ಗ್ರಾಹಕ ವ್ಯವಹಾರಗಳು, ಆಹಾರ ಮತ್ತು ಸಾರ್ವಜನಿಕ ವಿತರಣಾ ಸಚಿವಾಲಯದ ಗ್ರಾಹಕ ವ್ಯವಹಾರಗಳ ಇಲಾಖೆಯು, ಸರ್ಕಾರಿ ಅನುಮೋದಿತ ಪರೀಕ್ಷಾ ಕೇಂದ್ರಗಳ(ಜಿಎಟಿಸಿಗಳು) ವಿಸ್ತರಿಸುತ್ತಿರುವ ಜಾಲದ ಮೂಲಕ ದೇಶದ ಕಾನೂನು ಮಾಪನಶಾಸ್ತ್ರ ಪರಿಶೀಲನಾ ಮೂಲಸೌಕರ್ಯವನ್ನು ಬಲಪಡಿಸುತ್ತಿದೆ. ಮಾನ್ಯತೆಗಾಗಿ ಬರುತ್ತಿರುವ ಹೊಸ ಸುತ್ತಿನ ಅರ್ಜಿಗಳಿಗೆ ದೇಶಾದ್ಯಂತದ ಕೈಗಾರಿಕೆಗಳು, ಪ್ರಯೋಗಾಲಯಗಳು ಮತ್ತು ತಾಂತ್ರಿಕ ಸಂಸ್ಥೆಗಳಿಂದ ಬಲವಾದ ಪ್ರತಿಕ್ರಿಯೆ ಅಥವಾ ಸ್ಪಂದನೆ ವ್ಯಕ್ತವಾಗಿದೆ.

ಕಾನೂನು ಮಾಪನಶಾಸ್ತ್ರ(ಸರ್ಕಾರ ಅನುಮೋದಿತ ಪರೀಕ್ಷಾ ಕೇಂದ್ರ) ನಿಯಮಗಳು-2013ಕ್ಕೆ ತಿದ್ದುಪಡಿಗಳನ್ನು ತಂದ ನಂತರ ಆರೋಗ್ಯ ರಕ್ಷಣೆ, ಇಂಧನ, ಸಾರಿಗೆ, ಚಿಲ್ಲರೆ ವ್ಯಾಪಾರ, ಉತ್ಪಾದನೆ, ಮೂಲಸೌಕರ್ಯ ಮತ್ತು ಉದಯೋನ್ಮುಖ ಸ್ವಚ್ಛ ಇಂಧನ ವಲಯಗಳು ಸೇರಿದಂತೆ ವಿವಿಧ ಕ್ಷೇತ್ರಗಳ 23 ವಿಭಾಗಗಳ ತೂಕ ಮತ್ತು ಅಳತೆ ಉಪಕರಣಗಳನ್ನು ಸೇರ್ಪಡೆ ಮಾಡಲು ಜಿಎಟಿಸಿಗಳ ವ್ಯಾಪ್ತಿಯನ್ನು ವಿಸ್ತರಿಸಲಾಗಿದೆ.

ಅರ್ಹ ಕೈಗಾರಿಕೆಗಳು, ಪ್ರಯೋಗಾಲಯಗಳು, ಎಂಜಿನಿಯರಿಂಗ್ ಕಾಲೇಜುಗಳು, ಪಾಲಿಟೆಕ್ನಿಕ್‌ಗಳು, ಐಟಿಐಗಳು ಮತ್ತು ಪರೀಕ್ಷಾ ಸೌಲಭ್ಯಗಳನ್ನು ಜಿಎಟಿಸಿಗಳಾಗಿ ಮಾನ್ಯತೆ ಪಡೆಯುವಂತೆ ಆಹ್ವಾನಿಸುವುದನ್ನು ಇಲಾಖೆಯು ಮುಂದುವರೆಸಿದೆ. ಇಲಾಖೆಯ ಆನ್‌ಲೈನ್ ಪೋರ್ಟಲ್ ಮೂಲಕ ಮತ್ತೊಮ್ಮೆ ಅರ್ಜಿಗಳನ್ನು ಆಹ್ವಾನಿಸಲಾಗಿದೆ, ಇತ್ತೀಚಿನ ಅರ್ಜಿ ಗವಾಕ್ಷಿಯು ಸಂಭಾವ್ಯ ಅರ್ಜಿದಾರರಿಂದ ಉತ್ತಮ ಸ್ಪಂದನೆ ಪಡೆಯುತ್ತಿದೆ.

