಾನದಲ್ಲಿರುವ ಉಪಕ್ರಮಗಳ ಸಮಗ್ರ ಪರಿಶೀಲನೆಯ ಜೊತೆಗೆ, ಕಾರ್ಯದರ್ಶಿಯವರು ಮೈಸೂರಿನಲ್ಲಿ ನಡೆಯುತ್ತಿರುವ ಪ್ರದರ್ಶನ ಸ್ಥಳಕ್ಕೆ ಕೂಡ ಭೇಟಿ ನೀಡಲಿದ್ದಾರೆ.

ಮೈಸೂರು ದಸರಾ ವಸ್ತು ಪ್ರದರ್ಶನ ಮೈದಾನದಲ್ಲಿ ಅಕ್ಟೋಬರ್ 11, 2026 ರಿಂದ ಪ್ರದರ್ಶನ (ಉತ್ಸವ/ಮೇಳ) ನಡೆಯುತ್ತಿದೆ ಎಂದು ಕೇಂದ್ರ ಸಚಿವಾಲಯದ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಪ್ರದರ್ಶನವು(ಉತ್ಸವ/ಮೇಳ) ಸೋಮವಾರ, ಅಕ್ಟೋಬರ್ 19, 2026 ರಂದು ಮುಕ್ತಾಯಗೊಳ್ಳಲಿದೆ.

ಪರಿಶಿಷ್ಟ ಜಾತಿಗಳು (ಎಸ್.ಸಿ‌), ಇತರ ಹಿಂದುಳಿದ ವರ್ಗಗಳು (ಒ.ಬಿ.ಸಿ) ಸಮುದಾಯದ ಮತ್ತು ಸಫಾಯಿ ಕರ್ಮಚಾರಿ ವರ್ಗಗಳ ಕುಶಲಕರ್ಮಿಗಳು ಮತ್ತು ಫಲಾನುಭವಿಗಳಿಗೆ ಉತ್ಸವ ಪ್ರದರ್ಶನವು ಮಾರುಕಟ್ಟೆ ವೇದಿಕೆಯನ್ನು ಒದಗಿಸುತ್ತದೆ, ಇದರಿಂದಾಗಿ ಅವರು ತಮ್ಮ ಸಾಂಪ್ರದಾಯಿಕ ಕರಕುಶಲ ವಸ್ತುಗಳು, ಕೈಮಗ್ಗ ಉತ್ಪನ್ನಗಳು ಮತ್ತು ಇತರ ಸರಕುಗಳನ್ನು ವ್ಯಾಪಕ ಪ್ರೇಕ್ಷಕರಿಗೆ ಪ್ರದರ್ಶಿಸಲು ಅನುವು ಮಾಡಿಕೊಡುತ್ತದೆ ಎಂದು ಅವರು ಹೇಳಿದರು.

ಈ ವಿಶೇಷ ಪ್ರದರ್ಶನವನ್ನು ಕೇಂದ್ರ ಸರ್ಕಾರದ ಸಚಿವಾಲಯದ ಅಡಿಯಲ್ಲಿ ಬರುವ ರಾಷ್ಟ್ರೀಯ ಪರಿಶಿಷ್ಟ ಜಾತಿಗಳ ಹಣಕಾಸು ಮತ್ತು ಅಭಿವೃದ್ಧಿ ನಿಗಮ (ಎನ್.ಎಸ್.ಎಫ್.ಡಿ.ಸಿ.), ರಾಷ್ಟ್ರೀಯ ಹಿಂದುಳಿದ ವರ್ಗಗಳ ಹಣಕಾಸು ಮತ್ತು ಅಭಿವೃದ್ಧಿ ನಿಗಮ (ಎನ್.ಬಿ.ಸಿ.ಎಫ್.ಡಿ.ಸಿ.) ಮತ್ತು ರಾಷ್ಟ್ರೀಯ ಸಫಾಯಿ ಕರ್ಮಚಾರಿಗಳ ಹಣಕಾಸು ಮತ್ತು ಅಭಿವೃದ್ಧಿ ನಿಗಮ (ಎನ್.ಎಸ್.ಕೆ.ಎಫ್.ಡಿ.ಸಿ.) ಎಂಬ ಮೂರು ರಾಷ್ಟ್ರೀಯ ನಿಗಮಗಳು ಜಂಟಿಯಾಗಿ ಆಯೋಜಿಸಿವೆ ಎಂದು ಸಂಬಂಧಪಟ್ಟ ಅಧಿಕಾರಿ ತಿಳಿಸಿದ್ದಾರೆ, ಈ ನಿಗಮಗಳು ಕುಶಲಕರ್ಮಿಗಳು ಮತ್ತು ಅರ್ಹ ಫಲಾನುಭವಿಗಳಿಗೆ ಹಣಕಾಸಿನ ನೆರವು ನೀಡುತ್ತವೆ.

ಪ್ರಸ್ತುತ ನಡೆಯುತ್ತಿರುವ ಪ್ರದರ್ಶನದಲ್ಲಿ 83 ಮಳಿಗೆಗಳಿವೆ, ಅವುಗಳಲ್ಲಿ 80 ಮಳಿಗೆಗಳನ್ನು ಕುಶಲಕರ್ಮಿಗಳಿಗೆ ನೀಡಲಾಗಿದೆ, ಅವುಗಳಲ್ಲಿ 37 ಮಹಿಳಾ ಕುಶಲಕರ್ಮಿಗಳು ನಡೆಸುತ್ತಿದ್ದಾರೆ. ಆಂಧ್ರಪ್ರದೇಶ, ಬಿಹಾರ, ಕರ್ನಾಟಕ, ಕೇರಳ, ರಾಜಸ್ಥಾನ, ಪುದುಚೇರಿ, ಗುಜರಾತ್, ಮಧ್ಯಪ್ರದೇಶ, ಮಹಾರಾಷ್ಟ್ರ, ತೆಲಂಗಾಣ, ತಮಿಳುನಾಡು ಮತ್ತು ಉತ್ತರ ಪ್ರದೇಶ ಸೇರಿದಂತೆ 12 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಕುಶಲಕರ್ಮಿಗಳು ಪ್ರದರ್ಶನದಲ್ಲಿ ಭಾಗವಹಿಸುತ್ತಿದ್ದಾರೆ.

ಕರಕುಶಲ ವಸ್ತುಗಳು, ಕೈಮಗ್ಗ ಸೀರೆಗಳು, ಮಸಾಲೆಗಳು, ಉಪ್ಪಿನಕಾಯಿ, ಧೂಪದ್ರವ್ಯ, ಜೇನುತುಪ್ಪ ಉತ್ಪನ್ನಗಳು, ಅಚ್ಚು - ಕೈ ಮುದ್ರಿತ ವಸ್ತುಗಳು, ಚರ್ಮದ ಸರಕುಗಳು, ಮರದ ಆಟಿಕೆಗಳು, ಚೀಲಗಳು, ಚೀಲಗಳು, ಟೆರಾಕೋಟಾ ಉತ್ಪನ್ನಗಳು, ಕೃತಕ ಆಭರಣಗಳು, ರೋಸ್‌ ವುಡ್ ವಾಲ್ ಹ್ಯಾಂಗಿಂಗ್‌ ಗಳು ಮತ್ತು ಹಾಸಿಗೆ ಮತ್ತು ಕುಶನ್ ಕವರ್‌ ಗಳು ಸೇರಿದಂತೆ ವೈವಿಧ್ಯಮಯ ಉತ್ಪನ್ನಗಳನ್ನು ಮಳಿಗೆಗಳು ಒಳಗೊಂಡಿವೆ. ಸಾಂಪ್ರದಾಯಿಕ ಖಾದ್ಯಗಳನ್ನು ಪೂರೈಸುವ ಆಹಾರ ಮಳಿಗೆಗಳಿಗೂ ಅವರು ಭೇಟಿ ನೀಡಲಿದ್ದಾರೆ.

