নমস্কাৰ।

আপোনালোক সকলোৱে ইমান সুন্দৰভাবে এই খেলো ইণ্ডিয়া ডাইলগ কাৰ্যসূচী আয়োজন কৰিছে। আপোনালোক সকলোকে অভিনন্দন জনাইছো। লগতে কেন্দ্ৰীয় মন্ত্ৰীসভাত মোৰ সহযোগীসকল, সকলো মুখ্যমন্ত্ৰী, ৰাজ্য চৰকাৰৰ মন্ত্ৰীসকল , সংসদত মোৰ সহযোগী তথা প্ৰযুক্তিৰ জৰিয়তে এই কাৰ্যসূচীৰ সৈতে সংযোগ স্থাপন কৰা লাখ লাখ মাই ভাৰত স্বেচ্ছাসেৱকক আন্তৰিক অভিনন্দন জনাইছো। আজি দেশৰ বিভিন্ন প্ৰান্তৰ খেলুৱৈ আৰু ক্ৰীড়াৰ সৈতে জড়িত  ব্যক্তিসকলে আমাৰ এই কাৰ্যসূচীত যোগদান কৰিছে।

বন্ধুসকল আপোনালোক সকলোৱে জানে যে  ২৯ আগষ্টৰ ৰাষ্ট্ৰীয় ক্ৰীড়া দিৱসলৈ মাজত দুদিন বাকী । ক্ৰীড়া দিৱসত আপোনালোক সকলোকে, সমগ্ৰ দেশৰ যুৱক-যুৱতীসকলক আৰু ক্ৰীড়া জগতৰ সৈতে জড়িত সকলোকে আগতীয়াকৈ শুভেচ্ছা জনাইছো। এই দিৱস ভাৰত মাতৃৰ এগৰাকী মহান পুত্ৰ মেজৰ ধ্যান চান্দ জীক স্মৰণ কৰাৰ  এক সুযোগ। ১০০ বছৰ আগতে ভাৰতীয় সেনাৰ হকী দলটোৱে নিউজিলেণ্ড ভ্ৰমণ কৰিছিল আৰু ধ্যান চান্দ জীও সেই দলৰ অংশ আছিল। সেই ভ্ৰমণ ভাৰত আৰু নিউজিলেণ্ডৰ মাজত ১০০ বছৰীয়া ক্ৰীড়া সম্পৰ্কক  সুদৃঢ় কৰাৰ আধাৰ হৈ পৰিছে। কিছুদিন আগতে নিউজিলেণ্ড ভ্ৰমণ কৰিছিলো, তাতো তেওঁৰ কথা মনত পৰিছিল। মেজৰ ধ্যান চান্দ জীয়ে যি সম্পৰ্কৰ ভেটি স্থাপন কৰিছিল তাক  সমৃদ্ধ কৰাৰ বাবে আজি ভাৰতে অহৰহ কাম কৰি গৈছে।

বন্ধুসকল,

১৫ আগষ্টত লালকিল্লাৰ পৰা ভাৰতৰ ক্ৰীড়া দৃষ্টিভংগী দেশৰ  আগত দাঙি ধৰিছিলো । ক্ৰীড়াৰ কথা ক’লে কেৱল পদক জয়ৰ কথাই নহয়; ই ভাৰতৰ ক্ৰীড়া শক্তি আৰু যুৱক-যুৱতীসকলক একত্ৰিত কৰি উন্নত ভাৰত গঢ়ি তোলাৰ এক অভিযানো। মই সদায় কৈ আহিছো - খেলা সকলে বিকশিত হৈ উঠক। আৰু ক্ৰীড়াত উদ্ভাসিত হোৱাটো কেৱল খেলপথাৰত জয়ী হোৱাটোৱেই নহয়; ক্ৰীড়াত উদ্ভাসিত হৈ   উঠা মানে নিজৰ ব্যক্তিত্বক  উদ্ভাসিত কৰা , পৰিয়াল উদ্ভাসিত কৰা আৰু দেশৰ গৌৰৱ বৃদ্ধি কৰা।

