કેન્દ્રીય જળ શક્તિ મંત્રી શ્રી સી. આર. પાટીલે આજે વિભાગ અને તેની વિવિધ પાંખો તથા સંસ્થાઓ દ્વારા હાથ ધરવામાં આવેલા પ્રોજેક્ટ્સ, કાર્યક્રમો, યોજનાઓ અને પહેલોની એકંદર પ્રગતિનું મૂલ્યાંકન કરવા માટે જળ સંસાધન, નદી વિકાસ અને ગંગા સંરક્ષણ વિભાગની સમીક્ષા બેઠકની અધ્યક્ષતા કરી હતી.

બેઠક દરમિયાન, નેશનલ મિશન ફોર ક્લીન ગંગા (NMCG), સેન્ટ્રલ વોટર કમિશન (CWC), સેન્ટ્રલ ગ્રાઉન્ડ વોટર બોર્ડ (CGWB) અને સ્ટેટ પ્રોજેક્ટ્સ (SPR) એ તેમના ચાલી રહેલા પ્રોજેક્ટ્સ અને પ્રવૃત્તિઓ પર વિગતવાર પ્રેઝન્ટેશન આપ્યું હતું.

ચાલી રહેલા પ્રોજેક્ટ્સની સ્થિતિ, અમલીકરણ સંબંધિત પડકારો, કામોની ગુણવત્તા અને તેમની ગતિ તેમજ અસરોમાં સુધારો કરવા માટે જરૂરી પગલાં પર ચર્ચા કેન્દ્રિત કરવામાં આવી હતી. ઝડપી અમલીકરણની જરૂરિયાત પર ભાર મૂકતા, કેન્દ્રીય મંત્રીએ નિર્દેશ આપ્યો હતો કે પ્રોજેક્ટ્સની પ્રગતિને અસર કરતી અડચણોને તાકીદે ઓળખીને તેનો ઝડપથી ઉકેલ લાવવામાં આવે જેથી પ્રોજેક્ટ્સ સમયસર પૂરા થાય તે સુનિશ્ચિત કરી શકાય. કેન્દ્રીય મંત્રીએ વધુમાં ભારપૂર્વક જણાવ્યું હતું કે ચાલી રહેલા પ્રોજેક્ટ્સ સમયસર પૂરા થવાથી માત્ર ખર્ચમાં થતો વધારો અટકશે એટલું જ નહીં પરંતુ જનતાને સમયસર ઇચ્છિત લાભો પણ મળશે.

કેન્દ્રીય મંત્રીએ વિગતવાર પ્રોજેક્ટ અહેવાલો (DPRs) તૈયાર કરવા માટે વિભાગ અને તેની પાંખો તથા સંસ્થાઓની હાલની માર્ગદર્શિકાઓને વધુ સરળ બનાવવા પર ભાર મૂક્યો હતો જેથી તેને જમીની સ્તરે પ્રોજેક્ટના અમલીકરણ માટે વધુ અસરકારક બનાવી શકાય. તેમણે હાઇડ્રોલોજિકલ આધુનિકીકરણ, ડીપીઆર બનાવવામાં, પૂરની આગાહી અને ભૂગર્ભ જળ વ્યવસ્થાપન વગેરે માટે અત્યાધુનિક ટેકનોલોજીના ઉપયોગ પર પણ ભાર મૂક્યો હતો.

તેમણે કેન્દ્ર અને રાજ્યો વચ્ચે વધુ મજબૂત સંકલનના મહત્વ પર પ્રકાશ પાડ્યો હતો, અને પેન્ડિંગ મુદ્દાઓના ઉકેલ લાવવા તથા પ્રોજેક્ટ્સનું સરળ અમલીકરણ સુનિશ્ચિત કરવા અર્થે વધુ નજીકના જોડાણ માટે હાકલ કરી હતી.

તેમણે વિભાગના વરિષ્ઠ અધિકારીઓ અને સંબંધિત પાંખો તેમજ સંસ્થાઓના વડાઓને સમીક્ષા દરમિયાન લેવાયેલા નિર્ણયો પર અસરકારક ફોલો-અપ સુનિશ્ચિત કરવા અને નિયત સમયમર્યાદામાં ઇચ્છિત પરિણામો પ્રાપ્ત કરવા પર ધ્યાન કેન્દ્રિત કરીને અમલીકરણની નજીકથી દેખરેખ રાખવા આહ્વાન કર્યું હતું.

 

SM/IJ/JD

(રીલીઝ આઈડી: 2308910) મુલાકાતી સંખ્યા : 9