قومی معیار کے بنیادی ڈھانچے کو مضبوط بنانے اور بھارت کی صاف توانائی کی منتقلی کو مہمیز کرنے کی سمت ایک بڑی پیش رفت کے طور پر، بیورو آف انڈین اسٹینڈرڈز نے عالمی معیارات کے دن 2026 کے موقع پر نئی دہلی میں منعقدہ قومی تقریب میں بی آئی ایس سلور ریفائنری اسکیم، ابھرتی ہوئی ٹکنالوجیوں اور صاف توانائی کی نقل و حرکت پر نئے بھارتی معیارات اور پائیدار زراعت اور مینوفیکچرنگ کے لیے ایک معیاری روڈ میپ کی نقاب کشائی کی۔

معیاری کاری کے پیشہ ور افراد، ماہرین تعلیم، صنعت کے نمائندوں اور سینئر اہلکاران سے صدارتی خطاب کرتے ہوئے؛ صارفین کے امور، خوراک و عوامی تقسیم، اور نئی و قابلِ تجدید توانائی، اور تعلیم کے مرکزی وزیر جناب پرہلاد جوشی نے معیار کے تئیں بھارت کے عزم پر زور دیا: ”وزیرِ اعظم نریندر مودی جی کے وژن کے تحت، وِکست بھارت کی طرف ہمارا سفر ایک ہی منتر سے چلایا جا رہا ہے: معیار، معیار، اور صرف معیار۔“ اس سال کے تھیم، ’ایک بہتر دنیا کے لیے مشترکہ وژن: ایس ڈی جی 7 (صاف اور سستی توانائی)‘ پر بات کرتے ہوئے، جناب جوشی نے بھارت کی توانائی کی تبدیلی کو تشکیل دینے میں بی آئی ایس کے ذریعے تیار کردہ بھارتی معیارات کے کردار کو اجاگر کیا۔

ملک میں معیاری ایکو سسٹم کو وسعت دینے کی بی آئی ایس کی جاری کوششوں پر مبارکباد پیش کرتے ہوئے، صارفین کے امور، خوراک و عوامی تقسیم اور سماجی انصاف و تفویضِ اختیارات کے وزیرِ مملکت جناب بی ایل ورما نے ہر شہری کے معیارِ زندگی کو بہتر بنانے میں معیارات کے بنیادی اثرات پر زور دیا۔ محترمہ نیموبین جینتی بھائی بامبھنیا، صارفین کے امور، خوراک و عوامی تقسیم کی وزیرِ مملکت نے معیاری کاری کے صارف مرکوز پہلو پر زور دیا۔ انھوں نے نئے ڈومینز میں معیاری ترقی کو وسعت دینے کی ضرورت پر زور دیا، جس سے ایک متوازن ایکو سسٹم کو یقینی بنایا جا سکے جو بیک وقت صنعتی ترقی کو فروغ دے اور صارفین کی بہبود کی حفاظت کرے۔

حالیہ برسوں میں بی آئی ایس کی تاریخی کام یابیوں کی تعریف کرتے ہوئے، محترمہ ندھی کھرے، آئی اے ایس، سکریٹری، صارفین کے امور کے محکمہ نے عوامی خریداری اور ضابطے میں یکسانیت، مستقل مزاجی، اور عمل کی ادارہ جاتی کاری کو قائم کرنے میں معیاری کاری کے اہم کردار پر زور دیا۔ انھوں نے زور دے کر کہا کہ مؤثر صارفین کا تحفظ مضبوط جانچ، ڈیجیٹل نفاذ، اور مطابقت کی تشخیص کے ذریعے روک تھام پر مبنی ہونا چاہیے۔

