وزیر اعظم جناب نریندر مودی نے جمعرات، 27 اگست 2026 کو ویڈیو کانفرنس کے ذریعے کھیلو انڈیا سمواد میں شرکت کی۔ انہوں نے قومی یوم کھیل 2026 کی تقریبات کے سلسلے میں ملک بھر کے 5,000 سے زائد اداروں سے منسلک نوجوانوں اور کھلاڑیوں سے خطاب کیا۔

کھیلو انڈیا سمواد قومی یوم کھیل کی تقریبات کے ایک حصے کے طور پر منعقد کیا گیا۔ قومی یومِ کھیل ہر سال 29 اگست کو سابق بھارتی ہاکی لیجنڈ میجر دھیان چند کی یومِ پیدائش کے موقع پر منایا جاتا ہے۔

وزیر اعظم نے ویڈیو کانفرنس کے ذریعے ملک بھر کے نوجوانوں سے خطاب کرتے ہوئے قوم کی تعمیر میں کھیلوں کے وسیع تر مقصد پر روشنی ڈالی۔ انہوں نے کہا، ”جب میں کھیلوں کی بات کرتا ہوں تو یہ صرف تمغے جیتنے تک محدود نہیں ہے؛ یہ بھارت کی کھیلوں کی طاقت اور نوجوانوں کی توانائی کو یکجا کرکے وکست بھارت کی تعمیر کی ایک مہم ہے۔ میں ہمیشہ کہتا رہا ہوں، ’جو کھیلیں گے، وہ نکھریں گے۔“

عالمی سطح کے کھیلوں کے مختلف شعبوں میں بھارت کی موجودگی کو وسعت دینے پر زور دیتے ہوئے وزیر اعظم نے کہا، ”دیگر ممالک ان کھیلوں میں تمغے جیت رہے ہیں جن میں بھارت حصہ تک نہیں لیتا؛ ہمیں ان کھیلوں میں بھی مہارت حاصل کرنی ہوگی۔“

انہوں نے مزید کہا، ”اپنے تمغوں کی تعداد بڑھانے کے لیے ہمیں ان کھیلوں میں ہر صورت مہارت حاصل کرنا ہوگی۔“

وزیر اعظم نے نوجوانوں کو 5 سے 15 سال کی عمر کے بچوں کو ہدف بنانے والی ایک وسیع قومی ٹیلنٹ ہنٹ مہم شروع کیے جانے کی اطلاع دی۔ جناب مودی نے کہا، ”اس کے لیے حکومت کی جانب سے جس بھی تعاون کی ضرورت ہوگی، حکومت آپ کے شانہ بشانہ کھڑی رہے گی۔“

نوجوانوں کے امور اور کھیلوں کے مرکزی وزیر ڈاکٹر منسکھ منڈاویہ نے بھارتی انسٹی ٹیوٹ آف ٹیکنالوجی (آئی آئی ٹی) گاندھی نگر سے ورچوئل طور پر وزیر اعظم کا خیرمقدم کیا اور کہا، ”ملک نے پہلی بار کھیلوں کو محض ایک سرگرمی کے طور پر نہیں بلکہ قومی ترجیح کے طور پر دیکھا ہے۔“

کھیلوں کے مرکزی وزیر نے کھلاڑیوں کے ساتھ وزیر اعظم کے ذاتی تعلق کو سراہا۔ انہوں نے وزیر اعظم سے مخاطب ہوتے ہوئے کہا، ”کھلاڑیوں کے ساتھ آپ کا ذاتی تعلق آپ کے کھیلوں سے متعلق وژن کی سب سے بڑی طاقت ہے۔ آپ نے چیمپئنز کی کامیابیوں کا جشن منایا ہے اور ہمیشہ ان کی تعریف اور حوصلہ افزائی کی ہے۔ لیکن جب کسی کھلاڑی کو شکست کا سامنا کرنا پڑا، تو آپ نے کبھی اس کا ساتھ نہیں چھوڑا۔ یہی وجہ ہے کہ بھارت کے کھلاڑی آپ کو اپنا سمجھتے ہیں۔“