ಇತ್ತೀಚಿನ ಕರೆ ಅಥವಾ ಅರ್ಜಿ ಆಹ್ವಾನದ ನಂತರ ಅರ್ಹ ಸಂಸ್ಥೆಗಳಿಂದ ಹಲವಾರು ಅರ್ಜಿಗಳನ್ನು ಸ್ವೀಕರಿಸಲಾಗಿದೆ,  ಪ್ರಸ್ತುತ ಇಲಾಖೆಯು ಸಂಬಂಧಪಟ್ಟ ರಾಜ್ಯ ಕಾನೂನು ಮಾಪನಶಾಸ್ತ್ರ ಇಲಾಖೆಗಳೊಂದಿಗೆ ಸಮಾಲೋಚನೆ ನಡೆಸುವ ಪ್ರಕ್ರಿಯೆಯಲ್ಲಿದೆ.

ಅರ್ಜಿಗಳನ್ನು ಈ ಕೆಳಗಿನವುಗಳಿಗಾಗಿ ಪರಿಶೀಲಿಸಲಾಗುತ್ತಿದೆ:

• ದಾಖಲೆಗಳ ಸಂಪೂರ್ಣತೆ
• ಪರಿಶೀಲನಾ ಮೂಲಸೌಕರ್ಯದ ಸಮರ್ಪಕತೆ
• ಅರ್ಹ ತಾಂತ್ರಿಕ ಸಿಬ್ಬಂದಿಯ ಲಭ್ಯತೆ ಮತ್ತು
• ಮಾನ್ಯತೆ ನೀಡುವ ಮೊದಲು ಸ್ಥಳ ಪರಿಶೀಲನೆ

ಈಗಾಗಲೇ 51 ಜಿಎಟಿಸಿಗಳು ಗುರುತಿಸಲ್ಪಟ್ಟಿವೆ ಮತ್ತು ಸಕ್ರಿಯ ಪರಿಗಣನೆಯಲ್ಲಿರುವ ಅನ್ವಯಿಕೆಗಳ ಆರೋಗ್ಯಕರ ಸಂಪರ್ಕದೊಂದಿಗೆ ಜಿಎಟಿಸಿ ಜಾಲವು ಮುಂಬರುವ ತಿಂಗಳುಗಳಲ್ಲಿ ಮತ್ತಷ್ಟು ವಿಸ್ತರಿಸಲು ಸಜ್ಜಾಗಿದೆ, ಇದು ಉದ್ಯಮ ಮತ್ತು ಗ್ರಾಹಕರಿಗೆ ಲಭ್ಯವಿರುವ ತಾಂತ್ರಿಕವಾಗಿ ಸಮರ್ಥ ಪರಿಶೀಲನಾ ಸೌಲಭ್ಯಗಳ ನೆಲೆಯನ್ನು ವಿಸ್ತರಿಸುತ್ತದೆ.

