કેન્દ્રીય રેલવે મંત્રી શ્રી અશ્વિની વૈષ્ણવ; કેન્દ્રીય વાણિજ્ય અને ઉદ્યોગ મંત્રી શ્રી પીયૂષ ગોયલ; મહારાષ્ટ્રના નાયબ મુખ્યમંત્રી શ્રી એકનાથ શિંદે, અન્ય મહાનુભાવો સાથે, મુંબઈ અને કોંકણ ક્ષેત્ર વચ્ચે સીધી રેલ કનેક્ટિવિટી મજબૂત કરવા તરફ એક મહત્વપૂર્ણ પગલું ઉઠાવતા, આજે છત્રપતિ શિવાજી મહારાજ ટર્મિનસ (CSMT) અને સાવંતવાડી રોડ વચ્ચે નવી ટ્રેનની ઉદ્ઘાટન સેવાને લીલી ઝંડી આપી હતી.

નવી ટ્રેન સેવા મુંબઈ અને કોંકણ ક્ષેત્રના કેટલાક મોટા શહેરો વચ્ચે લગભગ 510 કિમીનું અંતર આવરી લેતી એક મહત્વપૂર્ણ સીધી રેલ લિંક પૂરી પાડશે. સ્ટોપેજના વ્યાપક નેટવર્ક સાથે, આ સેવાનો લાભ રાયગઢ, રત્નાગિરી અને સિંધુદુર્ગ જિલ્લાઓમાં મુસાફરી કરતા અને ત્યાંથી આવતા મુસાફરોને મળશે.

રેલવે મંત્રી શ્રી અશ્વિની વૈષ્ણવે જણાવ્યું હતું કે આ નવી સેવા મુંબઈ અને કોંકણના લોકોની લાંબા સમયથી ચાલી આવતી માંગને પૂરી કરશે. તેમણે ભારપૂર્વક જણાવ્યું હતું કે આ વર્ષે તહેવાર દરમિયાન મુસાફરોની અવરજવરને સરળ બનાવવા માટે 350 સ્પેશિયલ ટ્રેનો ચલાવવામાં આવી રહી છે. તેમણે ઉમેર્યું હતું કે જો જરૂર પડશે તો ટ્રેનોની સંખ્યા વધારીને 370 કરવાની પણ વ્યવસ્થા કરવામાં આવશે.

કેન્દ્રીય મંત્રી શ્રી પીયૂષ ગોયલે જણાવ્યું હતું કે છત્રપતિ શિવાજી મહારાજ ટર્મિનસ અને સાવંતવાડી વચ્ચે નવી દૈનિક ટ્રેન સેવાની શરૂઆત મહારાષ્ટ્રના લોકો માટે, ખાસ કરીને આગામી ગણેશ ઉત્સવ દરમિયાન આનંદ લાવે છે. શ્રી ગોયલે રેખાંકિત કર્યું હતું કે આ નવી સેવા માત્ર બીજી ટ્રેનની શરૂઆત નથી પરંતુ કોંકણ ક્ષેત્રના વિકાસની યાત્રામાં એક મહત્વપૂર્ણ માઇલસ્ટોન છે. શ્રી ગોયલે ભારપૂર્વક જણાવ્યું હતું કે આ નવી સેવા મુંબઈ અને કોંકણ વચ્ચે સુરક્ષિત, ઝડપી અને વિશ્વસનીય મુસાફરી પૂરી પાડીને લાખો પરિવારોને જોડવામાં મદદ કરશે.

શ્રી ગોયલે વધુમાં જણાવ્યું હતું કે જેમ જેમ આ રૂટ પર ગુડ્સ ટ્રાન્સપોર્ટ (માલસામાનની હેરફેર) વધશે, તેમ માછીમારો અને અન્ય સ્થાનિક ઉત્પાદકો મુંબઈ સુધી તેમનો માલ વધુ ઝડપથી પહોંચાડી શકશે. તેમણે ભારપૂર્વક જણાવ્યું હતું કે સુધારેલી કનેક્ટિવિટી કોંકણમાં રોજગારીની તકો ઊભી કરશે અને યુવાનો માટે કામની શોધમાં થતા સ્થળાંતરની જરૂરિયાતને ઘટાડશે.

