പ്രധാനമന്ത്രി ശ്രീ നരേന്ദ്ര മോദിയുടെ "സഹകാർ സേ സമൃദ്ധി" എന്ന കാഴ്ചപ്പാടിന് അനുസൃതമായും സഹകരണത്തിലൂടെ ഗ്രാമീണ സമ്പദ്‌വ്യവസ്ഥയെ ശക്തിപ്പെടുത്തുന്നതിനും സ്ത്രീകളുടെ നേതൃത്വത്തിലുള്ള വികസനത്തിന് പുതിയ, ഉത്തേജനം നൽകുന്നതിനുമുള്ള സുപ്രധാന ചുവടുവെപ്പായും കേന്ദ്ര ആഭ്യന്തര, സഹകരണ മന്ത്രി ശ്രീ അമിത് ഷാ ഇന്ന് കൊല്ലത്തെ പവിത്രം കൺവെൻഷൻ സെന്ററിൽ സ്ത്രീ ശാക്തീകരണവും സഹകരണവുമായി ബന്ധപ്പെട്ട വിവിധ പദ്ധതികൾക്ക് തുടക്കം കുറിച്ചു. ചടങ്ങിൽ കേന്ദ്ര പെട്രോളിയം പ്രകൃതി വാതക, ടൂറിസം സഹമന്ത്രി ശ്രീ സുരേഷ് ഗോപിയും സഹകരണ മേഖലയുമായി ബന്ധപ്പെട്ട നിരവധി വിശിഷ്ട വ്യക്തികളും പ്രതിനിധികളും പങ്കെടുത്തു.

തന്റെ അഭിസംബോധനയുടെ തുടക്കത്തിൽ, കേന്ദ്ര ആഭ്യന്തര, സഹകരണ മന്ത്രി ശ്രീ അമിത് ഷാ, 'കേരള' എന്നതിൽ നിന്ന് 'കേരളം' എന്നതിലേക്കുള്ള യാത്രയിൽ എല്ലാ മലയാളി സഹോദരീസഹോദരന്മാർക്കും ആശംസകളും അഭിനന്ദനങ്ങളും അറിയിച്ചു. സ്വാതന്ത്ര്യത്തിന്റെ അമൃത കാലത്ത്, കർഷകരും സഹകരണ മേഖലയുമായി ബന്ധപ്പെട്ട ആളുകളും കേന്ദ്രത്തിൽ ഒരു പ്രത്യേക സഹകരണ മന്ത്രാലയം രൂപീകരിക്കണമെന്ന് ഏറെക്കാലമായി ആവശ്യപ്പെട്ടിരുന്നതായി അദ്ദേഹം പറഞ്ഞു. കേന്ദ്രത്തിൽ സഹകരണ മന്ത്രാലയം സ്ഥാപിച്ചുകൊണ്ട് രാജ്യത്തെ ഗ്രാമീണ വികസനത്തിനും കാർഷിക വികസനത്തിനും സ്ത്രീ ശാക്തീകരണത്തിനും വലിയൊരു ചുവടുവെയ്പ്പാണ് പ്രധാനമന്ത്രി ശ്രീ നരേന്ദ്ര മോദി നടത്തിയത്; ഇത് സഹകരണ മേഖലയ്ക്ക് പുതിയ ഊർജ്ജവും വേഗതയും പകർന്നു നൽകി.

കേരളത്തിന്റെ സമ്പന്നമായ സഹകരണ പാരമ്പര്യം എടുത്തുപറഞ്ഞുകൊണ്ട്, സ്വാതന്ത്ര്യത്തിന് മുമ്പുതന്നെ സഹകരണ പ്രസ്ഥാനം ശക്തവും സുസംഘടിതവുമായി നിലനിന്നിരുന്ന സംസ്ഥാനങ്ങളിൽ ഒന്നാണ് കേരളമെന്ന് ശ്രീ അമിത് ഷാ പറഞ്ഞു. തിരുവിതാംകൂർ, കൊച്ചി, മലബാർ തുടങ്ങിയ മേഖലകളിൽ സ്വാതന്ത്ര്യത്തിന് മുമ്പുതന്നെ സഹകരണത്തിന്റെ ശക്തമായ പാരമ്പര്യമുണ്ടായിരുന്നു; ഇത് കേരളത്തിന്റെ സഹകരണ പ്രസ്ഥാനത്തെ രാജ്യത്തിനു മുഴുവൻ പ്രധാനപ്പെട്ടൊരു മാതൃകയാക്കി മാറ്റുന്നു. സഹകരണ മേഖലയിൽ ഇന്ന് ആരംഭിക്കുന്ന 'ഷീ-മാർട്ട്' പദ്ധതി കേന്ദ്ര ധനമന്ത്രി ബജറ്റിൽ പ്രഖ്യാപിച്ചതാണെന്നും ഈ പദ്ധതിക്ക് കേരളത്തിൽ തുടക്കം കുറിക്കാൻ കഴിഞ്ഞതിൽ വലിയ സന്തോഷമുണ്ടെന്നും അദ്ദേഹം വ്യക്തമാക്കി.

കർഷകർക്കും പൊതുജനങ്ങൾക്കും കുറഞ്ഞ നിരക്കിൽ ഭക്ഷ്യ ഉല്പന്നങ്ങൾ ലഭ്യമാക്കുന്നതിനായി ആരംഭിച്ച പദ്ധതികളെക്കുറിച്ച് വിശദീകരിക്കവേ, നാഫെഡിന്റെ (NAFED) മൊബൈൽ വാനുകൾ വഴി ഉള്ളി, ഭാരത് ആട്ട, ഭാരത് അരി എന്നിവ കർഷകരിലേക്കും സാധാരണക്കാരിലേക്കും എത്തിക്കുന്നതിനുള്ള പദ്ധതിക്ക് കേരളത്തിലും തുടക്കം കുറിച്ചിട്ടുണ്ടെന്ന് കേന്ദ്ര ആഭ്യന്തര, സഹകരണ മന്ത്രി പറഞ്ഞു. പപ്പടത്തിലും ധാന്യങ്ങളിലുമുള്ള 'ആത്മനിർഭരത' (സ്വയംപര്യാപ്തത) ലക്ഷ്യമിട്ടുള്ള ദൗത്യത്തിന് കീഴിൽ വനിതാ കർഷകർക്ക് ഉഴുന്ന്, കടല വിത്തുകൾ നൽകുന്നുണ്ട്. അതുപോലെതന്നെ 'നാഫെഡ്-കല്യാൺ സ്കോളർഷിപ്പ്' പദ്ധതിക്ക് കീഴിൽ രണ്ടായിരത്തോളം കുടുംബങ്ങളിലെ പെൺകുട്ടികൾക്ക് സ്കോളർഷിപ്പുകളും നൽകിവരുന്നു.

വനിതാ സ്വയം സഹായ സംഘങ്ങൾക്കും ഗ്രാമീണ വനിതാ സംരംഭകർക്കും 'ഷീ-മാർട്ട്' നൽകുന്ന പ്രാധാന്യം അടിയവരയിട്ടുകൊണ്ട്, ഇന്നത്തെ പരിപാടിയുടെ ഏറ്റവും പ്രധാനപ്പെട്ട വശം 'ഷീ-മാർട്ടിന്റെ' തുടക്കമാണെന്ന് ശ്രീ അമിത് ഷാ പറഞ്ഞു. വനിതാ സ്വയം സഹായ സംഘങ്ങളെയും ഗ്രാമീണ വനിതാ സംരംഭകരെയും വിപണികളുമായും ഉപഭോക്താക്കളുമായും നേരിട്ട് ബന്ധിപ്പിക്കാൻ ലക്ഷ്യമിട്ടുള്ള സുപ്രധാന പദ്ധതിയാണ് ഷീ-മാർട്ട്. വനിതകളുടെ നേതൃത്വത്തിലുള്ള സംരംഭങ്ങളെ കൂടുതൽ വിപുലമായ അളവിൽ വളർത്തിയെടുക്കാൻ നാഫെഡ് (NAFED), കേന്ദ്രീയ ഭണ്ഡാർ, അമൂൽ തുടങ്ങിയ സ്ഥാപനങ്ങളും സഹായിക്കുമെന്ന് അദ്ദേഹം വ്യക്തമാക്കി.