ಮುಖ್ಯಾಂಶಗಳು

• ಜಿಎಟಿಸಿ ಮಾನ್ಯತೆಗಾಗಿ ಹೊಸ ಸುತ್ತಿನ ಅರ್ಜಿಗಳನ್ನು ಆಹ್ವಾನಿಸಲಾಗಿದೆ, ಇದಕ್ಕೆ ಉದ್ಯಮ, ಪ್ರಯೋಗಾಲಯಗಳು ಮತ್ತು ತಾಂತ್ರಿಕ ಸಂಸ್ಥೆಗಳಿಂದ ಬಲವಾದ ಪ್ರತಿಕ್ರಿಯೆ ವ್ಯಕ್ತವಾಗಿದೆ.
• ಸ್ವೀಕರಿಸಿದ ಅರ್ಜಿಗಳು ಪ್ರಕ್ರಿಯೆಯಲ್ಲಿವೆ, ರಾಜ್ಯ ಕಾನೂನು ಮಾಪನಶಾಸ್ತ್ರ ಇಲಾಖೆಗಳ ಸಮನ್ವಯದೊಂದಿಗೆ ಸ್ಥಳ ಪರಿಶೀಲನೆ ಮತ್ತು ತಾಂತ್ರಿಕ ಪರಿಶೀಲನೆ ನಡೆಸಲಾಗುತ್ತಿದೆ.
• 51 ಜಿಎಟಿಸಿಗಳನ್ನು ಈಗಾಗಲೇ ಗುರುತಿಸಲಾಗಿದೆ, ಹೆಚ್ಚಿನ ಅರ್ಜಿಗಳನ್ನು ಅನುಮೋದಿಸಿದಂತೆ ಜಾಲವು ಮತ್ತಷ್ಟು ವಿಸ್ತರಿಸಲಿದೆ.
• ಹಲವಾರು ರಾಜ್ಯಗಳು ತಮ್ಮದೇ ಆದ ಜಿಎಟಿಸಿ ನಿಯಮಗಳನ್ನು ಅಂತಿಮಗೊಳಿಸಿವೆ, ಅವುಗಳನ್ನು ತಿದ್ದುಪಡಿ ಮಾಡಿದ ಕೇಂದ್ರ ಮಾರ್ಗಸೂಚಿಯೊಂದಿಗೆ ಜೋಡಿಸಿವೆ.
• ಪರಿಶೀಲನಾ ವ್ಯಾಪ್ತಿಯು ನೀರು, ಅನಿಲ ಮತ್ತು ಇಂಧನ ಮೀಟರ್‌ಗಳು, ಉಸಿರು ವಿಶ್ಲೇಷಕಗಳು, ವಾಹನ ಸ್ಪೀಡೋಮೀಟರ್‌ಗಳು, ತೂಕದ ಉಪಕರಣಗಳು ಮತ್ತು ಪೆಟ್ರೋಲ್, ಡೀಸೆಲ್, ಸಿಎನ್‌ಜಿ, ಎಲ್‌ಪಿಜಿ, ಎಲ್‌ಎನ್‌ಜಿ ಮತ್ತು ಹೈಡ್ರೋಜನ್‌ಗಾಗಿ ಇಂಧನ ವಿತರಕಗಳು ಸೇರಿದಂತೆ 23 ವರ್ಗಗಳ ಉಪಕರಣಗಳನ್ನು ಒಳಗೊಂಡಿದೆ.
• ವಿಸ್ತೃತ ಜಾಲವು ಒಐಎಂಎಲ್ ಪ್ರಮಾಣೀಕರಣ ಪ್ರಾಧಿಕಾರವಾಗಿ ಭಾರತದ ಸ್ಥಾನಮಾನಕ್ಕೆ ಅನುಗುಣವಾಗಿ ಗ್ರಾಹಕರ ರಕ್ಷಣೆ ಬಲಪಡಿಸುವ ಜತೆಗೆ ವ್ಯವಹಾರವನ್ನು ಸುಲಭಗೊಳಿಸುತ್ತದೆ.

ಹಲವಾರು ರಾಜ್ಯಗಳು ಜಿಎಟಿಸಿ ನಿಯಮಗಳನ್ನು ತಿದ್ದುಪಡಿ ಮಾಡಿದ ಕೇಂದ್ರ ಮಾರ್ಗಸೂಚಿಗಳೊಂದಿಗೆ ಜೋಡಿಸಿವೆ

