ಕೇಂದ್ರ ರೈಲ್ವೆ ಸಚಿವರಾದ ಶ್ರೀ ಅಶ್ವಿನಿ ವೈಷ್ಣವ್, ಕೇಂದ್ರ ವಾಣಿಜ್ಯ ಮತ್ತು ಉದ್ಯಮ ಸಚಿವರಾದ ಶ್ರೀ ಪಿಯೂಷ್ ಗೋಯಲ್, ಮಹಾರಾಷ್ಟ್ರದ ಉಪಮುಖ್ಯಮಂತ್ರಿ ಶ್ರೀ ಏಕನಾಥ್ ಶಿಂಧೆ ಅವರು ಇತರ ಗಣ್ಯರೊಂದಿಗೆ ಸೇರಿ ಛತ್ರಪತಿ ಶಿವಾಜಿ ಮಹಾರಾಜ್ ಟರ್ಮಿನಸ್ (CSMT) ಮತ್ತು ಸಾವಂತ್‌ವಾಡಿ ರಸ್ತೆ ನಡುವಿನ ಹೊಸ ರೈಲಿನ ಉದ್ಘಾಟನಾ ಸೇವೆಗೆ ಇಂದು ಹಸಿರು ನಿಶಾನೆ ತೋರಿದರು. ಇದು ಮುಂಬೈ ಮತ್ತು ಕೊಂಕಣ ಪ್ರದೇಶದ ನಡುವೆ ನೇರ ರೈಲು ಸಂಪರ್ಕವನ್ನು ಬಲಪಡಿಸುವ ನಿಟ್ಟಿನಲ್ಲಿ ಪ್ರಮುಖ ಹೆಜ್ಜೆಯಾಗಿದೆ.

ಈ ಹೊಸ ರೈಲು ಸೇವೆಯು ಮುಂಬೈ ಮತ್ತು ಕೊಂಕಣ ಪ್ರದೇಶದಾದ್ಯಂತ ಇರುವ ಹಲವಾರು ಪ್ರಮುಖ ನಗರಗಳ ನಡುವೆ ಸುಮಾರು 510 ಕಿಮೀ ದೂರವನ್ನು ಕ್ರಮಿಸುವ ಮೂಲಕ ಪ್ರಮುಖ ನೇರ ರೈಲು ಸಂಪರ್ಕವನ್ನು ಒದಗಿಸುತ್ತದೆ. ನಿಲುಗಡೆಗಳ ವಿಶಾಲ ಜಾಲದೊಂದಿಗೆ, ಈ ಸೇವೆಯು ರಾಯಗಢ, ರತ್ನಗಿರಿ ಮತ್ತು ಸಿಂಧುದುರ್ಗ ಜಿಲ್ಲೆಗಳಿಗೆ ಪ್ರಯಾಣಿಸುವ ಹಾಗೂ ಅಲ್ಲಿಂದ ಬರುವ ಪ್ರಯಾಣಿಕರಿಗೆ ಅನುಕೂಲ ಮಾಡಿಕೊಡಲಿದೆ.

ಈ ಹೊಸ ಸೇವೆಯು ಮುಂಬೈ ಮತ್ತು ಕೊಂಕಣ ಜನರ ಬಹುದಿನಗಳ ಬೇಡಿಕೆಯನ್ನು ಈಡೇರಿಸಲಿದೆ ಎಂದು ರೈಲ್ವೆ ಸಚಿವರಾದ ಶ್ರೀ ಅಶ್ವಿನಿ ವೈಷ್ಣವ್ ಹೇಳಿದರು. ಹಬ್ಬದ ಸಮಯದಲ್ಲಿ ಪ್ರಯಾಣಿಕರ ಸಂಚಾರವನ್ನು ಸುಗಮಗೊಳಿಸಲು ಈ ವರ್ಷ 350 ವಿಶೇಷ ರೈಲುಗಳನ್ನು ಕಾರ್ಯಾಚರಣೆಗೊಳಿಸಲಾಗುತ್ತಿದೆ ಎಂಬ ವಿಷಯವನ್ನು ಅವರು ಉಲ್ಲೇಖಿಸಿದರು. ಅಗತ್ಯಬಿದ್ದರೆ ಈ ಸಂಖ್ಯೆಯನ್ನು 370 ರೈಲುಗಳಿಗೆ ಹೆಚ್ಚಿಸಲು ವ್ಯವಸ್ಥೆ ಮಾಡಲಾಗಿದೆ ಎಂದು ಕೂಡಾ ಅವರು ತಿಳಿಸಿದರು.

