تجارتی سکریٹری جناب راجیش اگروال نے 26 اگست 2026 کو چلی کے دارالحکومت سانتیاگو میں جمہوریہ چلی کی بین الاقوامی اقتصادی تعلقات کی نائب وزیر محترمہ پاؤلا ایسٹیویز وائن اسٹائن سے ملاقات کی۔ ملاقات کا مقصد بھارت اور چلی کے درمیان جامع اقتصادی شراکت داری معاہدے (سی ای پی اے) کے لیے جاری مذاکرات میں پیش رفت کرنا تھا۔

بھارت نے بھارت اور چلی کے درمیان اقتصادی شراکت داری کو مضبوط بنانے کے لیے کھلے پن، مسلسل رابطے اور متوازن نقطۂ نظر کے عزم کا اعادہ کیا، جس میں دونوں ممالک کے کاروباری اداروں اور عوام کے لیے بامعنی مواقع پیدا کرنے پر توجہ مرکوز کی گئی ہے۔ عالمی جنوب کے رکن کی حیثیت سے بھارت اور چلی کی مشترکہ شناخت نیز دونوں ممالک کا مشترکہ تزویراتی ویژن، دو طرفہ اقتصادی تعاون کو مزید گہرا کرنے اور مشترکہ خوشحالی کو آگے بڑھانے کے لیے مضبوط بنیاد فراہم کرتا ہے۔

دونوں فریقوں نے بھارت اور چلی کے درمیان مضبوط اور مسلسل فروغ پاتے تعلقات کو مزید مستحکم کرنے اور اس بات کو یقینی بنانے کی اہمیت پر زور دیا کہ جامع اقتصادی شراکت داری معاہدہ دونوں ممالک کے کاروباری اداروں کے مشترکہ مقاصد اور خواہشات کو ٹھوس اور تجارتی لحاظ سے بامعنی مواقع میں تبدیل کرے۔

تجارتی سکریٹری نے صحتِ عامہ، ادویہ سازی، توانائی، معدنیات، زراعت، مشینری اور انجینئرنگ سمیت مختلف شعبوں میں اقتصادی تعاون کو وسعت دینے کے وسیع امکانات کو اجاگر کیا۔ جامع اقتصادی شراکت داری معاہدے کے مذاکرات کی کامیاب تکمیل سے دونوں ممالک کے درمیان بڑھتی ہوئی دو طرفہ تجارت اور اقتصادی شراکت داری کو مزید تقویت ملے گی۔

بھارت رواں سال کے اندر جامع اقتصادی شراکت داری معاہدے کے مذاکرات مکمل کرنے کے لیے پُرعزم ہے۔ اس کا مقصد ایسا متوازن اور باہمی طور پر مفید لائحۂ عمل تیار کرنا ہے جو دونوں ممالک کے کاروباری اداروں کے لیے منصفانہ اور تجارتی لحاظ سے بامعنی نتائج فراہم کرے۔

توقع ہے کہ جامع اقتصادی شراکت داری معاہدہ تجارت اور سرمایہ کاری کے فروغ کے لیے نئے راستے کھولے گا، جبکہ ٹیکنالوجی، افرادی قوت اور مضبوط و قابلِ اعتماد رسدی زنجیروں کے شعبوں میں تعاون کو بھی فروغ دے گا۔ اس طرح بھارت اور چلی کے درمیان طویل مدتی اقتصادی تعاون کے لیے مزید مضبوط بنیادیں قائم ہوں گی۔

***

ش ح۔ ش ا ر۔ ول

Uno-2764