ন’ডেল বিভাগ হিচাপে প্ৰশাসনিক সংস্কাৰ আৰু ৰাজহুৱা অভিযোগ বিভাগৰ সৈতে চৰকাৰে আৰম্ভ কৰা বিশেষ অভিযান ৬-এ লাভ কৰিছে গুৰুত্বপূৰ্ণ গতি। ২০২৬ চনৰ ৩০ ছেপ্টেম্বৰত প্ৰস্তুতিমূলক পৰ্যায় সফলভাৱে সম্পূৰ্ণ হোৱাৰ পিছত, ৰূপায়ণ পৰ্যায় আৰম্ভ হৈছিল ২০২৬ চনৰ ২ অক্টোবৰত আৰু  ই অহা ৩১ অক্টোবৰলৈকে অব্যাহত থাকিব। চৰকাৰৰ সমগ্ৰ মন্ত্ৰালয়/বিভাগসমূহে ৰূপায়ণৰ প্ৰথম দুসপ্তাহত উল্লেখযোগ্য উৎসাহ প্ৰদৰ্শন, স্বচ্ছতাৰ উদ্দেশ্যসমূহ আগুৱাই নিয়াৰ বাবে উদ্ভাৱনীমূলক, নাগৰিককেন্দ্ৰিক আৰু বহনক্ষম পদক্ষেপ গ্ৰহণ আৰু অৱশিষ্ট বিষয়বিলাক নিষ্পত্তি কৰিছে।

স্বচ্ছতা আৰু অৱশিষ্ট বিষয়বিলাক নিষ্পত্তিৰ বাবে অভিযানটোৰ ৰূপায়ণ পৰ্যায়ৰ অগ্ৰগতি পৰ্যালোচনা কৰিবলৈ ডি এ আৰ পি জিৰ সচিব শ্ৰীমতী নিবেদিতা শুক্লা বাৰ্মাৰ অধ্যক্ষতাত বিশেষ অভিযান ৬ৰ ন’ডেল বিষয়াসকলৰ সৈতে তৃতীয়খন বৈঠক অনুষ্ঠিত হৈছিল।

৮৪টা মন্ত্ৰালয়/বিভাগ, ইবিলাকৰ ৰাজহুৱা খণ্ডৰ উদ্যোগ আৰু ক্ষেত্ৰ কাৰ্যালয়সমূহক প্ৰতিনিধিত্ব কৰা ২৪০টাৰো অধিক স্থানৰ ৬০০ৰো অধিক বিষয়াই এই বৈঠকত ভাৰ্চুৱেল মাধ্যমত অংশগ্ৰহণ কৰিছিল। বৈঠকত ডি এ আৰ পি জিৰ অতিৰিক্ত সচিব শ্ৰী পুনীত যাদৱে চলিত অভিযানৰ অগ্ৰগতিৰ বিষয়ে বক্তব্য আগবঢ়ায় আৰু মন্ত্ৰালয়/বিভাগসমূহে গ্ৰহণ কৰা উদ্ভাৱনীমূলক ব্যৱস্থাবোৰত আলোকপাত কৰে।

এই বছৰৰ অভিযানৰ এক নতুন বৈশিষ্ট্য হৈছে উৎসর্গীকৃত এদিনীয়া অভিযান, যাৰ অধীনত মুখ্য মন্ত্ৰালয়/বিভাগে তেওঁলোকৰ সকলো সংলগ্ন আৰু অধীনস্থ কাৰ্যালয় আৰু ক্ষেত্ৰ প্ৰতিষ্ঠানত এদিনতে পৰিষ্কাৰ-পৰিচ্ছন্নতা আৰু নিষ্পত্তি কাৰ্যকলাপ হাতত লয়। এই এদিনীয়া কাৰ্যকলাপৰ প্ৰভাৱ বিশেষ অভিযান ৬ৰ ব্যাপক প্ৰসাৰত স্পষ্ট হৈ পৰিছে, য’ত বিভিন্ন মন্ত্ৰালয়/বিভাগৰ ক্ষেত্ৰ কাৰ্যালয়সমূহে এই অভিযানৰ কাৰ্যকলাপত সক্ৰিয়ভাৱে অংশগ্ৰহণ কৰিছে।

উদ্ভাৱনীমূলক পদক্ষেপঃ মন্ত্ৰালয়/বিভাগসমূহে নিয়মীয়া পৰিষ্কাৰ-পৰিচ্ছন্নতাৰ বাহিৰেও কেইবাটাও উদ্ভাৱনীমূলক আৰু নাগৰিককেন্দ্ৰিক পদক্ষেপ গ্ৰহণ কৰিছে। ইয়াৰে কিছুমান হ’লঃ

নাগৰিককেন্দ্ৰিক সেৱাঃ ডাক বিভাগে ডিজিপোষ্ট নামৰ এটা অনন্য ফিজিটেল মেইল সেৱা আৰম্ভ কৰিছে, যাৰ অধীনত গুজৰাট আৰক্ষীয়ে জাৰী কৰা ট্ৰেফিক ই-চালানসমূহ ডিজিটেলভাৱে প্ৰেৰণ কৰা আৰু নাগৰিকসকলক প্ৰদান কৰা হয়। প্ৰতিৰক্ষা বিভাগে অভিযোগ নিষ্পত্তিৰ বাবে ই-ছাৱানী হেল্পডেস্ক আৰু ৰেল মন্ত্ৰালয়ে যুৱক-যুৱতী, শিক্ষাৰ্থী আৰু যাত্ৰীসকলক ৰেলৰ সমস্যা আৰু জনসাধাৰণৰ অংশগ্ৰহণৰ সৈতে জড়িত কৰিবলৈ ৰেল জন যুৱ সংবাদৰ আয়োজন কৰিছিল।

ই-আৱৰ্জনা ব্যৱস্থাপনাঃ কয়লা মন্ত্ৰালয়ে এমচিএলৰ মুখ্য কাৰ্যালয়ত এটা ই-আৱৰ্জনা কিয়স্ক স্থাপন কৰিছিল আৰু ইয়াৰ ক্ষেত্ৰ কাৰ্যালয়সমূহত ই-আৱৰ্জনা সংগ্ৰহ অভিযান চলাইছিল। খনি মন্ত্ৰালয়ে হ্ৰাস, পুনৰ ব্যৱহাৰ আৰু পুনৰ সংসাধন পদ্ধতিৰ অধীনত পেলনীয়া  ইলেক্ট্ৰনিক আৰু বৈদ্যুতিক সামগ্ৰীৰ নিৰ্ভৰযোগ্য নিষ্পত্তিৰ বাবে উৎসাহিত কৰিবলৈ জি পি অ’ এ-৩ ভৱনত ই-আৱৰ্জনা সংগ্ৰহৰ ষ্টল স্থাপন কৰিছিল। শিক্ষা মন্ত্ৰালয়ৰ অধীনত, অপ্রচলিত ই-আৱৰ্জনা পৃথক তথা আই আই আই টি এলাহাবাদত সংসাধনৰ বাবে সংগ্ৰহ কৰা হৈছিল। ইয়াৰ লগতে বিদ্যালয় শিক্ষা আৰু সাক্ষৰতা বিভাগে এক ই-আৱৰ্জনা সংগ্ৰহ অভিযানৰ আয়োজন কৰিছিল।

আৱৰ্জনাৰ পৰা সম্পদঃ পেলনীয়া সামগ্ৰীবোৰক কলাসন্মত তথা উপযোগী সামগ্ৰীলৈ ৰূপান্তৰিত কৰা হৈছে। সংস্কৃতি মন্ত্ৰালয়ে পেলনীয়া প্লাষ্টিকৰ চামুচ আৰু কাগজৰ পৰা এটা ময়ূৰ ভাস্কৰ্য আৰু পেলনীয়া কম্পিউটাৰৰ অংশ আৰু ঘৰুৱা আৱৰ্জনাৰ পৰা ৰবট ভাস্কৰ্য ৰি-বট তৈয়াৰ কৰিছিল। ৰেল মন্ত্ৰালয়ে ৰেল সংগ্ৰহালয়ত এটা আৱৰ্জনা পৰা শিল্প পাৰ্ক স্থাপন আৰু ক্ষুদ্ৰ, লঘু আৰু মজলীয়া উদ্যোগ মন্ত্ৰালয়ে পেলনীয়া ই-আৱৰ্জনাৰ পৰা এটা কাৰ্যক্ষম চৰখা তৈয়াৰ কৰিছিল।

ৰেকৰ্ড, অন্তৰ্ভুক্তি আৰু পৰিষ্কাৰ-পৰিচ্ছন্নতাঃ বৈজ্ঞানিক আৰু ঔদ্যোগিক গৱেষণা বিভাগে অপ্রচলিত ৰেকৰ্ডসমূহৰ পৰা কটা-ছিঙা আৰু অপতৃণ আঁতৰ কৰাৰ সঁজুলি নিৰ্মাণৰ কাম হাতত লৈছে। পেট্ৰ’লিয়াম আৰু প্ৰাকৃতিক গেছ মন্ত্ৰালয়ৰ অধীনৰ নুমলীগড় শোধনাগাৰ লিমিটেডে কুইজ-আধাৰিত স্বাস্থ্য সজাগতা অভিযানৰ পিছত শ্ৰমিকসকলকৰ মাজত স্বচ্ছতা কিট বিতৰণ কৰে। আনহাতে, গৃহ পৰিক্ৰমা মন্ত্ৰালয়ৰ অধীনত থকা আছাম ৰাইফলছে সামূহিক অংশগ্ৰহণৰ জৰিয়তে আৱৰ্জনা পৃথকীকৰণ আৰু অনাময় ব্যৱস্থাৰ প্ৰচাৰ কৰে।

এই অভিযানৰ বিষয়ে ছপা আৰু ইলেক্ট্ৰনিক মাধ্যম তথা ছ’চিয়েল মিডিয়াৰ জৰিয়তে ব্যাপকভাৱে প্ৰচাৰ কৰা হৈছে। আনহাতে, মন্ত্ৰালয়/বিভাগসমূহে নিয়মীয়াভাৱে #স্পেচিয়েলকেম্পেইন৬ৰ অধীনত ছ’চিয়েল মিডিয়াত তেওঁলোকৰ কাৰ্যকলাপৰ তথ্যৰ পাৰস্পৰিক বিনিময় আৰু পি আই বিৰ জৰিয়তে বিবৃতি জাৰি কৰি আহিছে।

*****

NKR/Anand/PK