ನಗರ ಬೀದಿ ವ್ಯಾಪಾರಿಗಳಿಗೆ ಮೇಲಾಧಾರ ರಹಿತ ಕಾರ್ಯನಿರತ ಬಂಡವಾಳ ಸಾಲಗಳನ್ನು ಒದಗಿಸಲು ಜೂನ್ 1, 2020 ರಂದು ಪ್ರಾರಂಭಿಸಲಾದ ಪ್ರಧಾನಮಂತ್ರಿ ಬೀದಿ ವ್ಯಾಪಾರಿಗಳ ಆತ್ಮನಿರ್ಭರ ನಿಧಿ (ಪಿ.ಎಂ. ಸ್ವನಿಧಿ) ಯೋಜನೆಯು, ನೂತನವಾಗಿ ಪುನರ್ ರಚಿಸಿದ ಹಂತದ ಒಂದು ವರ್ಷವನ್ನು ಪೂರ್ಣಗೊಳಿಸಿದೆ. ಕೇಂದ್ರ ಸಚಿವ ಸಂಪುಟವು ಆಗಸ್ಟ್ 27, 2025 ರಂದು ಅನುಮೋದಿಸಿದ್ದು, ಪುನರ್ ರಚಿಸಿದ ಯೋಜನೆಯಡಿ ಸಾಲವನ್ನು ಮಾರ್ಚ್ 31, 2030 ರವರೆಗೆ ವಿಸ್ತರಿಸಲಾಗಿದೆ, ಔಪಚಾರಿಕ ಸಾಲ, ಡಿಜಿಟಲ್ ಹಣಕಾಸು ಸೇರ್ಪಡೆ, ಸಾಮಾಜಿಕ ಭದ್ರತೆ, ಸಾಮರ್ಥ್ಯ ವೃದ್ಧಿ ಮತ್ತು ಉದ್ಯಮಶೀಲತೆಯ ಮೇಲೆ ಹೆಚ್ಚಿನ ಗಮನ ಹರಿಸಲಾಗಿದೆ. ಇದು 50 ಲಕ್ಷ ಹೊಸ ಫಲಾನುಭವಿಗಳು ಸೇರಿದಂತೆ 1.15 ಕೋಟಿ ಬೀದಿ ವ್ಯಾಪಾರಿಗಳಿಗೆ ಪ್ರಯೋಜನವನ್ನು ನೀಡುವ ಗುರಿಯನ್ನು ಹೊಂದಿದೆ.

ಪುನರ್ರಚನೆ ನಂತರ ಮೊದಲ ವರ್ಷದ ಅವಧಿಯಲ್ಲಿ, 10.56 ಲಕ್ಷ ಹೊಸ ಫಲಾನುಭವಿಗಳಿಗೆ 21.86 ಲಕ್ಷ ಸಾಲಗಳನ್ನು ವಿತರಿಸಲಾಗಿದ್ದು, ಇದರ ಮೊತ್ತ ₹6,294 ಕೋಟಿಯಾಗಿದೆ.

ಔಪಚಾರಿಕ ಸಾಲದ ಪ್ರವೇಶ ಅವಕಾಶವನ್ನು ಹೆಚ್ಚಿಸಲು, ಅರ್ಹ ಮಾರಾಟಗಾರರಿಗೆ ₹30,000 ವರೆಗಿನ ಸಾಲದ ಮಿತಿಯನ್ನು ಹೊಂದಿರುವ ಯುಪಿಐ-ಸಂಯೋಜಿತ ರುಪೇ ಕ್ರೆಡಿಟ್ ಕಾರ್ಡ್ ಅನ್ನು ಪರಿಚಯಿಸಲಾಗಿದೆ. ಇಲ್ಲಿಯವರೆಗೆ, 27,077 ಕ್ರೆಡಿಟ್ ಕಾರ್ಡ್ಗಳನ್ನು ಅನುಮೋದಿಸಲಾಗಿದೆ.