તેમણે વિદ્યાર્થીઓ, કર્મચારીઓ અને પરિવારો માટેના લાભો વિશે પણ જણાવ્યું હતું. શ્રી ગોયલે કહ્યું હતું કે કોંકણના જે લોકો મુંબઈમાં અભ્યાસ કરે છે કે નોકરી કરે છે તેઓ તેમના પરિવારો સાથે વધુ ગાઢ સંબંધો જાળવી શકશે અને વધુ અનુકૂળ રીતે મુસાફરી કરી શકશે. તેમણે ઉમેર્યું હતું કે સુધારેલી રેલ કનેક્ટિવિટી દ્વારા મુંબઈના ઉચ્ચ શિક્ષણની તકો અને આરોગ્યસંભાળ સેવાઓ કોંકણના લોકો માટે વધુ સુલભ બનશે.

મહારાષ્ટ્રના નાયબ મુખ્યમંત્રી શ્રી એકનાથ શિંદેએ જણાવ્યું હતું કે આ નવી સેવા કોંકણના લોકો, પરપ્રાંતીય કામદારો અને ગણેશ ઉત્સવ દરમિયાન પોતાના વતન તરફ મુસાફરી કરતા ભક્તો માટે એક મોટી ભેટ છે.

શ્રી શિંદેએ મુંબઈ-અમદાવાદ બુલેટ ટ્રેન પ્રોજેક્ટ, વંદે ભારત ટ્રેનો અને દેશભરમાં રેલવે નેટવર્કના વિસ્તરણ સહિત રેલવેની કેટલીક મોટી સિદ્ધિઓ પર પ્રકાશ પાડ્યો હતો. તેમણે 741 કિમી લાંબા કોંકણ રેલવે રૂટના રેકોર્ડ સમયમાં ઈલેક્ટ્રિફિકેશન પૂર્ણ થવાની ખાસ નોંધ લીધી હતી. તેમણે કહ્યું કે આ પહેલે વધુ પર્યાવરણ-અનુકૂળ મુસાફરી સક્ષમ બનાવી છે અને ટ્રેનની ઝડપ વધારી છે.

મુસાફરો માટે અનુકૂળ સમય

ટ્રેન CSMT થી 23:55 વાગ્યે ઉપડશે અને બીજા દિવસે 14:15 વાગ્યે સાવંતવાડી રોડ પહોંચશે. તેની પરત મુસાફરીમાં, ટ્રેન સાવંતવાડી રોડથી 17:20 વાગ્યે ઉપડશે અને બીજા દિવસે સવારે 06:40 વાગ્યે CSMT પહોંચશે. આ અનુકૂળ સમય મુસાફરોને મુંબઈથી કોંકણ તરફ રાતોરાત મુસાફરી કરવા અને વહેલી સવારે મુંબઈ પરત ફરવા માટે સક્ષમ બનાવશે.

આ ટ્રેન દૈનિક ટ્રેન નંબર 15087 છત્રપતિ શિવાજી મહારાજ ટર્મિનસ-સાવંતવાડી રોડ એક્સપ્રેસ અને ટ્રેન નંબર 15088 સાવંતવાડી રોડ-છત્રપતિ શિવાજી મહારાજ ટર્મિનસ એક્સપ્રેસ તરીકે ચાલશે.

