பிரதமர் திரு நரேந்திர மோடி இன்று புது தில்லியில் 'செமிகான் இந்தியா 2026' நிகழ்ச்சியைத் தொடங்கி வைத்தார். அப்போது உரையாற்றிய அவர், கடந்த 15 நாட்களில் நாடு அடைந்துள்ள விரைவான முன்னேற்றத்தை எடுத்துரைத்து, முக்கிய மைல்கற்களைப் பட்டியலிட்டார். இதில், உலகளாவிய நிதிநுட்பத் திருவிழா நிகழ்வில் அனைவரையும் உள்ளடக்கிய நிதிச் சேவை குறித்த விவாதங்கள், 3,000 கிலோமீட்டர் நீளமுள்ள சரக்குப் போக்குவரத்திற்கான பிரத்யேக வழித்தடத்தின் தொடக்கம், 7.8% வலுவான காலாண்டு மொத்த உள்நாட்டு உற்பத்தி வளர்ச்சி ஆகியவை அடங்கும். நாட்டின் பொருளாதார நம்பகத்தன்மை உயர்ந்து வருவதற்கான சான்றாக, ஜப்பானிய கடன் மதிப்பீட்டு நிறுவனம் ஒன்று சமீபத்தில் நாட்டின் இறையாண்மை கடன் மதிப்பீட்டை உயர்த்தியதையும் அவர் சுட்டிக்காட்டினார். "இதன்படி, ஒருபுறம் இந்தியாவின் பொருளாதாரம் வளர்ந்து வருகிறது; மறுபுறம், இந்தியாவின் மீதான உலகின் நம்பிக்கையும் அதிகரித்து வருகிறது," என்று திரு மோடி குறிப்பிட்டார்.

செமிகண்டக்டர் சார்ந்த சூழலியலை உருவாக்குவதில் உள்ள பெரும் சிக்கல்களை விவரித்த பிரதமர், சிப் வடிவமைப்பு, உபகரண உற்பத்தி மற்றும் பரிசோதனைத் திறன்களில் சாதனை நேரத்தில் தேர்ச்சி பெறுவதற்குத்  தேவைப்பட்ட கூட்டு முயற்சியைப் பாராட்டினார். இந்த விரைவான தொழில்நுட்ப முன்னேற்றத்தை சாத்தியமாக்கியதில் முக்கியப் பங்காற்றிய தொழில் துறைத் தலைவர்களை, இதன் அடிப்படைத் தூண்களாக அவர் குறிப்பிட்டார். "இந்தியாவின் இந்த வெற்றிக்கு நீங்களே தூண்களாகவும், கூட்டாளிகளாகவும் இருக்கிறீர்கள்," என்று திரு மோடி கூறினார்.

நாட்டின் எல்லைக்குள்ளேயே மேம்பட்ட தொழில்நுட்பங்களை உருவாக்குவதில் இளம் திறமையாளர்கள் தீவிரமாகப் பங்கேற்க வேண்டும் என்று பிரதமர் வலியுறுத்தினார். வணிக நிறுவனங்கள், நாட்டின் இளைஞர்கள் ஆகிய இரு தரப்பினருக்கும் பரஸ்பர வளர்ச்சியை உறுதி செய்யும் வகையில், உள்ளூர் ஆராய்ச்சி மற்றும் மேம்பாட்டு முயற்சிகளை வழிநடத்துமாறு தொழில் துறைத் தலைவர்களுக்கு அவர் அழைப்பு விடுத்தார்.

மின்சாரத் துறையில் மேற்கொள்ளப்பட்டு வரும்  தீவிரமான விரிவாக்க நடவடிக்கைகளை அவர் எடுத்துரைத்தார்; இதில் சூரிய மின்சக்தி உற்பத்தித் திறனை 160 ஜிகாவாட்டிற்கும் அதிகமாக உயர்த்தியது, அணுசக்தித் துறையில் தனியார் நிறுவனங்களை அனுமதித்தது மற்றும் சிறிய அளவிலான ஈனுலைகளை உருவாக்கியது ஆகியவை அடங்கும். "இதன்மூலம், இன்று இந்தியாவும் மின்சாரத் துறையில் பெரும் முதலீடுகளைச் செய்து வருகிறது," என்று திரு மோடி குறிப்பிட்டார்.

மின் உள்கட்டமைப்பின் விரைவான விரிவாக்கத்தை தொழில்சார் தயார்நிலையுடன் தொடர்புபடுத்திப் பேசிய பிரதமர், இந்த எரிசக்திப் பாதுகாப்பு, செமிகண்டக்டர் சூழலியலுக்கு ஒரு அடிப்படை வலிமையாகத் திகழ்கிறது என்று குறிப்பிட்டார். தொழில் வளர்ச்சிக்கான சூழலைச் சிறப்பாக மேம்படுத்துவதில் அரசு மிகுந்த ஈடுபாடு கொண்டுள்ளது என்று அவர் சம்பந்தப்பட்ட தரப்பினருக்கு உறுதியளித்தார். "செமிகண்டக்டர் துறைக்கு விருப்பமான இடமாக இந்தியாவை மாற்றுவதற்கான அனைத்து நடவடிக்கைகளையும் நாங்கள் மேற்கொண்டு வருகிறோம்," என்று திரு மோடி உறுதிபடத் தெரிவித்தார்.

மேலும் விவரங்களுக்கு இந்த செய்திக் குறிப்பை ஆங்கிலத்தில் இங்கே காணவும்: https://www.pib.gov.in/PressReleaseDetail.aspx?PRID=2311294&reg=3&lang=1   

***

TV/BR/GS