'ഷീ-മാർട്ടിന്റെ' വിപുലീകരണത്തെക്കുറിച്ചും അത് കർഷകർക്കും വനിതാ സംരംഭകർക്കും മുന്നിൽ തുറന്നുനൽകുന്ന പുതിയ അവസരങ്ങളെക്കുറിച്ചും പരാമർശിക്കവേ, കേരളം, തമിഴ്‌നാട്, കർണാടക എന്നിവിടങ്ങളിലായി മുന്നൂറിലധികം ഷീ-മാർട്ട് സ്റ്റോറുകൾ സ്ഥാപിക്കാൻ പദ്ധതിയുണ്ടെന്ന് കേന്ദ്ര സഹകരണ മന്ത്രി പറഞ്ഞു. ഇവിടെ പ്രാദേശിക ഉൽപ്പന്നങ്ങൾക്കൊപ്പം ഭാരത് ബ്രാൻഡ് ഉൽപ്പന്നങ്ങളും ഉപഭോക്താക്കൾക്ക് ലഭ്യമാക്കും. സംഭരണം, സംസ്കരണം, ബ്രാൻഡിംഗ്, പാക്കേജിംഗ് മുതൽ റീട്ടെയിൽ വിപണിയിലേക്കുള്ള നേരിട്ടുള്ള പ്രവേശനം വരെ – മൂല്യ ശൃംഖലയുടെ ഓരോ ഘട്ടത്തിലും കർഷകർക്കും വനിതാ സംരംഭകർക്കും ഇതിന്റെ പ്രയോജനം ലഭിക്കുമെന്നും അദ്ദേഹം കൂട്ടിച്ചേർത്തു.

കേരളത്തിന്റെ ശക്തമായ സഹകരണ ആവാസവ്യവസ്ഥയെ പ്രശംസിച്ചുകൊണ്ട്, 23,000-ത്തിലധികം സഹകരണ സ്ഥാപനങ്ങൾ കാര്യക്ഷമമായി പ്രവർത്തിക്കുന്ന പുരാതനവും വിപുലവും ശക്തവുമായ സഹകരണ ഘടനയാണ് സംസ്ഥാനത്തുള്ളതെന്ന് ശ്രീ അമിത് ഷാ പറഞ്ഞു. കേരളത്തിലെ സഹകരണ മന്ത്രിയെ ഡൽഹിയിലേക്ക് ക്ഷണിച്ചുകൊണ്ട്, ഇന്ത്യാ ഗവണ്മെന്റിന്റെ  എല്ലാ പദ്ധതികളുടെയും പരമാവധി ആനുകൂല്യം കേരളത്തിന് ലഭിക്കുന്നുണ്ടെന്ന് ഉറപ്പാക്കുന്നതിൽ കേന്ദ്ര ഗവണ്മെന്റിന്  സന്തോഷമേയുള്ളൂ എന്ന് അദ്ദേഹം വ്യക്തമാക്കി. ജൈവ കൃഷിയിലും മറ്റ് അനുബന്ധ മേഖലകളിലും കേരളത്തിന് ആവശ്യമായ എല്ലാ പിന്തുണയും നൽകാൻ കേന്ദ്ര ഗവണ്മെന്റിന് സാധിക്കുമെന്നും അദ്ദേഹം കൂട്ടിച്ചേർത്തു.

പ്രധാനമന്ത്രി ശ്രീ നരേന്ദ്ര മോദിയുടെ 'സഹകാർ സേ സമൃദ്ധി' എന്ന കാഴ്ചപ്പാടിൽ സ്ത്രീ ശാക്തീകരണത്തിനുള്ള കേന്ദ്രസ്ഥാനം എടുത്തുപറഞ്ഞുകൊണ്ട്, സഹകരണത്തിലൂടെ സ്ത്രീകളെ ശാക്തീകരിക്കുക എന്നത് പ്രധാനമന്ത്രിയുടെ മുഖ്യ  ലക്ഷ്യങ്ങളിലൊന്നാണെന്നും അദ്ദേഹത്തിന്റെ വലിയ കാഴ്ചപ്പാടുകളുടെയും പ്രധാന ലക്ഷ്യങ്ങളുടെയും സുപ്രധാന അടിത്തറയാണെന്നും കേന്ദ്ര ആഭ്യന്തര, സഹകരണ മന്ത്രി പറഞ്ഞു. ഒരു കുടുംബത്തിലെ സ്ത്രീ അഭിവൃദ്ധിപ്പെടുമ്പോൾ ആ കുടുംബം മുഴുവൻ അഭിവൃദ്ധിപ്പെടുന്നുവെന്ന് പ്രധാനമന്ത്രി ശ്രീ നരേന്ദ്ര മോദി നിരന്തരം മാർഗ്ഗനിർദ്ദേശം നൽകിയിട്ടുണ്ട്. വീട്ടിലെ ഒരു സ്ത്രീ ശാക്തീകരിക്കപ്പെടുമ്പോൾ, അതിന്റെ സ്വാധീനം മുഴുവൻ കുടുംബത്തിന്റെയും ശാക്തീകരണത്തിൽ പ്രതിഫലിക്കും. അതിനാൽ, 'സഹകാർ സേ സമൃദ്ധി'യുടെ ഏറ്റവും വലിയ പ്രയോജനം രാജ്യത്തെ ഗ്രാമീണരും ദരിദ്രരുമായ സ്ത്രീകളിലേക്ക് എത്തുന്നുണ്ടെന്ന് ഉറപ്പാക്കുകയാണ് ഗവൺമെന്റിന്റെ ലക്ഷ്യം.

