ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ସୁଷମା ସ୍ୱରାଜ ଭବନଠାରେ ମହିଳା ଓ ଶିଶୁ ବିକାଶ ସମ୍ପର୍କିତ ଦୁଇଦିନିଆ ଜାତୀୟ ବିଭାଗୀୟ ସମ୍ମିଳନୀର ଉଦଯାପନୀ ଦିବସରେ ଅଧ୍ୟକ୍ଷତା କରିଥିଲେ ।

ପ୍ରଧାନମନ୍ତ୍ରୀଙ୍କ ଦ୍ୱାରା ପରିକଳ୍ପିତ ବିଭାଗୀୟ ସମ୍ମିଳନୀ ଗୁଡ଼ିକର ଅଂଶବିଶେଷ ଭାବେ ଆୟୋଜିତ ଏହି ସମ୍ମିଳନୀରେ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ମନ୍ତ୍ରୀ ଓ ବରିଷ୍ଠ ଅଧିକାରୀମାନେ ଏକାଠି ହୋଇଥିଲେ । ଏଥିରେ ପୁଷ୍ଟିସାଧନ ଓ ପ୍ରାରମ୍ଭିକ ଶିଶୁ ଯତ୍ନ, ଶିଶୁ ସୁରକ୍ଷା, ମହିଳାଙ୍କ ସୁରକ୍ଷା ଓ ସଶକ୍ତୀକରଣ ତଥା ବିଭିନ୍ନ ବିଭାଗ ମଧ୍ୟରେ ଉତ୍ତମ ସମନ୍ୱୟ ମାଧ୍ୟମରେ ସେବା ପ୍ରଦାନ ବ୍ୟବସ୍ଥାକୁ ସୁଦୃଢ଼ କରିବା ଉପରେ ବିସ୍ତୃତ ଆଲୋଚନା କରାଯାଇଥିଲା ।

ପ୍ରଧାନମନ୍ତ୍ରୀ ଏହି ଗଭୀର ଚର୍ଚ୍ଚାକୁ ପ୍ରଶଂସା କରିବା ସହ କେନ୍ଦ୍ର ଓ ରାଜ୍ୟ ମଧ୍ୟରେ ମିଳିତ ଭାବେ ନିଷ୍ପତ୍ତି ଗ୍ରହଣ କରିବାର ଗୁରୁତ୍ୱ ଉପରେ ଆଲୋକପାତ କରିଥିଲେ । ସେ ପରାମର୍ଶ ଦେଇଥିଲେ ଯେ ରାଜ୍ୟଗୁଡ଼ିକ ଜିଲ୍ଲା ଓ ମହାନଗର ନିଗମ ସ୍ତରରେ ଏହିପରି ‘ଚିନ୍ତନ ଶିବିର’ ଆୟୋଜନ କରି ଏହି ମଡେଲକୁ ଆଗକୁ ନେଇପାରିବେ । ଏହା ସହିତ ସେ ଅଙ୍ଗନବାଡ଼ି କର୍ମୀମାନଙ୍କ ପାଇଁ ମଧ୍ୟ ସ୍ୱତନ୍ତ୍ର ‘ଚିନ୍ତନ ଶିବିର’ ଆୟୋଜନ କରିବାକୁ ପରାମର୍ଶ ଦେଇଥିଲେ, ଯାହାଦ୍ୱାରା ସେମାନେ କ୍ଷେତ୍ରସ୍ତରୀୟ ଅଭିଜ୍ଞତା, ନୂତନ ଉଦ୍ଭାବନ ଏବଂ ବ୍ୟାବହାରିକ ସମାଧାନ ସମ୍ପର୍କରେ ପରସ୍ପର ସହ ମତାମତ ଆଦାନପ୍ରଦାନ କରିପାରିବେ ।