ಛತ್ರಪತಿ ಶಿವಾಜಿ ಮಹಾರಾಜ್ ಟರ್ಮಿನಸ್ ಮತ್ತು ಸಾವಂತ್‌ವಾಡಿ ನಡುವೆ ಹೊಸ ದೈನಂದಿನ ರೈಲು ಸೇವೆಯ ಪ್ರಾರಂಭವು ಮಹಾರಾಷ್ಟ್ರದ ಜನರಿಗೆ, ವಿಶೇಷವಾಗಿ ಮುಂಬರುವ ಗಣೇಶೋತ್ಸವದ ಸಮಯದಲ್ಲಿ ಅಪಾರ ಸಂತಸವನ್ನು ತಂದಿದೆ ಎಂದು ಕೇಂದ್ರ ಸಚಿವರಾದ ಶ್ರೀ ಪಿಯೂಷ್ ಗೋಯಲ್ ಹೇಳಿದರು. ಈ ಹೊಸ ಸೇವೆಯು ಕೇವಲ ಮತ್ತೊಂದು ರೈಲಿನ ಚಾಲನೆಯಲ್ಲ, ಬದಲಿಗೆ ಕೊಂಕಣ ಪ್ರದೇಶದ ಅಭಿವೃದ್ಧಿ ಪಯಣದಲ್ಲಿ ಒಂದು ಪ್ರಮುಖ ಮೈಲಿಗಲ್ಲು ಎಂದು ಶ್ರೀ ಗೋಯಲ್ ಎತ್ತಿಹಿಡಿದರು. ಈ ಹೊಸ ಸೇವೆಯು ಮುಂಬೈ ಮತ್ತು ಕೊಂಕಣ ನಡುವೆ ಸುರಕ್ಷಿತ, ವೇಗದ ಮತ್ತು ವಿಶ್ವಾಸಾರ್ಹ ಪ್ರಯಾಣವನ್ನು ಒದಗಿಸುವ ಮೂಲಕ ಲಕ್ಷಾಂತರ ಕುಟುಂಬಗಳನ್ನು ಸಂಪರ್ಕಿಸಲು ಸಹಾಯ ಮಾಡುತ್ತದೆ ಎಂದು ಶ್ರೀ ಗೋಯಲ್ ಒತ್ತಿಹೇಳಿದರು.

ಈ ಮಾರ್ಗದಲ್ಲಿ ಸರಕು ಸಾಗಣೆ ಹೆಚ್ಚಾದಂತೆ, ಮೀನುಗಾರರು ಮತ್ತು ಇತರ ಸ್ಥಳೀಯ ಉತ್ಪಾದಕರು ತಮ್ಮ ಸರಕುಗಳನ್ನು ಮುಂಬೈಗೆ ಹೆಚ್ಚು ವೇಗವಾಗಿ ಸಾಗಿಸಲು ಸಾಧ್ಯವಾಗುತ್ತದೆ ಎಂದೂ ಸಹ ಶ್ರೀ ಗೋಯಲ್ ಅವರು ಹೇಳಿದರು. ಸುಧಾರಿತ ಸಂಪರ್ಕವು ಕೊಂಕಣದಲ್ಲಿ ಉದ್ಯೋಗಾವಕಾಶಗಳನ್ನು ಸೃಷ್ಟಿಸುತ್ತದೆ ಮತ್ತು ಯುವಕರು ಕೆಲಸದ ಹುಡುಕಾಟದಲ್ಲಿ ವಲಸೆ ಹೋಗುವ ಅಗತ್ಯವನ್ನು ಕಡಿಮೆ ಮಾಡುತ್ತದೆ ಎಂದು ಅವರು ಒತ್ತಿಹೇಳಿದರು.

