ریلوے کے مرکزی وزیر جناب اشونی ویشنو، تجارت وصنعت کے مرکزی وزیر جناب پیوش گوئل اور مہاراشٹر کے نائب وزیرِ اعلیٰ جناب ایکناتھ شندے نے دیگر معززین کے ہمراہ آج چھترپتی شیواجی مہاراج ٹرمینس(سی ایس ایم ٹی)اور ساؤنت واڑی روڈ کے درمیان نئی ٹرین سروس کی افتتاحی روانگی کو ہری جھنڈی دکھائی۔ یہ اقدام ممبئی اور کونکن خطے کے درمیان براہِ راست ریل رابطے کو مزید مضبوط بنانے کی سمت ایک اہم قدم ہے۔

نئی ٹرین سروس ممبئی اور کونکن خطے کے کئی اہم شہروں کے درمیان تقریباً 510 کلومیٹر کا فاصلہ طے کرتے ہوئے ایک اہم براہِ راست ریل رابطہ فراہم کرے گی۔ راستے میں متعدد اسٹیشنوں پر اس کے ٹھہرنےکے باعث رائے گڑھ، رتناگیری اور سندھودرگ اضلاع سے آنے جانے والے مسافروں کو خاص طور پر فائدہ ہوگا۔

مرکزی وزیرِ ریلوے جناب اشونی ویشنو نے کہا کہ نئی ٹرین سروس ممبئی اور کونکن کے عوام کے دیرینہ مطالبے کو پورا کرے گی۔ انہوں نے بتایا کہ اس سال تہوار کے دوران مسافروں کی آمدورفت میں سہولت کے لیے 350 خصوصی ٹرینیں چلائی جا رہی ہیں۔ انہوں نے مزید کہا کہ ضرورت پڑنے پر خصوصی ٹرینوں کی تعداد بڑھا کر 370 کرنے کے انتظامات بھی کیے گئے ہیں۔

 تجارت وصنعت کے مرکزی وزیر جناب پیوش گوئل نے کہا کہ چھترپتی شیواجی مہاراج ٹرمینس اور ساؤنت واڑی کے درمیان روزانہ نئی ٹرین سروس کا آغاز مہاراشٹر کے عوام، خصوصاً آئندہ گنیش اتسو کے موقع پر، کے لیے بے حد خوشی کا باعث ہے۔ جناب گوئل نے کہا کہ یہ محض ایک اور ٹرین سروس کا آغاز نہیں بلکہ کونکن خطے کی ترقی کے سفر میں ایک اہم سنگ میل ہے۔ انہوں نے زور دیا کہ نئی سروس ممبئی اور کونکن کے درمیان محفوظ، تیز رفتار اور قابلِ اعتماد سفر کی سہولت فراہم کرکے لاکھوں خاندانوں کو ایک دوسرے سے جوڑنے میں مدد فراہم کرے گی۔

جناب گوئل نے مزید کہا کہ اس روٹ پر مال برداری میں اضافے کے ساتھ ماہی گیر اور دیگر مقامی پیداوار کنندگان اپنی اشیا زیادہ تیزی سے ممبئی پہنچا سکیں گے۔ انہوں نے کہا کہ بہتر ریل رابطے سے کونکن میں روزگار کے مزید مواقع پیدا ہوں گے اور نوجوانوں کو روزگار کی تلاش میں نقل مکانی کرنے کی ضرورت کم ہوگی۔

انہوں نے طلبہ، ملازمین اور خاندانوں کے لیے بھی اس سروس کے فوائد کا ذکر کیا۔ جناب گوئل نے کہا کہ کونکن کے وہ لوگ جو ممبئی میں تعلیم حاصل کرتے یا ملازمت کرتے ہیں، اپنے خاندانوں سے زیادہ قریبی تعلق برقرار رکھ سکیں گے اور زیادہ سہولت کے ساتھ سفر کر سکیں گے۔ انہوں نے مزید کہا کہ بہتر ریل رابطے کے ذریعے ممبئی میں اعلیٰ تعلیم کے مواقع اور صحت کی بہتر سہولیات کونکن کے لوگوں کے لیے زیادہ آسانی سے قابلِ رسائی ہوں گی۔

مہاراشٹر کے نائب وزیرِ اعلیٰ جناب ایکناتھ شندے نے کہا کہ نئی ٹرین سروس کونکن کے عوام، نقل مکانی کرنے والے مزدوروں اور گنیش اتسو کے دوران اپنے آبائی علاقوں کا سفر کرنے والے عقیدت مندوں کے لیے ایک بڑا تحفہ ہے۔

