குஜராத்தில் சரக்குக் கையாளும் திறனை வலுப்படுத்தவும், பிராந்தியப் பொருளாதார மையங்கள், துறைமுகங்கள் மற்றும் நாடு முழுவதும் உள்ள சந்தைகளுக்கு இடையிலான இணைப்பை மேம்படுத்தவும் உதவும் வகையில், ஐந்து கதிசக்தி சரக்கு முனையங்களை மத்திய ரயில்வே அமைச்சர் திரு அஸ்வினி வைஷ்ணவ் இன்று தொடங்கி வைத்தார். குஜராத்திலிருந்து உப்பை ஏற்றிச் செல்ல, ரயில் போக்குவரத்தை அதிகளவில் பயன்படுத்துவதை நோக்கிய ஒரு முக்கிய நடவடிக்கையாக, ஷிவ்லகா விரைவுசக்தி சரக்கு முனையத்திலிருந்து மிதாபூருக்கு பிரத்தியேக சரக்கு ரயிலையும் திரு வைஷ்ணவ் கொடியசைத்துத் தொடங்கி வைத்தார்.

உப்பு போக்குவரத்தின் முக்கியத்துவத்தை வலியுறுத்திய திரு வைஷ்ணவ், ஒவ்வொரு வீட்டிலும் பயன்படுத்தப்படும் அத்தியாவசியப் பொருளாக உப்பு திகழ்கிறது என்று குறிப்பிட்டார்.  நாட்டின் பல்வேறு பகுதிகளுக்கு உப்பைக் கொண்டு செல்வதில் நீண்டகாலமாகப் பல சவால்கள் இருந்து வருவதாக அவர் கூறினார்.

இந்தச் சவால்களை எதிர்கொள்ளும் வகையில், எடை குறைந்த, துருப்பிடிக்காத எஃகினால் ஆன புதிய உப்புக் கொள்கலன் பிரத்யேகமாக வடிவமைக்கப்பட்டுள்ளதாக அவர் மேலும் தெரிவித்தார். புதிய கொள்கலன்கள் நாட்டின் பல்வேறு பகுதிகளுக்கு உப்பைக் கொண்டு செல்வதை எளிதாக்குவதுடன், அவற்றை நிரப்புவது, இறக்கும் பணிகளைச் சீராகவும் திறம்படவும் மேற்கொள்ள உதவும் என்றும் அவர் கூறினார். நாடு முழுவதும் 150 கதிசக்தி சரக்கு முனையங்கள் தற்போது செயல்பாட்டுக்குக் கொண்டுவரப்பட்டுள்ளதாகவும், இவை தொழில்துறைகளுக்குப் பயனளிப்பதுடன், சரக்குப் போக்குவரத்து இணைப்பை மேம்படுத்தும் என்றும்  திரு வைஷ்ணவ் தெரிவித்தார்.

பிரத்யேக சரக்கு வழித்தடங்கள் குறித்துப் பேசிய திரு வைஷ்ணவ், சமீபத்தில் தொடங்கி வைக்கப்பட்ட இந்த உள்கட்டமைப்பு, பொருட்களை வேகமாகவும் சீராகவும் கொண்டு செல்ல உதவுவதன் மூலம் சரக்குப் போக்குவரத்திற்கு குறிப்பிடத்தக்க நன்மைகளை வழங்கும் என்று குறிப்பிட்டார். கிழக்கு-மேற்கு சரக்கு இணைப்பை விரிவுபடுத்தும் பணிகளும் மேற்கொள்ளப்பட்டு வருவதாக அவர் கூறினார்.

மேலும் விவரங்களுக்கு இந்த செய்திக் குறிப்பை ஆங்கிலத்தில் இங்கே காணவும்:

https://www.pib.gov.in/PressReleasePage.aspx?PRID=2310608&reg=3&lang=1

***

TV/RB/SM