સમગ્ર કોંકણમાં વ્યાપક કનેક્ટિવિટી

આ સેવામાં કેટલાક મહત્વપૂર્ણ સ્ટેશનો પર સ્ટોપેજ હશે, જેમાં નીચેનાનો સમાવેશ થાય છે:

• દાદર
•  ઠાણે
• પનવેલ
•  પેણ
• રોહા
• માણગાંવ
• વીર
• ખેડ
• ચિપલૂણ
• સાવરડા
• અરાવલી રોડ
• સંગમેશ્વર રોડ
• રત્નાગિરી
• અડાવલી
• વિલવડે
• રાજાપુર રોડ
• વૈભવવાડી રોડ
• નંદગાંવ
• કણકવલી
• સિંધુદુર્ગ
• કુડાળ
• સાવંતવાડી રોડ

વ્યાપક સ્ટોપેજ પેટર્ન મુસાફરોને માત્ર સાવંતવાડી જ નહીં પરંતુ સમગ્ર કોંકણ બેલ્ટના મોટી સંખ્યામાં મહત્વપૂર્ણ શહેરો અને વિસ્તારો સુધી પહોંચવા માટે સક્ષમ બનાવશે.

પ્રવાસન અને પ્રાદેશિક વિકાસને પ્રોત્સાહન

રત્નાગિરી, સિંધુદુર્ગ, કંકવલી, કુડાલ અને સાવંતવાડીના સ્થળો સુધી રેલ પહોંચમાં સુધારો કરીને આ નવી સેવા કોંકણ ક્ષેત્રમાં પ્રવાસનને વધુ વેગ આપે તેવી અપેક્ષા છે. મજબૂત કનેક્ટિવિટી પ્રવાસીઓ માટે મુસાફરીને સરળ બનાવશે જ્યારે સ્થાનિક પ્રવાસન સંબંધિત વ્યવસાયો અને સેવાઓ માટે વધુ તકો ઊભી કરશે.

આ સેવા મુંબઈ અને કોંકણ વચ્ચે વધુ એક નિર્ભર રેલ વિકલ્પ પૂરો પાડીને વિદ્યાર્થીઓ, કર્મચારીઓ, વેપારીઓ, પરિવારો અને અન્ય નિયમિત મુસાફરોને પણ લાભ પહોંચાડશે. લોકોની સુધારેલી અવરજવર મુંબઈ અને ક્ષેત્ર વચ્ચેના આર્થિક સંબંધોને મજબૂત કરશે અને સ્થાનિક આર્થિક પ્રવૃત્તિને ટેકો આપશે.

આ ટ્રેન ખાસ કરીને તહેવારો, રજાઓ અને પ્રવાસનની મોસમ દરમિયાન વધારાની મુસાફરી ક્ષમતા પૂરી પાડે તેવી અપેક્ષા છે, જ્યારે મુંબઈ અને કોંકણ વચ્ચે મુસાફરોની માંગમાં નોંધપાત્ર વધારો થાય છે. આ સેવા LHB રેક સાથે કાર્યરત થશે, જે મુસાફરોને આધુનિક અને આરામદાયક પેસેન્જર કોચ પૂરા પાડશે.

મુંબઈની ક્ષમતા અને મહારાષ્ટ્રની કનેક્ટિવિટી વધારવા માટેના મુખ્ય રેલ પ્રોજેક્ટ્સ

મુંબઈ સબર્બન રેલવે નેટવર્ક વિશે બોલતા, શ્રી વૈષ્ણવે ભારપૂર્વક જણાવ્યું હતું કે ક્ષમતા વધારવા અને મુસાફર સેવાઓમાં સુધારો કરવા માટે કેટલાક મોટા કામો હાથ ધરવામાં આવી રહ્યા છે. તેમણે કહ્યું કે મુંબઈમાં હાલમાં આશરે ₹18,000 કરોડના પ્રોજેક્ટ્સ કાર્યરત છે.

શ્રી વૈષ્ણવે સમજાવ્યું કે રેલવે 12-કોચની ટ્રેનો માટે ડિઝાઇન કરાયેલા પ્લેટફોર્મને 15-કોચની ટ્રેનો માટે વ્યવસ્થિત રીતે લંબાવી રહી છે. તેમણે કહ્યું કે કેટલાક સ્થળોએ કામ પૂર્ણ થઈ ગયું છે. તેમણે કહ્યું કે આ પહેલો સબર્બન રેલવે સિસ્ટમની ક્ષમતામાં નોંધપાત્ર વધારો કરશે અને મુંબઈવાસીઓનું દૈનિક જીવન સુધારેશે.

શ્રી વૈષ્ણવે વધુમાં ઉલ્લેખ કર્યો હતો કે રેલવે મુંબઈ સબર્બન નેટવર્કની ક્ષમતા અને કાર્યક્ષમતામાં વધુ સુધારો કરવા માટે વર્તમાન સિગ્નલિંગ સિસ્ટમને આધુનિક સિગ્નલિંગ સિસ્ટમમાં અપગ્રેડ કરી રહી છે.

રેલવે મંત્રીએ કહ્યું કે મુંબઈની જરૂરિયાતને વિલંબ વિના પૂરી કરવા માટે 238 નવા AC લોકલ ટ્રેન રેક પણ મંજૂર કરવામાં આવ્યા છે. તેમણે જાહેરાત કરી હતી કે પ્રથમ AC લોકલ ટ્રેનની ડિલિવરી 2027માં શરૂ થશે. શ્રી વૈષ્ણવે જણાવ્યું હતું કે આ નવી પેઢીની, એર-કન્ડીશન્ડ લોકલ ટ્રેનો, વધેલી ક્ષમતા અને સુધારેલી મુસાફર સુવિધા સાથે મુંબઈ સબર્બન રેલવે સિસ્ટમનું પરિવર્તન કરશે.

ડેડિકેટેડ ફ્રેઈટ કોરિડોર તરફ વળતા, શ્રી વૈષ્ણવે જણાવ્યું હતું કે ઈસ્ટર્ન અને વેસ્ટર્ન ડેડિકેટેડ ફ્રેઈટ કોરિડોર દેશ માટે એક મોટી તાકાત છે. તેમણે કહ્યું કે બંને ફ્રેઈટ કોરિડોર હવે 100 ટકા પૂર્ણ થઈ ગયા છે.

શ્રી વૈષ્ણવે કેન્દ્રીય બજેટમાં નવા ઈસ્ટ-વેસ્ટ ડેડિકેટેડ ફ્રેઈટ કોરિડોરની જાહેરાતનો પણ ઉલ્લેખ કર્યો હતો. તેમણે કહ્યું કે રેલવે દાનકુનીથી સુરત સુધીના નવા કોરિડોરને એવી રીતે ડિઝાઇન કરી રહી છે જે વિદર્ભ, મરાઠવાડા અને પશ્ચિમ મહારાષ્ટ્રના કેટલાક વિસ્તારોને રેલ કનેક્ટિવિટી પૂરી પાડશે, જ્યારે વર્ધા અને નાસિક ખાતેના બંદર તરફના કોરિડોરને પણ જોડશે, જે મહારાષ્ટ્રમાં ઔદ્યોગિક અને ગ્રામીણ વિકાસ માટે એક મજબૂત નેટવર્ક પૂરું પાડશે.

મુંબઈ-અમદાવાદ હાઇ-સ્પીડ રેલ પ્રોજેક્ટ પર, શ્રી વૈષ્ણવે જણાવ્યું હતું કે કામ ઝડપથી આગળ વધી રહ્યું છે. તેમણે અંડરસી રેલ ટનલના નિર્માણ પર પ્રકાશ પાડ્યો હતો, જે BKC અને ઠાણેને જોડશે. ટનલ બોરિંગ કરતી બે મશીનો, એક વિક્રોલીથી અને બીજી ઘનસોલીથી, હાલમાં ટનલ પર કામ કરી રહી છે.

મહારાષ્ટ્ર વિધાનસભાના સ્પીકર રાહુલ નાર્વેકર; મહારાષ્ટ્ર સરકારના બંદરો વિકાસ અને મત્સ્યોદ્યોગ મંત્રી નિતેશ રાણે અને મુંબઈના મેયર રિતુ તાવડે અન્ય મહાનુભાવો સાથે આ પ્રસંગે ઉપસ્થિત રહ્યા હતા.

SM/BS/JD