বন্ধুসকল,

যেতিয়া এজন খেলুৱৈ সফল হয়, তেতিয়া সেই সফলতা কেৱল তেওঁৰেই নহয়; তেওঁৰ সফলতাই তেওঁৰ পৰিয়ালৰ পৰিচয়ো গঢ়ি তোলে আৰু তেওঁলোকৰ সন্মান  বৃদ্ধি কৰে। তেওঁলোকে পঢ়া স্কুল-কলেজখনে প্ৰতিপত্তি লাভ কৰে। তেওঁলোকৰ জিলা আৰু ৰাজ্যৰ পৰিচয় অধিক শক্তিশালী হৈ উঠে। অৰ্থাৎ পৃথিৱীয়ে সেই চহৰ বা ৰাজ্যখনক খেলুৱৈৰ নামেৰে চিনি পাবলৈ আৰম্ভ কৰে। যেতিয়া কোনো অঞ্চলে কৃতিত্বৰে বিশ্বৰ ক্ৰীড়াৰ মানচিত্ৰত জিলিকি উঠে, তেতিয়া সেই চহৰখনৰ প্ৰতি বিশ্বৰ দৃষ্টিভংগীও সলনি হয়। দেশৰ শতাধিক জিলাৰ খেলুৱৈয়ে আজিৰ কাৰ্যসূচীত অংশগ্ৰহণ কৰিছে; প্ৰতিখন জিলাৰেই বিশ্বৰ ক্ৰীড়া মানচিত্ৰত জিলিকি উঠাৰ সম্ভাৱনা আছে। এই সম্ভাৱনাক উপলব্ধি কৰি আমি এই  কাৰ্যসূচী আগুৱাই নিব লাগিব।

বন্ধুসকল,

এইবাৰ লালকিল্লাৰ প্ৰাচীৰৰ পৰা ক্ৰীড়া সম্পৰ্কীয় এটা ডাঙৰ প্ৰত্যাহ্বানৰ বিষয়ত দেশবাসীৰ দৃষ্টি আকৰ্ষণ কৰিছিলো। এই প্ৰত্যাহ্বান অলিম্পিকৰ সৈতে জড়িত। অপ্ৰিয় সত্যটো হ’ল অলিম্পিকত প্ৰদৰ্শিত বিভিন্ন খেলৰ আধা সংখ্যকতো ভাৰতীয় দলসমূহে অংশগ্ৰহণ নকৰে। অৰ্থাৎ পদকৰ সংখ্যাৰ এক উল্লেখযোগ্য অংশৰ বাবেও আমি প্ৰতিযোগিতাত অংশগ্ৰহণ নকৰো আৰু দশক দশক ধৰি এয়াই  হৈ আহিছে। ২০১২ চনৰ অলিম্পিকত ভাৰতে মাত্ৰ ১৩ খন খেলত অংশ লৈছিল; ২০খনতকৈও অধিক খেলত ভাৰতীয় খেলুৱৈৰ অংশগ্ৰহণ নাছিল। এই ২০খনতকৈও অধিক খেলৰ ভিতৰত এনে বহু খেল আছে যাৰ নাম আমাৰ দেশৰ মানুহে হয়তো কেতিয়াও শুনাও নাই। এই খেলসমূহত আন দেশসমূহে পদক লাভ কৰে, তথাপিও আমি সেইবোৰত অংশগ্ৰহণো নকৰো। আমাৰ পদকৰ সংখ্যা বৃদ্ধি কৰিবলৈ আমি এই খেলসমূহতো উৎকৃষ্টতা অৰ্জন কৰিব লাগিব। উদাহৰণস্বৰূপে চাৰ্ফিং আৰু স্প’ৰ্টছ ক্লাইম্বিঙৰ কথাই  ধৰক ; আমাৰ বিশাল উপকূল আৰু বিস্তৃত পাহাৰীয়া অঞ্চল আছে য'ত এনে খেলৰ  বাবে প্ৰয়োজনীয়  দক্ষতা  বিকশিত হ'ব পাৰে। জল ক্ৰীড়াৰ পৰা আৰম্ভ কৰি শীতকালীন ক্ৰীড়ালৈকে সকলোকে সমৰ্থন কৰিব পৰা জনগাঁথনি আৰু ভূগোল আমাৰ হাতত আছে। তথাপিও এই শাখাসমূহত আমি বিশ্বৰ  মঞ্চত কাৰ্যতঃ অদৃশ্য। গতিকে আমি বিভিন্ন জিলাত নিৰ্দিষ্ট ক্ৰীড়াৰ বাবে পৰিৱেশতন্ত্ৰ গঢ়ি তোলাৰ সুযোগ বিচাৰি উলিয়াব লাগিব আৰু আজিৰ কাৰ্যসূচীয়ে এই প্ৰচেষ্টাত গুৰুত্বপূৰ্ণ ভূমিকা পালন কৰিব।

