કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયા, ભારતીય ક્રિકેટ ટીમના હેડ કોચ ગૌતમ ગંભીર, રેસલર સંગ્રામ સિંહ અને અભિનેત્રી મધુરિમા તુલીએ આજે જવાહરલાલ નેહરુ સ્ટેડિયમ ખાતે બ્રિક્સ (BRICS)ના સહયોગથી આયોજિત 'ફિટ ઇન્ડિયા સન્ડેઝ ઓન સાયકલની રાષ્ટ્રીય રમતગમત દિવસ નિમિત્તે આયોજિત વિશેષ આવૃત્તિમાં સહભાગીઓનું નેતૃત્વ કર્યું હતું.

આ કાર્યક્રમ દેશભરમાં 25,000 થી વધુ સ્થળોએ એકસાથે યોજાયો હતો, જે સાપ્તાહિક સાયકલિંગ આંદોલન માટે વધુ એક મહત્વપૂર્ણ સીમાચિહ્નરૂપ છે.

ડૉ.માંડવિયાએ જણાવ્યું હતું કે 88મી આવૃત્તિ વિશેષ મહત્વ ધરાવે છે કારણ કે ભારત 12-13 સપ્ટેમ્બરના રોજ ભારત મંડપમ ખાતે 18મી બ્રિક્સ (BRICS) શિખર સંમેલનની યજમાની કરી રહ્યું છે.

ડૉ.માંડવિયાએ જણાવ્યું હતું કે, "આ અઠવાડિયાની આવૃત્તિ અમારા આદરણીય મહાનુભાવો અને બ્રિક્સ (BRICS)ના સભ્યોને સમર્પિત છે જેઓ 12 અને 13 તારીખે યોજાનાર શિખર સંમેલનનો ભાગ બનશે. આજે તેમનું સ્વાગત કરતા અમને ખૂબ જ આનંદ થાય છે." 

ડૉ.માંડવિયાએ સાયકલિંગના ત્રિપક્ષીય લાભો - ફિટનેસ, પ્રદૂષણમાં ઘટાડો અને ટ્રાફિક જામમાં રાહત - પર ભાર મૂક્યો હતો અને નાગરિકોને સાયકલિંગને દૈનિક સાપ્તાહિક દિનચર્યાનો ભાગ બનાવવા આગ્રહ કર્યો હતો. 

ડૉ. માંડવિયાએ વધુમાં જણાવ્યું કે, "'સન્ડેઝ ઓન સાયકલ'ની 88મી આવૃત્તિ દેશભરમાં 25,000 થી વધુ સ્થળોએ શરૂ થઈ ગઈ છે. સાયકલિંગનો ક્રેઝ દેશવ્યાપી વધી રહ્યો છે, અને 'સન્ડેઝ ઓન સાયકલ' ધીમે ધીમે લોકોમાં એક ઝૂનૂન બની રહ્યો છે. ચાલો આપણે બધા દરરોજ એક કલાક માટે મોબાઈલ અને કોમ્પ્યુટર સ્ક્રીનથી દૂર રહીને બહાર જઈએ, સાયકલ ચલાવીએ, રમતો રમીએ અને પોતાને ફિટ રાખીએ."

બ્રિક્સ ભાગીદાર દેશોના પ્રતિષ્ઠિત પ્રતિનિધિઓમાં મલેશિયાના હાઇ કમિશનના ચાર્જ ડી'અફેર્સ, શ્રીમતી શરીફા એઝનેડા વાફા સૈયદ ઝુલ્કરનૈન વાફા; વિયેતનામ દૂતાવાસના નિયુક્ત રાજદૂત શ્રી ત્રિન્હ મિન્હ માન; ઇન્ડોનેશિયાના દૂતાવાસના ચાર્જ ડી'અફેર્સ શ્રી યુધો સાસોંગકો; બેલારુસના દૂતાવાસના રાજદૂત શ્રી મિખાઇલ કાસ્કો; ક્યુબાના દૂતાવાસના રાજદૂત શ્રી જુઆન કાર્લોસ માર્સન એગુઇલેરા; ઇથોપિયાના દૂતાવાસના રાજદૂત શ્રી નેબીયુ ટેડલા નેગાશ; અને રશિયાના દૂતાવાસના મંત્રી-કાઉન્સેલર અને ડેપ્યુટી હેડ ઓફ મિશન શ્રી રોમન બાબુશકિનનો સમાવેશ થાય છે.

આ પ્રસંગે ઉપસ્થિત વરિષ્ઠ સરકારી અધિકારીઓમાં રમતગમત વિભાગના સચિવ શ્રી હરિ રંજન રાવ, યુવા બાબતોના વિભાગના સચિવ શ્રી સુનિલ પાલીવાલ અને વિદેશ મંત્રાલયના સચિવ (આર્થિક સંબંધો) શ્રી સુધાકર દલેલાનો સમાવેશ થાય છે.

સાયકલ રાઈડને લીલી ઝંડી બતાવતા પદ્મશ્રી ગૌતમ ગંભીરે કહ્યું, "સરકાર દ્વારા આયોજિત આ 'ફિટ ઈન્ડિયા' કાર્યક્રમ એક મહાન પહેલ છે. મારું માનવું છે કે ભારત જેટલું ફિટ રહેશે, તેટલું તે મજબૂત અને આત્મનિર્ભર બનશે. તેથી, આપણે આને ફક્ત એક કાર્યક્રમ તરીકે નહીં, પરંતુ એક ચળવળ તરીકે જોવું જોઈએ. આપણી જવાબદારી છે - ખાસ કરીને આ કાર્યક્રમમાં હાજર યુવાનો - આને એક આંદોલન બનાવીએ અને ખાતરી કરીએ કે આપણા યુવાનો અને બીજા બધા લોકો ફિટ રહે, જેનાથી દેશ વધુ ફિટ અને મજબૂત બને."

નવી દિલ્હીના જવાહરલાલ નહેરુ સ્ટેડિયમ ખાતે 'બ્રિક્સ રન એન્ડ રાઈડ 2026' પહેલના ભાગ રૂપે 5,000 થી વધુ લોકોએ ઉત્સાહપૂર્વક નૃત્ય કર્યું, સાયકલ ચલાવી અને વિવિધ પ્રવૃત્તિઓમાં ભાગ લીધો.

ITBP બ્રાસ બેન્ડના પ્રદર્શને ઉત્સવના વાતાવરણમાં રંગ ઉમેર્યો. રવિવારે સવારે આયોજિત આ કાર્યક્રમ ખાસ હતો કારણ કે તે રાષ્ટ્રીય રમત દિવસના એક દિવસ પછી યોજાયો હતો, જેનાથી નાગરિકોમાં ફિટનેસ, રમતગમત અને સક્રિય ભાગીદારીની ભાવનાને વધુ પ્રોત્સાહન મળ્યું.
ફિટ ઇન્ડિયા સન્ડે ઓન સાયકલ એ કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયાની પહેલ છે. તેનું આયોજન યુવા બાબતો અને રમતગમત મંત્રાલય (MYAS) દ્વારા સાયકલિંગ ફેડરેશન ઓફ ઇન્ડિયા (CFI), રાહગિરી ફાઉન્ડેશન અને MY Bharat ના સહયોગથી કરવામાં આવે છે અને SAI અને ખેલો ઇન્ડિયા નેટવર્ક દ્વારા તમામ રાજ્યો અને કેન્દ્રશાસિત પ્રદેશોમાં તેનો અમલ કરવામાં આવે છે.