વિકસિત ભારત@2047 ના પાયા તરીકે સુપોષિત, સુરક્ષિત અને સશક્ત ભારતના વિઝનને સાકાર કરવાની દિશામાં એક મહત્વપૂર્ણ પગલાં તરીકે, મહિલા અને બાળ વિકાસ મંત્રાલય 8 અને 9 ઓક્ટોબર 2026 ના રોજ સુષ્મા સ્વરાજ ભવન, નવી દિલ્હી ખાતે તેની વિભાગીય સમિટ (Departmental Summit) નું આયોજન કરશે. સહકારી સંઘવાદને મજબૂત કરવા, રાષ્ટ્રીય પ્રાથમિકતાઓની સહિયારી માલિકીને પ્રોત્સાહન આપવા અને કેન્દ્ર-રાજ્યના વધુ મજબૂત સહયોગ દ્વારા પરિણામોને ઝડપી બનાવવા માટે પ્રધાનમંત્રી શ્રી નરેન્દ્ર મોદી દ્વારા પરિકલ્પિત વિભાગીય સમિટની શ્રેણીમાં આ બીજી સમિટ છે.

વિભાગીય સમિટ મોડલ ક્ષેત્રીય પ્રાથમિકતાઓ પર વિચાર-વિમર્શ કરવા, શ્રેષ્ઠ પદ્ધતિઓ શેર કરવા, અમલીકરણના પડકારોને ઉકેલવા અને સુધારેલા ગવર્નન્સ તેમજ સેવા પહોંચાડવા માટે સમયબદ્ધ કાર્યો પર સંમતિ સાધવા માટે કેન્દ્ર અને રાજ્ય સરકારોના રાજકીય નેતૃત્વ અને વરિષ્ઠ અધિકારીઓને એકસાથે લાવે છે.

આ બે દિવસીય સમિટ ચાર થીમ પર ધ્યાન કેન્દ્રિત કરશે:

• વધુ સારા પોષણ અને પ્રારંભિક શિક્ષણ માટે આંગણવાડી કેન્દ્રોની પુનઃપરિકલ્પના (Reimagining Anganwadi Centres)
• સંવેદનશીલ બાળકો માટે સંરક્ષણ પ્રણાલીને મજબૂત બનાવવી
• સંસ્થાકીય અને કાયદાકીય માળખાના અસરકારક અમલીકરણ દ્વારા મહિલા સુરક્ષા
• મુખ્ય યોજનાઓની અસરકારકતા અને પરિણામો વધારીને મહિલા સશક્તિકરણ

પ્રથમ દિવસની ચર્ચાઓમાં ટેક-હોમ રાશન (Take-Home Ration) અને ગરમ રાંધેલા ખોરાકની ગુણવત્તા, પોષણ ટ્રેકર (Poshan Tracker) ના ડેટાની ગુણવત્તામાં સુધારો, પ્રારંભિક બાળપણની સંભાળ અને શિક્ષણ (ECCE), સોશિયલ મીડિયાની અસર સહિત સંવેદનશીલ બાળકો માટેની સુરક્ષા વ્યવસ્થા, અને મહિલા સુરક્ષા માટે અમલીકરણના પડકારો તેમજ તેના ઉકેલો આવરી લેવામાં આવશે. બીજો દિવસ મહિલા સશક્તિકરણ માટેની મુખ્ય યોજનાઓની અસરકારકતા અને પરિણામો વધારવા માટે સમર્પિત રહેશે.

સહભાગી રાજ્યો તેમના અનુભવો, પડકારો અને તેમની શ્રેષ્ઠ પદ્ધતિઓ શેર કરશે, અને સહકારી સંઘવાદ તેમજ સહિયારી જવાબદારીની ભાવનાને મજબૂત બનાવીને સંમત પરિણામો પર સર્વસંમતિ સાધવાનો પ્રયાસ કરશે. આ પ્રાપ્ત કરવા માટેના મુખ્ય પરિણામો અને કાર્ય યોજનાઓ સમાપન સત્ર દરમિયાન પ્રધાનમંત્રી શ્રી નરેન્દ્ર મોદી સમક્ષ રજૂ કરવામાં આવશે. પ્રધાનમંત્રીનું માર્ગદર્શન કેન્દ્ર અને રાજ્યોના સંકલ્પને વેગ આપશે અને સંમત પરિણામો પર નિર્ણાયક તેમજ સમયબદ્ધ કાર્યવાહી માટેનો માર્ગ પ્રશસ્ત કરશે તેવી અપેક્ષા છે.

SM/DK/JD

(રીલીઝ આઈડી: 2320381) મુલાકાતી સંખ્યા : 14