বন্ধুসকল,

২০৩৬ চনৰ অলিম্পিকৰ বাবে প্ৰস্তুতি চলোৱাৰ কথা ক’লে আমাৰ গুৰুত্ব নিশ্চয়কৈ এতিয়াৰে পৰা আৰম্ভ কৰি ২০৩৬ চনত বিভিন্ন খেলত যোগ্যতা অৰ্জন আৰু প্ৰতিযোগিতাত অংশগ্ৰহণ কৰিবলগীয়া খেলুৱৈসকলক ইয়াৰ বাবে উপযুক্ত কৰি তোলা হ'ব লাগিব। শিশুসকলক আমি সেই অনুসৰি প্ৰশিক্ষণ দিব লাগিব  আৰু মই আপোনালোক সকলোকে আশ্বাস দিছো যে চৰকাৰে আপোনালোকৰ লগত কান্ধত কান্ধ মিলাই থিয় দিব, ইয়াৰ বাবে যি সহায়ৰ প্ৰয়োজন হ’ব সেয়া প্ৰদান কৰিব।

বন্ধুসকল,

আমাৰ চৰকাৰে ভাৰতত আধুনিক, একবিংশ শতিকাৰ ক্ৰীড়া পৰিৱেশতন্ত্ৰ গঢ়ি তোলাৰ বাবে সম্পূৰ্ণ প্ৰতিশ্ৰুতিবদ্ধ। আজি দেশত এনে এক ব্যৱস্থাৰ সৃষ্টি হৈছে—যিটোৱে ক্ৰীড়া বিশ্ববিদ্যালয়ৰ পৰা আৰম্ভ কৰি আধুনিক প্ৰশিক্ষণ কেন্দ্ৰলৈকে সকলোকে সামৰি লৈছে—যিটোৱে প্ৰতিভা চিনাক্তকৰণৰ পৰা আৰম্ভ কৰি সেই প্ৰতিভাক বিশ্বৰ মঞ্চলৈ আগুৱাই নিয়ালৈকে প্ৰতিটো পৰ্যায়তে সহায় আগবঢ়ায়। আমি ক্ৰীড়া বিজ্ঞান, প্ৰশিক্ষণ আৰু প্ৰশিক্ষকৰ বিশেষজ্ঞতা ভাগ-বাটোৱাৰা কৰিবলৈ অন্য দেশসমূহৰ সৈতেও সহযোগিতা শক্তিশালী কৰিছো।

বন্ধুসকল,

ক্ৰীড়াক লৈ চৰকাৰ কিমান সচেষ্ট তাৰ প্ৰমাণ এই অনুষ্ঠানটো নিজেই। ‘খেলো ইণ্ডিয়া সংবাদ’ কেৱল ক্ৰীড়া আলোচনাৰ কাৰ্যসূচী নহয়; ই এক আলোচনাৰ মঞ্চ , য’ত প্ৰতিটো ধাৰণাই দেশৰ  ক্ৰীড়া দৃষ্টিভংগীক নতুন দিশলৈ লৈ যাব পাৰে। তদুপৰি যুৱক-যুৱতীসকলৰ সৈতে হোৱা আলোচনাই আপোনাৰ ধাৰণা আৰু আকাংক্ষাক দেশৰ সপোনৰ সৈতে সম্পৃক্ত কৰাৰ এক শক্তিশালী মাধ্যম হিচাপে কাম কৰে। এই কাৰ্যসূচীত আমি যুৱক-যুৱতীসকলৰ কথা শুনিম— ক্ৰীড়া পৰিৱেশতন্ত্ৰ, প্ৰতিভা বিকাশ, শাসন ব্যৱস্থা তথা  এখন  ‘বিকশিত ভাৰত’ (উন্নত ভাৰত) সম্পৰ্কে তেওঁলোকৰ চিন্তা তথা  পৰামৰ্শ বিচাৰিম আৰু নীতি নিৰ্ধাৰণ প্ৰক্ৰিয়াত সেয়া অন্তৰ্ভুক্ত কৰিম। সেয়েহে আপোনালোক সকলোকে এই মঞ্চ সৰ্বাধিক অৰ্থপূৰ্ণভাবে ব্যৱহাৰ কৰি নতুন নতুন ধাৰণা আগবঢ়াবলৈ আহ্বান জনাইছো; আমাৰ যুৱ শক্তিৰ এই সতেজ ধাৰণাবোৰেই হ’ব বিকশিত  ভাৰতৰ দৃষ্টিভংগীক বাস্তৱায়িত কৰাৰ চালিকা শক্তি।

