مرکزی وزیر برائے جل شکتی جناب سی آر پاٹل نے آج محکمہ آبی وسائل، ندیوں کی ترقی اور گنگا کی بحالی کی ایک جائزہ میٹنگ کی صدارت کی تاکہ محکمے اور اس کے مختلف ونگز اور تنظیموں کے ذریعے شروع کیے جانے والے پروجیکٹوں، پروگراموں، اسکیموں اور اقدامات کی مجموعی پیش رفت کا جائزہ لیا جاسکے۔

میٹنگ کے دوران، قومی مشن برائے صاف گنگا ، سنٹرل واٹر کمیشن ، سینٹرل گراؤنڈ واٹر بورڈ اور ریاستی پروجیکٹس نے اپنے جاری منصوبوں اور سرگرمیوں کے بارے میں تفصیلی پریزنٹیشن دی۔

بات چیت میں جاری منصوبوں کی صورتحال، عمل درآمد سے متعلق چیلنجز، کام کے معیار اور ان کی رفتار اور تاثیر کو بہتر بنانے کے لیے درکار اقدامات پر توجہ مرکوز کی گئی۔ تیزی سے عمل آوری کی ضرورت پر زور دیتے ہوئے مرکزی وزیر نے ہدایت دی کہ پروجیکٹوں کی پیش رفت کو متاثر کرنے والی رکاوٹوں کی نشاندہی کی جائے اور ان کو تیزی سے حل کیا جائے تاکہ پروجیکٹوں کی بروقت تکمیل کو یقینی بنایا جاسکے۔ مرکزی وزیر نے مزید زور دیا کہ جاری پروجیکٹوں کی بروقت تکمیل سے نہ صرف لاگت میں اضافے سے بچا جا سکے گا بلکہ عوام کو بروقت مطلوبہ فوائد بھی فراہم ہوں گے۔

مرکزی وزیر نے تفصیلی پروجیکٹ رپورٹس (ڈی پی آر) تیار کرنے کے لیے محکمہ اور اس کے ونگز اور تنظیموں کے موجودہ رہنما خطوط کو ہموار کرنے پر زور دیا تاکہ زمین پر پروجیکٹ کے نفاذ کے لیے اسے مزید موثر بنایا جا سکے۔ انہوں نے ہائیڈروولوجیکل ماڈرنائزیشن، ڈی پی آرز بنانے، سیلاب کی پیش گوئی اور زمینی پانی کے انتظام وغیرہ کے لیے جدید ترین ٹیکنالوجی کے استعمال پر بھی زور دیا۔

انہوں نے مرکز اور ریاستوں کے درمیان مضبوط تال میل کی اہمیت کو اجاگر کرتے ہوئے زیر التواء مسائل کے حل میں آسانی پیدا کرنے اور پروجیکٹوں کی آسانی سے عمل آوری کو یقینی بنانے کے لیے قریبی مشغولیت پر زور دیا۔

انہوں نے محکمہ کے سینئر افسران اور متعلقہ ونگز اور تنظیموں کے سربراہان پر زور دیا کہ وہ جائزے کے دوران کیے گئے فیصلوں پر موثر فالو اپ کو یقینی بنائیں اور مقررہ ٹائم لائنز کے اندر مطلوبہ نتائج حاصل کرنے پر توجہ مرکوز کرتے ہوئے عملدرآمد کی کڑی نگرانی کریں۔

***

(ش ح۔اص)

UR No 3292

 

(ریلیز آئی ڈی: 2308916) وزیٹر کاؤنٹر : 10