ಕುಶಲಕರ್ಮಿಗಳಿಗೆ ಮಾರುಕಟ್ಟೆ ಸಂಪರ್ಕಗಳನ್ನು ಬಲಪಡಿಸಲು, ಸಾಂಪ್ರದಾಯಿಕ ಕರಕುಶಲತೆಯನ್ನು ಉತ್ತೇಜಿಸಲು ಮತ್ತು ಸುಸ್ಥಿರ ಜೀವನೋಪಾಯದ ಅವಕಾಶಗಳನ್ನು ಸೃಷ್ಟಿಸಲು ಪ್ರದರ್ಶನ(ಮೇಳ)ವನ್ನು ವಿನ್ಯಾಸಗೊಳಿಸಲಾಗಿದೆ. ಸಂದರ್ಶಕರು ಮತ್ತು ಸಂಭಾವ್ಯ ಗ್ರಾಹಕರೊಂದಿಗೆ  ನೇರ ಸಂವಾದದ ಮೂಲಕ, ಭಾಗವಹಿಸುವ ಕುಶಲಕರ್ಮಿಗಳು ತಮ್ಮ ಉತ್ಪನ್ನಗಳನ್ನು ಪ್ರದರ್ಶಿಸಬಹುದು, ಮಾರಾಟ ಮಾಡಬಹುದು, ತಮ್ಮ ಗ್ರಾಹಕರ ನೆಲೆಯನ್ನು ವಿಸ್ತರಿಸಬಹುದು ಮತ್ತು ಅವರ ಉದ್ಯಮಗಳ ಮಾರುಕಟ್ಟೆ ವ್ಯಾಪ್ತಿಯನ್ನು ಸುಧಾರಿಸಬಹುದು.  ಈ ಉಪಕ್ರಮವು ಭಾರತದ ಶ್ರೀಮಂತ ಸಾಂಸ್ಕೃತಿಕ ಪರಂಪರೆಯನ್ನು ಉತ್ತೇಜಿಸುತ್ತದೆ ಮತ್ತು ಸಾಂಪ್ರದಾಯಿಕ ಕಲಾ ಪ್ರಕಾರಗಳು ಮತ್ತು ಕೌಶಲ್ಯಗಳ ಸಂರಕ್ಷಣೆಯನ್ನು ಬೆಂಬಲಿಸುತ್ತದೆ.

ಇದೇ ಬರುವ ಸೋಮವಾರ, ಅಕ್ಟೋಬರ್ 19, 2026 ರ ವರೆಗೆ ಮೈಸೂರು ದಸರಾ ಪ್ರದರ್ಶನ ಮೈದಾನದಲ್ಲಿ "ಶಿಲ್ಪ್ ಸಮಗಮ್ ಮೇಳ 2026" ಪ್ರದರ್ಶನವು ಮುಂದುವರಿಯಲಿದೆ. ಈ ಪ್ರದರ್ಶನ ಮೂಲಕ, ಕುಶಲಕರ್ಮಿಗಳ ಜೀವನೋಪಾಯವನ್ನು ಬೆಂಬಲಿಸುವಾಗ, ಭಾರತದ ಸಾಂಪ್ರದಾಯಿಕ ಕರಕುಶಲ ವಸ್ತುಗಳು ಮತ್ತು ಕೈಮಗ್ಗ ಉತ್ಪನ್ನಗಳನ್ನು ಅನ್ವೇಷಿಸಲು ಸಂದರ್ಶಕರಿಗೆ ಕೂಡ ವಿಶೇಷ ಅವಕಾಶ ನೀಡುತ್ತದೆ. ಇಂತಹ ಉಪಕ್ರಮಗಳ ಮೂಲಕ, ಕೇಂದ್ರ ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ಸಚಿವಾಲಯವು ಮಾರುಕಟ್ಟೆ ಪ್ರವೇಶವನ್ನು ಬಲಪಡಿಸುವುದು, ಉದ್ಯಮಶೀಲತೆಯನ್ನು ಪ್ರೋತ್ಸಾಹಿಸುವುದು ಮತ್ತು ಆರ್ಥಿಕ ಅನಾನುಕೂಲಕರ ಸಮುದಾಯಗಳ ಆರ್ಥಿಕ ಸಬಲೀಕರಣಗೊಳಿಸುವುದನ್ನು  ಮುನ್ನಡೆಸುತ್ತಿದೆ ಹಾಗೂ ಮುಂತಾದ ಕಾರ್ಯಚಟುವಟಿಕೆಗಳನ್ನು ಉತ್ತಮ ರೀತಿಯಲ್ಲಿ ಮುಂದುವರೆಸಿದೆ.