ڈاکٹر مانڈویہ نے مائی بھارت (MyBharat) پلیٹ فارم کی وسیع رسائی کو سراہتے ہوئے کہا، ”ملک بھر کے 2.4 کروڑ سے زیادہ نوجوان پہلے ہی اس سے وابستہ ہو چکے ہیں اور اپنے کیریئر کے ساتھ ساتھ قوم کی تعمیر میں بھی اپنا کردار ادا کر رہے ہیں۔“

حکومت کی نوجوانوں پر مرکوز پالیسی سازی کے نقطۂ نظر کے بارے میں انہوں نے کہا، ”نوجوانوں کے خیالات کی بنیاد پر اس سال کے بجٹ کو نوجوانوں پر مرکوز بجٹ قرار دیا گیا۔ آج ملک کے نوجوان محسوس کرتے ہیں کہ ان کے خیالات کو اب نظرانداز نہیں کیا جاتا بلکہ ان پر عمل درآمد کیا جاتا ہے۔“

ڈاکٹر منڈاویہ نے شفافیت اور جواب دہی کے ذریعے کھیلوں کے انتظام و انصرام کو مضبوط بنانے کی اہمیت پر بھی روشنی ڈالی۔ انہوں نے کہا، ”نیشنل اسپورٹس گورننس ایکٹ کے ذریعے شفافیت، جواب دہی اور منصفانہ مواقع کو مضبوط بنانے کی کوشش اس بات کو یقینی بناتی ہے کہ ٹیلنٹ کو اس کا جائز حق ملے۔“

وزیر اعظم کے خطاب کے بعد اولمپک تمغہ جیتنے والے گگن نارنگ نے آئی آئی ٹی گاندھی نگر میں موجود نوجوانوں کے ساتھ ایک کھلاڑی کی حیثیت سے اپنے متاثر کن سفر کا اشتراک کیا۔

نارنگ نے کہا، ’’آج کھیلوں کے شعبے میں ہونے والی انتظامی تبدیلیوں کی بدولت کھلاڑیوں کو بین الاقوامی سطح پر مقابلہ کرنے کے لیے بہترین آلات اور سہولیات حاصل ہو رہی ہیں۔ یہ انہی تبدیلیوں کی وجہ سے ہے کہ ہم آج یہاں تک پہنچے ہیں۔‘‘

ان کے ساتھ 2024 کے پیرا اولمپکس کی کانسی کا تمغہ جیتنے والی شیتل دیوی بھی موجود تھیں، جنہوں نے حاضرین کے ساتھ اپنے متاثر کن سفر کا اشتراک کیا۔ انہوں نے کہا، ’’آج لوگوں کی سوچ بدل چکی ہے۔ جو لوگ پہلے سوال کرتے تھے کہ ’یہ (پیرا ایتھلیٹس) کیا حاصل کر سکتے ہیں؟‘، وہی آج کہتے ہیں کہ ’ہاں، یہ کامیابی حاصل کریں گے، یہی وہ لوگ ہیں جو تمغے جیت کر ملک واپس لائیں گے۔‘‘

آئی آئی ٹی گاندھی نگر کے طلبہ نے تقریب میں موجود نوجوانوں کے سامنے ایک پریزنٹیشن پیش کی، جو وزیر اعظم کی جانب سے بیان کردہ پانچ اہم موضوعات—کھیل، اولمپک عزائم، نوجوانوں کی قیادت، وکست بھارت اور نشہ مُکت یووا (منشیات سے پاک نوجوان)—کے گرد ترتیب دی گئی تھی۔ اس پریزنٹیشن میں کھیلوں میں اعلیٰ کارکردگی حاصل کرنے کی جانب بھارت کے سفر پر خصوصی توجہ مرکوز کی گئی۔

                                               **************

ش ح۔ ف ش ع

                                                                                                                                       U: 2670