ಅರ್ಜಿ ಮತ್ತು ಪರಿಶೀಲನೆಯಿಂದ ಅನುಮೋದನೆ ಮತ್ತು ವಿತರಣೆಯವರೆಗೆ ಎಂಡ್-ಟು-ಎಂಡ್ ಡಿಜಿಟಲ್ ಲೆಂಡಿಂಗ್ ಪ್ಲಾಟ್ಫಾರ್ಮ್ (ಡಿ.ಎಲ್.ಪಿ) ಪರಿಚಯವು ಸಾಲ ಪ್ರಕ್ರಿಯೆಯನ್ನು ಸರಳಗೊಳಿಸಿದೆ. ಮಾರಾಟಗಾರರು ಯು.ಎಲ್.ಬಿಗಳು ಮತ್ತು ಜನಗಣತಿ ಪಟ್ಟಣಗಳ ನಡುವೆ ವಲಸೆ ಹೋದಾಗ ಶಿಫಾರಸು ಪತ್ರದ ಸರಾಗ ವರ್ಗಾವಣೆಯನ್ನು ಸಕ್ರಿಯಗೊಳಿಸಲು ಮಾರಾಟಗಾರರ ವಲಸೆ ಮಾದರಿ(ಮಾಡ್ಯೂಲ್)ಯನ್ನು ಅಭಿವೃದ್ಧಿಪಡಿಸಲಾಗಿದೆ, ಇದು ಯೋಜನೆಯ ಪ್ರಯೋಜನಗಳ ನಿರಂತರತೆಯನ್ನು ಖಚಿತಪಡಿಸುತ್ತದೆ.

ನಗರ ಪ್ರದೇಶ ವಿಧಾನದೊಂದಿಗೆ ಯೋಜನೆಯು ಜನಗಣತಿ ಪಟ್ಟಣಗಳನ್ನು ಸೇರಿಸುವ ಮೂಲಕ ತನ್ನ ವ್ಯಾಪ್ತಿಯನ್ನು ವಿಸ್ತರಿಸುತ್ತಿದೆ, ಹೆಚ್ಚಿನ ಬೀದಿ ಮಾರಾಟಗಾರರು ಔಪಚಾರಿಕ ಸಾಲ ಮತ್ತು ಜೀವನೋಪಾಯ ಬೆಂಬಲ ಪರಿಸರ ವ್ಯವಸ್ಥೆಗೆ ಪ್ರವೇಶಿಸಲು ಅನುವು ಮಾಡಿಕೊಡುತ್ತದೆ.

“ಪ್ರಧಾನಮಂತ್ರಿ ಸ್ವನಿಧಿ” ಯೋಜನೆಯು ಉದ್ಯಮ ಅಭಿವೃದ್ಧಿ ಮತ್ತು ನಾವೀನ್ಯತೆಯ ಕಡೆಗೆ ಕ್ರೆಡಿಟ್ ವಿತರಣೆಯನ್ನು ಮೀರಿ ವಿಕಸನಗೊಂಡಿದೆ. ನಡೆಯುತ್ತಿರುವ “ಪ್ರಧಾನಮಂತ್ರಿ ಸ್ವನಿಧಿ” ಯೋಜನೆಯು ಸ್ಟಾರ್ಟ್ಅಪ್ ಸವಾಲು ಮಾರುಕಟ್ಟೆ ಪ್ರವೇಶ, ಡಿಜಿಟಲ್ ಪಾವತಿಗಳು, ಹಣಕಾಸು ಸೇವೆಗಳು, ಲಾಜಿಸ್ಟಿಕ್ಸ್ ಮತ್ತು ವೆಂಡಿಂಗ್ ಮೂಲಸೌಕರ್ಯದಂತಹ ಕ್ಷೇತ್ರಗಳಲ್ಲಿ ಪರಿಹಾರಗಳನ್ನು ಅಭಿವೃದ್ಧಿಪಡಿಸಲು ಸ್ಟಾರ್ಟ್ಅಪ್ಗಳು ಮತ್ತು ನಾವೀನ್ಯಕಾರರನ್ನು ಪ್ರೋತ್ಸಾಹಿಸುತ್ತದೆ.