ଜନ ଭାଗିଦାରୀକୁ ଗୁରୁତ୍ୱ ଦେଇ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ, ଏକ ଅଙ୍ଗନବାଡ଼ି କେନ୍ଦ୍ର ଏକ ବିଚ୍ଛିନ୍ନ ଅନୁଷ୍ଠାନ ଭାବେ କାର୍ଯ୍ୟ କରିବା ଅନୁଚିତ ବରଂ ଏକ ସାମୁହିକ ଅଂଶଗ୍ରହଣର କେନ୍ଦ୍ର ହେବା ଉଚିତ । ସେ କହିଥିଲେ ଯେ, ଅଙ୍ଗନବାଡ଼ି କେନ୍ଦ୍ର ନିକଟରେ ରହୁଥିବା ପରିବାରଗୁଡ଼ିକୁ ମଧ୍ୟ ପିଲାମାନଙ୍କ ପାଇଁ ପୁଷ୍ଟିକର ଖାଦ୍ୟ, ଖେଳଣା ଏବଂ ସ୍ଥାନୀୟ ଭାବରେ ପ୍ରାସଙ୍ଗିକ ଜିନିଷ ବଣ୍ଟନ କରି ବିଶେଷ ଅବସରରେ ଯୋଗଦାନ କରିବାକୁ ଉତ୍ସାହିତ କରାଯାଇପାରିବ । 

ପ୍ରଧାନମନ୍ତ୍ରୀ ଅଙ୍ଗନବାଡ଼ି କେନ୍ଦ୍ର ସହିତ ବିଶ୍ୱବିଦ୍ୟାଳୟ ଏବଂ ଶିକ୍ଷାନୁଷ୍ଠାନ ଗୁଡ଼ିକର ଗଭୀର ସମ୍ପର୍କ ସ୍ଥାପନ ପାଇଁ ଆହ୍ୱାନ ଜଣାଇଥିଲେ । ବିଶ୍ୱବିଦ୍ୟାଳୟଗୁଡ଼ିକ ନିକଟସ୍ଥ ଅଙ୍ଗନବାଡ଼ି କେନ୍ଦ୍ର ଗୁଡ଼ିକୁ ଆଦରି ପାରିବେ ଏବଂ ସାମାଜିକ ପ୍ରଭାବ ବାବଦରେ ଅଧ୍ୟୟନ କରିପାରିବେ । ଏହାଦ୍ୱାରା ଛାତ୍ରଛାତ୍ରୀମାନଙ୍କ ଯୋଗଦାନ ପାଇଁ ସୁଯୋଗ ସୃଷ୍ଟି ହୋଇପାରିବ ଏବଂ ସେବା ପ୍ରଦାନରେ ଉନ୍ନତି ଆଣିବା ପାଇଁ ଉପଯୋଗୀ ଅନ୍ତର୍ଦୃଷ୍ଟି ମଧ୍ୟ ସୃଷ୍ଟି ହୋଇପାରିବ । ଡାକ୍ତରୀ ଛାତ୍ର, ଏନଏସଏସ ଏବଂ ଏନସିସି ସ୍ୱେଚ୍ଛାସେବୀମାନେ ମଧ୍ୟ ଅଙ୍ଗନବାଡ଼ି କେନ୍ଦ୍ର ଏବଂ ସାମୁହିକ ପଦକ୍ଷେପ ସହିତ ସମାନ ଭାବେ ଜଡ଼ିତ ହୋଇପାରିବେ ବୋଲି ସେ କହିଥିଲେ । ସେ କିଶୋରୀ ଝିଅମାନଙ୍କ ସ୍ୱାସ୍ଥ୍ୟ, ପୁଷ୍ଟିସାର ଏବଂ ସାମଗ୍ରିକ ବିକାଶ ଉପରେ ଅଧିକ ଧ୍ୟାନ ଦେବାକୁ ମଧ୍ୟ ଆହ୍ୱାନ ଦେଇଥିଲେ ।

ପ୍ରଧାନମନ୍ତ୍ରୀ ମହିଳା ସୁରକ୍ଷା ସମ୍ପର୍କିତ ପ୍ରସଙ୍ଗ ଉପରେ ଆଲୋଚନା କରି ମହିଳାଙ୍କ ସୁରକ୍ଷା, ମର୍ଯ୍ୟାଦା ଏବଂ ସଶକ୍ତୀକରଣ ଉପରେ ପିଲାମାନଙ୍କ ପାଇଁ ବୟସ ଉପଯୁକ୍ତ ମଡୁ୍ୟଲ ବିକଶିତ କରିବାକୁ ପରାମର୍ଶ ଦେଇଥିଲେ । ସେ ବିଭିନ୍ନ ବିଭାଗ ମଧ୍ୟରେ ପ୍ରଚେଷ୍ଟାର ସମନ୍ୱୟ ମାଧ୍ୟମରେ ପ୍ରତିରୋଧକ କାର୍ଯ୍ୟ ଉପରେ ମଧ୍ୟ ଗୁରୁତ୍ୱାରୋପ କରିଥିଲେ ।