جناب شندے نے ریلوے کے شعبے میں کئی اہم کامیابیوں کا ذکر کیا، جن میں ممبئی-احمد آباد بلٹ ٹرین منصوبہ، وندے بھارت ٹرینیں اور ملک بھر میں ریلوے نیٹ ورک کی توسیع شامل ہیں۔ انہوں نے خاص طور پر 741 کلومیٹر طویل کونکن ریلوے روٹ کی ریکارڈ مدت میں بجلی کاری کی تکمیل کو نمایاں کیا۔ انہوں نے کہا کہ اس اقدام سے زیادہ ماحول دوست سفر ممکن ہوا ہے اور ٹرینوں کی رفتار میں بھی اضافہ ہوا ہے۔

مسافروں کے لیے موزوں اوقات:

ٹرین سی ایس ایم ٹی سے رات 23:55 بجے روانہ ہوگی اور اگلے روز 14:15 بجے ساؤنت واڑی روڈ پہنچے گی۔ واپسی کے سفر میں ٹرین ساؤنت واڑی روڈ سے 17:20 بجے روانہ ہوگی اور اگلی صبح 06:40 بجے سی ایس ایم ٹی پہنچے گی۔ ان موزوں اوقات کی بدولت مسافر ممبئی سے کونکن کے لیے رات بھر کا سفر کر سکیں گے اور صبح سویرے ممبئی واپس پہنچ سکیں گے۔

یہ ٹرین روزانہ ٹرین نمبر 15087 چھترپتی شیواجی مہاراج ٹرمینس-ساؤنت واڑی روڈ ایکسپریس اور ٹرین نمبر 15088 ساؤنت واڑی روڈ-چھترپتی شیواجی مہاراج ٹرمینس ایکسپریس کے طور پر چلائی جائے گی۔

کونکن بھر میں وسیع ریل رابطہ:

اس ٹرین سروس کے راستے میں کئی اہم اسٹیشنوں پر ٹرین رکے گی، جن میں درج ذیل  شامل ہیں:

• دادر
• تھانے
• پنویل
• پین
• روہا
• مانگاؤں
• ویر
• کھیڈ
• چپلون
• ساورڈا
• اراولی روڈ
• سنگمیشور روڈ
• رتناگیری
• اڈاولی
• ولاواڈے
• راجاپور روڈ
• وائبھاو واڑی روڈ
• ناندگاؤں
• کنکاولی
• سندھودرگ
• کڈال
• ساؤنت واڑی روڈ

اس وسیع اسٹاپیج نیٹ ورک کے باعث مسافر صرف ساؤنت واڑی ہی نہیں بلکہ کونکن خطے کے بڑی تعداد میں اہم شہروں اور علاقوں تک آسانی سے پہنچ سکیں گے۔

سیاحت اور علاقائی ترقی کو فروغ

نئی ٹرین سروس سے کونکن خطے میں سیاحت کو مزید فروغ ملنے کی توقع ہے، کیونکہ اس کے ذریعے رتناگیری، سندھودرگ، کنکاولی، کڈال اور ساؤنت واڑی کے سیاحتی مقامات تک ریل کے ذریعے رسائی بہتر ہوگی۔ بہتر رابطے سے سیاحوں کے لیے سفر آسان ہوگا اور مقامی سیاحت سے وابستہ کاروبار اور خدمات کے لیے بھی مزید مواقع پیدا ہوں گے۔

یہ سروس طلبہ، ملازمین، تاجروں، خاندانوں اور دیگر باقاعدہ مسافروں کے لیے بھی ممبئی اور کونکن کے درمیان سفر کا ایک اضافی قابلِ اعتماد ذریعہ فراہم کرے گی۔ لوگوں کی بہتر آمدورفت سے ممبئی اور اس خطے کے درمیان معاشی روابط مضبوط ہوں گے اور مقامی اقتصادی سرگرمیوں کو فروغ ملے گا۔

توقع ہے کہ تہواروں، تعطیلات اور سیاحتی موسم کے دوران، جب ممبئی اور کونکن کے درمیان مسافروں کی طلب میں نمایاں اضافہ ہوتا ہے، یہ ٹرین اضافی سفری گنجائش فراہم کرے گی۔ اس سروس میں ایل ایچ بی ریک استعمال کیا جائے گا، جس میں مسافروں کے لیے جدید اور آرام دہ کوچز ہوں گے۔