ವಿದ್ಯಾರ್ಥಿಗಳು, ಉದ್ಯೋಗಿಗಳು ಮತ್ತು ಕುಟುಂಬಗಳಿಗೆ ಸಿಗುವ ಪ್ರಯೋಜನಗಳ ಬಗ್ಗೆಯೂ ಅವರು ಒತ್ತಿ ಹೇಳಿದರು. ಮುಂಬೈನಲ್ಲಿ ಶಿಕ್ಷಣ ಪಡೆಯುತ್ತಿರುವ ಅಥವಾ ಕೆಲಸ ಮಾಡುತ್ತಿರುವ ಕೊಂಕಣ ಭಾಗದ ಜನರು ತಮ್ಮ ಕುಟುಂಬಗಳೊಂದಿಗೆ ನಿಕಟ ಸಂಪರ್ಕವನ್ನು ಇಟ್ಟುಕೊಳ್ಳಲು ಮತ್ತು ಹೆಚ್ಚು ಅನುಕೂಲಕರವಾಗಿ ಪ್ರಯಾಣಿಸಲು ಸಾಧ್ಯವಾಗುತ್ತದೆ ಎಂದು ಶ್ರೀ ಗೋಯಲ್ ಹೇಳಿದರು. ಸುಧಾರಿತ ರೈಲು ಸಂಪರ್ಕದ ಮೂಲಕ ಮುಂಬೈನ ಉನ್ನತ ಶಿಕ್ಷಣದ ಅವಕಾಶಗಳು ಮತ್ತು ಆರೋಗ್ಯ ಸೇವೆಗಳು ಕೊಂಕಣದ ಜನರಿಗೆ ಹೆಚ್ಚು ಸುಲಭವಾಗಿ ಸಿಗಲಿವೆ ಎಂದು ಅವರು ತಿಳಿಸಿದರು.

ಮಹಾರಾಷ್ಟ್ರದ ಉಪಮುಖ್ಯಮಂತ್ರಿ ಶ್ರೀ ಏಕನಾಥ್ ಶಿಂಧೆ ಮಾತನಾಡಿ, ಈ ಹೊಸ ಸೇವೆಯು ಕೊಂಕಣದ ಜನರಿಗೆ, ವಲಸೆ ಕಾರ್ಮಿಕರಿಗೆ ಮತ್ತು ಗಣೇಶೋತ್ಸವದ ಸಮಯದಲ್ಲಿ ತಮ್ಮ ಹುಟ್ಟೂರುಗಳಿಗೆ ಪ್ರಯಾಣಿಸುವ ಭಕ್ತರಿಗೆ ನೀಡಿದ ಪ್ರಮುಖ ಕೊಡುಗೆಯಾಗಿದೆ ಎಂದು ಹೇಳಿದರು.

ಮುಂಬೈ-ಅಹಮದಾಬಾದ್ ಬುಲೆಟ್ ರೈಲು ಯೋಜನೆ, ವಂದೇ ಭಾರತ್ ರೈಲುಗಳು ಮತ್ತು ದೇಶಾದ್ಯಂತ ರೈಲ್ವೆ ಜಾಲದ ವಿಸ್ತರಣೆ ಸೇರಿದಂತೆ ಹಲವು ಪ್ರಮುಖ ರೈಲ್ವೆ ಸಾಧನೆಗಳನ್ನು ಶ್ರೀ ಶಿಂಧೆ ಹೈಲೈಟ್ ಮಾಡಿದರು. 741 ಕಿಮೀ ಉದ್ದದ ಕೊಂಕಣ ರೈಲ್ವೆ ಮಾರ್ಗದ ವಿದ್ಯುದ್ದೀಕರಣವನ್ನು ದಾಖಲೆ ಸಮಯದಲ್ಲಿ ಪೂರ್ಣಗೊಳಿಸಿರುವುದನ್ನು ಅವರು ವಿಶೇಷವಾಗಿ ಉಲ್ಲೇಖಿಸಿದರು. ಈ ಉಪಕ್ರಮವು ಹೆಚ್ಚು ಪರಿಸರ ಸ್ನೇಹಿ ಪ್ರಯಾಣವನ್ನು ಸಕ್ರಿಯಗೊಳಿಸಿದೆ ಮತ್ತು ರೈಲುಗಳ ವೇಗವನ್ನು ಹೆಚ್ಚಿಸಿದೆ ಎಂದು ಅವರು ಹೇಳಿದರು.