ಮಾರಾಟ ಮೂಲಸೌಕರ್ಯ ಮತ್ತು ಜೀವನೋಪಾಯವನ್ನು ಸುಧಾರಿಸಲು, ದೇಶಾದ್ಯಂತ 50 ಬೀದಿ ಆಹಾರ ಕೇಂದ್ರಗಳನ್ನು (ಎಸ್.ಎಫ್.ಹೆಚ್) ಅಭಿವೃದ್ಧಿಪಡಿಸಲಾಗುವುದು, ನಗರಗಳು ಪ್ರತಿ ಕೇಂದ್ರಕ್ಕೆ ₹4 ಕೋಟಿಯವರೆಗೆ ಆರ್ಥಿಕ ಸಹಾಯವನ್ನು ಪಡೆಯಲು ಅರ್ಹವಾಗಿವೆ, ಇದರಲ್ಲಿ ಮಾರಾಟ ವಲಯಗಳ ಅಧಿಸೂಚನೆಗೆ ಹೆಚ್ಚುವರಿ ₹25 ಲಕ್ಷವೂ ಸೇರಿದೆ.

ಕೊನೆಯ ಹಂತದ ಸಂಪರ್ಕವನ್ನು ಬಲಪಡಿಸಲು, ಬೀದಿ ವ್ಯಾಪಾರಿಗಳು, ಬ್ಯಾಂಕುಗಳು ಮತ್ತು ನಗರ ಸ್ಥಳೀಯ ಸಂಸ್ಥೆಗಳನ್ನು ಒಟ್ಟುಗೂಡಿಸಲು ಮತ್ತು ಸಾಲ, ಕಲ್ಯಾಣ ಯೋಜನೆಗಳು ಮತ್ತು ಸಾಮರ್ಥ್ಯ ವೃದ್ಧಿ ಕಾರ್ಯಕ್ರಮಗಳಿಗೆ ಪ್ರವೇಶ ಅವಕಾಶವನ್ನು ಸುಲಭಗೊಳಿಸಲು ಲೋಕ ಕಲ್ಯಾಣ ಮೇಳಗಳನ್ನು ಆಯೋಜಿಸಲಾಗುತ್ತಿದೆ. ಲೋಕ ಕಲ್ಯಾಣ ಮೇಳಗಳ ಮುಂದಿನ ಸುತ್ತನ್ನು ಸೆಪ್ಟೆಂಬರ್ 1 ರಿಂದ ಸೆಪ್ಟೆಂಬರ್ 30, 2026 ರವರೆಗೆ ಆಯೋಜಿಸಲಾಗುವುದು.