বন্ধুসকল,

আমি প্ৰায়ে শুনিবলৈ পাওঁ যে এখন সুস্থ সমাজ, সুস্থ পাৰিবাৰিক গাঁথনি, ইতিবাচক কৰ্ম সংস্কৃতিৰ বাবে ‘ক্ৰীড়াৰ মনোভাৱ’ অপৰিহাৰ্য— খেলপথাৰত ভৰি নিদিয়াকৈ এই মনোভাৱ গঢ়ি তোলাটো কঠিন। ক্ৰীড়াই আমাক কেৱল চেম্পিয়ন হোৱাই নহয়, কেনেকৈ ভাল প্ৰতিযোগী হ’ব পাৰি সেই বিষয়েও শিকায়। উত্থান, পতন আৰু পতনৰ পিছত পুনৰ উত্থান—ক্ৰীড়াই আমাৰ ভিতৰত এই স্থিতিস্থাপকতাই গঢ় দিয়ে। 

বন্ধুসকল,

আমাৰ পেৰা-এথলীটসকল হৈছে ক্ৰীড়াই কেনেকৈ জীৱনক ৰূপান্তৰিত কৰিব পাৰে তাৰ প্ৰধান উদাহৰণ। পেৰা এথলীটসকলৰ কৰ্ম প্ৰত্যক্ষ কৰিলে জীৱনৰ প্ৰতি মানুহৰ সমগ্ৰ দৃষ্টিভংগী সলনি হয়। যেতিয়া তেওঁলোকে সফলতা লাভ কৰে, তেতিয়া ই কেৱল খেলুৱৈগৰাকীৰ বাবেই নহয়, তেওঁলোকৰ সমগ্ৰ পৰিয়ালৰ বাবেও জীৱনৰ নতুন ৰং আনে । সন্তানৰ প্ৰাৰম্ভিক সংগ্ৰামৰ সাক্ষী হোৱা পিতৃ-মাতৃ আৰু ভাই-ভনীসকলৰ বাবে সেই বিশেষভাবে সক্ষম খেলুৱৈগৰাকীৰ সফলতাই তেওঁলোকৰ নিজৰ সপোন আৰু আশাক নতুন উচ্চতালৈ লৈ যায়।

বন্ধুসকল,

এনে খেলুৱৈৰ পৰা মই সদায় অনুপ্ৰাণিত হৈ আহিছো। উদাহৰণস্বৰূপে আপোনালোক সকলোৱে শুনা এটা নাম — আমাৰ এগৰাকী কন্যা  যি এগৰাকী আচৰিত ধনুৰ্বিদ; তেওঁৰ নামটো জানেনে? তেওঁ  হৈছে শীতল। পেৰালিম্পিকত যেতিয়া তেওঁ  পদক লাভ কৰিছিল, তেতিয়া জম্মু-কাশ্মীৰৰ সমগ্ৰ অঞ্চল—আৰু সঁচাকৈয়ে সমগ্ৰ ভাৰত—গৌৰাবান্বিত হৈ পৰিছিল। আমাৰ তেনে  আন এগৰাকী কন্যা হৈছে দুবাৰকৈ পেৰালিম্পিক পদক লাভ কৰা অৱনী লেখাৰা। অৱনীক লগ পালেই মোৰ গৌৰৱ অনুভৱ হয়। তাৰ পিছত আছে সুমিত আণ্টিল, নিতেশ কুমাৰ আৰু—আপোনালোকে  সম্ভৱতঃ নাম  শুনিছে—আমাৰ  ঝাণ্ডু কুমাৰৰ দৰে খেলুৱৈৰ। এনে পেৰা-এথলীটসকলে—তেওঁলোকৰ প্ৰত্যেকেই—আমাৰ সকলোৰে বাবে প্ৰেৰণা হিচাপে কাম কৰে।