ಪ್ರಯಾಣಿಕರಿಗೆ ಅನುಕೂಲಕರ ಸಮಯ

ಈ ರೈಲು ಸಿಎಸ್ಎಂಟಿ (CSMT) ಯಿಂದ ರಾತ್ರಿ 23:55 ಕ್ಕೆ ಹೊರಟು ಮರುದಿನ ಮಧ್ಯಾಹ್ನ 14:15ಕ್ಕೆ ಸಾವಂತ್‌ವಾಡಿ ರಸ್ತೆಯನ್ನು ತಲುಪಲಿದೆ. ತನ್ನ ಪ್ರಯಾಣದಲ್ಲಿ, ರೈಲು ಸಾವಂತ್‌ವಾಡಿ ರಸ್ತೆಯಿಂದ ಸಂಜೆ 17:20ಕ್ಕೆ ಹೊರಟು ಮರುದಿನ ಬೆಳಿಗ್ಗೆ 06:40ಕ್ಕೆ ಸಿಎಸ್ಎಂಟಿ ತಲುಪಲಿದೆ. ಈ ಅನುಕೂಲಕರ ಸಮಯವು ಪ್ರಯಾಣಿಕರಿಗೆ ಮುಂಬೈನಿಂದ ಕೊಂಕಣದತ್ತ ರಾತ್ರೋರಾತ್ರಿ ಪ್ರಯಾಣ ಬೆಳೆಸಲು ಮತ್ತು ಬೆಳಿಗ್ಗೆ ಬೇಗನೆ ಮುಂಬೈಗೆ ಹಿಂತಿರುಗಲು ಅನುವು ಮಾಡಿಕೊಡುತ್ತದೆ.

ಈ ರೈಲು ದಿನನಿತ್ಯ ರೈಲು ಸಂಖ್ಯೆ 15087 ಛತ್ರಪತಿ ಶಿವಾಜಿ ಮಹಾರಾಜ್ ಟರ್ಮಿನಸ್-ಸಾವಂತ್‌ವಾಡಿ ರಸ್ತೆ ಎಕ್ಸ್‌ಪ್ರೆಸ್ ಮತ್ತು ರೈಲು ಸಂಖ್ಯೆ 15088 ಸಾವಂತ್‌ವಾಡಿ ರಸ್ತೆ-ಛತ್ರಪತಿ ಶಿವಾಜಿ ಮಹಾರಾಜ್ ಟರ್ಮಿನಸ್ ಎಕ್ಸ್‌ಪ್ರೆಸ್ ಆಗಿ ಕಾರ್ಯಾಚರಣೆ ನಡೆಸಲಿದೆ.

ಕೊಂಕಣದಾದ್ಯಂತ ವ್ಯಾಪಕ ಸಂಪರ್ಕ

ಈ ಸೇವೆಯು ಸೇರಿದಂತೆ ಹಲವು ಪ್ರಮುಖ ನಿಲ್ದಾಣಗಳಲ್ಲಿ ನಿಲುಗಡೆಗಳನ್ನು ಹೊಂದಿರುತ್ತದೆ:

• ದಾದರ್

• ಥಾನೆ

• ಪನ್ವೇಲ್

• ಪೆನ್

• ರೋಹಾ

• ಮಾಂಗಾವ್

• ವೀರ್

• ಖೇಡ್

• ಚಿಪ್ಲೂಣ್

• ಸಾವರ್ದ

• ಅರಾವಳಿ ರಸ್ತೆ

• ಸಂಗಮೇಶ್ವರ ರಸ್ತೆ

• ರತ್ನಗಿರಿ

• ಅಡಾವಳಿ

• ವಿಲಾವಡೆ

• ರಾಜಾಪುರ ರಸ್ತೆ

• ವೈಭವವಾಡಿ ರಸ್ತೆ

• ನಂದಗಾವ್

• ಕಂಕವಲಿ

• ಸಿಂಧುದುರ್ಗ

• ಕುಡಾಲ್

• ಸಾವಂತ್‌ವಾಡಿ ರಸ್ತೆ

ಈ ವ್ಯಾಪಕ ನಿಲುಗಡೆ ಮಾದರಿಯು ಪ್ರಯಾಣಿಕರಿಗೆ ಸಾವಂತ್‌ವಾಡಿ ಮಾತ್ರವಲ್ಲದೆ ಕೊಂಕಣ ಪಟ್ಟಿಯಾದ್ಯಂತ ಇರುವ ಹೆಚ್ಚಿನ ಸಂಖ್ಯೆಯ ಪ್ರಮುಖ ನಗರಗಳು ಮತ್ತು ಪ್ರದೇಶಗಳನ್ನು ತಲುಪಲು ಅನುವು ಮಾಡಿಕೊಡುತ್ತದೆ.

ಪ್ರವಾಸೋದ್ಯಮ ಮತ್ತು ಪ್ರಾದೇಶಿಕ ಅಭಿವೃದ್ಧಿಗೆ ಉತ್ತೇಜನ

ರತ್ನಗಿರಿ, ಸಿಂಧುದುರ್ಗ, ಕಂಕವಲಿ, ಕುಡಾಲ್ ಮತ್ತು ಸಾವಂತ್‌ವಾಡಿಯ ಪ್ರವಾಸಿ ತಾಣಗಳಿಗೆ ರೈಲು ಸಂಪರ್ಕವನ್ನು ಸುಧಾರಿಸುವ ಮೂಲಕ ಈ ಹೊಸ ಸೇವೆಯು ಕೊಂಕಣ ಪ್ರದೇಶದ ಪ್ರವಾಸೋದ್ಯಮಕ್ಕೆ ಇನ್ನಷ್ಟು ಉತ್ತೇಜನ ನೀಡುವ ನಿರೀಕ್ಷೆಯಿದೆ. ಸುಧಾರಿತ ಸಂಪರ್ಕವು ಪ್ರವಾಸಿಗರ ಪ್ರಯಾಣವನ್ನು ಸುಗಮಗೊಳಿಸುತ್ತದೆ, ಜೊತೆಗೆ ಸ್ಥಳೀಯ ಪ್ರವಾಸೋದ್ಯಮ ಸಂಬಂಧಿತ ಉದ್ಯಮಗಳು ಮತ್ತು ಸೇವೆಗಳಿಗೆ ಹೆಚ್ಚಿನ ಅವಕಾಶಗಳನ್ನು ಸೃಷ್ಟಿಸುತ್ತದೆ.

ಈ ಸೇವೆಯು ಮುಂಬೈ ಮತ್ತು ಕೊಂಕಣ ನಡುವೆ ಹೆಚ್ಚುವರಿ ವಿಶ್ವಾಸಾರ್ಹ ರೈಲು ಆಯ್ಕೆಯನ್ನು ಒದಗಿಸುವ ಮೂಲಕ ವಿದ್ಯಾರ್ಥಿಗಳು, ನೌಕರರು, ವ್ಯಾಪಾರಿಗಳು, ಕುಟುಂಬಗಳು ಮತ್ತು ಇತರ ನಿರಂತರ ಪ್ರಯಾಣಿಕರಿಗೆ ಅನುಕೂಲ ಮಾಡಿಕೊಡಲಿದೆ. ಜನರ ಸುಧಾರಿತ ಸಂಚಾರವು ಮುಂಬೈ ಮತ್ತು ಈ ಪ್ರದೇಶದ ನಡುವಿನ ಆರ್ಥಿಕ ಬಾಂಧವ್ಯವನ್ನು ಬಲಪಡಿಸುತ್ತದೆ ಹಾಗೂ ಸ್ಥಳೀಯ ಆರ್ಥಿಕ ಚಟುವಟಿಕೆಗಳಿಗೆ ಬೆಂಬಲ ನೀಡುತ್ತದೆ.

