نائب صدر جمہوریہ جناب سی پی رادھاکرشنن نے آج نئی دہلی کے قطب انسٹی ٹیوشنل ایریا میں واقع جناب لال بہادر شاستری نیشنل سنسکرت یونیورسٹی کی دوسری تقسیم اسناد تقریب سے خطاب کیا۔ انہوں نے اس موقع پر فارغ التحصیل اسٹوڈنٹس، ان کے والدین، اساتذہ اور یونیورسٹی برادری کو مبارکباد پیش کی۔ انہوں نے  تقریب کی قیادت کرتے ہوئے‘منشیات کو انکار’ کا عہد بھی دلایا اور نمایاں کارکردگی کا مظاہرہ کرنے والے فارغ التحصیل اسٹوڈنٹس کو طلائی تمغے پیش کیے۔

یونیورسٹی کے سنسکرت ودیا پیٹھ سے مرکزی یونیورسٹی تک کے سفر کو اجاگر کرتے ہوئے  نائب صدرجناب سی پی رادھاکرشنن نے کہا کہ اب وقت آگیا ہے کہ یہ ادارہ اپنے بانی اور سابق وزیر اعظم جناب لال بہادر شاستری کے ویژن کو پورا کرتے ہوئے سنسکرت کے مطالعہ کے لیے ایک ممتاز بین الاقوامی مرکزامتیاز کے طور پر خود کو قائم کرے۔ جناب شاستری کو خراج عقیدت پیش کرتے ہوئے انہوں نے کہا کہ ان کا لازوال نعرہ ‘جے جوان، جے کسان’ محض ایک نعرہ نہیں تھا بلکہ یہ  ہندوستان کی اپنی سرحدوں کے تحفظ اور غذائی تحفظ یقینی بنانے کے عزم کی عکاسی کرتا تھا۔

نائب صدر نے یونیورسٹی کو این اے اے سی کی جانب سے اعلی ترین ++A گریڈ حاصل کرنے اور ہندوستانی علمی روایت کے مختلف شعبوں میں تحقیق کرنے پر سراہا۔ انہوں نے کہا کہ اگرچہ  ہندوستان کی ہر زبان نے ملک کو مالا مال کیا ہے، لیکن سنسکرت وہ ‘سنہری دھاگا’ ہے جو  ہندوستان کی متعدد زبانوں کے موتیوں کو ایک عظیم ہار میں پروتا ہے۔ انہوں نے سبھاشیتوں کے ذریعے پورے کیمپس میں سنسکرت کو زندہ رکھنے، ودیا پیٹھ پنچانگ کی اشاعت کی 44 سالہ روایت اور پراکرت اور واستو شاستر سمیت کلاسیکی علوم کی تدریس کے لیے یونیورسٹی کی کوششوں کی تعریف  و ستائش کی۔

جناب سی پی رادھاکرشنن نے زور دے کر کہا کہ  ہندوستان کی ترقی اس کے تہذیبی ورثے میں جڑی رہنی چاہیے۔ انہوں نے کہا کہ وزیر اعظم جناب نریندر مودی کی قیادت میں کئی اقدامات نے سنسکرت کی نشاۃ ثانیہ اور  ہندوستانی علمی نظام کے فروغ کے لیے سازگار ماحول پیدا کیا ہے۔ قومی تعلیمی پالیسی-  2020 اور ‘اشٹادشی اسکیم’ کا حوالہ دیتے ہوئے انہوں نے کہا کہ سنسکرت کے نایاب متون کو ختم نہیں ہونے دیا جانا چاہیے اور انہیں محفوظ کیا جانا، ان کا مطالعہ کیا جانا اور آنے والی نسلوں کے لیے قابل رسائی بنایا جانا چاہیے۔

 ہندوستان کے مخطوطاتی ورثے کے بارے میں زیادہ سے زیادہ علمی مشغولیت پر زور دیتے ہوئے نائب صدر نے یونیورسٹی کے اساتذہ اور  اسٹوڈنٹس سے کہا کہ وہ غیر مطبوعہ سنسکرت مخطوطات کی تلاش، تحفظ، تنقیدی تدوین اور اشاعت کا کام انجام دیں۔ گیان بھارت مشن کا حوالہ دیتے ہوئے انہوں نے کہا کہ مخطوطات کے تحفظ اور دستاویز بندی کے لیے500 کروڑ روپے کے بنیادی سرمایہ کے ساتھ یہ اقدام  ہندوستان کے وسیع مخطوطاتی ورثے کو  ہندوستان اور دنیا کے عوام تک پہنچا رہا ہے۔

فارغ التحصیل اسٹوڈنٹس سے خطاب کرتے ہوئے جناب سی پی رادھاکرشنن نے ان پر زور دیا کہ وہ زندگی بھر سیکھنے والے بنے رہیں اور اپنے آچاریوں اور والدین کی جانب سے دی گئی اقدار کو آگے بڑھائیں۔ مصنوعی ذہانت کے دور میں انہوں نے  اسٹوڈنٹس سے اپیل کی کہ وہ سنسکرت کے تحفظ اور فروغ کے لیے ٹیکنالوجی سے بھرپور فائدہ اٹھائیں۔

نائب صدر نے نوجوانوں پر زور دیا کہ وہ منشیات اور نشہ آور اشیا کے استعمال سے دور رہیں اور نظم و ضبط، کھیل، اچھی صحبت اور بامقصد سرگرمیوں کو اپنائیں۔ انہوں نے  اسٹوڈنٹس کو سوشل میڈیا کا دانش مندی سے اور اعتدال کے ساتھ استعمال کرنے کا مشورہ بھی دیا اور کہا کہ وہ اپنا وقت مطالعہ، سیکھنے، ہنر کی ترقی اور حقیقی تعلقات استوار کرنے میں صرف کریں۔

تقریب کے دوران نائب صدر نے تین مطبوعات‘آمانیہ کلپ ترو’، ‘ودیا مترم’ اور‘شودھ پربھا’(جولائی تا ستمبر 2026) بھی جاری کیں۔

تقریب میں مرکزی وزیر مملکت برائے تعلیم اور ڈونر جناب سوکانتا مجمدار،جناب لال بہادر شاستری نیشنل سنسکرت یونیورسٹی کے وائس چانسلر پروفیسر مرلی منوہر پاٹھک؛ ممتاز اسکالرز، آچاریہ، افسران، اساتذہ، عملہ، اسٹوڈنٹس، والدین اور سنسکرت کے شائقین نے شرکت کی۔

*****

ش ح-ظ الف-ن ع

UR No. 4711