ସ୍ୱଚ୍ଛତା, ସ୍ୱାସ୍ଥ୍ୟ ଏବଂ ପୁଷ୍ଟିସାର ମଧ୍ୟରେ ଘନିଷ୍ଠ ସମ୍ପର୍କ ଉପରେ ଆଲୋକପାତ କରି ପ୍ରଧାନମନ୍ତ୍ରୀ ସାରା ଦେଶରେ ମହିଳା ଏବଂ ଶିଶୁ ବିକାଶ ବିଭାଗ ଗୁଡ଼ିକୁ ସ୍ୱଚ୍ଛତା ଅଭିଯାନର ସକ୍ରିୟ ମାଲିକାନା ନେବାକୁ ଆହ୍ୱାନ କରିଥିଲେ । ସେ ଗୁରୁତ୍ୱାରୋପ କରିଥିଲେ ଯେ, ଭଲ ସ୍ୱାସ୍ଥ୍ୟ ଏବଂ ପୁଷ୍ଟି ସ୍ୱଚ୍ଛତା ସହିତ ଆରମ୍ଭ ହୁଏ ଏବଂ ଅଙ୍ଗନବାଡ଼ି କେନ୍ଦ୍ର ଏବଂ ଆଖପାଖ ସମ୍ପ୍ରଦାୟ ଏହି ଆଚରଣଗତ ପରିବର୍ତ୍ତନକୁ ପ୍ରୋତ୍ସାହିତ କରିବା ପାଇଁ ଗୁରୁତ୍ୱପୂର୍ଣ୍ଣ ମଞ୍ଚ ହୋଇପାରିବେ ।

ପ୍ରଧାନମନ୍ତ୍ରୀ କହିଥିଲେ ଯେ, ମହିଳା ସଶକ୍ତୀକରଣ ପାଇଁ ଭୋକାଲ ଫର ଲୋକାଲ ଆଣ୍ଡ ୱାନ ଡିଷ୍ଟ୍ରିକ୍ଟ ୱାନ ଭଳି ପ୍ରଡକ୍ଟ (ଓଡିଓପି) ଜାତୀୟ ଆନେ୍ଦାଳନକୁ ପ୍ରୋତ୍ସାହିତ କରାଯିବା ଉଚିତ । ସେ ଆହୁରି ମଧ୍ୟ କହିଥିଲେ ଯେ, ମହିଳା ଗୋଷ୍ଠୀ ଏବଂ ସମ୍ପ୍ରଦାୟ ଅନୁଷ୍ଠାନ ଗୁଡ଼ିକ ସ୍ଥାନୀୟ ଉତ୍ପାଦ, ଜୀବିକା ଏବଂ ଆର୍ଥିକ ସଶକ୍ତୀକରଣକୁ ସୁଦୃଢ଼ କରିବାରେ ଗୁରୁତ୍ୱପୂର୍ଣ୍ଣ ଅଂଶୀଦାର ହୋଇପାରିବେ ।

ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ, ମହିଳା ଏବଂ ଶିଶୁ ବିକାଶ ମନ୍ତ୍ରଣାଳୟ ଏବଂ ରାଜ୍ୟଗୁଡ଼ିକରେ ଏହାର ସମକକ୍ଷ ବିଭାଗ ଗୁଡ଼ିକୁ ସମାଜର ସବୁଠାରୁ ବଡ଼ ଏବଂ ଗୁରୁତ୍ୱପୂର୍ଣ୍ଣ ବର୍ଗ ଗୁଡ଼ିକ ମଧ୍ୟରୁ ଗୋଟିଏର ଦାୟିତ୍ୱ ଅର୍ପଣ କରାଯାଇଛି । ଆଜି ଅଙ୍ଗନବାଡ଼ି କେନ୍ଦ୍ର ଗୁଡ଼ିକରେ ପାଳିତ ହେଉଥିବା ପିଲାମାନେ ଯୁବକ ଏବଂ ନାଗରିକ ହେବେ ଯେଉଁମାନେ କି ବିକଶିତ ଭାରତ ନିର୍ମାଣ କରିବେ ।

SR