ಪ್ರಾರಂಭದಿಂದಲೂ, “ಪ್ರಧಾನಮಂತ್ರಿ ಸ್ವನಿಧಿ” ಯೋಜನೆ ಮೂಲಕ 78.68 ಲಕ್ಷ ಬೀದಿ ವ್ಯಾಪಾರಿಗಳು 1.18 ಕೋಟಿಗೂ ಹೆಚ್ಚು ಸಾಲಗಳನ್ನು ಪಡೆಯಲು ಅನುವು ಮಾಡಿಕೊಟ್ಟಿದೆ, ಇದು ₹19,171 ಕೋಟಿ ಮೊತ್ತವಾಗಿದೆ. ಸಾಲಗಳ ಸಕಾಲಿಕ ಮರುಪಾವತಿಯನ್ನು ಪ್ರೋತ್ಸಾಹಿಸಲು, ₹421 ಕೋಟಿಯನ್ನು ಬಡ್ಡಿ ಸಬ್ಸಿಡಿಯಾಗಿ ಬಿಡುಗಡೆ ಮಾಡಲಾಗಿದೆ. ಇದಲ್ಲದೆ, 57.09 ಲಕ್ಷ ಮಾರಾಟಗಾರರು 908 ಕೋಟಿಗೂ ಹೆಚ್ಚು ಡಿಜಿಟಲ್ ವಹಿವಾಟುಗಳನ್ನು ಕೈಗೊಂಡಿದ್ದಾರೆ. ಸ್ವನಿಧಿ ಸೆ ಸಮೃದ್ಧಿ ಯೋಜನೆಯಡಿಯಲ್ಲಿ, 51.15 ಲಕ್ಷಕ್ಕೂ ಹೆಚ್ಚು ಫಲಾನುಭವಿಗಳ ಕುಟುಂಬಗಳ ಸಾಮಾಜಿಕ-ಆರ್ಥಿಕ ಪ್ರೊಫೈಲ್ ಅನ್ನು ಪೂರ್ಣಗೊಳಿಸಲಾಗಿದೆ ಮತ್ತು ಆಯ್ದ 8 ಕೇಂದ್ರ ಸರ್ಕಾರದ ಕಲ್ಯಾಣ ಯೋಜನೆಗಳ ಅಡಿಯಲ್ಲಿ ಅರ್ಹ ಸದಸ್ಯರಿಗೆ 1.59 ಕೋಟಿಗೂ ಹೆಚ್ಚು ಯೋಜನೆಗಳ ಅನುಮೋದನೆಗಳನ್ನು ನೀಡಲಾಗಿದೆ. ಚಿಲ್ಲರೆ ಮತ್ತು ಸಗಟು ವಹಿವಾಟುಗಳನ್ನು ಒಳಗೊಂಡ ಕ್ಯಾಶ್ಬ್ಯಾಕ್ ಪ್ರೋತ್ಸಾಹಕಗಳ ಮೂಲಕ ಡಿಜಿಟಲ್ ಅಳವಡಿಕೆಯನ್ನು ಬಲಪಡಿಸಲಾಗಿದೆ, ಇಲ್ಲಿಯವರೆಗೆ ₹418.78 ಕೋಟಿ ಬಿಡುಗಡೆ ಮಾಡಲಾಗಿದೆ. ಇಲ್ಲಿಯವರೆಗೆ, 6 ಲಕ್ಷಕ್ಕೂ ಹೆಚ್ಚು ಬೀದಿ ಆಹಾರ ಮಾರಾಟಗಾರರು ಆಹಾರ ಸುರಕ್ಷತೆ ಮತ್ತು ನೈರ್ಮಲ್ಯದ ಕುರಿತು FSSAI ತರಬೇತಿಯನ್ನು ಪಡೆದಿದ್ದಾರೆ.

“ಪ್ರಧಾನಮಂತ್ರಿ ಸ್ವನಿಧಿ” ಯೋಜನೆಯು, ಹೀಗೆ ಸಾಲ ವ್ಯವಸ್ಥೆಯಿಂದ ಔಪಚಾರಿಕ ಸಾಲ, ಡಿಜಿಟಲ್ ಸೇರ್ಪಡೆ, ಸಾಮಾಜಿಕ ಭದ್ರತೆ, ಸಾಮರ್ಥ್ಯ ವೃದ್ಧಿ, ನಾವೀನ್ಯತೆ ಮತ್ತು ಸುಧಾರಿತ ಮಾರಾಟ ಮೂಲಸೌಕರ್ಯವನ್ನು ಸಂಯೋಜಿಸುವ ಸಮಗ್ರ ಜೀವನೋಪಾಯ ಮತ್ತು ಉದ್ಯಮಶೀಲತಾ ಉಪಕ್ರಮವಾಗಿ ವಿಕಸನಗೊಂಡಿದೆ. ಪುನರ್ರಚಿಸಿದ ಹಂತದ ಮೊದಲ ವರ್ಷದ ಪ್ರಗತಿಯು ಬೀದಿ ಮಾರಾಟಗಾರರನ್ನು ಆರ್ಥಿಕವಾಗಿ ಸಬಲೀಕರಣಗೊಳಿಸಲು, ಡಿಜಿಟಲ್ ಸೇರ್ಪಡೆಗೊಳಿಸಲು ಮತ್ತು ಸಾಮಾಜಿಕವಾಗಿ ಸುರಕ್ಷಿತ ಸೂಕ್ಷ್ಮ ಉದ್ಯಮಿಗಳಾಗಲು ಅನುವು ಮಾಡಿಕೊಡುವ ಸರ್ಕಾರದ ನಿರಂತರ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ, ಇದು 2047ರಲ್ಲಿ ವಿಕಸಿತ ಭಾರತದ ದೃಷ್ಟಿಕೋನಕ್ಕೆ ಕೊಡುಗೆ ನೀಡುತ್ತದೆ.

 

*****

(ಪ್ರಕಟಣೆ ಐ.ಡಿ.: 2303820) ವಿಸಿಟರ್ ಕೌಂಟರ್ : 13