ವಿಶೇಷವಾಗಿ ಹಬ್ಬಗಳು, ರಜಾದಿನಗಳು ಮತ್ತು ಪ್ರವಾಸಿ ಋತುವಿನಲ್ಲಿ ಮುಂಬೈ ಮತ್ತು ಕೊಂಕಣ ನಡುವೆ ಪ್ರಯಾಣಿಕರ ಬೇಡಿಕೆ ಗಣನೀಯವಾಗಿ ಹೆಚ್ಚಾದಾಗ ಈ ರೈಲು ಹೆಚ್ಚುವರಿ ಪ್ರಯಾಣ ಸಾಮರ್ಥ್ಯವನ್ನು ಒದಗಿಸುವ ನಿರೀಕ್ಷೆಯಿದೆ. ಈ ಸೇವೆಯು ಎಲ್‌ಹೆಚ್‌ಬಿ (LHB) ರೇಕ್‌ನೊಂದಿಗೆ ಕಾರ್ಯಾಚರಣೆ ನಡೆಸಲಿದ್ದು, ಪ್ರಯಾಣಿಕರಿಗೆ ಆಧುನಿಕ ಮತ್ತು ಆರಾಮದಾಯಕ ಬೋಗಿಗಳನ್ನು ಒದಗಿಸುತ್ತದೆ.

ಮುಂಬೈನ ಸಾಮರ್ಥ್ಯ ಮತ್ತು ಮಹಾರಾಷ್ಟ್ರದ ಸಂಪರ್ಕವನ್ನು ಹೆಚ್ಚಿಸಲು ಪ್ರಮುಖ ರೈಲ್ವೆ ಯೋಜನೆಗಳು

ಮುಂಬೈ ಉಪನಗರ ರೈಲ್ವೆ ಜಾಲದ ಕುರಿತು ಮಾತನಾಡಿದ ಶ್ರೀ ವೈಷ್ಣವ್, ಸಾಮರ್ಥ್ಯವನ್ನು ಹೆಚ್ಚಿಸಲು ಮತ್ತು ಪ್ರಯಾಣಿಕರ ಸೇವೆಗಳನ್ನು ಸುಧಾರಿಸಲು ಹಲವಾರು ಪ್ರಮುಖ ಕಾಮಗಾರಿಗಳನ್ನು ಕೈಗೆತ್ತಿಕೊಳ್ಳಲಾಗುತ್ತಿದೆ ಎಂದು ಒತ್ತಿಹೇಳಿದರು. ಮುಂಬೈನಲ್ಲಿ ಪ್ರಸ್ತುತ ಸುಮಾರು ₹18,000 ಕೋಟಿ ಮೌಲ್ಯದ ಯೋಜನೆಗಳು ಪ್ರಗತಿಯಲ್ಲಿವೆ ಎಂದು ಅವರು ತಿಳಿಸಿದರು.

12-ಬೋಗಿಗಳ ರೈಲುಗಳಿಗಾಗಿ ವಿನ್ಯಾಸಗೊಳಿಸಲಾದ ಪ್ಲಾಟ್‌ಫಾರ್ಮ್‌ಗಳನ್ನು 15-ಬೋಗಿಗಳ ರೈಲುಗಳಿಗೆ ಅನುಕೂಲವಾಗುವಂತೆ ರೈಲ್ವೆಯು ಹಂತ-ಹಂತವಾಗಿ ವಿಸ್ತರಿಸುತ್ತಿದೆ ಎಂದು ಶ್ರೀ ವೈಷ್ಣವ್ ವಿವರಿಸಿದರು. ಈಗಾಗಲೇ ಹಲವಾರು ಸ್ಥಳಗಳಲ್ಲಿ ಕಾಮಗಾರಿ ಪೂರ್ಣಗೊಂಡಿದೆ ಎಂದು ಅವರು ಹೇಳಿದರು. ಈ ಉಪಕ್ರಮಗಳು ಉಪನಗರ ರೈಲ್ವೆ ವ್ಯವಸ್ಥೆಯ ಸಾಮರ್ಥ್ಯವನ್ನು ಗಣನೀಯವಾಗಿ ಹೆಚ್ಚಿಸುತ್ತವೆ ಮತ್ತು ಮುಂಬೈಕರ್ಗಳ ದೈನಂದಿನ ಜೀವನವನ್ನು ಸುಧಾರಿಸುತ್ತವೆ ಎಂದು ಅವರು ಹೇಳಿದರು.

