وزارت خزانہ کے محکمہ مالیاتی خدمات(ڈی ایف ایس) کے سکریٹری جناب سنجے لوہیا نے آج نئی دہلی میں تمام سرکاری شعبہ کے بینکوں(پی ایس بیز) کے سربراہان اور بڑے نجی شعبہ کے بینکوں(پی وی بیز) کے ایگزیکٹیو ڈائریکٹروں کے ساتھ جائزہ اجلاس کی صدارت کی۔ جائزہ اجلاس میں محکمہ مالیاتی خدمات کے سینئر افسران نے بھی شرکت کی۔

 میٹنگ کے دوران پردھان منتری جن دھن یوجنا(پی ایم جے ڈی وائی)، پردھان منتری جیون جیوتی بیمہ یوجنا(پی ایم جے جے بی وائی) ، پردھان منتری سرکشا بیمہ یوجنا(پی ایم ایس بی وائی)، اٹل پنشن یوجنا(اے پی وائی)، پردھان منتری مدرا یوجنا(پی ایم ایم وائی)، اسٹینڈ اپ انڈیا، پی ایم اسٹریٹ وینڈر آتما نربھر ندھی(پی ایم ایس وی اے ندھی)، پی ایم وشوکرما، پی ایم سوریہ گھر، کے سی سی وغیرہ سمیت مالی شمولیت کی مختلف اسکیموں کے تحت پیش رفت کا تفصیلی جائزہ لیا گیا۔ بینکوں کی اینٹ اور گارے سے بنی شاخیں کھولنے اور بینکنگ سہولت سے محروم دیہات میں بینکنگ نمائندوں (بی سیز) کی تعیناتی میں پیش رفت کا بھی جائزہ لیا گیا۔

محکمہ مالیاتی خدمات کے سکریٹری جناب سنجے لوہیا نے کہا کہ حکومت کی مختلف اہم اسکیموں کے ذریعہ ملک میں مالی شمولیت کو وسعت دینے میں نمایاں پیش رفت ہوئی ہے، تاہم بینکوں کو اپنی ڈجیٹل رسائی مزید بڑھانے اور قرضوں کی مکمل طور پر ڈجیٹل طریقے سے کارروائی پر توجہ مرکوز کرنے کی کوشش کرنی چاہیے۔ یو پی آئی پر کریڈٹ لائن اور مائیکرو انٹرپرائزز کے لیے کریڈٹ کارڈ(سی سی ایم ای) جیسے ذرائع کے ذریعے کاروباری سرمایہ فراہم کرنے کی بھی وضاحت کی گئی۔انہوں نے مالی شمولیت کے تحت بینکوں کی جانب سے کی گئی پیش رفت پر تفصیل سے تبادلہ خیال کیا۔ انہوں نے نجی شعبے کے بینکوں پر زور دیا کہ وہ مالی شمولیت کی اسکیموں میں اپنی شرکت بڑھائیں۔

 میٹنگ کے دوران محکمہ مالیاتی خدمات کے سکریٹری جناب سنجے لوہیا نے بینکوں کو ہدایت دی کہ جن سرکشا بیمہ اسکیموں کے تحت دعوے کی اہلیت کے بارے میں بیداری بڑھائی جائے، تاکہ مستفید ہونے والے کی بدقسمتی سے موت کی صورت میں نامزد افراد کو رقم حاصل ہو سکے۔ بینکوں کو یہ بھی مشورہ دیا گیا کہ ان اسکیموں کے تحت دعووں سے متعلق شکایات سے نمٹتے وقت خصوصی احتیاط برتی جائے۔ انہوں نے بینکوں سے یہ بھی کہا کہ پردھان منتری جیون جیوتی بیمہ یوجنا(پی ایم جے جے بی وائی) اور پردھان منتری سرکشا بیمہ یوجنا(پی ایم ایس بی وائی) کے تمام نئے مستفیدین کا اندراج جن سرکشا پورٹل کے ذریعے کیا جائے، کیونکہ اس پورٹل کو تمام بینکوں اور بیمہ کمپنیوں کے ساتھ مربوط کیا جائے گا، جس سے اعداد و شمار کے معیار اور کام کاج میں آسانی میں بہتری آئے گی۔ اجلاس کے دوران اٹل پنشن یوجنا کے تسلسل کی شرح بڑھانے کے طریقوں پر بھی تبادلہ خیال کیا گیا۔

جناب لوہیا نے بینکوں پر زور دیا کہ وہ 21 اکتوبر 2026 سے 31 دسمبر 2026 تک چلائی جانے والی آئندہ مالی شمولیت کی جامع مہم میں بھرپور طریقے سے حصہ لیں اور معاشرے کے محروم طبقات کی خدمت اور ان کی بینکاری  سےمتعلق ضروریات پوری کرنے پر مزید توجہ دیں۔

 

*****

ش ح-ظ الف-ن ع

UR No. 4717

(ریلیز آئی ڈی: 2319748) وزیٹر کاؤنٹر : 7