వినియోగదారు వ్యవహారాలు, ఆహారం, ప్రజా పంపిణీ మంత్రిత్వశాఖ

చెన్నైలోని అంబత్తూరులోని ఒక ఆభరణాల దుకాణంలో 2026 సెప్టెంబర్ 1న నిర్వహించిన సోదాలు, జప్తు తనిఖీల్లో 803.99 గ్రాముల హాల్‌మార్క్ లేని బంగారు ఆభరణాలను చెన్నైలోని భారతీయ ప్రమాణాల సంస్థ (బీఐఎస్) కార్యాలయం స్వాధీనం చేసుకుంది. వాణిజ్య విక్రయం కోసం హాల్‌మార్క్ లేని బంగారు ఆభరణాలను ప్రదర్శనకు ఉంచినట్లు గుర్తించిన అధికారులు భారతీయ ప్రమాణాల సంస్థ చట్టం-2016లోని సెక్షన్ 28 ప్రకారం ఈ చర్యలు తీసుకున్నారు. 

స్వాధీనం చేసుకున్న ఆభరణాలలో 671.50 గ్రాముల 175 మంగళసూత్రాలు (తాళిబొట్లు), 25.02 గ్రాముల 12 పిల్లల గాజులు, 86.14 గ్రాముల 40 చెవిపోగులు, 21.33 గ్రాముల బరువున్న 10 లాకెట్లు ఉన్నాయి.

అవసరమైన హాల్‌మార్కింగ్ లేకుండా వివిధ డిజైన్లు, రకాల ఆభరణాలను విక్రయానికి ఉంచినట్లు బీఐఎస్ ఎన్‌ఫోర్స్‌మెంట్ బృందం గుర్తించింది. భారతీయ ప్రమాణాల సంస్థ చట్టం- 2016 నిబంధనల ప్రకారం ఈ నగలను జప్తు చేశారు. సమగ్ర విచారణ, తదుపరి చట్టపరమైన చర్యల నిమిత్తం వీటిని స్వాధీనం చేసుకున్నారు.

స్థానిక పోలీసుల సహకారంతో బీఐఎస్ చెన్నై కార్యాలయం అధికారులు, సహాయక సిబ్బంది ఈ తనిఖీలను నిర్వహించారు.

మార్కెట్ నిఘాను పెంచిన బీఐఎస్: వినియోగదారుల రక్షణే ధ్యేయం

తప్పనిసరి బీఐఎస్ ధ్రువీకరణ, హాల్‌మార్కింగ్ నిబంధనల పరిధిలోకి వచ్చే ఉత్పత్తులు నిర్దేశిత ప్రమాణాలకు అనుగుణంగా ఉండేలా చూసేందుకు బీఐఎస్ క్రమం తప్పకుండా మార్కెట్ నిఘా, తదనంతర చర్యలు తీసుకుంటున్నట్లు బీఐఎస్ చెన్నై కార్యాలయ ప్రధానాధికారి శ్రీ ఎస్. డీ. దయానంద్ తెలిపారు.

నాణ్యత లేని ఉత్పత్తుల విక్రయాలను అరికట్టడానికి, బీఐఎస్ స్టాండర్డ్ మార్క్- హాల్‌మార్క్ దుర్వినియోగాన్ని అడ్డుకోవడానికి, ధ్రువీకరణ-  హాల్‌మార్కింగ్ వ్యవస్థపై వినియోగదారుల విశ్వాసాన్ని కాపాడటానికి ఎన్‌ఫోర్స్‌మెంట్ చర్యలు ఎంతో ముఖ్యమైనవని ఆయన పేర్కొన్నారు.

అమూల్యమైన లోహ వస్తువుల స్వచ్ఛత లేదా నాణ్యతకు హాల్‌మార్కింగ్ అధికారిక గ్యారంటీని ఇస్తుందని బీఐఎస్ పేర్కొంది. ప్రస్తుత హాల్‌మార్కింగ్ వ్యవస్థ ప్రకారం హాల్‌మార్క్ చేసిన బంగారు ఆభరణాలపై బీఐఎస్ లోగో, స్వచ్ఛత, ఆరు అంకెల హాల్‌మార్క్ యునీక్ ఐడెంటిఫికేషన్ (హెచ్‌యూఐడీ) నంబర్ ఉంటాయి. హాల్‌మార్క్ చేసిన ఆభరణాల హెచ్‌యూఐడీ నిర్ధారించుకోవడానికి వినియోగదారులు 'బీఐఎస్ కేర్' యాప్‌ను కూడా ఉపయోగించొచ్చు.

చట్టపరమైన చర్యలు ప్రారంభం

భారతీయ ప్రమాణాల సంస్థ చట్టం- 2016 ప్రకారం సంబంధిత వ్యక్తులపై తగిన చట్టపరమైన చర్యలు ప్రారంభించారు.

మరింత సమాచారం కోసం:

• తప్పనిసరి హాల్‌మార్కింగ్ ఉత్తర్వు – అధికారిక బీఐఎస్ పేజీ

• బీఐఎస్ హాల్‌మార్కింగ్ ఎఫ్ఏక్యూలు – అధికారిక బీఐఎస్ సమాచారం

• నగల వ్యాపారులకు సంబంధించిన బీఐఎస్ సమాచారం – నమోదు, తప్పనిసరి హాల్‌మార్కింగ్, మినహాయింపులు

****