وفود کا خیرمقدم کرتے ہوئے، بی آئی ایس کے ڈائریکٹر جنرل، جناب سنجے گرگ نے کہا، ”معیارات جدت طرازی، ٹکنالوجی کی ترقی، اور صنعتی طاقت کے اہم معاون ہیں۔“ انھوں نے اعلان کیا کہ بی آئی ایس دنیا کی پہلی قومی معیاری کاری کی تنظیموں میں سے ہے جس نے تمام اسٹیک ہولڈروں کے لیے معیارات کی ترقی اور اس تک رسائی کو مکمل طور پر ڈیجیٹل بنا دیا ہے۔ انھوں نے کاروبار کرنے میں آسانی کی حمایت کرنے والی بی آئی ایس میں بڑی اصلاحات کو بھی اجاگر کیا۔

بی آئی ایس سلور ریفائنری اسکیم کا آغاز

سلور ریفائنریوں اور ٹکبرسوں کے لیے بی آئی ایس سرٹیفیکیشن اسکیم، پورے بھارت میں چاندی کے بلین اور سکوں کو منظم پاکیزگی کی یقین دہانی اور ہال مارکنگ فراہم کرتی ہے اور موجودہ گولڈ ریفائنری اسکیم کی طرز پر چاندی کی پاکیزگی کے لیے ایک قومی فریم ورک قائم کرتی ہے۔

بھارتی معیار IS 2112:2025 (چاندی کے مرکب، زیورات/آرٹفیکٹس - عمدگی اور نشان دہی) میں ترمیم نمبر 1 کے گزٹ نوٹیفکیشن کے بعد، تین پاکیزگی گریڈز: 999.9، 999.5، اور 999.0 پارٹس فی ہزار (ppt) کے عمدہ چاندی کے بلین اور سکے کو معیار کے دائرہ کار میں شامل کیا گیا ہے، جس میں بی آئی ایس لائسنس یافتہ ریفائنریوں اور ٹکبرسوں کے ذریعے ہال مارکنگ کی گنجائش ہے۔

اس اسکیم کے تحت، بی آئی ایس اہل سلور ریفائنریوں اور ٹکبرسوں کو ان کی تکنیکی اہلیت، ریفائننگ کے عمل، اور جانچ کے بنیادی ڈھانچے کا جائزہ لینے کے بعد لائسنس جاری کرے گا۔ لائسنس یافتہ سہولیات کو مقررہ ضروریات کے مطابق چاندی کے بلین اور سکوں پر سرکاری بی آئی ایس ہال مارک لگانے کا اختیار دیا جائے گا۔

قیمتی دھاتوں کی سپلائی چین میں مستندیت اور ٹریس ایبلٹی کی یقین دہانی کے لیے، ہال مارک شدہ چاندی کے بلین اور سکوں پر ایک معیاری بی آئی ایس نشان ہوگا جس میں بی آئی ایس اسٹینڈرڈ مارک کے ساتھ لفظ سلور، پاکیزگی گریڈ (999.9، 999.5، یا 999.0)، مینوفیکچرر کا شناختی نشان اور بیچ ٹریس ایبلٹی کے لیے ایک منفرد نمبر شمار شامل ہوگا۔

معیار ریفائنریوں اور ٹکبرسوں کے لیے بلین اور سکوں میں چاندی کے مواد کا تعین کرنے کے لیے سخت نمونہ لینے اور جانچ کے پروٹوکول تجویز کرتا ہے۔ ان میں جدید تجزیاتی طریقے شامل ہیں جیسے گریوی میٹرک ٹیسٹنگ (IS 2113)، ICP-OES فرق کا طریقہ (IS 16900 / ISO 15096) اور اسپارک-OES فرق کے طریقے (IS 19563 / ISO 18214)۔