ദേശീയതലത്തിൽ സഹകരണം ശക്തിപ്പെടുത്തുന്നതിൽ നാഫെഡിന്റെയും (NAFED) എൻസിസിഎഫിന്റെയും (NCCF) പങ്കിനെക്കുറിച്ച് പരാമർശിക്കവേ, രാജ്യത്തുടനീളം പ്രവർത്തിക്കുന്ന രണ്ട് സുപ്രധാന സ്ഥാപനങ്ങളാണ് നാഫെഡും എൻസിസിഎഫും എന്ന് ശ്രീ അമിത് ഷാ പറഞ്ഞു. നിലവിൽ ഏകദേശം 8 ലക്ഷം കർഷകർ നാഫെഡുമായും ഏകദേശം 6 ലക്ഷം വനിതാ കർഷകർ എൻസിസിഎഫുമായും ബന്ധപ്പെട്ട് പ്രവർത്തിക്കുന്നുണ്ട്. വരും ദിവസങ്ങളിൽ ഈ എണ്ണം ഇനിയും വർദ്ധിപ്പിക്കാനും ഇരു സ്ഥാപനങ്ങളെയും കൂടുതൽ ശക്തിപ്പെടുത്താനുമുള്ള ശ്രമങ്ങൾ നടത്തുമെന്നും അദ്ദേഹം വ്യക്തമാക്കി.

അടുത്ത കാലത്തായി സ്ത്രീ ശാക്തീകരണത്തിനായി കൈക്കൊണ്ട നടപടികളും അതിലൂടെ കൈവരിച്ച നേട്ടങ്ങളും എടുത്തുപറഞ്ഞുകൊണ്ട്, നാരീശക്തിയെയും സ്ത്രീ ശാക്തീകരണത്തെയും പ്രോത്സാഹിപ്പിക്കുന്നതിനായി പ്രധാനമന്ത്രി ശ്രീ നരേന്ദ്ര മോദിയുടെ നേതൃത്വത്തിൽ നിരവധി സുപ്രധാന പദ്ധതികൾ നടപ്പിലാക്കിയിട്ടുണ്ടെന്ന് കേന്ദ്ര ആഭ്യന്തര, സഹകരണ മന്ത്രി പറഞ്ഞു. 2017-18 കാലഘട്ടത്തിൽ ഏകദേശം 23 ശതമാനമായിരുന്ന സ്ത്രീകളുടെ തൊഴിൽ പങ്കാളിത്തം ഇപ്പോൾ ഏകദേശം 40 ശതമാനമായി ഉയർന്നിട്ടുണ്ട്. പ്രധാനമന്ത്രി ശ്രീ നരേന്ദ്ര മോദിയുടെ നേതൃത്വത്തിൽ 36 കോടിയോളം സ്ത്രീകൾക്ക് ബാങ്ക് അക്കൗണ്ടുകൾ തുറന്നു നൽകിയതായും അദ്ദേഹം കൂട്ടിച്ചേർത്തു.