ಮುಂಬೈ ಉಪನಗರ ಜಾಲದ ಸಾಮರ್ಥ್ಯ ಮತ್ತು ದಕ್ಷತೆಯನ್ನು ಇನ್ನಷ್ಟು ಸುಧಾರಿಸಲು ರೈಲ್ವೆಯು ಪ್ರಸ್ತುತ ಇರುವ ಸಿಗ್ನಲಿಂಗ್ ವ್ಯವಸ್ಥೆಯನ್ನು ಆಧುನಿಕ ಸಿಗ್ನಲಿಂಗ್ ವ್ಯವಸ್ಥೆಗೆ ಮೇಲ್ದರ್ಜೆಗೆ ಏರಿಸುತ್ತಿದೆ ಎಂದು ಶ್ರೀ ವೈಷ್ಣವ್ ಮುಂದುವರಿದು ಉಲ್ಲೇಖಿಸಿದರು.

ಮುಂಬೈನ ಅಗತ್ಯವನ್ನು ವಿಳಂಬವಿಲ್ಲದೆ ಪೂರೈಸಲು 238 ಹೊಸ ಎಸಿ ಲೋಕಲ್ ರೈಲು ರೇಕ್‌ಗಳನ್ನು ಸಹ ಮಂಜೂರು ಮಾಡಲಾಗಿದೆ ಎಂದು ರೈಲ್ವೆ ಸಚಿವರು ಹೇಳಿದರು. ಮೊದಲ ಎಸಿ ಲೋಕಲ್ ರೈಲಿನ ಪೂರೈಕೆಯು 2027ರಲ್ಲಿ ಪ್ರಾರಂಭವಾಗಲಿದೆ ಎಂದು ಅವರು ಘೋಷಿಸಿದರು. ಇದು ಮುಂಬೈ ಉಪನಗರ ರೈಲ್ವೆ ವ್ಯವಸ್ಥೆಯನ್ನು ಹೊಸ ಪೀಳಿಗೆಯ, ಹವಾನಿಯಂತ್ರಿತ ಲೋಕಲ್ ರೈಲುಗಳು, ಹೆಚ್ಚಿದ ಸಾಮರ್ಥ್ಯ ಮತ್ತು ಸುಧಾರಿತ ಪ್ರಯಾಣಿಕರ ಆರಾಮದೊಂದಿಗೆ ರೂಪಾಂತರಿಸಲಿದೆ ಎಂದು ಶ್ರೀ ವೈಷ್ಣವ್ ಹೇಳಿದರು.

ಮೀಸಲಾದ ಸರಕು ಕಾರಿಡಾರ್‌ಗಳ ಕಡೆಗೆ ಗಮನ ಹರಿಸಿದ ಶ್ರೀ ವೈಷ್ಣವ್, ಪೂರ್ವ ಮತ್ತು ಪಶ್ಚಿಮ ಮೀಸಲಾದ ಸರಕು ಕಾರಿಡಾರ್‌ಗಳು ದೇಶಕ್ಕೆ ಪ್ರಮುಖ ಶಕ್ತಿಯಾಗಿವೆ ಎಂದು ಹೇಳಿದರು. ಎರಡೂ ಸರಕು ಕಾರಿಡಾರ್‌ಗಳು ಈಗ ಶೇಕಡಾ 100 ರಷ್ಟು ಪೂರ್ಣಗೊಂಡಿವೆ ಎಂದು ಅವರು ತಿಳಿಸಿದರು.