https://youtu.be/SrF8K82bTow

بی آئی ایس ڈیجیٹل اسٹینڈرڈ ریڈر کا آغاز - بی آئی ایس ڈیجیٹل اسٹینڈرڈ ریڈر ایک ویب پر مبنی پلیٹ فارم ہے جو XML فارمیٹ شدہ بھارتی معیارات کو انٹرایکٹو اسمارٹ معیارات میں تبدیل کرتا ہے۔ رسائی کو بڑھانے کے لیے ڈیزائن کیا گیا، یہ ٹول صارفین کو تکنیکی مواد تلاش کرنے، ہائپر لنک شدہ کراس ریفرنسز کو نیویگیٹ کرنے، ایک بلٹ ان ڈکشنری تک رسائی حاصل کرنے، اور متن کو بھارتی زبانوں میں ترجمہ کرنے کے قابل بناتا ہے۔ موبائل آلات، ٹیبلٹس، اور ڈیسک ٹاپس پر قابل رسائی، یہ پلیٹ فارم استعمال کے رجحانات کو ٹریک کرنے کے لیے ایک تجزیاتی ڈیش بورڈ بھی پیش کرتا ہے اور مستقبل کی ڈیجیٹل خدمات کے لیے ایک اے آئی تیار ذخیرہ قائم کرتا ہے۔ یہ بھارتی معیارات کو بہت زیادہ صارف دوست اور موافقت کے لیے آسان بنائے گا۔

نئے بھارتی معیارات کا اجرا - اس موقع پر بی آئی ایس نے ٹیکسٹائل، صاف نقل و حرکت، علاج معالجے کی صحت کی دیکھ بھال، روبوٹکس، اور تعمیراتی مواد سمیت مختلف شعبوں میں 7 نئے بھارتی معیارات کے اجرا کا اعلان کیا۔

ابھرتی ہوئی ٹکنالوجیاں اور صاف توانائی کی نقل و حرکت -

1. الیکٹرک وہیکل چارجنگ سسٹمز کے لیے کیبلز (آئی ایس 19967:2026): اے سی موڈز 1-3 اور ڈی سی موڈ 4 سسٹمز میں بیرونی حالات میں کام کرنے والی لچک دار چارجنگ کیبلز (1,100 V AC / 1,500 V DC تک) کے لیے تعمیر، انسولیشن، تھرمل مینجمنٹ اور جانچ کے پروٹوکول کی وضاحت کرتا ہے۔

2. پیڈل اسسٹڈ بائیسکل / ای پی اے سیز (آئی ایس 19891:2026): 0.25 کلو واٹ تک مسلسل ریٹیڈ پاور اور 25 کلومیٹر فی گھنٹہ پر اسپیڈ کٹ آف کے ساتھ الیکٹریکلی پاور اسسٹڈ سائیکلوں کے لیے ڈیزائن، الیکٹریکل سرکٹ سیفٹی، شارٹ سرکٹ/اوور ہیٹ پروٹیکشن اور اینٹی ٹیمپرنگ قواعد کے معیارات فراہم کرتا ہے۔

3. پہننے کے قابل سروس روبوٹس - نچلے اعضا (آئی ایس 17192 پارٹ-6:2026): نچلے اعضا کی معاونت اور بحالی روبوٹکس کی حرکت، استحکام اور کارکردگی کا جائزہ لینے کے لیے اینتھروپومورفک ٹیسٹ ڈمیز کا استعمال کرتے ہوئے بین الاقوامی جانچ کے معیار (آئی ایس او ایف ڈی آئی ایس 18646-6:2025 کے عین مطابق) کو اپناتا ہے۔

صحت کی دیکھ بھال-

4. پیڈیاٹرک پنچکرما درونی (آئی ایس 19960:2026): شیر خوار (پیدائش سے 2 سال) اور بچوں (2 سے 10 سال) کے لیے پیڈیاٹرک پنچکرما علاج کی میزوں (درونی) کے لیے حفاظت، ساختی استحکام، غیر زہریلی کوٹنگز اور تیل مزاحمتی خصوصیات کو یقینی بناتا ہے۔

5. تھیراپیوٹک فٹ ویئر کی تفصیلات (آئی ایس 19956:2026): ذیابیطس اور نیوروپیتھک مریضوں کے لیے ڈیزائن کیے گئے جوتوں کے لیے کلینیکل اور مکینیکل حفاظتی معیار کو یقینی بناتا ہے۔ یہ پیر کے السر کے خطرات کو کم کرنے کے لیے دباؤ سے نجات، اندرونی گہرائی، راکر جیومیٹری، نمی کے انتظام اور اینٹی فنگل خصوصیات کا احاطہ کرتا ہے۔