ಜಿಎಟಿಸಿ ಮಾರ್ಗಸೂಚಿ ಆಧರಿಸಿದ ಕೇಂದ್ರ-ರಾಜ್ಯ ಪಾಲುದಾರಿಕೆ ಬಲಪಡಿಸುವ ಮಹತ್ವದ ಬೆಳವಣಿಗೆಯಲ್ಲಿ, ಹಲವಾರು ರಾಜ್ಯಗಳು ತಿದ್ದುಪಡಿ ಮಾಡಿದ ಕೇಂದ್ರ ಮಾರ್ಗಸೂಚಿಯೊಂದಿಗೆ ತಮ್ಮದೇ ಆದ ಜಿಎಟಿಸಿ ನಿಯಮಗಳನ್ನು ಅಂತಿಮಗೊಳಿಸಿ, ಅಧಿಸೂಚನೆ ಹೊರಡಿಸಿವೆ. ರಾಜ್ಯ ಮಟ್ಟದಲ್ಲಿ ಈ ಜೋಡಣೆಯು ಪರಿಶೀಲನಾ ಪರಿಸರ ವ್ಯವಸ್ಥೆಯ ವ್ಯಾಪ್ತಿಯನ್ನು ಮತ್ತಷ್ಟು ಆಳಗೊಳಿಸುತ್ತದೆ, ರಾಜ್ಯ ಕಾನೂನು ಮಾಪನಶಾಸ್ತ್ರ ಇಲಾಖೆಗಳು ಮತ್ತು ಮಾನ್ಯತೆ ಪಡೆದ ಜಿಎಟಿಸಿಗಳ ನಡುವೆ ಸುಗಮ ಸಮನ್ವಯವನ್ನು ಸಕ್ರಿಯಗೊಳಿಸುತ್ತದೆ. ಇದು ದೇಶಾದ್ಯಂತ ವ್ಯವಹಾರಗಳು ಮತ್ತು ಗ್ರಾಹಕರಿಗೆ ವೇಗವಾಗಿ ಮತ್ತು ಹೆಚ್ಚು ಸ್ಥಳೀಯ ಪರಿಶೀಲನಾ ಸೇವೆಗಳನ್ನು ಬೆಂಬಲಿಸುತ್ತದೆ ಎಂದು ನಿರೀಕ್ಷಿಸಲಾಗಿದೆ.

ಜಿಎಟಿಸಿಗಳು ರಾಜ್ಯ ಕಾನೂನು ಮಾಪನಶಾಸ್ತ್ರ ಮೂಲಸೌಕರ್ಯಕ್ಕೆ ಪೂರಕವಾಗಿವೆ

ಭಾರತದ ಕಾನೂನು ಮಾಪನಶಾಸ್ತ್ರ ಪರಿಸರ ವ್ಯವಸ್ಥೆ ಆಧುನೀಕರಿಸುವ ಇಲಾಖೆಯ ನಿರಂತರ ಪ್ರಯತ್ನಗಳಲ್ಲಿ ಜಿಎಟಿಸಿ ಜಾಲದ ವಿಸ್ತರಣೆಯು ಮಹತ್ವದ ಹೆಜ್ಜೆಯಾಗಿದೆ. ತಾಂತ್ರಿಕವಾಗಿ ಸಮರ್ಥ ಖಾಸಗಿ ಸಂಸ್ಥೆಗಳು ನಿರ್ದಿಷ್ಟ ತೂಕ ಮತ್ತು ಅಳತೆಗಳ ಪರಿಶೀಲನೆ ಮತ್ತು ಮರುಪರಿಶೀಲನೆ ಕೈಗೊಳ್ಳಲು ಅನುವು ಮಾಡಿಕೊಡುವ ಮೂಲಕ, ಈ ಉಪಕ್ರಮವು ರಾಜ್ಯ ಕಾನೂನು ಮಾಪನಶಾಸ್ತ್ರ ಇಲಾಖೆಗಳ ಸಾಮರ್ಥ್ಯವನ್ನು ಹೆಚ್ಚಿಸುತ್ತದೆ.

ಇದು ಕಾನೂನು ಮಾಪನಶಾಸ್ತ್ರ ಅಧಿಕಾರಿಗಳಿಗೆ ಈ ಕೆಳಗಿನವುಗಳಿಗೆ ಹೆಚ್ಚಿನ ಗಮನ ನೀಡಲು ಅನುವು ಮಾಡಿಕೊಡುತ್ತದೆ:

• ಮಾರುಕಟ್ಟೆ ಕಣ್ಗಾವಲು
• ಅಪಾಯ ಆಧಾರಿತ ತಪಾಸಣೆಗಳು
• ಗಂಭೀರ ಉಲ್ಲಂಘನೆಗಳ ವಿರುದ್ಧ ಜಾರಿ ಮತ್ತು
• ಗ್ರಾಹಕರ ಕುಂದುಕೊರತೆಗಳ ಪರಿಹಾರ

ಪರಿಶೀಲನೆಯು 23 ವಿಭಾಗಗಳ ಉಪಕರಣಗಳನ್ನು ಒಳಗೊಂಡಿದೆ

ವಿಸ್ತರಿತ ಜಿಎಟಿಸಿ ಮಾರ್ಗಸೂಚಿಯು ತೂಕ ಮತ್ತು ಅಳತೆ ಉಪಕರಣಗಳ 23 ವಿಭಾಗಗಳನ್ನು ಒಳಗೊಂಡಿದೆ, ಅವುಗಳೆಂದರೆ:

• ನೀರು, ಅನಿಲ ಮತ್ತು ಇಂಧನ ಮೀಟರ್‌ಗಳು;
• ಉಸಿರಾಟದ ವಿಶ್ಲೇಷಕಗಳು;
• ವಾಹನಗಳ ವೇಗ ಅಳೆಯಲು ಬಳಸುವ ಸ್ಪೀಡೋಮೀಟರ್‌ಗಳು;
• ತೂಕದ ಉಪಕರಣಗಳು ಮತ್ತು
• ಪೆಟ್ರೋಲ್, ಡೀಸೆಲ್, ಸಿಎನ್‌ಜಿ, ಎಲ್‌ಪಿಜಿ, ಎಲ್‌ಎನ್‌ಜಿ ಮತ್ತು ಹೈಡ್ರೋಜನ್‌ ಇಂಧನ ವಿತರಕಗಳು.

ಜಿಎಟಿಸಿಗಳ ಜಾಲ ಬೆಳೆಯುತ್ತಲೇ ಇರುವುದರಿಂದ, ಹೊಸ ಅನ್ವಯಿಕೆಗಳು ಮತ್ತು ಕೇಂದ್ರ ಮಾರ್ಗಸೂಚಿಯೊಂದಿಗೆ ರಾಜ್ಯಗಳ ಮಟ್ಟದ ನಿಯಮಗಳ ಜೋಡಣೆಯಿಂದ ಬೆಂಬಲಿತವಾಗಿದೆ. ಇಲಾಖೆಯು ದೊಡ್ಡದಾದ, ಹೆಚ್ಚು ಪ್ರವೇಶಿಸಬಹುದಾದ ಮತ್ತು ತಾಂತ್ರಿಕವಾಗಿ ಸಮರ್ಥವಾದ ಪರಿಶೀಲನಾ ಮೂಲಸೌಕರ್ಯವನ್ನು ಸ್ಥಿರವಾಗಿ ನಿರ್ಮಿಸುತ್ತಿದೆ. ಈ ವಿಸ್ತರಣೆಯು ವ್ಯವಹಾರವನ್ನು ಸುಲಭಗೊಳಿಸಲು ಕಾನೂನು ಮಾಪನಶಾಸ್ತ್ರ ವ್ಯವಸ್ಥೆಯ ಸಂಯೋಜಿತ ಪ್ರಯತ್ನಗಳನ್ನು ಪ್ರತಿಬಿಂಬಿಸುತ್ತದೆ. ಅದೇ ಸಮಯದಲ್ಲಿ ಗ್ರಾಹಕರ ರಕ್ಷಣೆ ಮತ್ತು ದೈನಂದಿನ ವಾಣಿಜ್ಯ ವಹಿವಾಟುಗಳಲ್ಲಿ ವಿಶ್ವಾಸವನ್ನು ಬಲಪಡಿಸುತ್ತದೆ.

ವ್ಯಾಪಾರದಲ್ಲಿ ನ್ಯಾಯಸಮ್ಮತೆ ಹೆಚ್ಚಿಸುವ ಮತ್ತು ದೇಶಾದ್ಯಂತ ಗ್ರಾಹಕರ ಹಿತಾಸಕ್ತಿಗಳನ್ನು ರಕ್ಷಿಸುವ ಪಾರದರ್ಶಕ, ತಂತ್ರಜ್ಞಾನ-ಚಾಲಿತ ಮತ್ತು ಸ್ವಾವಲಂಬಿ ಮಾಪನ ಪರಿಶೀಲನಾ ವ್ಯವಸ್ಥೆಯನ್ನು ನಿರ್ಮಿಸುವ ಬದ್ಧತೆಯನ್ನು ಇಲಾಖೆ ಪುನರುಚ್ಚರಿಸುತ್ತದೆ.

 

*****

 

(ಪ್ರಕಟಣೆ ಐ.ಡಿ.: 2310691) ವಿಸಿಟರ್ ಕೌಂಟರ್ : 13