صدر جمہوریہ محترمہ دروپدی مرمو نے آج (6 اکتوبر 2026) ہماچل پردیش کے بلاسپور میں ایمس بلاسپور کی پہلی تقسیمِ اسناد تقریب میں شرکت کی۔

اس موقع پر خطاب کرتے ہوئے صدر جمہوریہ نے کہا کہ طبی پیشے کا بنیادی مقصد انسانیت کی خدمت ہونا چاہیے۔ انہوں نے کہا کہ جو بیمار شخص ڈاکٹر کے پاس آتا ہے، وہ اپنی بیماری سے وابستہ خوف اور غیر یقینی کے ساتھ ساتھ امید بھی لے کر آتا ہے۔ انہوں نے زور دے کر کہا کہ ڈاکٹروں کا ہمدردانہ اور رحم دلانہ رویہ مریض کو حوصلہ فراہم کرتا ہے، جبکہ ان کا علم اور مہارت مریض کے علاج میں معاون ہوتے ہیں۔ انہوں نے ڈاکٹروں پر زور دیا کہ وہ اپنے پیشے میں اعلیٰ معیار حاصل کرنے کی کوشش کے ساتھ ساتھ حساسیت اور ہمدردی کو بھی اپنائیں۔

صدر جمہوریہ نے کہا کہ کم سے کم لاگت پر معیاری طبی نگہداشت ایمس کی نمایاں خصوصیت ہے۔ انہوں نے کہا کہ ملک کے عوام کے لیے ایمس کا مطلب ملک کے سب سے قابل ڈاکٹروں کے ذریعے طبی علاج ہے۔ انہوں نے کہا کہ ملک کے مختلف حصوں میں متعدد ایمس قائم کیے گئے ہیں، تاکہ زیادہ سے زیادہ لوگ اس اعتماد سے مستفید ہو سکیں اور زیادہ تعداد میں باصلاحیت طلبہ کو اعلیٰ معیار کی طبی تعلیم حاصل کرنے اور ملک کی خدمت کرنے کا موقع مل سکے۔

صدر جمہوریہ نے کہا کہ ایمس بلاسپور اپنے جغرافیائی محلِ وقوع کے باعث ایک خصوصی ذمہ داری کا حامل ہے۔ ہماچل پردیش کے دور دراز علاقوں میں رہنے والی آبادی کو بروقت معیاری طبی خدمات فراہم کرنا ایک کثیرالجہتی چیلنج ہے۔ انہوں نے کہا کہ ایمس بلاسپور کو جدید اور اعلیٰ سطح کی ثالثی صحت خدمات کے ایک ممتاز مرکز کے طور پر ابھرنا چاہیے۔ انہوں نے ٹیلی میڈیسن، دور دراز علاقوں کے لیے ماہرین سے طبی مشاورت، طبی عملے کی تربیت اور جدید ترین ٹیکنالوجی کے استعمال کے ذریعے پہاڑی علاقوں میں صحت خدمات کو مضبوط بنانے کی ضرورت پر زور دیا۔

صدر جمہوریہ نے کہا کہ عام لوگوں کے لیے کسی سنگین بیماری کے علاج کے اخراجات برداشت کرنا ایک بڑا مالی بوجھ بن جاتا ہے۔ معاشرے کے کمزور طبقات کو درپیش اس مشکل کو کم کرنے کے لیے حکومت ہند ’آیوشمان بھارت-پردھان منتری جن آروگیہ یوجنا‘ کے تحت ہر کنبے کو ہر سال 5 لاکھ روپے تک کا ہیلتھ انشورنس کور فراہم کرتی ہے۔

صدر جمہوریہ نے کہا کہ شہریوں کو سستی لاگت پر معیاری طبی سہولیات فراہم کرنا اجتماعی ذمہ داری ہے۔ طبی آلات اور ادویات کی بڑھتی ہوئی قیمتیں مریضوں اور ان کے اہل خانہ کے لیے ایک بڑا چیلنج ہیں۔ سستی، قابل رسائی اور کفایتی صحت کی دیکھ بھال کے حل تیار کرنا ایمس جیسے ممتاز اداروں کے لیے ایک چیلنج کے ساتھ ساتھ ایک موقع بھی ہے۔ ایسی کوششوں کے ذریعے ہمارے شہری صحت مند رہیں گے اور اپنی مکمل صلاحیت کے ساتھ ملک کی ترقی میں اپنا کردار ادا کر سکیں گے۔

صدر جمہوریہ کی تقریر دیکھنے کے لیے یہاں کلک کریں۔

ش ح۔ اع خ۔ ج

uno-4701