ಸಚಿವಾಲಯ ಮತ್ತು ಅದರ ಮೂರು ರಾಷ್ಟ್ರೀಯ ನಿಗಮಗಳ ಯೋಜನೆಗಳು ಮತ್ತು ಕಾರ್ಯಕ್ರಮಗಳ ಬಗ್ಗೆ ಮಾಹಿತಿಯನ್ನು ಪ್ರಸಾರ ಮಾಡಲು, ಅರ್ಹ ಫಲಾನುಭವಿಗಳಿಗೆ ಲಭ್ಯವಿರುವ ಆರ್ಥಿಕ ನೆರವು ಮತ್ತು ಉದ್ಯಮಶೀಲತಾ ಅವಕಾಶಗಳ ಬಗ್ಗೆ ತಿಳಿದುಕೊಳ್ಳಲು ಸಹಾಯ ಮಾಡಲು ಪ್ರದರ್ಶನವು ಒಂದು ಪ್ರಮುಖ ವೇದಿಕೆಯಾಗಿಯೂ ಕಾರ್ಯನಿರ್ವಹಿಸುತ್ತಿದೆ.

ಸಮಕಾಲೀನವಾಗಿ ಅನ್ವಯವಾಗುವ ವ್ಯವಸ್ಥೆಗಳಿಗೆ ಅನುಗುಣವಾಗಿ ಪ್ರಯಾಣ ವೆಚ್ಚಗಳು, ದೈನಂದಿನ ಭತ್ಯೆ, ಸರಕು ಮತ್ತು ಊಟದ ಸಾಗಣೆಗೆ ಉಚಿತ ಮಳಿಗೆಗಳು ಮತ್ತು ಬೆಂಬಲವನ್ನು ಒದಗಿಸುವ ಮೂಲಕ ಸಚಿವಾಲಯವು ಕುಶಲಕರ್ಮಿಗಳ ಭಾಗವಹಿಸುವಿಕೆಯನ್ನು ಸುಗಮಗೊಳಿಸುತ್ತಿದೆ.

ಪ್ರದರ್ಶನದ ಜೊತೆಗೆ, ಗುರಿ ಹೊಂದಿರುವ- ವಿಶೇಷ ಗುಂಪು ಕುಶಲಕರ್ಮಿಗಳು ತಯಾರಿಸಿದ ಉತ್ಪನ್ನಗಳಿಗೆ ಭಾರತ ಮತ್ತು ವಿದೇಶಗಳಲ್ಲಿ ಡಿಜಿಟಲ್ ಪ್ಲಾಟ್‌ಫಾರ್ಮ್‌ ಗಳ ಮೂಲಕ ಜಾಗತಿಕ ಮಾರುಕಟ್ಟೆ ಪ್ರವೇಶವನ್ನು ವಿಸ್ತರಿಸಲು ಕೇಂದ್ರ ಸಚಿವಾಲಯವು ಭಾರತ್ ತುಲಿಪ್ (ಸಾಂಪ್ರದಾಯಿಕ ಕುಶಲಕರ್ಮಿಗಳ ಉನ್ನತಿ ಜೀವನೋಪಾಯ ಕಾರ್ಯಕ್ರಮ) ಉಪಕ್ರಮವನ್ನು ಉತ್ತೇಜಿಸುತ್ತಿದೆ. ಭಾರತ್ ತುಲಿಪ್ ಯೋಜನೆಯಡಿಯಲ್ಲಿ ಉತ್ಪನ್ನಗಳನ್ನು ಬ್ರ್ಯಾಂಡಿಂಗ್ ಮಾಡುವುದು ಅವುಗಳ ಪ್ರಸಾರ , ಗೋಚರತೆಯನ್ನು ಸುಧಾರಿಸಲು, ಆನ್‌ ಲೈನ್ ಮಾರಾಟವನ್ನು ಸುಗಮಗೊಳಿಸಲು ಮತ್ತು ಸಾಂಪ್ರದಾಯಿಕ ಕುಶಲಕರ್ಮಿಗಳನ್ನು ವಿಶಾಲ ಗ್ರಾಹಕ ನೆಲೆಯೊಂದಿಗೆ ಸಂಪರ್ಕಿಸಲು ಉದ್ದೇಶಿಸಲಾಗಿದೆ.

ಸಚಿವಾಲಯವು 2022 ರಿಂದ ಶಿಲ್ಪ್ ಸಮಾಗಮ್ ಪ್ರದರ್ಶನ(ಮೇಳ)ಗಳನ್ನು ದೇಶದಾದ್ಯಂತ ಆಯೋಜಿಸುತ್ತಿದೆ, ಇದುವರೆಗೆ ನಡೆದ 13 ಮೇಳಗಳ ಮೂಲಕ 975 ಕುಶಲಕರ್ಮಿಗಳಿಗೆ ಪ್ರಯೋಜನವನ್ನು ನೀಡಿದೆ.

ಪ್ರಸ್ತುತ ನಡೆಯುತ್ತಿರುವ ಮೈಸೂರು ಆವೃತ್ತಿಯು 2026–27ರ ಹಣಕಾಸು ವರ್ಷದ ಮೊದಲ ಶಿಲ್ಪ್ ಸಮಾಗಮ್ ಪ್ರದರ್ಶನ(ಮೇಳ)ವಾಗಿದೆ.

ಗುವಾಹಟಿಯಲ್ಲಿ (ಅಕ್ಟೋಬರ್ 21 ರಿಂದ 28, 2026) ಹೆಚ್ಚುವರಿ ಪ್ರದರ್ಶನ /ಮೇಳಗಳನ್ನು ಆಯೋಜಿಸಲು ಸಚಿವಾಲಯವು ಪ್ರಸ್ತಾಪಿಸಿದೆ;  ಪ್ರಸಕ್ತ ಹಣಕಾಸು ವರ್ಷದಲ್ಲಿ ನವದೆಹಲಿ, ಜೋಧ್‌ ಪುರ ಮತ್ತು ಲಕ್ನೋದಲ್ಲಿ ದಿಲ್ಲಿ ಹಾತ್, ನವೆಂಬರ್ 14 ರಿಂದ 27, 2026 ರವರೆಗೆ ನವದೆಹಲಿಯ ಭಾರತ್ ಮಂಟಪದಲ್ಲಿ ನಡೆದ ಭಾರತ ಅಂತರರಾಷ್ಟ್ರೀಯ ವ್ಯಾಪಾರ ಪ್ರದರ್ಶನ 2026 ಮತ್ತು ಫೆಬ್ರವರಿ 2027 ರಲ್ಲಿ ನಡೆದ ಸೂರಜ್‌ ಕುಂಡ್ ಪ್ರದರ್ಶನದಂತಹ ಪ್ರಮುಖ ಪ್ರದರ್ಶನಗಳಲ್ಲಿ ಭಾಗವಹಿಸಲಿದೆ.

 

******

(ಪ್ರಕಟಣೆ ಐ.ಡಿ.: 2324819) ವಿಸಿಟರ್ ಕೌಂಟರ್ : 15