صنعتی مواد اور تعمیراتی مصنوعات

6. لچک دار پلائی ووڈ کی تفصیلات (آئی ایس 19952:2026): اندرونی ڈیزائن اور فن تعمیر میں استعمال ہونے والے خمیدہ لکڑی پر مبنی پینلز کے لیے معیاری درجہ بندی، گلو بانڈ کی طاقت کے درجات (نمی مزاحم، بی ڈبلیو آر اور بی ڈبلیو پی) اور فارملڈیہائیڈ کے اخراج کی حد فراہم کرتا ہے۔

7. پی وی سی کوٹیڈ فائبر گلاس انسیکٹ اسکرین (آئی ایس 19825:2026): رہائشی اور تجارتی جگہوں میں استعمال ہونے والی فائبر گلاس انسیکٹ اسکریننگ کے لیے میش کی طاقت، یو وی تنزلی مزاحمت، شعلے کے پھیلاؤ کی مزاحمت اور ساختی استحکام کے لیے تقاضوں کا خاکہ پیش کرتا ہے۔

پائیدار زراعت اور مینوفیکچرنگ کے شعبے میں معیاری کاری کے لیے قومی روڈ میپس کا اجرا

اس موقع پر، پائیدار زرعی شعبے کے لیے بھارتی معیارات قائم کرنے کے لیے بی آئی ایس کی ماحولیات اور ماحولیاتی ڈوژن کونسل کے ذریعے تیار کردہ ایک اسٹریٹجک روڈ میپ جاری کیا گیا۔ یہ دستاویز آب و ہوا کی تبدیلی، وسائل کی کمی، زمین کی تنزلی، کٹائی کے بعد کے نقصانات اور غیر موثر غذائی اجزا کے استعمال سمیت چیلنجوں سے نمٹتی ہے۔ یہ 15 زمروں کو محیط ہے، جس میں مٹی کا انتظام، پانی کا استعمال، زرعی آدان، ابھرتی ہوئی ٹیکنالوجیز، آب و ہوا کی خدمات اور سماجی و اقتصادی معاونت شامل ہیں۔ قومی آب و ہوا کی تبدیلی ایکشن پلان (این اے پی سی سی) سے ہم آہنگ، روڈ میپ تین ٹائم لائنز پر معیاری فارمولیشن کا خاکہ پیش کرتا ہے: مختصر مدت (1 سال)، درمیانی مدت (2-3 سال) اور طویل مدت (4-5 سال)۔

آج جاری کردہ ایک اور روڈ میپ میں، پائیدار مینوفیکچرنگ کے لیے، کم کاربن ٹیکنالوجیز، وسائل کی کارکردگی، سرکلر اکانومی کے طریقے، پائیدار مصنوعات کا ڈیزائن، ڈیجیٹلائزیشن، پائیداری کی رپورٹنگ اور سپلائی چین مینجمنٹ کو معیاری کاری کے لیے اہم شعبوں کے طور پر شناخت کیا گیا ہے۔

معیارات کی ترقی کے لیے بہترین تکنیکی کمیٹیوں کا ایوارڈ

عالمی معیارات کے دن کے موقع پر، بی آئی ایس متعلقہ شعبوں میں بھارتی معیارات کی ترقی کو آگے بڑھانے میں ماہرین کی شاندار شراکت، تکنیکی مہارت اور باہمی تعاون کی کوششوں کو تسلیم کرنے کے لیے بہترین تکنیکی کمیٹی کا ایوارڈ پیش کرتا ہے۔ اس سال 16 ممتاز تکنیکی کمیٹیوں کو یہ باوقار ایوارڈ دیا گیا ہے۔