ممبئی کی گنجائش اور مہاراشٹر کے ریل رابطے کو بہتر بنانے والے بڑے منصوبے

ممبئی کے مضافاتی ریلوے نیٹ ورک کے بارے میں بات کرتے ہوئے جناب ویشنو نے کہا کہ گنجائش بڑھانے اور مسافروں کی خدمات بہتر بنانے کے لیے کئی بڑے منصوبوں پر کام جاری ہے۔ انہوں نے بتایا کہ ممبئی میں اس وقت تقریباً 18,000 کروڑ روپے کی لاگت کے منصوبے زیرِ تعمیر ہیں۔

جناب ویشنو نے وضاحت کی کہ ریلوے مرحلہ وار ان پلیٹ فارمز کو توسیع دے رہا ہے جو 12 کوچ والی ٹرینوں کے لیے بنائے گئے ہیں، تاکہ ان پر 15 کوچ والی ٹرینیں بھی چلائی جا سکیں۔ انہوں نے کہا کہ کئی مقامات پر یہ کام پہلے ہی مکمل کیا جا چکا ہے۔ ان اقدامات سے مضافاتی ریلوے نظام کی گنجائش میں نمایاں اضافہ ہوگا اور ممبئی کے شہریوں کی روزمرہ زندگی مزید آسان ہوگی۔

جناب ویشنو نے مزید بتایا کہ ممبئی کے مضافاتی ریلوے نیٹ ورک کی گنجائش اور کارکردگی کو مزید بہتر بنانے کے لیے موجودہ سگنلنگ نظام کو جدید سگنلنگ نظام میں تبدیل کیا جا رہا ہے۔

وزیرِ ریلوے نے کہا کہ ممبئی کی ضروریات کو بروقت پورا کرنے کے لیے 238 نئی اے سی لوکل ٹرینوں کے ریک بھی منظور کیے گئے ہیں۔ انہوں نے اعلان کیا کہ پہلی اے سی لوکل ٹرین کی فراہمی 2027 سے شروع ہوگی۔ جناب ویشنو نے کہا کہ اس سے ممبئی کا مضافاتی ریلوے نظام نئی نسل کی ایئر کنڈیشنڈ لوکل ٹرینوں، زیادہ گنجائش اور مسافروں کے بہتر آرام کے ساتھ ایک نئے دور میں داخل ہوگا۔

وقف شدہ مال بردار راہداریوں کا ذکر کرتے ہوئے جناب ویشنو نے کہا کہ ایسٹرن اور ویسٹرن ڈیڈیکیٹڈ فریٹ کوریڈورز ملک کے لیے ایک بڑی طاقت ہیں۔ انہوں نے بتایا کہ دونوں مال بردار راہداریاں اب 100 فیصد مکمل ہو چکی ہیں۔

جناب ویشنو نے مرکزی بجٹ میں اعلان کردہ نئی ایسٹ-ویسٹ ڈیڈیکیٹڈ فریٹ کوریڈور کا بھی ذکر کیا۔ انہوں نے کہا کہ ریلوے محکمہ دانکونی سے سورت تک نئی راہداری کا نقشہ اس طرح تیار کر رہا ہے کہ ودربھ، مراٹھواڑہ اور مغربی مہاراشٹر کے کئی علاقوں کو ریل رابطہ فراہم کیا جا سکے۔ اس کے ساتھ یہ راہداری وردھا اور ناسک کی بندرگاہ تک بھی رابطہ فراہم کرے گی، جس سے مہاراشٹر میں صنعتی اور دیہی ترقی کے لیے ایک مضبوط نیٹ ورک قائم ہوگا۔

ممبئی-احمد آباد ہائی اسپیڈ ریل منصوبے کے بارے میں جناب ویشنو نے کہا کہ اس پر تیزی سے کام جاری ہے۔ انہوں نے زیرِ سمندر ریل سرنگ کی تعمیر کو اجاگر کیا،   جو       بی کے سی اور تھانے کو آپس میں جوڑے گی۔ اس سرنگ کی تعمیر کے لیے دو ٹنل بورنگ مشینیں، ایک وکھرولی اور دوسری گھانسولی سے، اس وقت کام کر رہی ہیں۔

اس موقع پر مہاراشٹر قانون ساز اسمبلی کے اسپیکر راہل نارویکر، حکومتِ مہاراشٹر میں بندرگاہوں کی ترقی اور ماہی پروری کے وزیر نتیش رانے اور ممبئی کی میئر ریتو تاؤڈے سمیت دیگر معزز شخصیات بھی موجود تھیں۔

****

(ش ح ۔ م م ع ۔م ذ)

U.No: 2996