કેન્દ્રીય ઊર્જા તથા આવાસ અને શહેરી બાબતોના મંત્રી શ્રી મનોહર લાલ 14-16 સપ્ટેમ્બર 2026 દરમિયાન યુનાઇટેડ સ્ટેટ્સ ઓફ અમેરિકાના હ્યુસ્ટન ખાતે યોજાનારી G20 ઊર્જા મંત્રીઓની બેઠકમાં ભાગ લેશે. અમેરિકાના G20 અધ્યક્ષતા હેઠળ આયોજિત આ બેઠક, વૈશ્વિક ઊર્જા સુરક્ષા, પોષણક્ષમતા, ઈન્ફ્રાસ્ટ્રક્ચર વિકાસ અને સ્થિતિસ્થાપક ઊર્જા સપ્લાય ચેઇનને લગતા મહત્વના મુદ્દાઓ પર વિચાર-વિમર્શ કરવા માટે G20 સભ્યોના ઊર્જા મંત્રીઓ અને વરિષ્ઠ પ્રતિનિધિઓને એકસાથે લાવશે.

મંત્રીશ્રી ત્રણ મુખ્ય સ્તંભો - "ઊર્જા સુરક્ષા અને પરવડે તેવા બેઝલોડ," "પરવાનગી અને નિયમનકારી કાર્યક્ષમતા," અને "ક્રિટિકલ મિનરલ્સ અને સ્થિતિસ્થાપક સપ્લાય ચેઇન્સ" હેઠળના મંત્રી સ્તરના સત્રોમાં ભાગ લેશે. આ ચર્ચા ઊર્જા સુરક્ષા અને પરવડે તેવી ઊર્જાને મજબૂત કરવા, કાર્યક્ષમ નિયામક માળખા દ્વારા ઊર્જા ઈન્ફ્રાસ્ટ્રક્ચરના સમયસર વિકાસને સુગમ બનાવવા અને સુરક્ષિત, સ્થિતિસ્થાપક અને વૈવિધ્યસભર ક્રિટિકલ-મિનરલ સપ્લાય ચેઇન બનાવવા પર કેન્દ્રિત રહેશે.

બેઠક દરમિયાન શ્રી મનોહર લાલ ભારતની ઝડપથી વધતી ઊર્જા જરૂરિયાતોને પૂરી કરવા માટે સક્ષમ સ્થિતિસ્થાપક અને ભવિષ્ય માટે તૈયાર ઊર્જા પ્રણાલીના નિર્માણ તરફ ભારતના અભિગમને રેખાંકિત કરવાનો પ્રયાસ કરશે, સાથે જ સંસ્થાકીય અને નીતિગત સુધારાઓ દ્વારા પરવાનગી અને નિયમનકારી કાર્યક્ષમતા વધારવામાં ભારતના અનુભવને શેર કરશે. તેમજ, ક્રિટિકલ મિનરલ્સના વૈવિધ્યકરણ, સર્ક્યુલેરિટી અને સમગ્ર વેલ્યુ ચેઇનને મજબૂત કરવા પર ભારતના ફોકસને પ્રકાશિત કરશે.

મંત્રીશ્રીની ભાગીદારી ઉભરતા વૈશ્વિક ઊર્જા પડકારોને પહોંચી વળવામાં રચનાત્મક આંતરરાષ્ટ્રીય જોડાણ અને સામૂહિક કાર્યવાહી પ્રત્યે ભારતની પ્રતિબદ્ધતાને પુનઃપુષ્ટ કરશે. ભારત વ્યવહારુ, સર્વસમાવેશક અને ટેકનોલોજી-તટસ્થ અભિગમોની સતત હિમાયત કરશે,  જે વિવિધ રાષ્ટ્રીય પરિસ્થિતિઓનો આદર કરે છે અને તમામ માટે સુરક્ષિત, પોષણક્ષમ, વિશ્વસનીય, સ્થિતિસ્થાપક અને ટકાઉ ઊર્જા પ્રણાલીઓને આગળ ધપાવે છે.

SM/BS/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad