ಭಾರತದ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ಆಹ್ವಾನದ ಮೇರೆಗೆ ಬೆಲ್ಜಿಯಂ ದೇಶದ ಪ್ರಧಾನಮಂತ್ರಿ ಘನತೆವೆತ್ತ ಶ್ರೀ ಬಾರ್ಟ್ ಡಿ ವೆವರ್ ಅವರು 2026ರ ಸೆಪ್ಟೆಂಬರ್ 2 ರಿಂದ 4 ರವರೆಗೆ ಭಾರತಕ್ಕೆ ಅಧಿಕೃತ ಭೇಟಿ ಕೈಗೊಂಡಿದ್ದಾರೆ. ಬೆಲ್ಜಿಯಂನ ಪ್ರಧಾನಮಂತ್ರಿಯವರೊಂದಿಗೆ ಬೆಲ್ಜಿಯಂನ ರಕ್ಷಣಾ ಮತ್ತು ವಿದೇಶಾಂಗ ವ್ಯಾಪಾರ ಸಚಿವರಾದ ಘನತೆವೆತ್ತ ಶ್ರೀ ಥಿಯೋ ಫ್ರಾಂಕೆನ್ ಮತ್ತು ಉನ್ನತ ಮಟ್ಟದ ಅಧಿಕಾರಿಗಳು ಹಾಗೂ ವ್ಯಾಪಾರ ಮುಖಂಡರ ನಿಯೋಗವೂ ಆಗಮಿಸಿದೆ. ಫೆಬ್ರವರಿ 2025ರಲ್ಲಿ ಅಧಿಕಾರ ವಹಿಸಿಕೊಂಡ ನಂತರ ಪ್ರಧಾನಮಂತ್ರಿ ಡಿ ವೇವರ್ ಅವರ ಮೊದಲ ಭಾರತ ಭೇಟಿ ಇದಾಗಿದೆ.

ಪ್ರಧಾನಮಂತ್ರಿ ಡಿ ವೆವರ್ ಅವರು ರಾಜ್ ಘಾಟ್‌ನಲ್ಲಿ ಮಹಾತ್ಮ ಗಾಂಧಿ ಅವರಿಗೆ ಗೌರವ ನಮನ ಸಲ್ಲಿಸುವ ಮೂಲಕ ತಮ್ಮ ಭೇಟಿಯನ್ನು ಪ್ರಾರಂಭಿಸಿದರು. ನಂತರ ಪ್ರಧಾನ ಮಂತ್ರಿ ಡಿ ವೆವರ್ ಅವರು ಭಾರತದ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರೊಂದಿಗೆ ದ್ವಿಪಕ್ಷೀಯ ಮಾತುಕತೆ ನಡೆಸಿದರು. ಮೊದಲು ನಿರ್ಬಂಧಿತ ಸ್ವರೂಪದಲ್ಲಿ ಮತ್ತು ನಂತರ ಆಯಾ ನಿಯೋಗಗಳೊಂದಿಗೆ ಮಾತುಕತೆ ನಡೆಸಿದರು. ಉಭಯ ದೇಶಗಳ ನಡುವಿನ ಸಂಬಂಧದ ಸಂಪೂರ್ಣ ಉದ್ದಗಲಕ್ಕೂ ಅವರ ಚರ್ಚೆಗಳು ವ್ಯಾಪಿಸಿದ್ದವು. ಪ್ರಧಾನಮಂತ್ರಿ ಮೋದಿ ಅವರು ಪ್ರಧಾನಮಂತ್ರಿ ಡಿ ವೇವರ್ ಮತ್ತು ಭೇಟಿ ನೀಡಿದ ನಿಯೋಗಕ್ಕೆ ಭೋಜನಕೂಟ ಆಯೋಜಿಸಿದ್ದರು.

ಮೊದಲ ಮಹಾಯುದ್ಧದ ಸಮಯದಲ್ಲಿ ಫ್ಲಾಂಡರ್ಸ್ ಫೀಲ್ಡ್ಸ ನಲ್ಲಿ 9,000ಕ್ಕೂ ಹೆಚ್ಚು ಭಾರತೀಯ ಸೈನಿಕರು ಮಾಡಿ ಸರ್ವೋಚ್ಚ ತ್ಯಾಗವನ್ನು ಉಭಯ ನಾಯಕರು ಸ್ಮರಿಸಿದರು. 1947ರಲ್ಲಿ ಭಾರತದೊಂದಿಗೆ ರಾಜತಾಂತ್ರಿಕ ಸಂಬಂಧ ಸ್ಥಾಪಿಸಿದ ಮೊದಲ ಯುರೋಪಿಯನ್ ದೇಶಗಳಲ್ಲಿ ಬೆಲ್ಜಿಯಂ ಕೂಡ ಒಂದಾಗಿದೆ ಎಂಬುದನ್ನು ಉಭಯ ನಾಯಕರು ಸ್ಮರಿಸಿದರು. ಹಂಚಿಕೆಯ ಪ್ರಜಾಪ್ರಭುತ್ವ ಮೌಲ್ಯಗಳು, ಪರಸ್ಪರ ನಂಬಿಕೆ, ಪರಸ್ಪರ ಆರ್ಥಿಕ ಪೂರಕತೆಗಳು ಮತ್ತು ಬಲವಾದ ಜನರ ನಡುವಿನ ಸಂಬಂಧಗಳ ಅಡಿಪಾಯದ ಮೇಲೆ ಈ ಪಾಲುದಾರಿಕೆಯು ಬೆಳೆದು ಬಂದಿದೆ ಎಂದು ಅವರು ಹೇಳಿದರು. ಈ ಬಹುಮುಖಿ ಸಂಬಂಧವನ್ನು ಮತ್ತಷ್ಟು ವಿಸ್ತರಿಸುವ ಮತ್ತು ಗಾಢವಾಗಿಸುವ ಬಯಕೆಯನ್ನು ನಾಯಕರು ವ್ಯಕ್ತಪಡಿಸಿದರು. 2027ರಲ್ಲಿ ಬೆಲ್ಜಿಯಂ-ಭಾರತ ರಾಜತಾಂತ್ರಿಕ ಸಂಬಂಧಗಳ 80ನೇ ವಾರ್ಷಿಕೋತ್ಸವವು ದ್ವಿಪಕ್ಷೀಯ ಸಂಬಂಧವನ್ನು ಆಳಗೊಳಿಸಲು ಮತ್ತು ವಿಸ್ತರಿಸಲು ಭಾರತ ಮತ್ತು ಬೆಲ್ಜಿಯಂಗೆ ಮತ್ತೊಂದು ಐತಿಹಾಸಿಕ ಸಂದರ್ಭವನ್ನು ಒದಗಿಸುತ್ತದೆ.

ಜುಲೈ 15, 2026 ರಂದು ಬ್ರಸೆಲ್ಸ್‌ನಲ್ಲಿ ಉದ್ಘಾಟನೆಗೊಂಡ ಚೊಚ್ಚಲ ಭಾರತ-ಬೆಲ್ಜಿಯಂ ಕಾರ್ಯತಂತ್ರದ ಸಂವಾದವನ್ನು ಇಬ್ಬರೂ ನಾಯಕರು ಸ್ವಾಗತಿಸಿದರು, ಇದು ಭಾರತದ ವಿದೇಶಾಂಗ ವ್ಯವಹಾರಗಳ ಸಚಿವ ಮತ್ತು ಬೆಲ್ಜಿಯಂನ ಉಪ ಪ್ರಧಾನ ಮಂತ್ರಿ ಮತ್ತು ವಿದೇಶಾಂಗ ವ್ಯವಹಾರಗಳ ಸಚಿವರ ಸಹ-ಅಧ್ಯಕ್ಷತೆಯಲ್ಲಿ ನಡೆಯಿತು.ವ್ಯಾಪಕವಾದ ಭಾರತ-ಇಯು ಕಾರ್ಯತಂತ್ರದ ಪಾಲುದಾರಿಕೆಯಲ್ಲಿ ನೆಲೆಗೊಂಡಿರುವ ಈ ಸಂವಾದವು ವ್ಯಾಪಾರ ಮತ್ತು ಹೂಡಿಕೆ, ಹಸಿರು ಪರಿವರ್ತನೆ, ತಂತ್ರಜ್ಞಾನ, ಸಂಪರ್ಕ, ರಕ್ಷಣೆ, ಭದ್ರತೆ ಮತ್ತು ಜನರ ನಡುವಿನ ಬಾಂಧವ್ಯದಾದ್ಯಂತ ಸಹಕಾರವನ್ನು ಮುನ್ನಡೆಸಲು ನಿಯಮಿತ ಮತ್ತು ಸಮಗ್ರ ಕಾರ್ಯವಿಧಾನವನ್ನು ಸ್ಥಾಪಿಸಿದೆ ಎಂದು ಅವರು ಗಮನಿಸಿದರು. ಈ ಸಂದರ್ಭದಲ್ಲಿ, ಕಾರ್ಯತಂತ್ರದ ಸಂವಾದದ ಅಡಿಯಲ್ಲಿ ಗುರುತಿಸಲಾದ ಆದ್ಯತೆಗಳನ್ನು ಮುನ್ನಡೆಸಲು ಪ್ರಮುಖ ವೇದಿಕೆಯಾಗಿ ಮುಂಬರುವ ವಿದೇಶಾಂಗ ಕಚೇರಿ ಸಮಾಲೋಚನೆಗಳನ್ನು ಅವರು ಸ್ವಾಗತಿಸಿದರು.

ಸಮಾನ ಮತ್ತು ಶಾಂತಿಯುತ ಅಂತರರಾಷ್ಟ್ರೀಯ ಕ್ರಮವನ್ನು ಕಾಯ್ದುಕೊಳ್ಳಲು, ಜಾಗತಿಕ ಸವಾಲುಗಳನ್ನು ಎದುರಿಸಲು ಮತ್ತು ತಾಂತ್ರಿಕ ಹಾಗೂ ಆರ್ಥಿಕ ಕ್ಷೇತ್ರಗಳಲ್ಲಿ ಸೇರಿದಂತೆ ಉದಯೋನ್ಮುಖ ಬೆಳವಣಿಗೆಗಳಿಗೆ ಜಗತ್ತನ್ನು ಸಿದ್ಧಪಡಿಸಲು ವಿಶ್ವಸಂಸ್ಥೆಯ ಚಾರ್ಟರ್ ಅನ್ನು ಕೇಂದ್ರವಾಗಿಟ್ಟುಕೊಂಡು ಸುಧಾರಿತ ಮತ್ತು ಪರಿಣಾಮಕಾರಿ ಬಹುಪಕ್ಷೀಯತೆಗಾಗಿ ಉಭ ನಾಯಕರು ತಮ್ಮ ಕರೆಯನ್ನು ಪುನರುಚ್ಚರಿಸಿದರು. ಇಂದಿನ ಜಗತ್ತಿನ ಹೆಚ್ಚು ಪ್ರಾತಿನಿಧ್ಯವನ್ನು ಹೊಂದಲು ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಸುಧಾರಣೆಯ ತುರ್ತು ಅಗತ್ಯವನ್ನು ಉಭಯ ನಾಯಕರು ವಿಶೇಷವಾಗಿ ಒತ್ತಿ ಹೇಳಿದರು. ಸುಧಾರಿತ ಮತ್ತು ವಿಸ್ತರಿತ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಖಾಯಂ ಸದಸ್ಯತ್ವಕ್ಕಾಗಿ ಭಾರತದ ಉಮೇದುವಾರಿಕೆಗೆ ಬೆಲ್ಜಿಯಂ ತನ್ನ ಬೆಂಬಲವನ್ನು ಪುನರುಚ್ಚರಿಸಿತು. ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ತಾತ್ಕಾಲಿಕ ಸದಸ್ಯತ್ವಕ್ಕಾಗಿ, 2028-29ರ ಅವಧಿಗೆ ಭಾರತ ಮತ್ತು 2037-2038ರ ಅವಧಿಗೆ ಬೆಲ್ಜಿಯಂನ ಪರಸ್ಪರ ಉಮೇದುವಾರಿಕೆಯನ್ನು ಬೆಂಬಲಿಸಲು ಉಭಯ ದೇಶಗಳು ಸಮ್ಮತಿಸಿವೆ.

ಭಾರತ-ಇಯು ಕಾರ್ಯತಂತ್ರದ ಪಾಲುದಾರಿಕೆ ಮತ್ತು ಮುಕ್ತ ವ್ಯಾಪಾರ ಒಪ್ಪಂದ

ಭಾರತ-ಐರೋಪ್ಯ ಒಕ್ಕೂಟದ ಕಾರ್ಯತಂತ್ರದ ಪಾಲುದಾರಿಕೆಯು ಭಾರತ-ಬೆಲ್ಜಿಯಂ ಸಂಬಂಧಗಳಿಗೆ ಕೇಂದ್ರಬಿಂದುವಾಗಿರುವುದನ್ನು ಉಭಯ ಪ್ರಧಾನಮಂತ್ರಿಗಳು ಪುನರುಚ್ಚರಿಸಿದರು. 2026ರ ಜನವರಿ 27ರಂದು ನಡೆದ 'ಭಾರತ-ಐರೋಪ್ಯ ಒಕ್ಕೂಟ ಶೃಂಗಸಭೆ'ಯಲ್ಲಿ 'ಭಾರತ-ಇಯು ಮುಕ್ತ ವ್ಯಾಪಾರ ಒಪ್ಪಂದ'ದ ಮಾತುಕತೆಗಳ ಯಶಸ್ವಿ ತೀರ್ಮಾನವನ್ನು ಅವರು ಸ್ವಾಗತಿಸಿದರು. ಜೊತೆಗೆ, ಭಾರತ ಮತ್ತು ಐರೋಪ್ಯ ಒಕ್ಕೂಟದ ನಡುವಿನ ಆರ್ಥಿಕ ಸಂಬಂಧಗಳನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶದಿಂದ 'ಐರೋಪ್ಯ ಒಕ್ಕೂಟ-ಭಾರತ ಹೂಡಿಕೆ ಸಂರಕ್ಷಣಾ ಒಪ್ಪಂದ' ಮತ್ತು 'ಭೌಗೋಳಿಕ ಸೂಚಕಗಳ ಒಪ್ಪಂದ'ದ ಮಾತುಕತೆಗಳನ್ನು ಶೀಘ್ರವಾಗಿ ಅಂತಿಮಗೊಳಿಸುವಂತೆ ಕರೆ ನೀಡಿದರು.

ಭಾರತ-ಇಯು ಮುಕ್ತ ವ್ಯಾಪಾರ ಒಪ್ಪಂದವನ್ನು ಕಾರ್ಯತಂತ್ರದ ಪಾಲುದಾರಿಕೆಯಲ್ಲಿ ಐತಿಹಾಸಿಕ ಮೈಲಿಗಲ್ಲು ಎಂದು ಬಣ್ಣಿಸಿದ ನಾಯಕರು, ಅದರ ಸಕಾಲಿಕ ಅನುಷ್ಠಾನಕ್ಕೆ ಕರೆ ನೀಡಿದರು. ನಿರ್ಣಾಯಕ ಮೌಲ್ಯ ಸರಪಳಿಗಳನ್ನು ವೈವಿಧ್ಯಗೊಳಿಸುವ ಮತ್ತು ಹೊಸ ಮಾರುಕಟ್ಟೆಗಳನ್ನು ತೆರೆಯುವ ಮೂಲಕ ವ್ಯಾಪಾರ ಮತ್ತು ಹೂಡಿಕೆ ಸಹಯೋಗದ ನೈಜ ಸಾಮರ್ಥ್ಯವನ್ನು ಬಳಸಿಕೊಳ್ಳಲು ಮುಕ್ತ ವ್ಯಾಪಾರ ಒಪ್ಪಂದದ ಮಹತ್ವವನ್ನು ಒತ್ತಿ ಹೇಳಿದರು.

ವ್ಯಾಪಾರ ಮತ್ತು ತಂತ್ರಜ್ಞಾನಗಳು ಹೆಚ್ಚೆಚ್ಚು ಹೆಣೆದುಕೊಂಡಿರುವ ಈ ಕಾಲಘಟ್ಟದಲ್ಲಿ ಹೆಚ್ಚು ಸಮಗ್ರ, ಸ್ಥಿತಿಸ್ಥಾಪಕ ಮತ್ತು ಸುಸ್ಥಿರ ಆರ್ಥಿಕ ಮತ್ತು ತಾಂತ್ರಿಕ ಪಾಲುದಾರಿಕೆಯನ್ನು ರೂಪಿಸುವ ನಿಟ್ಟಿನಲ್ಲಿ ಜುಲೈ 2026 ರಲ್ಲಿ ಬ್ರಸೆಲ್ಸ್‌ನಲ್ಲಿ ನಡೆದ ಸಚಿವರ ಸಭೆ ಸೇರಿದಂತೆ ಭಾರತ-ಐರೋಪ್ಯ ಒಕ್ಕೂಟದ ವ್ಯಾಪಾರ ಮತ್ತು ತಂತ್ರಜ್ಞಾನ ಮಂಡಳಿಯ ಅಡಿಯಲ್ಲಿ ಸಾಧಿಸಿದ ಮಹತ್ವದ ಪ್ರಗತಿಯನ್ನು ಉಭಯ ಪ್ರಧಾನಮಂತ್ರಿಗಳು ಸ್ವಾಗತಿಸಿದರು. ಈ ಸಂದರ್ಭದಲ್ಲಿ, ವ್ಯಾಪಾರ, ತಂತ್ರಜ್ಞಾನ, ಆರ್ಥಿಕ ಭದ್ರತೆ ಮತ್ತು ಸದೃಢ ಪೂರೈಕೆ ಸರಪಳಿಗಳಲ್ಲಿ ಭಾರತ, ಬೆಲ್ಜಿಯಂ ಮತ್ತು ಐರೋಪ್ಯ ಒಕ್ಕೂಟದ ನಡುವೆ ಸಹಕಾರವನ್ನು ಮತ್ತಷ್ಟು ಬಲಪಡಿಸುವ ಬದ್ಧತೆಯನ್ನು ಅವರು ಪುನರುಚ್ಚರಿಸಿದರು.

ಉಬಯ ನಾಯಕರು ‘2030ರ ಜಂಟಿ ಭಾರತ-ಇಯು ಸಮಗ್ರ ಕಾರ್ಯತಂತ್ರದ ಕಾರ್ಯಸೂಚಿ'ಯನ್ನು ಅನುಮೋದಿಸಿದರು. ಇದು ಭಾರತ-ಐರೋಪ್ಯ ಒಕ್ಕೂಟದ ಸಹಕಾರವನ್ನು ವಿಸ್ತರಿಸುವ ಮೂಲಕ ಕಾರ್ಯತಂತ್ರದ ಪಾಲುದಾರಿಕೆಯನ್ನು ಮತ್ತಷ್ಟು ಬಲಪಡಿಸುವ ಜೊತೆಗೆ ಪಾಲುದಾರರಿಗೆ ಮತ್ತು ವಿಶಾಲ ಜಗತ್ತಿಗೆ ಪರಸ್ಪರ ಪ್ರಯೋಜನಕಾರಿ, ದೃಢವಾದ ಮತ್ತು ಪರಿವರ್ತನಾತ್ಮಕ ಫಲಿತಾಂಶಗಳನ್ನು ನೀಡುವ ಗುರಿಯನ್ನು ಹೊಂದಿದೆ. ಭಾರತ-ಐರೋಪ್ಯ ಒಕ್ಕೂಟವು ಭದ್ರತೆ ಮತ್ತು ರಕ್ಷಣಾ ಪಾಲುದಾರಿಕೆಗೆ ಸಹಿ ಹಾಕುವುದರಿಂದ ಕಡಲ ಭದ್ರತೆ, ರಕ್ಷಣಾ ಉದ್ಯಮ ಮತ್ತು ತಂತ್ರಜ್ಞಾನ, ಸೈಬರ್ ಮತ್ತು ಹೈಬ್ರಿಡ್ ಬೆದರಿಕೆಗಳು, ಬಾಹ್ಯಾಕಾಶ ಮತ್ತು ಭಯೋತ್ಪಾದನೆ ನಿಗ್ರಹ ಸೇರಿದಂತೆ ಪರಸ್ಪರ ಸಮಾನ ಹಿತಾಸಕ್ತಿಗಳ ಕ್ಷೇತ್ರಗಳಲ್ಲಿ ಕಾರ್ಯತಂತ್ರದ ಸಹಕಾರವನ್ನು ಆಳಗೊಳಿಸುತ್ತದೆ ಎಂದು ಅವರು ಗಮನ ಸೆಳೆದರು.

ವ್ಯಾಪಾರ, ಆರ್ಥಿಕ ಸಹಕಾರ ಮತ್ತು ಹೂಡಿಕೆ

ಬೆಲ್ಜಿಯಂ ಪ್ರಸ್ತುತ ವಿಶ್ವದ 24ನೇ ಅತಿದೊಡ್ಡ ಆರ್ಥಿಕತೆಯಾಗಿದ್ದು, ಭಾರತ ಸಹ ಮುಂಬರುವ ವರ್ಷಗಳಲ್ಲಿ 10 ಟ್ರಿಲಿಯನ್ ಅಮೆರಿಕನ್ ಡಾಲರ್ ಆರ್ಥಿಕತೆಯಾಗುವ ಮಹತ್ವಾಕಾಂಕ್ಷೆಯನ್ನು ಹೊಂದಿದೆ. ಈ ಹಿನ್ನೆಲೆಯಲ್ಲಿ ಪರಸ್ಪರ ಲಾಭದಾಯಕ ಪಾಲುದಾರಿಕೆಗೆ ಹೇರಳವಾದ ಅವಕಾಶಗಳು ಇರುವುದನ್ನು ಉಭಯ ನಾಯಕರು ಒಪ್ಪಿಕೊಂಡರು. ತಮ್ಮ ಆರ್ಥಿಕತೆಗಳ ನಡುವಿನ ಬಲವಾದ ಪೂರಕತೆಗಳನ್ನು ಗುರುತಿಸಿದ ಉಭಯ ಪ್ರಧಾನಮಂತ್ರಿಗಳು ವ್ಯಾಪಾರ, ಹೂಡಿಕೆ ಮತ್ತು ಆರ್ಥಿಕ ಸಹಕಾರವನ್ನು ಆಳಗೊಳಿಸುವ ತಮ್ಮ ಬದ್ಧತೆಯನ್ನು ಪುನರುಚ್ಚರಿಸಿದರು. ಈ ನಿಟ್ಟಿನಲ್ಲಿ, ದ್ವಿಪಕ್ಷೀಯ ಆರ್ಥಿಕ ಸಂಬಂಧಗಳ ಸ್ಥಿರ ವಿಸ್ತರಣೆ ಮತ್ತು ದ್ವಿಪಕ್ಷೀಯ ವ್ಯಾಪಾರದಲ್ಲಿ ಕ್ಷೇತ್ರಗಳ ಹೆಚ್ಚುತ್ತಿರುವ ವೈವಿಧ್ಯೀಕರಣವನ್ನು ಅವರು ಸ್ವಾಗತಿಸಿದರು. ಜೊತೆಗೆ, ಮುಂದಿನ 5 ವರ್ಷಗಳಲ್ಲಿ ದ್ವಿಪಕ್ಷೀಯ ವ್ಯಾಪಾರವನ್ನು ದ್ವಿಗುಣಗೊಳಿಸಲು ಅನುವು ಮಾಡಿಕೊಡುವ ಉದ್ದೇಶದಿಂದ ಪರಸ್ಪರ ಸಮಾನ ಆಸಕ್ತಿಯ ಪ್ರಮುಖ ಕ್ಷೇತ್ರಗಳಲ್ಲಿ ಸಹಕಾರವನ್ನು ಮತ್ತಷ್ಟು ಬಲಪಡಿಸುವ ದೃಢ ನಿರ್ಧಾರವನ್ನು ವ್ಯಕ್ತಪಡಿಸಿದರು.

2025ರ ಮಾರ್ಚ್‌ನಲ್ಲಿ ಘನತೆವೆತ್ತ ರಾಜಕುಮಾರಿ ಆಸ್ಟ್ರಿಡ್ ನೇತೃತ್ವದಲ್ಲಿ ಬೆಲ್ಜಿಯಂನ ಆರ್ಥಿಕ ನಿಯೋಗದ ಯಶಸ್ವಿ ಭಾರತ ಭೇಟಿಯ ಬಗ್ಗೆ ಉಭಯ ಪ್ರಧಾನಮಂತ್ರಿಗಳು ತೃಪ್ತಿ ವ್ಯಕ್ತಪಡಿಸಿದರು. ದ್ವಿಪಕ್ಷೀಯ ಆರ್ಥಿಕ ತೊಡಗಿಸಿಕೊಳ್ಳುವಿಕೆಯನ್ನು ಮುನ್ನಡೆಸುವಲ್ಲಿ, ಮಹಿಳೆಯರ ಆರ್ಥಿಕ ಸಬಲೀಕರಣದ ವಿನಿಮಯ ಹಾಗೂ ಜೀವ ವಿಜ್ಞಾನ, ಔಷಧಗಳು ಮತ್ತು ಆರೋಗ್ಯ ರಕ್ಷಣೆ, ಇಂಧನ ಮತ್ತು ನವೀಕರಿಸಬಹುದಾದ ಇಂಧನ, ರಕ್ಷಣೆ, ಏರೋನಾಟಿಕ್ಸ್ ಮತ್ತು ಬಾಹ್ಯಾಕಾಶ, ಲಾಜಿಸ್ಟಿಕ್ಸ್, ಸಾರಿಗೆ ಮತ್ತು ಬಂದರುಗಳು, ಕ್ಲೀನ್‌ಟೆಕ್ ಮತ್ತು ಹಸಿರು ಎಂಜಿನಿಯರಿಂಗ್, ರಸಾಯನಶಾಸ್ತ್ರ, ಸುಧಾರಿತ ವಸ್ತುಗಳು ಮತ್ತು ಉತ್ಪಾದನೆ, ಡಿಜಿಟಲ್ ತಂತ್ರಜ್ಞಾನಗಳು ಮತ್ತು ನಾವೀನ್ಯತೆಗಳಂತಹ ಆದ್ಯತೆಯ ಕ್ಷೇತ್ರಗಳಲ್ಲಿ ಸಹಕಾರವನ್ನು ವಿಸ್ತರಿಸುವಲ್ಲಿ ಈ ನಿಯೋಗದ ಭೇಟಿಯು ಒಂದು ಪ್ರಮುಖ ಮೈಲುಗಲ್ಲು ಎಂದು ಅವರು ಗುರುತಿಸಿದರು. ಈ ನಿಟ್ಟಿನಲ್ಲಿ, ಔಷಧಗಳು, ಜೈವಿಕ ತಂತ್ರಜ್ಞಾನ, ವೈದ್ಯಕೀಯ ಸಂಶೋಧನೆ, ನಾವೀನ್ಯತೆ ಮತ್ತು ಸುಧಾರಿತ ಆರೋಗ್ಯ ಸೇವೆಗಳಲ್ಲಿ ಉಭಯ ದೇಶಗಳ ಪೂರಕ ಸಾಮರ್ಥ್ಯಗಳ ಮೇಲೆ ನೆಲೆಗೊಂಡ - ಜೀವ ವಿಜ್ಞಾನ ವಲಯದಲ್ಲಿ ಭಾರತ-ಬೆಲ್ಜಿಯಂ ಪಾಲುದಾರಿಕೆಯ ಬಲವಾದ ಸಾಮರ್ಥ್ಯವನ್ನು ಅವರು ಗಮನಿಸಿದರು. ಜೊತೆಗೆ ಉದ್ಯಮ, ಶೈಕ್ಷಣಿಕ ಮತ್ತು ಸಂಶೋಧನಾ ಸಂಸ್ಥೆಗಳ ನಡುವೆ ನಿಕಟ ಸಹಯೋಗವನ್ನು ಪ್ರೋತ್ಸಾಹಿಸಿದರು. ಬೆಲ್ಜಿಯಂನ ಪ್ರಾದೇಶಿಕ ವ್ಯಾಪಾರ ಮತ್ತು ಹೂಡಿಕೆ ಏಜೆನ್ಸಿಗಳೊಂದಿಗಿನ ನಿಯಮಿತ ಉನ್ನತ ಮಟ್ಟದ ವಿನಿಮಯಗಳ ಮೂಲಕ ಈ ವೇಗವನ್ನು ಜೀವಂತವಾಗಿರಿಸಲು ಇಬ್ಬರೂ ನಾಯಕರು ಒಪ್ಪಿಕೊಂಡರು.

ದ್ವಿಪಕ್ಷೀಯ ಆರ್ಥಿಕ ಸಂಬಂಧಗಳ ಬೆಳವಣಿಗೆ ಮತ್ತು ವೈವಿಧ್ಯೀಕರಣದ ಬಗ್ಗೆ ಉಭಯ ನಾಯಕರು ತೃಪ್ತಿ ವ್ಯಕ್ತಪಡಿಸಿದರು. ಖಾಸಗಿ ವಲಯದ ಪಾಲುದಾರರನ್ನು ಒಳಗೊಂಡ ಸಹಕಾರಕ್ಕಾಗಿ ಉದಯೋನ್ಮುಖ ಅವಕಾಶಗಳನ್ನು ಅನ್ವೇಷಿಸುವ ಮೂಲಕ ಸೆಮಿಕಂಡಕ್ಟರ್‌ಗಳು, ರಾಸಾಯನಿಕಗಳು, ಔಷಧಗಳು, ರಕ್ಷಣಾ ಕೈಗಾರಿಕಾ ಸಹಯೋಗ, ನಿರ್ಣಾಯಕ ಖನಿಜಗಳ ಸಂಸ್ಕರಣೆ ಮತ್ತು ಮರುಬಳಕೆ, ಸುಸ್ಥಿರ ಕೈಗಾರಿಕೆಗಳು ಮತ್ತು ಪರಮಾಣು ಶಕ್ತಿಯಂತಹ ಕ್ಷೇತ್ರಗಳಲ್ಲಿ ವಿಸ್ತರಿಸುತ್ತಿರುವ ಸಹಕಾರವನ್ನು ಸ್ವಾಗತಿಸಿದರು. ಮುಂಬೈ ಮತ್ತು ಸೂರತ್‌ನೊಂದಿಗೆ ಆಂಟ್‌ವೆರ್ಪ್ ಅನ್ನು ಸಂಪರ್ಕಿಸುವ ವಜ್ರದ ವ್ಯಾಪಾರದ ನಿರಂತರ ಪ್ರಾಮುಖ್ಯತೆಯನ್ನು ಇಬ್ಬರೂ ನಾಯಕರು ಮತ್ತಷ್ಟು ಒಪ್ಪಿಕೊಂಡರು ಮತ್ತು ಆರ್ಥಿಕ ನಿಶ್ಚಿತಾರ್ಥ ಮತ್ತು ಹಂಚಿಕೆಯ ಬೆಳವಣಿಗೆಗೆ ಹೊಸ ಮಾರ್ಗಗಳನ್ನು ಅನುಸರಿಸುವಾಗ ಈ ಐತಿಹಾಸಿಕ ಪಾಲುದಾರಿಕೆಯನ್ನು ಮತ್ತಷ್ಟು ಬಲಪಡಿಸಲು ಒಪ್ಪಿಕೊಂಡರು.

ಉಭಯ ದೇಶಗಳ ನಡುವಿನ ಕಡಲ ಮತ್ತು ಬಂದರು ಸಹಕಾರದ ಕಾರ್ಯತಂತ್ರದ ಮಹತ್ವವನ್ನು ಅವರು ಒತ್ತಿಹೇಳಿದರು. ಬಂದರು ಅಭಿವೃದ್ಧಿ, ಸರಕು-ಸಾಗಣೆ, ಸಂಪರ್ಕ, ಹೂಳೆತ್ತುವಿಕೆ ಮತ್ತು ಕಡಲಾಚೆಯ ಪವನ ಮೂಲಸೌಕರ್ಯದಲ್ಲಿ ಸಹಯೋಗವನ್ನು ಆಳಗೊಳಿಸುವ ಅವಕಾಶಗಳನ್ನು ಸ್ವಾಗತಿಸಿದರು. ಈ ನಿಟ್ಟಿನಲ್ಲಿ, 2026 ರ ಅಕ್ಟೋಬರ್‌ನಲ್ಲಿ ನವದೆಹಲಿಯಲ್ಲಿ ನಡೆದ "ಸಾಗರಮಂಥನ್: ದಿ ಗ್ರೇಟ್ ಓಷನ್ಸ್ ಡೈಲಾಗಿಕ್" ನಲ್ಲಿ 'ಫ್ಲೆಮಿಷ್ ಮೊಬಿಲಿಟಿ' ಮತ್ತು ಬಂದರು ಸಚಿವ ಅನಿಕ್ ಡಿ ರೈಡರ್ ಅವರ ಯೋಜಿತ ಭಾಗವಹಿಸುವಿಕೆಯನ್ನು ಅವರು ಸ್ವಾಗತಿಸಿದರು. 'ಎಪಿಇಸಿ' (ಆಂಟ್‌ವೆರ್ಪ್/ಫ್ಲಾಂಡರ್ಸ್ ಪೋರ್ಟ್ ಟ್ರೈನಿಂಗ್ ಸೆಂಟರ್) ಮತ್ತು ಭಾರತದ ಜವಾಹರಲಾಲ್ ನೆಹರು ಬಂದರು ಪ್ರಾಧಿಕಾರ (ಜೆಎನ್‌ಪಿಎ) ನಡುವಿನ ವರ್ಧಿತ ಸಹಕಾರದ ನಿರೀಕ್ಷೆಯನ್ನು ಅವರು ಸ್ವಾಗತಿಸಿದರು. ವಿಶೇಷವಾಗಿ ಭಾರತೀಯ ಬಂದರು ವಲಯದಾದ್ಯಂತ ಮತ್ತು ಕಡಲ ವಲಯದಾದ್ಯಂತ ನಿರ್ವಹಣೆಯ ಎಲ್ಲಾ ಹಂತಗಳಲ್ಲಿ ಅಧಿಕಾರಿಗಳು ಮತ್ತು ಉದ್ಯೋಗಿಗಳಿಗೆ ತರಬೇತಿಯ ಅಗತ್ಯಗಳನ್ನು ಗುರುತಿಸುವುದು ಮತ್ತು ಸಾಮರ್ಥ್ಯ ವೃದ್ಧಿ. ಭಾರತದ ಬಂದರು ಮೂಲಸೌಕರ್ಯದ ಅಭಿವೃದ್ಧಿಗೆ ಬೆಲ್ಜಿಯಂನ ಹೂಳೆತ್ತುವ ಪರಿಣತಿಯ ನಿರಂತರ ಕೊಡುಗೆ ಮತ್ತು ಕಡಲಾಚೆಯ ನವೀಕರಿಸಬಹುದಾದ ಇಂಧನ ಯೋಜನೆಗಳನ್ನು ಬೆಂಬಲಿಸುವಲ್ಲಿ ಅದರ ಸಂಭಾವ್ಯ ಪಾತ್ರವನ್ನು ಅವರು ಒಪ್ಪಿಕೊಂಡರು.