বন্ধুসকল,

ক্ৰীড়াই উন্নত জীৱনৰ নিশ্চয়তা দিয়ে। ই  আমাক ফিট কৰি ৰাখে আৰু আমাৰ জীৱনৰ মান বৃদ্ধি কৰে। যোৱা বছৰ ১০০ বছৰৰো অধিক বয়সত মৃত্যু হোৱা ফৌজা সিং জীৰ কথা আমি সকলোৱে জানো । ক্ৰীড়া আৰু ফিটনেছৰ প্ৰতি থকা আকৰ্ষণ কেনেকৈ গোটেই জীৱন বৰ্তাই ৰাখিব পাৰি তাৰ এক উজ্জ্বল উদাহৰণ আছিল তেওঁ। ক্ৰীড়া আৰু জীৱনৰ মানৰ মাজৰ গভীৰ সংযোগৰ বিষয়ত তেওঁৰ জীৱনে এক শক্তিশালী প্ৰেৰণা হিচাপে কাম কৰে।

বন্ধুসকল,

ক্ৰীড়াই আন এটা উল্লেখযোগ্য সুবিধা প্ৰদান কৰে: প্ৰকৃত খেলুৱৈসকলে ড্ৰাগছ আৰু নিচাযুক্ত দ্ৰব্যৰ অপব্যৱহাৰৰ পৰা আঁতৰি থকাৰ ইচ্ছাশক্তি গঢ়ি তোলে। যি সময়ত যুৱক-যুৱতীসকলে নিচাৰ দৰে  প্ৰত্যাহ্বানৰ সন্মুখীন হ’বলগীয়া হৈছে , সেই সময়ত এই সমস্যাৰ সমাধানৰ ক্ষেত্ৰত ক্ৰীড়াই অৰ্থপূৰ্ণ ভূমিকা পালন কৰে।

বন্ধুসকল,

আজি ভাৰতত ক্ৰীড়া এক উৎকৃষ্ট বৃত্তি হিচাপে আত্মপ্ৰকাশ কৰাত মই আনন্দিত হৈছো। ক্ৰীড়াৰ প্ৰতি সমাজৰ দৃষ্টিভংগী সলনি হৈছে। চাৰিওফালে চাওক—দেশজুৰি মানুহে ট্ৰায়েথলনত অংশগ্ৰহণ কৰি ৫ কে আৰু ১০ কে দৌৰ দৌৰিছে। বন্ধুসকলে হাইৰক্সৰ দৰে প্ৰত্যাহ্বান গ্ৰহণ কৰিবলৈ একত্ৰিত হৈছে। কোনোবাই প্ৰথমবাৰৰ বাবে শীৰ্ষাসন (হেডষ্টেণ্ড) প্ৰদৰ্শন কৰাৰ আনন্দ উদযাপন কৰিছে, আন কোনোবাই পৰিয়াল আৰু বন্ধু-বান্ধৱীৰ সৈতে পিকলবল আৰু বেডমিণ্টন খেলিছে। এইবোৰ সৰু সৰু কথা যেন লাগিব পাৰে, কিন্তু বহল দৃষ্টিকোণৰ পৰা চালে ই এক বৃহৎ পৰিৱৰ্তনৰ সংকেত দিয়ে: সঁচা অৰ্থত ক্ৰীড়া আমাৰ জীৱনৰ এক অবিচ্ছেদ্য অংগ হৈ পৰিছে। আমি যেনেকৈ পঢ়া-শুনা আৰু কেৰিয়াৰৰ বাবে সময় নিৰ্ধাৰণ কৰোঁ, তেনেকৈয়ে এতিয়া ক্ৰীড়াই আমাৰ দৈনন্দিন জীৱনত স্থান লাভ কৰিছে। এই পৰিৱৰ্তনেই ভাৰতৰ ক্ৰীড়া ভৱিষ্যতৰ প্ৰতি আত্মবিশ্বাস বৃদ্ধি কৰিছে।

