08–09  اکتوبر 2026 کو انٹیلی جنس کی بنیاد پر کی جانے والی ایک کارروائی میں، ڈائریکٹوریٹ آف ریونیو انٹیلی جنس (ڈی آر آئی)، منگلور ریجنل یونٹ نے دہلی سے بنگلورو جانے والی ٹرین میں سوار ایک بھارتی شہری کو روکا۔ مسافر کے ٹرالی بیگ کی تفصیلی تلاشی کے نتیجے میں 3 پیکٹ برآمد ہوئے جن میں 5.753 کلوگرام سفید کرسٹل مادہ موجود تھا، جس کے بارے میں شبہ ہے کہ وہ میتھمفیٹامائن (کرسٹل میتھ) ہے۔

مشتبہ منشیات کو نارکوٹک ڈرگز اینڈ سائیکو ٹروپک سبسٹینسز (این ڈی پی ایس) ایکٹ، 1985 کی دفعات کے تحت ضبط کر لیا گیا۔ ملزم کو گرفتار کر کے بعد میں مجاز کورٹ کے ذریعے عدالتی حراست میں بھیج دیا گیا۔

میتھمفیٹامائن، جسے عام طور پر کرسٹل میتھ یا آئس کہا جاتا ہے، ایک طاقتور، انتہائی لت آور مصنوعی سائیکو اسٹیمولنٹ ہے جو اعصابی نظام کو متاثر کرتا ہے۔ اس کا غلط استعمال لت اور شدید جسمانی و ذہنی صحت کے نقصانات کا باعث بن سکتا ہے۔ بھارت میں، میتھمفیٹامائن ایک نفسیاتی مادہ ہے جسے نارکوٹک ڈرگز اینڈ سائیکو ٹروپک سبسٹینسز (این ڈی پی ایس) ایکٹ، 1985 کے تحت منظم کیا جاتا ہے۔ اس ایکٹ کے تحت غیر مجاز قبضے، تیاری، فروخت، خریداری، نقل و حمل، درآمد یا برآمد پر سزا دی جا سکتی ہے، جس کی شدت کا انحصار جرم کی نوعیت اور ملوث مقدار پر ہوتا ہے۔ موجودہ معاملے میں، ضبط شدہ 5.753 کلوگرام کی مقدار میتھمفیٹامائن کے لیے طے شدہ 50 گرام کی تجارتی مقدار سے کہیں زیادہ ہے، جس پر 10 سے 20 سال کی قیدِ با مشقت اور 1 سے 2 لاکھ روپے جرمانے کی سزا ہو سکتی ہے۔

ڈی آر آئی انٹیلی جنس پر مبنی نفاذ کے ذریعے منشیات کی اسمگلنگ کے خلاف لڑنے کے لیے مسلسل پرعزم ہے۔

**********

 (ش ح –ا ب ن)

U.No:4967

(ریلیز آئی ڈی: 2321895) وزیٹر کاؤنٹر : 8