ಬೆಲ್ಗೋ-ಭಾರತೀಯ ಖಗೋಳ ವಿಜ್ಞಾನ ಮತ್ತು ಖಗೋಳ ಭೌತಶಾಸ್ತ್ರ ಜಾಲ (ಬಿಐಎನ್ಎ) ಮೂಲಕ ಖಗೋಳಶಾಸ್ತ್ರ, ಖಗೋಳ ಭೌತಶಾಸ್ತ್ರ ಮತ್ತು ಬಾಹ್ಯಾಕಾಶ ತಂತ್ರಜ್ಞಾನಗಳು ಸೇರಿದಂತೆ ಸಂಶೋಧನೆ ಮತ್ತು ಉನ್ನತ ಶಿಕ್ಷಣದಲ್ಲಿ ಭಾರತ ಮತ್ತು ಬೆಲ್ಜಿಯಂ ನಡುವಿನ ಗಾಢವಾದ ಸಹಕಾರವನ್ನು ಇಬ್ಬರೂ ಪ್ರಧಾನಮಂತ್ರಿಗಳು ಸ್ವಾಗತಿಸಿದರು. ದ್ವಿಪಕ್ಷೀಯ ವೈಜ್ಞಾನಿಕ ಸಹಯೋಗದ ಬಲವನ್ನು ಪ್ರತಿಬಿಂಬಿಸುವ ದೇವಸ್ಥಲ್ ಆಪ್ಟಿಕಲ್ ಟೆಲಿಸ್ಕೋಪ್, ದೇವಸ್ತಾಲ್ ಇಂಟರ್ನ್ಯಾಷನಲ್ ಲಿಕ್ವಿಡ್ ಮಿರರ್ ಟೆಲಿಸ್ಕೋಪ್, ಮೌಂಟ್ ಅಬು ಟೆಲಿಸ್ಕೋಪ್ ಮತ್ತು ಉದಯಪುರದ ಮಲ್ಟಿ-ಅಪ್ಲಿಕೇಶನ್ ಸೋಲಾರ್ ಟೆಲಿಸ್ಕೋಪ್ ಸೇರಿದಂತೆ ಭಾರತದ ಹಲವಾರು ಹೆಗ್ಗುರುತಿನ ಖಗೋಳ ಸೌಲಭ್ಯಗಳಿಗೆ ಬೆಲ್ಜಿಯಂನ ಕೊಡುಗೆಯನ್ನು ಅವರು ಉಲ್ಲೇಖಿಸಿದರು.

ಭಾರತ-ಬೆಲ್ಜಿಯಂ ಹೂಡಿಕೆ ಫಾಸ್ಟ್-ಟ್ರ್ಯಾಕ್ ಕಾರ್ಯವಿಧಾನದ ಪ್ರಾರಂಭವನ್ನು ಉಭಯ ನಾಯಕರು ಸ್ವಾಗತಿಸಿದರು ಮತ್ತು ದ್ವಿಪಕ್ಷೀಯ ಹೂಡಿಕೆ ಸಂಬಂಧಗಳನ್ನು ಮತ್ತಷ್ಟು ಬಲಪಡಿಸುವ ನಿಟ್ಟಿನಲ್ಲಿ ಇದೊಂದು ಪ್ರಮುಖ ಹೆಜ್ಜೆ ಎಂದು ಗುರುತಿಸಿದರು. ಭಾರತದಲ್ಲಿ ಬೆಲ್ಜಿಯಂನ ಹೂಡಿಕೆಗಳು ಮತ್ತು ಬೆಲ್ಜಿಯಂನಲ್ಲಿ ಭಾರತೀಯ ಹೂಡಿಕೆಗಳನ್ನು ಸುಗಮಗೊಳಿಸಲು ಮತ್ತು ವಿಸ್ತರಿಸಲು, ವ್ಯವಹಾರಗಳನ್ನು ಬೆಂಬಲಿಸಲು, ಹೂಡಿಕೆ ಅಡೆತಡೆಗಳನ್ನು ಪರಿಹರಿಸಲು ಮತ್ತು ಉಭಯ ದೇಶಗಳ ನಡುವೆ ದೀರ್ಘಕಾಲೀನ ಆರ್ಥಿಕ ಸಹಕಾರಕ್ಕೆ ಹೆಚ್ಚು ಅನುಕೂಲಕರ ವಾತಾವರಣವನ್ನು ಬೆಳೆಸಲು ಈ ಕಾರ್ಯವಿಧಾನವು ವಿಶೇಷ ವೇದಿಕೆಯಾಗಿ ಕಾರ್ಯನಿರ್ವಹಿಸುತ್ತದೆ ಎಂದು ಅವರು ಹೇಳಿದರು.

ಫೆಡರಲ್ ಹೋಲ್ಡಿಂಗ್ ಮತ್ತು ಇನ್‌ವೆಸ್ಟ್‌ಮೆಂಟ್‌ ಕಂಪನಿ (ಎಸ್ಎಫ್‌ಪಿಐಎಂ), ಬೆಲ್ಜಿಯಂನ ಸಾರ್ವಭೌಮ ಸಂಪತ್ತು ನಿಧಿ ಮತ್ತು ಭಾರತದ ರಾಷ್ಟ್ರೀಯ ಹೂಡಿಕೆ ಮತ್ತು ಮೂಲಸೌಕರ್ಯ ನಿಧಿ (ಎನ್ಐಐಎಫ್) ನಡುವೆ ನಡೆಯುತ್ತಿರುವ ಕಾರ್ಯಕ್ರಮಗಳನ್ನು ಉಭಯ ನಾಯಕರು ಸ್ವಾಗತಿಸಿದರು. ಇಂಡೋ-ಬೆಲ್ಜಿಯಂ ಆರ್ಥಿಕ ಮತ್ತು ಹೂಡಿಕೆ ಕಾರಿಡಾರ್ ಸ್ಥಾಪಿಸಲು ಸಹಾಯ ಮಾಡಲು ಎಸ್ಎಫ್‌ಪಿಐಎಂ-ಎನ್ಐಐಎಫ್ ನಡುವಿನ ಸಹಯೋಗವನ್ನು ಔಪಚಾರಿಕಗೊಳಿಸವ ಇಂಗಿತವನ್ನು ಅವರು ವ್ಯಕ್ತಪಡಿಸಿದರು. ಅಭಿವೃದ್ಧಿಶೀಲ ರಾಷ್ಟ್ರಗಳಿಗಾಗಿ ಬೆಲ್ಜಿಯನ್ ಹೂಡಿಕೆ ಕಂಪನಿ (ಬಿಐಒ ಇನ್ವೆಸ್ಟ್) ಕೊಡುಗೆಯನ್ನು ಅವರು ಸ್ವಾಗತಿಸಿದರು ಮತ್ತು ಪರಸ್ಪರ ಆಸಕ್ತಿಯ ಕ್ಷೇತ್ರಗಳಲ್ಲಿ ಬಯೋ ಇನ್ವೆಸ್ಟ್ ಮತ್ತು ಎನ್ಐಐಎಫ್ ನಡುವೆ ಸಂಭಾವ್ಯ ಸಹಕಾರವನ್ನು ಅನ್ವೇಷಿಸಲು ಸಹಮತಿಸಿದರು.

ದ್ವಿಪಕ್ಷೀಯ ಆರ್ಥಿಕ ಸಹಕಾರವನ್ನು ಮುಂದುವರಿಸಲು ಭಾರತ-ಬೆಲ್ಜಿಯಂ-ಲಕ್ಸೆಂಬರ್ಗ್ ಆರ್ಥಿಕ ಒಕ್ಕೂಟ (ಬಿಎಲ್ಇಯು) ಜಂಟಿ ಆರ್ಥಿಕ ಆಯೋಗದ ಮಹತ್ವವನ್ನು ಇಬ್ಬರೂ ಪ್ರಧಾನಮಂತ್ರಿಗಳು ಪುನರುಚ್ಚರಿಸಿದರು ಮತ್ತು ಈ ವರ್ಷಾಂತ್ಯದಲ್ಲಿ ಅದರ 19ನೇ ಅಧಿವೇಶನವನ್ನು ಎದುರು ನೋಡುತ್ತಿರುವುದಾಗಿ ಹೇಳಿದರು.

ರಕ್ಷಣೆ ಮತ್ತು ಭದ್ರತೆ ಸಹಕಾರ

ಗಡಿಯಾಚೆಗಿನ ಭಯೋತ್ಪಾದನೆ ಸೇರಿದಂತೆ ಭಯೋತ್ಪಾದನೆಯ ವಿರುದ್ಧದ ಹೋರಾಟದಲ್ಲಿ ಬೆಲ್ಜಿಯಂನ ಬೆಂಬಲವನ್ನು ಪ್ರಧಾನಮಂತ್ರಿ ಬಾರ್ಟ್ ಡಿ ವೆವರ್ ವ್ಯಕ್ತಪಡಿಸಿದರು. ಏಪ್ರಿಲ್ 2025ರಲ್ಲಿ ಭಾರತದ ಜಮ್ಮು ಮತ್ತು ಕಾಶ್ಮೀರದ ಪಹಲ್ಗಾಮ್‌ನ್ಲ್ಲಿ ಮುಗ್ಧ ನಾಗರಿಕರ ಮೇಲೆ ನಡೆದ ಭಯೋತ್ಪಾದಕ ದಾಳಿಯನ್ನು ಅವರು ಮತ್ತೊಮ್ಮೆ ಖಂಡಿಸಿದರು. ಭಯೋತ್ಪಾದನೆ ನಿಗ್ರಹಕ್ಕೆ ಸಮಗ್ರ/ಜಾಗತಿಕ ವಿಧಾನಕ್ಕೆ ತಮ್ಮ ಬದ್ಧತೆಯನ್ನು ಒತ್ತಿಹೇಳಿದರು. ಭಯೋತ್ಪಾದನೆಯನ್ನು ಯಾವುದೇ ರೂಪದಲ್ಲಿ ಮತ್ತು ಅಭಿವ್ಯಕ್ತಿಯಲ್ಲಿ ಮತ್ತು ಎಲ್ಲಿಯಾದರೂ ಎಂದಿಗೂ ಸಮರ್ಥಿಸಲು ಸಾಧ್ಯವಿಲ್ಲ ಎಂದು ಖಚಿತವಾಗಿ ಹೇಳಿದರು. ಜೊತೆಗೆ ಭಯೋತ್ಪಾದನೆ ಕೃತ್ಯಗಳ ಅಪರಾಧಿಗಳನ್ನು ಅಂತರರಾಷ್ಟ್ರೀಯ ಕಾನೂನಿಗೆ ಅನುಗುಣವಾಗಿ ಜವಾಬ್ದಾರರನ್ನಾಗಿ ಮಾಡಬೇಕೆಂದು ಕರೆ ನೀಡಿದರು. ಯುಎನ್ಎಸ್ಸಿ 1267 ನಿರ್ಬಂಧಗಳ ನೀತಿಯಡಿ ಗೊತ್ತುಪಡಿಸಿದ ಭಯೋತ್ಪಾದಕರು ಮತ್ತು ಭಯೋತ್ಪಾದಕ ಘಟಕಗಳು, ಭಯೋತ್ಪಾದಕ ಜಾಲಗಳು, ಅವರ ಸುರಕ್ಷಿತ ಆಶ್ರಯಗಳು ಮತ್ತು ಯುಎನ್ ಮತ್ತು ಎಫ್ಎಟಿಎಫ್ ಸೇರಿದಂತೆ ಅವರ ಹಣಕಾಸು ಒದಗಿಸುವಿಕೆಯ ವಿರುದ್ಧ ಅಂತರರಾಷ್ಟ್ರೀಯ ಸಮುದಾಯವು ಒಟ್ಟಾಗಿ ಕಾರ್ಯನಿರ್ವಹಿಸಬೇಕು ಎಂದು ಅವರು ಒಪ್ಪಿಕೊಂಡರು. ರಾಷ್ಟ್ರೀಯ, ಪ್ರಾದೇಶಿಕ ಮತ್ತು ಅಂತರರಾಷ್ಟ್ರೀಯ ಮಟ್ಟದಲ್ಲಿ ನಿರ್ಬಂಧಗಳ ಕಾರ್ಯವಿಧಾನಗಳ ಮೂಲಕ ಸೇರಿದಂತೆ ಭಯೋತ್ಪಾದನೆಯನ್ನು ತಡೆಗಟ್ಟಲು ಮತ್ತು ಎದುರಿಸಲು ಅಂತರರಾಷ್ಟ್ರೀಯ ಸಹಕಾರವನ್ನು ಬಲಪಡಿಸಲು ನಾಯಕರು ಕರೆ ನೀಡಿದರು. ಈ ನಿಟ್ಟಿನಲ್ಲಿ, ಭಯೋತ್ಪಾದಕ ಬೆದರಿಕೆಗಳನ್ನು ಎದುರಿಸಲು ದ್ವಿಪಕ್ಷೀಯ ಸಹಕಾರವನ್ನು ಹೆಚ್ಚಿಸುವ ಉದ್ದೇಶದಿಂದ ಭಯೋತ್ಪಾದನೆ ನಿಗ್ರಹ ಕುರಿತು ಬೆಲ್ಜಿಯಂ-ಭಾರತ ಜಂಟಿ ಕಾರ್ಯಪಡೆ ಸ್ಥಾಪಿಸುವ ಉದ್ದೇಶವನ್ನು ಅವರು ವ್ಯಕ್ತಪಡಿಸಿದರು.

ರಕ್ಷಣಾ ಸಹಕಾರದ ವಿಚಾರದಲ್ಲಿ, ನಿಯಮಿತ ವಿನಿಮಯ, ಸಿಬ್ಬಂದಿ ಮಾತುಕತೆಗಳು, ಶಿಕ್ಷಣ ಮತ್ತು ತರಬೇತಿ, ಸಂಶೋಧನಾ ಸಹಕಾರ ಮತ್ತು ರಕ್ಷಣಾ-ಕೈಗಾರಿಕಾ ಪಾಲುದಾರಿಕೆಗಾಗಿ ಚೌಕಟ್ಟನ್ನು ಸ್ಥಾಪಿಸುವ ಎರಡು ರಕ್ಷಣಾ ಸಚಿವಾಲಯಗಳ ನಡುವಿನ ಉದ್ದೇಶಿತ ಪತ್ರಕ್ಕೆ ಸಹಿ ಹಾಕಿರುವುದನ್ನು ಉಭಯ ಪ್ರಧಾನ ಮಂತ್ರಿಗಳು ಸ್ವಾಗತಿಸಿದರು. ದ್ವಿಪಕ್ಷೀಯ ರಕ್ಷಣಾ ಸಹಕಾರವನ್ನು ಸಾಂಸ್ಥಿಕಗೊಳಿಸಲು ಮತ್ತು ಮತ್ತಷ್ಟು ಬಲಪಡಿಸಲು ಮಾರ್ಚ್ 2025ರಲ್ಲಿ ಭಾರತ ಮತ್ತು ಬೆಲ್ಜಿಯಂನ ರಕ್ಷಣಾ ಸಚಿವರ ನಡುವೆ ಏರ್ಪಟ್ಟ ಒಡಂಬಡಿಕೆ ಆಧಾರದ ಮೇಲೆ ಒಪ್ಪಂದವು ನಿರ್ಮಾಣಗೊಂಡಿದೆ ಎಂದು ಅವರು ಗಮನಿಸಿದರು. ಕಡಲ ಭದ್ರತೆ, ಉದಯೋನ್ಮುಖ ತಂತ್ರಜ್ಞಾನಗಳು, ಶಿಕ್ಷಣ ಮತ್ತು ಮಿಲಿಟರಿ ವಿನಿಮಯ ಮತ್ತು ಇಂಡೋ-ಪೆಸಿಫಿಕ್ ಸಹಕಾರದ ಬಗ್ಗೆ ಎರಡು ರಕ್ಷಣಾ ಸಂಸ್ಥೆಗಳ ನಡುವೆ ನಿರಂತರವಾಗಿ ಗಾಢವಾಗುತ್ತಿರುವ ಸಂಬಂಧವನ್ನು ಉಭಯ ನಾಯಕರು ಸ್ವಾಗತಿಸಿದರು. ಈ ಸಂದರ್ಭದಲ್ಲಿ, ಬೆಲ್ಜಿಯಂ ಫ್ರಿಗೇಟ್ ಲಿಯೋಪೋಲ್ಡ್ Iರ ಯೋಜಿತ ಭಾರತ ಭೇಟಿ, ಬೆಲ್ಜಿಯಂ ರಕ್ಷಣಾ ಕಾಲೇಜು ತನ್ನ ವಿಶ್ವ ಅಧ್ಯಯನ ಪ್ರವಾಸ 2027 ಅನ್ನು ಭಾರತದಲ್ಲಿ ಆಯೋಜಿಸುವ ಉದ್ದೇಶ ಮತ್ತು 2026 ರ ಅಕ್ಟೋಬರ್ ನಲ್ಲಿ ಸಿಕಂದರಾಬಾದ್‌ನ 'ಕಾಲೇಜ್ ಆಫ್ ಡಿಫೆನ್ಸ್ ಮ್ಯಾನೇಜ್ಮೆಂಟ್'ನಿಂದ ಬೆಲ್ಜಿಯಂಗೆ ಅಧ್ಯಯನ ಪ್ರವಾಸವನ್ನು ಅವರು ಸ್ವಾಗತಿಸಿದರು.

ನವದೆಹಲಿಯಲ್ಲಿ ಬೆಲ್ಜಿಯಂನಿಂದ 'ಡಿಫೆನ್ಸ್‌ ಅಟಾಚ್‌' ನೇಮಕವನ್ನು ಅವರು ಸ್ವಾಗತಿಸಿದರು ಮತ್ತು ಮುಂದಿನ ದಿನಗಳಲ್ಲಿ ಬ್ರಸೆಲ್ಸ್ನಲ್ಲಿರುವ ಭಾರತೀಯ ರಾಯಭಾರ ಕಚೇರಿಯಲ್ಲಿ ನಿವಾಸಿ 'ಡಿಫೆನ್ಸ್‌ ಅಟಾಚ್‌' ನೇಮಿಸುವ ಭಾರತದ ನಿರ್ಧಾರವನ್ನು ಸ್ವಾಗತಿಸಿದರು. ಕಡಲ ಭದ್ರತೆ, ಉದಯೋನ್ಮುಖ ತಂತ್ರಜ್ಞಾನಗಳು ಮತ್ತು ಇಂಡೋ-ಪೆಸಿಫಿಕ್ನಲ್ಲಿ ಸಹಕಾರದ ಬಗ್ಗೆ ಎರಡು ರಕ್ಷಣಾ ಸಂಸ್ಥೆಗಳ ನಡುವೆ ಸ್ಥಿರವಾಗಿ ಆಳವಾಗುತ್ತಿರುವ ಸಂಬಂಧವನ್ನು ಉಭಯ ನಾಯಕರು ಸ್ವಾಗತಿಸಿದರು.

ಉಭಯ ಪ್ರಧಾನಮಂತ್ರಿಗಳು ಭಾರತ ಮತ್ತು ಬೆಲ್ಜಿಯಂ ನಡುವೆ ಹೆಚ್ಚುತ್ತಿರುವ ರಕ್ಷಣಾ-ಕೈಗಾರಿಕಾ ಸಹಕಾರವನ್ನು ಸ್ವಾಗತಿಸಿದರು ಮತ್ತು ಮಾರ್ಚ್ 2025ರಲ್ಲಿ ಭಾರತಕ್ಕೆ ಬೆಲ್ಜಿಯಂ ಆರ್ಥಿಕ ನಿಯೋಗದ ಭೇಟಿ ಸಮಯದಲ್ಲಿ ಅಂತಹ ಪಾಲುದಾರಿಕೆಗಳನ್ನು ಮತ್ತಷ್ಟು ಬಲಪಡಿಸಲಾಗಿದೆ ಎಂದು ಗಮನಿಸಿದರು. ರಕ್ಷಣಾ ಉತ್ಪಾದನೆ, ತಂತ್ರಜ್ಞಾನ, ನಾವೀನ್ಯತೆ, ಸಹ-ಅಭಿವೃದ್ಧಿ ಮತ್ತು ಸಹ-ಉತ್ಪಾದನೆಯಲ್ಲಿ ಮತ್ತಷ್ಟು ಸಹಯೋಗದ ಸಾಮರ್ಥ್ಯವನ್ನು ಗುರುತಿಸಿದ ಉಭಯ ನಾಯಕರು, ಬೆಲ್ಜಿಯಂ ಮತ್ತು ಭಾರತೀಯ ರಕ್ಷಣಾ ಉದ್ಯಮಗಳ ನಡುವೆ ಬಹು ಒಪ್ಪಂದಗಳು ಮತ್ತು ಪಾಲುದಾರಿಕೆಗಳಿಗೆ ಸಹಿ ಹಾಕಿರುವುದನ್ನು ಸ್ವಾಗತಿಸಿದರು. ಎರಡೂ ಕಡೆಯ ಕೈಗಾರಿಕೆಗಳು ತೊಡಗಿಸಿಕೊಳ್ಳಲು ಪ್ರೋತ್ಸಾಹಿಸಿದರು.

ಭಾರತ ಮತ್ತು ಬೆಲ್ಜಿಯಂನ ಹಂಚಿಕೆಯ ಐತಿಹಾಸಿಕ ಪರಂಪರೆಯನ್ನು ಸಂರಕ್ಷಿಸಲು ಮತ್ತು ಉತ್ತೇಜಿಸಲು ಕೊಡುಗೆ ನೀಡುವ ವೈಪ್ರೆಸ್‌ನಲ್ಲಿರುವ ಫ್ಲಾಂಡರ್ಸ್ ಫೀಲ್ಡ್ಸ್ ಮ್ಯೂಸಿಯಂ ಮತ್ತು ನವದೆಹಲಿಯ ಸಶಸ್ತ್ರ ಪಡೆಗಳ ಐತಿಹಾಸಿಕ ಸಂಶೋಧನಾ ಕೇಂದ್ರ (ಸಿಎಎಫ್ಎಚ್ಆರ್) ನಡುವೆ ನಡೆಯುತ್ತಿರುವ ಸಹಕಾರವನ್ನು ಇಬ್ಬರೂ ನಾಯಕರು ಗಮನಿಸಿದರು.

ಬಹುರಾಷ್ಟ್ರೀಯ ಸಂಘಟಿತ ಅಪರಾಧ, ಸೈಬರ್ ಅಪರಾಧ ಮತ್ತು ಸಂಬಂಧಿತ ವಿಷಯಗಳ ವಿರುದ್ಧ ಸಹಕಾರಕ್ಕಾಗಿ ಭಾರತದ ಕೇಂದ್ರೀಯ ತನಿಖಾ ಬ್ಯೂರೋ(ಸಿಬಿಐ) ಮತ್ತು ಬೆಲ್ಜಿಯಂನ ಫೆಡರಲ್ ಪೊಲೀಸ್ ನಡುವಿನ ತಿಳಿವಳಿಕೆ ಒಪ್ಪಂದಕ್ಕೆ ಸಹಿ ಹಾಕಿರುವುದನ್ನು ಇಬ್ಬರೂ ಪ್ರಧಾನಮಂತ್ರಿಗಳು ಸ್ವಾಗತಿಸಿದರು. ಈ ಒಪ್ಪಂದವು ಸಾಂಸ್ಥಿಕ ಸಂಪರ್ಕಗಳನ್ನು ಬಲಪಡಿಸುತ್ತದೆ, ಮಾಹಿತಿ ಹಂಚಿಕೆಗೆ ಅನುಕೂಲವಾಗುತ್ತದೆ, ಸಾಮರ್ಥ್ಯ ವರ್ಧನೆ ಮತ್ತು ಉತ್ತಮ ಅಭ್ಯಾಸಗಳ ವಿನಿಮಯವನ್ನು ಉತ್ತೇಜಿಸುತ್ತದೆ. ದೇಶಭ್ರಷ್ಟರನ್ನು ಪತ್ತೆಹಚ್ಚುವಲ್ಲಿ ಸಹಕಾರವನ್ನು ಹೆಚ್ಚಿಸುತ್ತದೆ ಮತ್ತು ಬಹುರಾಷ್ಟ್ರೀಯ ಸಂಘಟಿತ ಅಪರಾಧ, ಸೈಬರ್ ಅಪರಾಧ ಮತ್ತು ಸಂಬಂಧಿತ ವಿಷಯಗಳನ್ನು ಎದುರಿಸಲು ದ್ವಿಪಕ್ಷೀಯ ಕಾನೂನು ಜಾರಿ ಸಹಕಾರವನ್ನು ಆಳಗೊಳಿಸುತ್ತದೆ ಎಂದು ಅವರು ಗಮನ ಸೆಳೆದರು.

ಹಸಿರು ಪರಿವರ್ತನೆ, ಉದಯೋನ್ಮುಖ ತಂತ್ರಜ್ಞಾನಗಳು, ಆರೋಗ್ಯ ಸಹಕಾರ ಮತ್ತು ನವೋದ್ಯಮಗಳು

ಭಾರತ ಮತ್ತು ಬೆಲ್ಜಿಯಂ ನಡುವೆ ನವೀಕರಿಸಬಹುದಾದ ಇಂಧನ ಸಹಕಾರ ಕುರಿತು ನವೀಕೃತ ಒಪ್ಪಂದಕ್ಕೆ ಸಹಿ ಹಾಕಿರುವುದನ್ನು ಉಭಯು ಪ್ರಧಾನಮಂತ್ರಿಗಳು ಸ್ವಾಗತಿಸಿದರು. ನವೀಕೃತ ಒಪ್ಪಂದವು 2015ರ ನೀತಿಚೌಕಟ್ಟಿನ ಅಡಿಯಲ್ಲಿ ಸ್ಥಾಪಿಸಲಾದ ಸಹಕಾರ ಮತ್ತು ನವೀಕರಿಸಬಹುದಾದ ಇಂಧನ ಕುರಿತ ಜಂಟಿ ಕಾರ್ಯಪಡೆಯ ಕೆಲಸದ ಮೇಲೆ ಆಧರಿತವಾಗಿದೆ. ಜೊತೆಗೆ ಹಸಿರು ಜಲಜನಕ, ಸೌರಶಕ್ತಿ, ಇಂಧನ ಸಂಗ್ರಹಣೆ, ಕಡಲಾಚೆಯ ಪವನ ಶಕ್ತಿ, ಜೈವಿಕ ಶಕ್ತಿ, ಸಣ್ಣ ಜಲವಿದ್ಯುತ್ ಮತ್ತು ಪಂಪ್ಡ್ ಸ್ಟೋರೇಜ್ ಘಟಕಗಳು ಸೇರಿದಂತೆ ಪ್ರಮುಖ ಕ್ಷೇತ್ರಗಳಲ್ಲಿ ಸಹಯೋಗವನ್ನು ವಿಸ್ತರಿಸುತ್ತದೆ ಎಂದು ಅವರು ಗಮನಿಸಿದರು.

ಕೈಗಾರಿಕಾ ಪಾಲುದಾರಿಕೆ ಮತ್ತು ಜ್ಞಾನ ವಿನಿಮಯ ಸೇರಿದಂತೆ ಹಸಿರು ಜಲಜನಕ ಕ್ಷೇತ್ರದಲ್ಲಿ ಭಾರತ ಮತ್ತು ಬೆಲ್ಜಿಯಂ ನಡುವೆ ಹೆಚ್ಚುತ್ತಿರುವ ಸಹಯೋಗವನ್ನು ಉಭಯ ದೇಶಗಳು ಸ್ವಾಗತಿಸಿದವು. ಜಿಎಚ್2 ಭಾರತ, ಬೆಲ್ಜಿಯನ್ ಹೈಡ್ರೋಜನ್ ಕೌನ್ಸಿಲ್ ಮತ್ತು ಫ್ಲಾಂಡರ್ಸ್ ಇನ್‌ವೆಸ್ಟ್‌ಮೆಂಟ್ಸ್‌ & ಟ್ರೇಡ್ ನಡುವಿನ ಒಪ್ಪಂದದ ಅಡಿಯಲ್ಲಿ ಸಹಕಾರವನ್ನು ಅವರು ಒಪ್ಪಿಕೊಂಡರು. ಜೊತೆಗೆ ಬ್ರಸೆಲ್ಸ್‌ನಲ್ಲಿ ಎಗ್ಮಾಂಟ್ ಇನ್ಸ್‌ಟಿಟ್ಯೂಟ್‌ನ ಹಸಿರು ಹೈಡ್ರೋಜನ್ ವಿನಿಮಯ ಕಾರ್ಯಕ್ರಮದಲ್ಲಿ ಭಾರತೀಯ ಅಧಿಕಾರಿಗಳ ಸಕ್ರಿಯ ಭಾಗವಹಿಸುವಿಕೆ ಮತ್ತು ಎರಡೂ ದೇಶಗಳ ಸರ್ಕಾರ, ಉದ್ಯಮ ಮತ್ತು ಸಂಶೋಧನಾ ಪ್ರತಿನಿಧಿಗಳ ಪರಸ್ಪರ ಭೇಟಿಗಳನ್ನು ಒಪ್ಪಿಕೊಂಡರು. ಉತ್ಪಾದನೆ, ಸಾರಿಗೆ, ಸಂಗ್ರಹಣೆ ಮತ್ತು ಅಂತಿಮ ಬಳಕೆಯ ಅನ್ವಯಿಕೆಗಳು ಸೇರಿದಂತೆ ಹಸಿರು ಹೈಡ್ರೋಜನ್ ಮೌಲ್ಯ ಸರಪಳಿಯನ್ನು ಬಲಪಡಿಸುವಲ್ಲಿ ಭಾರತ ಮತ್ತು ಬೆಲ್ಜಿಯಂನ ಪ್ರಮುಖ ಪಾತ್ರವನ್ನು ನಾಯಕರು ಒತ್ತಿಹೇಳಿದರು.

ಬೆಲ್ಜಿಯಂ ಮತ್ತು ಭಾರತ ದೇಶಗಳು ತಾಪಮಾನದ ಗುರಿ ಹಾಗೂ ವಿಭಿನ್ನ ಜವಾಬ್ದಾರಿಗಳು ಸೇರಿದಂತೆ 'ಪ್ಯಾರಿಸ್ ಒಪ್ಪಂದ'ದ ದೀರ್ಘಕಾಲೀನ ಗುರಿಗಳ ವಿಚಾರದಲ್ಲಿ ತಮ್ಮ ಬದ್ಧತೆಯನ್ನು ಪುನರುಚ್ಚರಿಸಿವೆ. ಅನುಷ್ಠಾನವನ್ನು ಮುನ್ನಡೆಸುವ ಮತ್ತು ನೆಲದ ಮೇಲೆ ವರ್ಧಿತ ಕ್ರಮಕ್ಕೆ ಕಾರಣವಾಗುವ ಯಶಸ್ವಿ 'ಸಿಒಪಿ 31’ ಅನ್ನು ಅವು ಬೆಂಬಲಿಸುತ್ತವೆ. ವರ್ಧಿತ ಹವಾಮಾನ ಉಪಕ್ರಮ, ವಿಶೇಷವಾಗಿ ಅಭಿವೃದ್ಧಿಶೀಲ ರಾಷ್ಟ್ರಗಳಲ್ಲಿ, ಎಲ್ಲಾ ಮೂಲಗಳಿಂದ ಸಮರ್ಪಕ, ಊಹಿಸಬಹುದಾದ ಮತ್ತು ಪ್ರವೇಶಿಸಬಹುದಾದ ಹವಾಮಾನ ಹಣಕಾಸು ಕ್ರೋಢೀಕರಣ, ಅಭಿವೃದ್ಧಿ ಮತ್ತು ಪ್ರಸರಣ ಹವಾಮಾನ ತಂತ್ರಜ್ಞಾನಗಳು ಮತ್ತು ಸಾಮರ್ಥ್ಯ ವರ್ಧನೆಯ ಮೂಲಕ ಸಕ್ರಿಯಗೊಳಿಸಲಾಗಿದೆ. ಈ ಕ್ಷೇತ್ರಗಳಲ್ಲಿ ಅಂತರರಾಷ್ಟ್ರೀಯ ಸಹಕಾರವನ್ನು ಬಲಪಡಿಸುವ ಮಹತ್ವವನ್ನು ಉಭಯ ದೇಶಗಳು ಒತ್ತಿ ಒತ್ತಿಹೇಳುತ್ತವೆ. ಹವಾಮಾನ ಹೊಂದಾಣಿಕೆ, ಸ್ಥಿತಿಸ್ಥಾಪಕತ್ವ ಮತ್ತು ವಿಪತ್ತು ಸನ್ನದ್ಧತೆಯನ್ನು ಬಲಪಡಿಸಲು ಉಭಯ ದೇಶಗಳು ಬದ್ಧತೆ ವ್ಯಕ್ತಪಡಿಸಿವೆ. ಹವಾಮಾನ ಸ್ಥಿತಿಸ್ಥಾಪಕತ್ವ, ಸುಸ್ಥಿರ ಅಭಿವೃದ್ಧಿ ಮತ್ತು ಕರಾವಳಿ ಸಮುದಾಯಗಳ ಯೋಗಕ್ಷೇಮವನ್ನು ಬೆಂಬಲಿಸುವಲ್ಲಿ ಸಾಗರಗಳು ಮತ್ತು ಕರಾವಳಿ ಪರಿಸರ ವ್ಯವಸ್ಥೆಗಳ ಪ್ರಮುಖ ಪಾತ್ರವನ್ನು ಭಾರತ ಮತ್ತು ಬೆಲ್ಜಿಯಂ ಗುರುತಿಸಿವೆ. ಸುಸ್ಥಿರ ಅಭಿವೃದ್ಧಿ ಮತ್ತು ಹವಾಮಾನ ಸ್ಥಿತಿಸ್ಥಾಪಕತ್ವದ ಅಂಶವಾಗಿ ಬಲಗೊಂಡ ಸಾಗರ ಆಡಳಿತದ ಮಹತ್ವವನ್ನು ಗುರುತಿಸಿದ ಉಭಯ ನಾಯಕರು, ರಾಷ್ಟ್ರೀಯ ನ್ಯಾಯವ್ಯಾಪ್ತಿಯನ್ನು ಮೀರಿದ ಜೀವವೈವಿಧ್ಯ (ಬಿಬಿಎನ್‌ಜೆ) ಒಪ್ಪಂದ ಮತ್ತು ಕಡಲ ವ್ಯವಹಾರಗಳಲ್ಲಿ ವ್ಯಾಪಕ ಅಂತರರಾಷ್ಟ್ರೀಯ ಸಹಕಾರದ ಮಹತ್ವವನ್ನು ಒತ್ತಿಹೇಳಿದರು.

ಸೆಮಿಕಂಡಕ್ಟರ್ ಕಂಪನಿಗಳು, ಚಿಪ್ಇನ್ ಸೆಂಟರ್, ಸಿ-ಡಾಕ್, ವಿಶ್ವವಿದ್ಯಾಲಯಗಳು ಮತ್ತು ಬೆಲ್ಜಿಯಂನ ಐಎಂಇಸಿ ಸೇರಿದಂತೆ ಭಾರತೀಯ ಮೈಕ್ರೋ-ಎಲೆಕ್ಟ್ರಾನಿಕ್ಸ್ ಪರಿಸರ ವ್ಯವಸ್ಥೆಯ ನಡುವಿನ ಕಾರ್ಯಕ್ರಮಗಳನ್ನು ಉಭಯ ನಾಯಕರು ಪ್ರೋತ್ಸಾಹಿಸಿದರು. ಸೆಮಿಕಂಡಕ್ಟರ್ ತಂತ್ರಜ್ಞಾನಗಳಲ್ಲಿ ಆಳವಾದ ಪಾಲುದಾರಿಕೆಯಾಗಿ ಅಭಿವೃದ್ಧಿ ಹೊಂದಲು ಈ ಸಂವಹನಗಳಿಗೆ ಅವರು ತಮ್ಮ ಬೆಂಬಲವನ್ನು ವ್ಯಕ್ತಪಡಿಸಿದರು. ಆ ಮೂಲಕ ಎರಡೂ ದೇಶಗಳಲ್ಲಿ ಸ್ಥಿತಿಸ್ಥಾಪಕ ಮತ್ತು ಸುಧಾರಿತ ತಂತ್ರಜ್ಞಾನ ಪರಿಸರ ವ್ಯವಸ್ಥೆಗಳ ರಚನೆಗೆ ಇವು ಕೊಡುಗೆ ನೀಡಲಿವೆ.

ಭಾರತ ಆಯೋಜಿಸಿದ್ದ 'ಎಐ ಇಂಪ್ಯಾಕ್ಟ್' ಶೃಂಗಸಭೆಯಲ್ಲಿ ಫ್ಲಾಂಡರ್ಸ್ ಸರ್ಕಾರದ ಸಚಿವರು-ಅಧ್ಯಕ್ಷರ ಭಾಗವಹಿಸುವಿಕೆಯನ್ನು ಉಭಯ ನಾಯಕರು ಸ್ವಾಗತಿಸಿದರು, ಈ ಭೇಟಿಯು ಕೃತಕ ಬುದ್ಧಿಮತ್ತೆ, ಉದಯೋನ್ಮುಖ ತಂತ್ರಜ್ಞಾನಗಳು ಮತ್ತು ನಾವೀನ್ಯತೆಗಳಲ್ಲಿ ಸಹಕಾರದ ಹೆಚ್ಚುತ್ತಿರುವ ಮಹತ್ವವನ್ನು ಒತ್ತಿಹೇಳುತ್ತದೆ ಎಂದು ಹೇಳಿದರು.

ಸ್ಟಾರ್ಟ್ಅಪ್ ಇನ್‌ಕ್ಯೂಬೇಷನ್‌ ಕ್ಷೇತ್ರಗಳಲ್ಲಿ ಸಹಕಾರವನ್ನು ಎರಡೂ ಕಡೆಯವರು ಸ್ವಾಗತಿಸಿದರು. ಈ ನಿಟ್ಟಿನಲ್ಲಿ, ಎಂಇಐಟಿವೈ ಸ್ಟಾರ್ಟ್ ಅಪ್ ಹಬ್ ಮತ್ತು ಹಬ್ ಬ್ರಸೆಲ್ಸ್, ಹಾಗೂ ಇತರ ಸ್ಟಾರ್ಟ್ಅಪ್ ಹಬ್‌ಗಳು ಮತ್ತು ಕೌಶಲ್ಯ ಕೇಂದ್ರಗಳ ನಡುವಿನ ಸಹಯೋಗವನ್ನು ಮುಂದುವರಿಸಲು, ನಾವೀನ್ಯತೆ-ಚಾಲಿತ ಉದ್ಯಮಶೀಲತೆಯನ್ನು ಬೆಂಬಲಿಸುವ ಮೂಲಕ ಮತ್ತು ಡಿಜಿಟಲ್ ಕೌಶಲ್ಯ ಅಭಿವೃದ್ಧಿಯನ್ನು ಹೆಚ್ಚಿಸುವ ಮೂಲಕ ನವೋದ್ಯಮ ಪರಿಸರ ವ್ಯವಸ್ಥೆಗಳನ್ನು ಉತ್ತೇಜಿಸಲು ಉಭಯ ನಾಯಕರು ಸಹಮತಿಸಿದರು.

ಸಂಪರ್ಕ, ಸಾರಿಗೆ, ಶಿಕ್ಷಣ, ಸಂಸ್ಕೃತಿ ಮತ್ತು ಜನರ ನಡುವಿನ ಸಂಬಂಧಗಳು

ಪರಿಣಾಮಕಾರಿ ವೀಸಾ ಸೇವೆಗಳೊಂದಿಗೆ ಜನರ ನಡುವಿನ ಬಾಂಧವ್ಯ ಮತ್ತು ಸಂಪರ್ಕವನ್ನು ಆಧಾರವಾಗಿಡುವ ಪ್ರಾಮುಖ್ಯತೆಯನ್ನು ಇಬ್ಬರೂ ನಾಯಕರು ಗುರುತಿಸಿದರು. ಈ ಸನ್ನಿವೇಶದಲ್ಲಿ, ಸುಗಮ ಮತ್ತು ತ್ವರಿತ ಪ್ರಕ್ರಿಯೆಯ ಅಗತ್ಯವನ್ನು ಅವರು ಗುರುತಿಸಿದರು. ಭಾರತ ಮತ್ತು ಬೆಲ್ಜಿಯಂ ನಡುವಿನ ವಿನಿಮಯವು ತೀವ್ರಗೊಳ್ಳುತ್ತಿರುವುದರಿಂದ, ಬೆಲ್ಜಿಯಂ ಮತ್ತು ಭಾರತದಲ್ಲಿನ ರಾಜತಾಂತ್ರಿಕ ಕಾರ್ಯೋಗಗಳಿಂದ ವೀಸಾ ಪ್ರಕ್ರಿಯೆ ಸಾಮರ್ಥ್ಯವು ಗಮನಾರ್ಹವಾಗಿ ಹೆಚ್ಚಾಗುತ್ತದೆ. ನಿರ್ದಿಷ್ಟ ಅಗತ್ಯವನ್ನು ಗಮನದಲ್ಲಿಟ್ಟುಕೊಂಡು, ಭಾರತದಲ್ಲಿ ಬೆಲ್ಜಿಯನ್ ವೀಸಾ ವಿತರಣಾ ಸೇವೆಗಳ ನಡೆಯುತ್ತಿರುವ ಬಲವರ್ಧನೆಯನ್ನು ಉಭಯ ನಾಯಕರು ಸ್ವಾಗತಿಸಿದರು.

ಸಂಚಾರ ಸಹಕಾರದ ಸಮಗ್ರ ಚೌಕಟ್ಟು ಕುರಿತ ಐರೋಪ್ಯ ಒಕ್ಕೂಟದ ಒಪ್ಪಂದಕ್ಕೆ ಸಹಿ ಹಾಕಿರುವುದನ್ನು ಸ್ವಾಗತಿಸಿದ ನಾಯಕರು, ವೃತ್ತಿಪರರು, ನುರಿತ ಕಾರ್ಯಪಡೆ ಮತ್ತು ವಿದ್ಯಾರ್ಥಿಗಳ ಚಲನೆಗೆ ಕಾನೂನು ಮಾರ್ಗಗಳನ್ನು ಉತ್ತೇಜಿಸುವಲ್ಲಿ ಮತ್ತು ಭಾರತ ಮತ್ತು ಐರೋಪ್ಯ ಒಕ್ಕೂಟದ ಜನರ ನಡುವಿನ ಸಂಬಂಧಗಳನ್ನು ಬಲಪಡಿಸುವಲ್ಲಿ ಅದರ ಪಾತ್ರವನ್ನು ಗಮನಿಸಿದರು. ವ್ಯಾಪಾರ, ಹೂಡಿಕೆ ಮತ್ತು ಜನರ ನಡುವಿನ ಸಂಬಂಧಗಳು ಬೆಳೆಯುತ್ತಲೇ ಇರುವ ಹಿನ್ನೆಲೆಯಲ್ಲಿ ನುರಿತ ವೃತ್ತಿಪರರು, ವಿದ್ಯಾರ್ಥಿಗಳು, ಸಂಶೋಧಕರು ಮತ್ತು ವ್ಯಾಪಾರ ಪ್ರಯಾಣಿಕರ ವರ್ಧಿತ ಚಲನಶೀಲತೆ ಅತ್ಯಗತ್ಯ ಎಂದು ಅವರು ಒಪ್ಪಿಕೊಂಡರು. ಸಂಪರ್ಕವನ್ನು ಬಲಪಡಿಸುವ ಮಹತ್ವವನ್ನು ಉಭಯ ನಾಯಕರು ಒತ್ತಿಹೇಳಿದರು ಮತ್ತು ಬೆಲ್ಜಿಯಂ ಮತ್ತು ಭಾರತದ ನಡುವೆ ನೇರ ವಾಯು ಸಂಪರ್ಕವನ್ನು ಸ್ಥಾಪಿಸಲು ವಿಮಾನಯಾನ ನಿರ್ವಾಹಕರನ್ನು ಪ್ರೋತ್ಸಾಹಿಸಿದರು. ಭಾರತದಿಂದ ಬೆಲ್ಜಿಯಂಗೆ ಅರ್ಹ ದಾದಿಯರ ಸಂಚಾರಕ್ಕೆ ಅನುಕೂಲವಾಗುವಂತೆ ಮತ್ತು ಆರೋಗ್ಯ ಮತ್ತು ಶಿಕ್ಷಣ ಕ್ಷೇತ್ರಗಳಲ್ಲಿ ಬೆಲ್ಜಿಯಂ ಮತ್ತು ಭಾರತದ ನಡುವೆ ವ್ಯಾಪಕ ಮತ್ತು ಹೆಚ್ಚುತ್ತಿರುವ ನಾಗರಿಕ ಸಮಾಜ ಸಹಕಾರ ಸೇರಿದಂತೆ ಆರೋಗ್ಯ ಕ್ಷೇತ್ರದಲ್ಲಿ ಬೆಲ್ಜಿಯಂ ಆರೋಗ್ಯ ಸಂಸ್ಥೆಗಳು ಮತ್ತು ಭಾರತದ ನಡುವೆ ನಡೆಯುತ್ತಿರುವ ಸಹಕಾರವನ್ನು ಅವರು ಸ್ವಾಗತಿಸಿದರು. ಸಂಚಾರ ಮತ್ತು ವಲಸೆ ಕುರಿತು ಒಪ್ಪಂದಕ್ಕೆ ಸಹಿ ಹಾಕುವ ನಿಟ್ಟಿನಲ್ಲಿ ನಿರಂತರ ಚರ್ಚೆಗಳನ್ನು ಅವರು ಪ್ರೋತ್ಸಾಹಿಸಿದರು.

ಬೆಲ್ಜಿಯಂ ಆರ್ಥಿಕ ನಿಯೋಗದ ವೇಳೆ ರೂಪುಗೊಂಡ ಹಲವಾರು ಶೈಕ್ಷಣಿಕ ಸಹಭಾಗಿತ್ವವನ್ನು ಸ್ಮರಿಸಿದ ಪ್ರಧಾನಮಂತ್ರಿ ಮೋದಿಯವರು, ಭಾರತದ ಹೊಸ ಶಿಕ್ಷಣ ನೀತಿಯಡಿ ಭಾರತದಲ್ಲಿ ಕ್ಯಾಂಪಸ್ಗಳನ್ನು ತೆರೆಯಲು ಬೆಲ್ಜಿಯಂನ ಪ್ರಮುಖ ವಿಶ್ವವಿದ್ಯಾಲಯಗಳು ಮತ್ತು ಪ್ರಮುಖ ಶೈಕ್ಷಣಿಕ ಸಂಸ್ಥೆಗಳಿಗೆ ಆಹ್ವಾನ ನೀಡಿದರು. ಉತ್ತಮ ಅಭ್ಯಾಸಗಳ ವಿನಿಮಯ, ಉದ್ಯಮ-ಸ್ಪಂದಿಸುವ ತರಬೇತಿ, ತರಬೇತುದಾರರು ಮತ್ತು ಮೌಲ್ಯಮಾಪಕರ ಸಾಮರ್ಥ್ಯ ವರ್ಧನೆ, ಅಪ್ರೆಂಟಿಸ್‌ಶಿಪ್‌ ಮತ್ತು ಕೆಲಸ ಆಧಾರಿತ ಕಲಿಕೆ, ಉದಯೋನ್ಮುಖ ಮತ್ತು ಭವಿಷ್ಯದ ಕೌಶಲ್ಯಗಳಲ್ಲಿ ಸಹಕಾರ ಮತ್ತು ಅರ್ಹತೆಗಳ ಹೊಂದಾಣಿಕೆ ಮತ್ತು ಗುರುತಿಸುವಿಕೆಯ ಬಗ್ಗೆ ಮಾತುಕತೆ ಸೇರಿದಂತೆ ಎರಡೂ ದೇಶಗಳ ಸಂಬಂಧಿತ ಪ್ರಾಧಿಕಾರಗಳು, ಸಂಸ್ಥೆಗಳು ಮತ್ತು ಉದ್ಯಮದ ಪಾಲುದಾರರನ್ನು ಉಭಯ ನಾಯಕರು ಪ್ರೋತ್ಸಾಹಿಸಿದರು. ಭಾರತೀಯ ಪಾಲುದಾರರೊಂದಿಗೆ ಸಂಶೋಧನಾ ಸಹಕಾರ, ನಾವೀನ್ಯತೆ ಮತ್ತು ಜ್ಞಾನ ವಿನಿಮಯವನ್ನು ಉತ್ತೇಜಿಸುವಲ್ಲಿ ಫ್ಲೆಮಿಶ್ ಇನ್ಸ್ಟಿಟ್ಯೂಟ್ ಫಾರ್ ಟೆಕ್ನಾಲಜಿಕಲ್ ರಿಸರ್ಚ್ (ವಿಟಿಟಿಒ) ನೀಡಿದ ಕೊಡುಗೆಯನ್ನು ನಾಯಕರು ಒಪ್ಪಿಕೊಂಡರು. ರಾಜತಾಂತ್ರಿಕ ತರಬೇತಿಯಲ್ಲಿ ಸುಷ್ಮಾ ಸ್ವರಾಜ್ ವಿದೇಶಾಂಗ ಸೇವೆಯ ಸಂಸ್ಥೆ ಮತ್ತು ಬೆಲ್ಜಿಯಂನ ಫೆಡರಲ್ ಸಾರ್ವಜನಿಕ ಸೇವಾ ವಿದೇಶಾಂಗ ವ್ಯವಹಾರಗಳ ನಡುವಿನ ಸಹಕಾರವನ್ನು ಅವರು ಸ್ವಾಗತಿಸಿದರು.

ಅಂತರರಾಷ್ಟ್ರೀಯ ಸಮಸ್ಯೆಗಳು

ಉಕ್ರೇನ್ ಮತ್ತು ಪಶ್ಚಿಮ ಏಷ್ಯಾದಲ್ಲಿನ ಇತ್ತೀಚಿನ ಬೆಳವಣಿಗೆಗಳು ಸೇರಿದಂತೆ ಪ್ರಮುಖ ಅಂತರರಾಷ್ಟ್ರೀಯ ಬೆಳವಣಿಗೆಗಳ ಬಗ್ಗೆಯೂ ಉಭಯ ಪ್ರಧಾನ ಮಂತ್ರಿಗಳು ಅಭಿಪ್ರಾಯಗಳನ್ನು ವಿನಿಮಯ ಮಾಡಿಕೊಂಡರು. ಉಕ್ರೇನ್ ನಲ್ಲಿನ ಯುದ್ಧಕ್ಕೆ ಸಂಬಂಧಿಸಿದಂತೆ, ವಿಶ್ವಸಂಸ್ಥೆಯ ಸನ್ನದು ಮತ್ತು ಅಂತರರಾಷ್ಟ್ರೀಯ ಕಾನೂನಿನ ತತ್ವಗಳಿಗೆ ಅನುಗುಣವಾಗಿ ಮಾತುಕತೆ ಮತ್ತು ರಾಜತಾಂತ್ರಿಕತೆಯ ಮೂಲಕ ಸಮಗ್ರ, ನ್ಯಾಯಯುತ ಮತ್ತು ಶಾಶ್ವತ ಶಾಂತಿಯನ್ನು ಸಾಧಿಸುವ ಪ್ರಯತ್ನಗಳಿಗೆ ಉಭಯ ನಾಯಕರು ತಮ್ಮ ಬೆಂಬಲವನ್ನು ಪುನರುಚ್ಚರಿಸಿದರು. ಪಶ್ಚಿಮ ಏಷ್ಯಾದಲ್ಲಿ, ಅವರು ಈ ಪ್ರದೇಶದ ಇತ್ತೀಚಿನ ಕಾಳಜಿಯ ಬೆಳವಣಿಗೆಗಳ ಬಗ್ಗೆ ಚರ್ಚಿಸಿದರು ಮತ್ತು ಶಾಂತಿಯುತ ರೀತಿಯಲ್ಲಿ ಸವಾಲುಗಳನ್ನು ಎದುರಿಸಲು ಮಾತುಕತೆ ಮತ್ತು ರಾಜತಾಂತ್ರಿಕ ತೊಡಗಿಸಿಕೊಳ್ಳುವಿಕೆಯ ಮಹತ್ವವನ್ನು ಒತ್ತಿಹೇಳಿದರು. ಕಡಲ ಮಾರ್ಗಗಳ ಸುರಕ್ಷತೆ ಮತ್ತು ಭದ್ರತೆಯನ್ನು ಖಾತ್ರಿಪಡಿಸುವ ಮತ್ತು ಸುರಕ್ಷಿತ ಮತ್ತು ಅಡೆತಡೆಯಿಲ್ಲದ ಕಡಲ ಹಡಗು ಸಾಗಣೆಯನ್ನು ನಿರ್ವಹಿಸುವ ಮಹತ್ವವನ್ನು ಅವರು ಒತ್ತಿ ಹೇಳಿದರು.

ಪರಸ್ಪರ ನಂಬಿಕೆ ಮತ್ತು ಶಾಂತಿ, ಸಮೃದ್ಧಿ ಮತ್ತು ಅಭಿವೃದ್ಧಿಯ ಹಂಚಿಕೆಯ ದೃಷ್ಟಿಕೋನದಿಂದ ಮಾರ್ಗದರ್ಶನ ಪಡೆದ ಭಾರತ-ಬೆಲ್ಜಿಯಂ ಪಾಲುದಾರಿಕೆಯನ್ನು ಮತ್ತಷ್ಟು ಗಾಢವಾಗಿಸುವ ಮತ್ತು ವೈವಿಧ್ಯಗೊಳಿಸುವ ತಮ್ಮ ಹಂಚಿಕೆಯ ಬದ್ಧತೆಯನ್ನು ಉಭಯ ಪ್ರಧಾನಮಂತ್ರಿಗಳು ಪುನರುಚ್ಚರಿಸಿದರು. ವಿಸ್ತರಣೆಯಾಗುತ್ತಿರುವ ದ್ವಿಪಕ್ಷೀಯ ಸಹಭಾಗಿತ್ವವು ಪ್ರಜಾಪ್ರಭುತ್ವ, ಕಾನೂನಿನ ನಿಯಮ, ಮಾನವ ಹಕ್ಕುಗಳ ಗೌರವ, ಲಿಂಗ ಸಮಾನತೆ ಮತ್ತು ನಿಯಮಾಧಾರಿತ ಅಂತರರಾಷ್ಟ್ರೀಯ ವ್ಯವಸ್ಥೆಗೆ ಹಂಚಿಕೆಯ ಬದ್ಧತೆಯಿಂದ ಮುಂದುವರಿಯುತ್ತದೆ ಎಂದು ಅವರು ಸಮ್ಮತಿಸಿದರು. ಈ ಅಡಿಪಾಯಗಳ ಆಧಾರದ ಮೇಲೆ, ಭಾರತ-ಬೆಲ್ಜಿಯಂ ಸಹಭಾಗಿತ್ವವು ಜನರಿಗೆ ಮತ್ತು ಜಗತ್ತಿಗೆ ಸ್ಪಷ್ಟವಾದ ಪ್ರಯೋಜನಗಳನ್ನು ನೀಡುವುದನ್ನು ಮುಂದುವರಿಸುತ್ತದೆ ಮತ್ತು ಹಂಚಿಕೆಯ ಜಾಗತಿಕ ಸವಾಲುಗಳನ್ನು ಎದುರಿಸುವಲ್ಲಿ ಭಾರತ ಮತ್ತು ಯುರೋಪ್ ನಡುವಿನ ಸಹಯೋಗವನ್ನು ಬಲಪಡಿಸಲು ಕೊಡುಗೆ ನೀಡುತ್ತದೆ ಎಂಬ ವಿಶ್ವಾಸವನ್ನು ಅವರು ವ್ಯಕ್ತಪಡಿಸಿದರು.

ಭಾರತ-ಬೆಲ್ಜಿಯಂ ನಡುವೆ ಹೆಚ್ಚಿದ ಪಾಲುದಾರಿಕೆ, ವೈವಿಧ್ಯೀಕರಣ ಮತ್ತು ಹೆಚ್ಚುತ್ತಿರುವ ಭಾರತ-ಯುರೋಪ್ ಕಾರ್ಯಕ್ರಮಗಳು ಹಾಗೂ ಭಾರತ-ಐರೋಪ್ಯ ಒಕ್ಕೂಟ ಬಾಂಧವ್ಯದ ಹಿನ್ನೆಲೆಯಲ್ಲಿ, ಪ್ರಧಾನಮಂತ್ರಿ ಬಾರ್ಟ್ ಡಿ ವೆವರ್ ಅವರು ಅನುಕೂಲಕರ ಸಮಯದಲ್ಲಿ ಬೆಲ್ಜಿಯಂಗೆ ದ್ವಿಪಕ್ಷೀಯ ಭೇಟಿ ನೀಡುವಂತೆ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರಿಗೆ ಆಹ್ವಾನ ನೀಡಿದರು.

*****