സ്ത്രീകളുടെ അവകാശങ്ങളും അന്തസ്സും അവസരങ്ങളും വിപുലീകരിക്കുന്നതിനായി കേന്ദ്ര ഗവൺമെന്റ് സ്വീകരിച്ച നടപടികളെക്കുറിച്ച് പരാമർശിക്കവേ, മുസ്ലീം സ്ത്രീകളുടെ അവകാശങ്ങൾ സംരക്ഷിക്കുന്നതിനാണ് മുത്തലാഖ് നിരോധിക്കാനുള്ള സുപ്രധാന തീരുമാനം എടുത്തതെന്ന് ശ്രീ അമിത് ഷാ പറഞ്ഞു. മുമ്പ് പുരുഷ പങ്കാളിയില്ലാതെ മുസ്ലീം സ്ത്രീകൾക്ക് ഹജ്ജ് തീർത്ഥാടനം നടത്തുന്നതിന് നിയന്ത്രണങ്ങളുണ്ടായിരുന്നു, എന്നാൽ ഇപ്പോൾ മുസ്ലീം സ്ത്രീകൾക്ക് സ്വതന്ത്രമായി ഹജ്ജ് തീർത്ഥാടനം നടത്താൻ സാധിക്കും. ഇന്ന് 11,000-ലധികം വനിതാ ഓഫീസർമാർ ഇന്ത്യൻ സായുധ സേനയിൽ സേവനമനുഷ്ഠിക്കുന്നുണ്ടെന്നും സ്ത്രീകൾക്കായി 26 ആഴ്ചത്തെ പ്രസവാവധി കേന്ദ്ര ഗവൺമെന്റ്  ഉറപ്പാക്കിയിട്ടുണ്ടെന്നും അദ്ദേഹം വ്യക്തമാക്കി.

സ്ത്രീകളുടെ സാമ്പത്തിക ശാക്തീകരണം കൂടുതൽ വിപുലീകരിക്കുന്നതിനുള്ള ലക്ഷ്യത്തെക്കുറിച്ച് സംസാരിക്കവേ, ഏകദേശം 3 കോടി 'ലഖ്‌പതി ദീദിമാരെ' സൃഷ്ടിക്കുക എന്ന ലക്ഷ്യം 2024-ന് മുമ്പ് തന്നെ കൈവരിച്ചതായും 2029-ഓടെ 6 കോടി സ്ത്രീകളെ ലഖ്‌പതി ദീദിമാരാക്കി മാറ്റുകയാണ് പുതിയ ലക്ഷ്യമെന്നും കേന്ദ്ര ആഭ്യന്തര, സഹകരണ മന്ത്രി പറഞ്ഞു.

കേരളത്തിന്റെ നീല സമ്പദ് വ്യവസ്ഥയിൽ കുടികൊള്ളുന്ന വലിയ സാമ്പത്തിക സാധ്യതകളെ എടുത്തുപറഞ്ഞുകൊണ്ട്, സംസ്ഥാനത്തിന്റെ നീളമേറിയ തീരദേശവും കായലുകളും പുഴകളും സമ്പന്നമായ സമുദ്ര പാരമ്പര്യവും നീല സമ്പദ് വ്യവസ്ഥയിൽ വൻ അവസരങ്ങളാണ് നൽകുന്നതെന്ന് ശ്രീ അമിത് ഷാ പറഞ്ഞു. വലിയ ട്രോളറുകൾ നൽകുന്നത് മുതൽ ഉൽപ്പാദനം, സംസ്കരണം, പാക്കേജിംഗ്, ബ്രാൻഡിംഗ്, കയറ്റുമതി എന്നിവ വരെ ഉൾപ്പെടുന്ന നിരവധി പദ്ധതികൾ മത്സ്യബന്ധന മേഖലയിൽ ലഭ്യമാണ്. ഈ ദിശയിൽ മുൻകൈയെടുക്കാനും പദ്ധതികളുടെ വിശദാംശങ്ങൾ മനസ്സിലാക്കി കേരളത്തിന് ഇതിന്റെ പരമാവധി ആനുകൂല്യം ലഭിക്കുന്നുണ്ടെന്ന് ഉറപ്പാക്കാനും അദ്ദേഹം കേരളത്തിലെ സഹകരണ മന്ത്രിയോട് അഭ്യർത്ഥിച്ചു. മത്സ്യബന്ധന, സമുദ്ര മേഖലകളുടെ സാധ്യതകളെ ഒരു വലിയ സാമ്പത്തിക അവസരമാക്കി മാറ്റുന്നതിന് കേന്ദ്രത്തിന്റെയും സംസ്ഥാനത്തിന്റെയും സംയുക്ത ശ്രമങ്ങൾ ആവശ്യമാണെന്ന് ചൂണ്ടിക്കാണിച്ച കേന്ദ്ര ആഭ്യന്തര, സഹകരണ മന്ത്രി, ഈ മേഖലകളിൽ കേരളത്തിന് വൻ സാധ്യതകളുണ്ടെന്നും കേന്ദ്രവും സംസ്ഥാനവും ഒരുമിച്ച് പ്രവർത്തിച്ചാൽ ഇത് വലിയൊരു സാമ്പത്തിക നേട്ടമാക്കി മാറ്റാൻ സാധിക്കുമെന്നും കൂട്ടിച്ചേർത്തു.