ಕೇಂದ್ರ ಬಜೆಟ್‌ನಲ್ಲಿ, ಹೊಸ ಪೂರ್ವ-ಪಶ್ಚಿಮ ಮೀಸಲಾದ ಸರಕು ಕಾರಿಡಾರ್‌ನ ಘೋಷಣೆಯನ್ನು ಶ್ರೀ ವೈಷ್ಣವ್ ಉಲ್ಲೇಖಿಸಿದರು. ದಾನ್ಕುನಿಯಿಂದ ಸೂರತ್‌ವರೆಗಿನ ಹೊಸ ಕಾರಿಡಾರ್ ಅನ್ನು ರೈಲ್ವೆಯು ವಿನ್ಯಾಸಗೊಳಿಸುತ್ತಿದ್ದು, ಇದು ವಿದರ್ಭ, ಮರಾಠವಾಡ ಮತ್ತು ಪಶ್ಚಿಮ ಮಹಾರಾಷ್ಟ್ರದ ಹಲವಾರು ಪ್ರದೇಶಗಳಿಗೆ ರೈಲು ಸಂಪರ್ಕವನ್ನು ಒದಗಿಸುತ್ತದೆ, ಜೊತೆಗೆ ವರ್ಧಾ ಮತ್ತು ನಾಸಿಕ್‌ನಲ್ಲಿರುವ ಬಂದರಿನತ್ತ ಕಾರಿಡಾರ್ ಅನ್ನು ಸಂಪರ್ಕಿಸುತ್ತದೆ, ಮಹಾರಾಷ್ಟ್ರದ ಕೈಗಾರಿಕಾ ಮತ್ತು ಗ್ರಾಮೀಣ ಅಭಿವೃದ್ಧಿಗೆ ಬಲವಾದ ಜಾಲವನ್ನು ಒದಗಿಸುತ್ತದೆ ಎಂದು ಅವರು ಹೇಳಿದರು.

ಮುಂಬೈ-ಅಹಮದಾಬಾದ್ ಹೈ-ಸ್ಪೀಡ್ ರೈಲು ಯೋಜನೆಯ ಬಗ್ಗೆ ಮಾತನಾಡಿದ ಶ್ರೀ ವೈಷ್ಣವ್, ಕಾಮಗಾರಿಯು ವೇಗವಾಗಿ ಪ್ರಗತಿಯಲ್ಲಿದೆ ಎಂದು ಹೇಳಿದರು. ಬಿಕೆಸಿ (BKC) ಮತ್ತು ಥಾನೆಯನ್ನು ಸಂಪರ್ಕಿಸುವ ಸಮುದ್ರದಾಳದ ರೈಲು ಸುರಂಗದ ನಿರ್ಮಾಣದ ಬಗ್ಗೆ ಅವರು ಒತ್ತಿ ಹೇಳಿದರು. ವಿಕ್ರೋಲಿಯಿಂದ ಒಂದು ಮತ್ತು ಘಾನ್ಸೋಲಿಯಿಂದ ಮತ್ತೊಂದು ಹೀಗೆ ಎರಡು ಟನಲ್ ಬೋರಿಂಗ್ ಯಂತ್ರಗಳು (TBM) ಪ್ರಸ್ತುತ ಸುರಂಗದ ಕಾಮಗಾರಿಯಲ್ಲಿ ತೊಡಗಿವೆ.

ಮಹಾರಾಷ್ಟ್ರ ವಿಧಾನಸಭೆಯ ಸ್ಪೀಕರ್ ರಾಹುಲ್ ನಾರ್ವೇಕರ್; ಮಹಾರಾಷ್ಟ್ರ ಸರ್ಕಾರದ ಬಂದರು ಅಭಿವೃದ್ಧಿ ಮತ್ತು ಮೀನುಗಾರಿಕೆ ಸಚಿವರಾದ ನಿತೇಶ್ ರಾಣೆ ಮತ್ತು ಮುಂಬೈ ಮೇಯರ್ ರಿತು ತಾವ್ಡೆ ಅವರು ಇತರ ಗಣ್ಯರೊಂದಿಗೆ ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು.

*****