معیاری کاری کے فریم ورک میں 6 نئے تعلیمی اداروں کا اضافہ -

مرکزی وزیر مملکت جناب بی ایل ورما اور محترمہ نیموبین جینتی بھائی بامبھانیا کی موجودگی میں، بی آئی ایس نے آئی آئی ٹی روپر، این آئی ٹی منی پور، این آئی ٹی میگھالیہ، آسام ٹیکسٹائل انسٹی ٹیوٹ، اور آئی آئی ٹی دھارواڑ، اور آر جی آئی پی ٹی (راجیو گاندھی انسٹی ٹیوٹ آف پیٹرولیم ٹیکنالوجی) کو مفاہمت نامے کے شراکت دار اداروں کے طور پر شامل کیا جس کا مقصد بھارتی معیارات کو تعلیمی نصاب میں شامل کرنا اور طلبہ کو معیارات کے لیے تیار پیشہ ور افراد میں تبدیل کرنا ہے۔ آج تک بی آئی ایس کے پاس 98 مفاہمت نامے کے شراکت دار ادارے ہیں جو تعلیمی نصاب میں معیارات کو شامل کرنے، معیاری کاری کے لیے باہمی آر اینڈ ڈی منصوبوں کے ساتھ ساتھ بی آئی ایس میں انٹرن شپ اور طلبہ کو صنعتی نمائش فراہم کرنے کے لیے کام کر رہے ہیں۔

لیبارٹری میں حفاظت کے لیے اچھے طریقوں پر ہینڈ بک

بی آئی ایس نے ایک جامع کتابچہ، ’لیبارٹری میں حفاظت کے لیے اچھے طریقے‘ شائع کیا ہے، جو اہم معیارات (بشمول آئی ایس 4209، آئی ایس 4906، اور آئی ایس 9457) پر مبنی ہے۔ حوالہ جاتی ہینڈ بک کیمیائی، ریڈیو کیمیائی اور مائیکرو بائیولوجیکل سہولیات کے لیے خطرے کی شناخت، حفاظتی سامان، آلودگی کنٹرول اور محفوظ فضلہ ٹھکانے لگانے کا احاطہ کرتی ہے۔

تعلیمی مزاحیہ کتابوں کا اجرا -

اس موقع پر، بی آئی ایس نے کھلونوں اور ہال مارکنگ کے لیے بھارتی معیارات پر دو نئی مزاحیہ کتابیں جاری کیں تاکہ بچوں میں کم عمری سے ہی معیارات، معیار اور صارفین کے تحفظ کی اہمیت کے بارے میں بیداری پیدا کی جا سکے۔ ان عنوانات کے اضافے کے ساتھ، بی آئی ایس نے اپنے مجموعہ کو 13 مزاحیہ کتابوں تک بڑھا دیا ہے، جس سے پرنٹ اور ڈیجیٹل پلیٹ فارمز کے ذریعے صارفین کی بیداری کو فروغ دینے کی اپنی کوششوں کو تقویت ملی ہے۔

عالمی معیارات کے دن 2026 کے موقع پر، عالمی معیاری کاری کے اداروں آئی ایس او، آئی ای سی اور آئی ٹی یو نے مشترکہ طور پر ایک ویڈیو پیغام جاری کیا جس میں یہ بتایا گیا کہ کس طرح مشترکہ معیارات نظام پر اعتماد پیدا کرتے ہیں، جدت طرازی کو تیز کرتے ہیں اور پائیدار تجارت کی حمایت کرتے ہیں۔ بھارت کے قومی معیاری کاری کے ادارے کے طور پر، بی آئی ایس بین الاقوامی معیارات کی ترقی کو بھارت کے اسٹریٹجک مفادات سے ہم آہنگ کرنے کے لیے آئی ایس او اور آئی ای سی میں 600 سے زیادہ تکنیکی کمیٹیوں میں حصہ لیتا ہے۔

ماخذ: بیورو آف انڈین اسٹینڈرڈز (بی آئی ایس)

***

(ش ح - ع ا)

U.No. 6102

 

(ریلیز آئی ڈی: 2323583) وزیٹر کاؤنٹر : 7