దేశ గొప్ప వస్త్ర వారసత్వం, సంప్రదాయ హస్తకళ, సమకాలీన డిజైన్‌లతో సమ్మేళనంగా రూపొందించిన డిజైనర్ ఉత్పత్తులను ప్రదర్శిస్తున్న ‘డిజైనర్ అటెలియర్’ ప్రదర్శన-విక్రయ కార్యక్రమం 2026 సెప్టెంబర్ 12 నుంచి అక్టోబర్ 1 వరకు న్యూఢిల్లీలోని జనపథ్‌లో ఉన్న జవహర్ వ్యాపార్ భవన్‌లోని సెంట్రల్ కాటేజ్ ఇండస్ట్రీస్ ఎంపోరియంలో జరుగుతోంది. ఈ ప్రదర్శన ఉదయం 10:00 గంటల నుంచి సాయంత్రం 7:00 గంటల వరకు సందర్శకులకు అందుబాటులో ఉంటుంది.

 

కేంద్ర జౌళి మంత్రిత్వ శాఖ డీడీజీ (వస్త్ర), సెంట్రల్ కాటేజ్ ఇండస్ట్రీస్ కార్పొరేషన్ (సీసీఐసీ) చైర్మన్ శ్రీ అఖిలేష్ కుమార్, సీసీఐసీ మేనేజింగ్ డైరెక్టర్ శ్రీ బిమల్ గోపాలాచారి నేడు సంయుక్తంగా ప్రదర్శనను ప్రారంభించారు. ఈ కార్యక్రమంలో ఉన్నతాధికారులు, ఇతర ప్రముఖులు పాల్గొన్నారు.

 

భారతదేశ గొప్ప వస్త్ర వారసత్వాన్ని ప్రోత్సహించడం, దేశంలోని విభిన్న హస్తకళా సంప్రదాయాలు, సాంస్కృతిక విలువలకు ప్రతీకగా నిలిచే అసలైన చేనేత, చేతితో నేసిన ఉత్పత్తుల వినియోగాన్ని ప్రోత్సహించడం ‘డిజైనర్ అటెలియర్’ ప్రధాన లక్ష్యం. అలాగే, కళాకారులు, చేనేత కార్మికులు తమ కళాకృతులను విస్తృత వేదికపై ప్రదర్శించడంతో పాటు వినియోగదారులతో నేరుగా అనుసంధానం కావడానికి ఇది అవకాశం కల్పిస్తుంది.

 

ఈ ప్రదర్శనలో సంప్రదాయ పద్ధతులు, దేశీయ హస్తకళ, సమకాలీన డిజైన్‌లను ఒకచోట చేర్చారు. ఇందులో సంక్లిష్టమైన చేనేత వస్త్రాలు, సంప్రదాయ ప్రింట్లు, ఆధునిక ఆకృతులు, డిజైనర్ కలెక్షన్లు ప్రదర్శిస్తున్నారు. సంప్రదాయ, సమకాలీన ఫ్యాషన్‌ ప్రియులు ఇద్దరికీ విభిన్న రకాల ఉత్పత్తులను ఇది అందిస్తోంది.

 

పండుగలు, రాబోయే వివాహ సీజన్ నేపథ్యంలో సందర్శకులు ప్రత్యేకమైన భారతీయ వస్త్రాలు, చేతితో తయారు చేసిన ఫ్యాషన్ ఉత్పత్తులను అన్వేషించేందుకు ఈ ప్రదర్శన మంచి అవకాశాన్ని కల్పిస్తోంది. అదే సమయంలో దేశంలోని చేనేత కార్మికులు, కళాకారులు, హస్తకళా సమాజాలకు మద్దతు అందించేందుకు కూడా ఇది దోహదపడుతుంది.

 

***

(రిలీజ్ ఐడి: 2309613) సందర్శకుల సూచీ సంఖ్య : : 5