বন্ধুসকল,

ক্ৰীড়া সংস্কৃতিয়ে দেশত শিপাই যাব তেতিয়াহে যেতিয়া সাধাৰণ নাগৰিকসকল ইয়াৰ সৈতে জড়িত হয়—যেতিয়া বিদ্যালয়সমূহে ক্ৰীড়াক কেৱল সহ-পাঠ্যক্ৰমৰ কাৰ্য্যকলাপ হিচাপে নহয়, জীৱনৰ এক অপৰিহাৰ্য অংশ হিচাপে গণ্য কৰে। যেতিয়া এনে হ'ব, তেতিয়া প্ৰতিভা বিকশিত  হ'ব

আৰু যিসকল শিশুৱে ক্ৰীড়াক কেৰিয়াৰ হিচাপে গ্ৰহণ কৰাৰ আকাংক্ষা কৰে, তেওঁলোকে পৰিয়ালৰ পৰা প্ৰয়োজনীয় সহায় লাভ কৰিব  । আৰু ঠিক সেইবাবেই মই কওঁ যে স্ক্ৰীণতকৈ ক্ৰীড়া কেন্দ্ৰৰ গুৰুত্ব বেছি। প্লেষ্টেচনতকৈ খেলপথাৰ অধিক গুৰুত্বপূৰ্ণ। এয়া  তেতিয়াহে হ’ব যেতিয়া আপোনালোক সকলো যুৱ বন্ধুৱে ইয়াক আগুৱাই নিব।

বন্ধুসকল,

ভাৰতৰ যুৱ শক্তিৰ সম্ভাৱনা আৰু সফলতাৰ বিষয়ত  মোৰ অপৰিসীম বিশ্বাস আছে। দেশৰ প্ৰতিগৰাকী  যুৱক-যুৱতীক জনাব বিচাৰিছো যে ক্ৰীড়াক্ষেত্ৰতেই হওক বা সমাজৰ ভিতৰতেই হওক, আপোনালোকৰ অংশগ্ৰহণেই ভাৰতৰ শক্তি। যদি আপোনালোকে  খেল ভালপায়, তেন্তে সেইবোৰৰ সৈতে জড়িত হোৱাৰ অসংখ্য পথ মুকলি হৈছে। আধুনিক ক্ৰীড়া সঁজুলি আৰু নতুন প্ৰযুক্তিৰ আগমন ঘটিছে। প্ৰশিক্ষণ আৰু প্ৰশিক্ষণ পদ্ধতিৰ বিকাশ ঘটিছে। ক্ৰীড়া অনুষ্ঠানৰ আয়োজন, প্ৰতিযোগিতাৰ প্ৰকৃতি আৰু  শাখাসমূহৰ বিষয়ত  প্ৰয়োজনীয়তা সলনি হৈছে। সঁজুলি ডিজাইন, ক্ৰীড়া প্ৰযুক্তি, ক্ৰীড়া চিকিৎসা, পুষ্টি, মনোবিজ্ঞান, বিশ্লেষণ আদি বিভিন্ন ক্ষেত্ৰত যুৱক-যুৱতীসকলৰ বাবে নতুন সুযোগৰ উন্মেষ ঘটিছে। এই সুযোগবোৰ হাতৰ পৰা এৰাই যাবলৈ নিদিব। গতিকে এই মত-বিনিময়ৰ সময়ত আপোনালোকৰ ধাৰণাসমূহ মুকলিকৈ প্ৰকাশ কৰক। আমাৰ যুৱ শক্তিৰ এই অংশগ্ৰহণেই হৈছে এখন উন্নত ভাৰতৰ সৰ্বোচ্চ শক্তি। আকৌ এবাৰ আপোনালোক সকলো যুৱ বন্ধুলৈ মোৰ শুভেচ্ছা জ্ঞাপন কৰিলোঁ।

ধন্যবাদ।

বন্দে মাতৰম।

*****

MJPS/SS/SS/KP/RK/DM