പരിപാടിക്കിടെ, കിലോഗ്രാമിന് 35 രൂപ നിരക്കിൽ ഇളവോടെ സവാള  ലഭ്യമാക്കുന്ന എൻസിസിഎഫ് (NCCF), നാഫെഡ് (NAFED) മൊബൈൽ വാനുകൾ കേന്ദ്ര ആഭ്യന്തര, സഹകരണ മന്ത്രി ഫ്ലാഗ് ഓഫ് ചെയ്യുകയും വിവിധ സ്റ്റാളുകൾ സന്ദർശിക്കുകയും ചെയ്തു. ചടങ്ങിൽ എൻസിസിഎഫും ദി സെൻട്രൽ ഫിനാൻഷ്യൽ ക്രെഡിറ്റ് ആൻഡ് ഇൻവെസ്റ്റ്‌മെന്റ് കോ-ഓപ്പറേറ്റീവ് (ഇന്ത്യ) ലിമിറ്റഡും (CFCICI) തമ്മിൽ ധാരണാപത്രം (MoU) കൈമാറി. ഭാരതീയ മത്സ്യ പ്രവർത്തക് സംഘത്തിന്റെ മത്സ്യ ഉൽപ്പന്നങ്ങൾ എൻസിസിഎഫിന്റെ 'ജനഃ' ബ്രാൻഡുമായി ചേർന്ന് സപ്ലൈ ചെയിൻ ലോജിസ്റ്റിക്സിൽ സംയോജിപ്പിക്കുന്നതിനും, കേരളം, തമിഴ്‌നാട്, കർണാടക എന്നിവിടങ്ങളിലായി 300 ഷീ-മാർട്ട് ഷോപ്പുകൾ ആരംഭിക്കുന്നതിനായി എൻസിസിഎഫും ഭാരത് ലജ്ന സഹകാരി സമിതിയും തമ്മിലും ധാരണാപത്രങ്ങൾ കൈമാറി.

എൻസിസിഎഫിന്റെ 'ജനാ' ഉൽപ്പന്നങ്ങളുടെ വിൽപ്പനയ്ക്കും എൻസിസിഎഫും CFCICI-യും ചേർന്ന്  വികസിപ്പിച്ച വനിതം ഷീ-മാർട്ട് ഷോപ്പുകളുടെ ഉദ്ഘാടനത്തിനും ശ്രീ അമിത് ഷാ തുടക്കം കുറിച്ചു. വനിതം ഷീ-മാർട്ട് ഷാപ്പുകൾ വഴി വനിതാ ഉപഭോക്താക്കൾക്കുള്ള 'ഭാരത് ആട്ട', 'ഭാരത് അരി' എന്നിവയുടെ വിൽപ്പനയും അദ്ദേഹം ഉദ്ഘാടനം ചെയ്തു. ഇതുകൂടാതെ, ധാന്യങ്ങളിലെ സ്വയംപര്യാപ്തതയ്ക്കായുള്ള ദൗത്യത്തിന് (Mission for Aatmanirbharta in Pulses) കീഴിൽ വനിതാ കർഷകർക്ക് സൗജന്യ ഉഴുന്ന്, കടല വിത്ത് - കിറ്റുകൾ വിതരണം ചെയ്യുകയും, 'നാഫെഡ്-കല്യാൺ സ്കോളർഷിപ്പ്' പദ്ധതിക്ക് കീഴിൽ രജിസ്റ്റർ ചെയ്ത കർഷകരുടെ പെൺമക്കൾക്ക് സ്കോളർഷിപ്പ് ചെക്കുകൾ സമ്മാനിക്കുകയും ചെയ്തു.

***