നമസ്കാരം

നിങ്ങളെല്ലാവരും ഈ ഖേലോ ഇന്ത്യ സംവാദ് പരിപാടി വളരെ നന്നായി സംഘടിപ്പിച്ചിരിക്കുന്നു. നിങ്ങൾക്കെല്ലാവർക്കും ഹൃദയം നിറഞ്ഞ അഭിനന്ദനങ്ങൾ ഞാൻ അറിയിക്കുന്നു. ഈ പരിപാടിയുമായി ബന്ധപ്പെട്ട കേന്ദ്ര മന്ത്രിസഭയിലെ എന്റെ സഹപ്രവർത്തകർ, മുഖ്യമന്ത്രിമാർ, സംസ്ഥാന മന്ത്രിമാർ, പാർലമെന്റിലെ എന്റെ സഹപ്രവർത്തകർ, മൈ ഭാരതിന്റെ ലക്ഷക്കണക്കിന് സന്നദ്ധപ്രവർത്തകർ എന്നിവരെ സാങ്കേതികവിദ്യയിലൂടെ ഞാൻ ഊഷ്മളമായി അഭിവാദ്യം ചെയ്യുന്നു. ഇന്ന് രാജ്യമെമ്പാടുമുള്ള കായികതാരങ്ങളും കായിക ലോകത്തെ വിശിഷ്ട വ്യക്തിത്വങ്ങളും ഈ പരിപാടിയിൽ നമ്മോടൊപ്പം പങ്കുചേരുന്നു.

സുഹൃത്തുക്കളേ, നിങ്ങൾക്കെല്ലാവർക്കും അറിയാം,

രണ്ട് ദിവസം കഴിഞ്ഞാൽ ഓഗസ്റ്റ് 29-ന് ദേശീയ കായിക ദിനമാണ്. നിങ്ങൾക്കെല്ലാവർക്കും രാജ്യമെമ്പാടുമുള്ള യുവാക്കൾക്കും കായിക ലോകവുമായി ബന്ധപ്പെട്ട എല്ലാ സുഹൃത്തുക്കൾക്കും ഞാൻ മുൻകൂട്ടി കായിക ദിനാശംസകൾ നേരുന്നു. ഭാരതാംബയുടെ മഹാനായ പുത്രന്മാരിലൊരാളായ മേജർ ധ്യാൻചന്ദ് ജിയെ ഓർക്കാനുള്ള അവസരം കൂടിയാണ് ഈ ദിവസം. നൂറുവർഷം മുമ്പ് ഇന്ത്യൻ ആർമിയുടെ ഹോക്കി ടീം ന്യൂസിലൻഡിൽ ഒരു പര്യടനം നടത്തിയിരുന്നു. ധ്യാൻചന്ദ് ജി ആ ടീമിന്റെ ഭാഗമായിരുന്നു. ആ പര്യടനമാണ് ഇന്ത്യയും ന്യൂസിലൻഡും തമ്മിലുള്ള 100 വർഷത്തെ കായിക ബന്ധത്തിന് അടിത്തറയിട്ടത്. കുറച്ച് ദിവസങ്ങൾക്ക് മുമ്പ് ഞാൻ ന്യൂസിലൻഡ് സന്ദർശിച്ചിരുന്നു. അവിടെ വെച്ചും ഞാൻ അദ്ദേഹത്തെ ഓർത്തു. മേജർ ധ്യാൻചന്ദ് ജി അടിത്തറയിട്ട ബന്ധങ്ങളുടെ അഭിവൃദ്ധിക്കായി ഇന്ന് ഇന്ത്യ തുടർച്ചയായി പ്രവർത്തിച്ചുകൊണ്ടിരിക്കുന്നു.

സുഹൃത്തുക്കളേ,

ഈ ഓഗസ്റ്റ് 15-ന് ചെങ്കോട്ടയിൽ വെച്ച് ഞാൻ ഇന്ത്യയുടെ കായിക വീക്ഷണം രാജ്യത്തിന് മുന്നിൽ അവതരിപ്പിക്കുകയുണ്ടായി. ഞാൻ കായികരംഗത്തെക്കുറിച്ച് സംസാരിക്കുമ്പോൾ അത് മെഡലുകൾ നേടുന്നതിൽ മാത്രം പരിമിതപ്പെടുന്ന ഒന്നല്ല. ഒരു വികസിത ഭാരതം കെട്ടിപ്പടുക്കുന്നതിൽ ഇന്ത്യയുടെ കായിക ശക്തിയെയും ഇന്ത്യയുടെ യുവശക്തിയെയും ഒന്നിച്ചുചേർക്കാനുള്ള ഒരു ക്യാമ്പയിനാണിത്. ഞാൻ എപ്പോഴും പറയാറുള്ളതുപോലെ - ജോ ഖേലേഗാ, വോ ഖിലേഗാ - "ആരാണോ കളിക്കുന്നത്, അവർ ശോഭിക്കും." കായികരംഗത്ത് ശോഭിക്കുക എന്നതുകൊണ്ട് ഉദ്ദേശിക്കുന്നത് മൈതാനത്ത് വിജയിക്കുക എന്ന് മാത്രമല്ല. കായികരംഗത്തെ ശോഭ എന്നത് വ്യക്തിത്വത്തിന്റെ വികാസം, കുടുംബത്തിന്റെ വികാസം, രാജ്യത്തിന്റെ അഭിമാനം വ‍ർധിപ്പിക്കൽ എന്നിവയാണ്.

സുഹൃത്തുക്കളേ,

ഒരു കായികതാരം വിജയിക്കുമ്പോൾ ആ വിജയം അവൻ്റേതോ അവളുടെയോ മാത്രം വിജയമല്ല. ആ വിജയം ആ കുടുംബത്തിന്റെ സ്വത്വം കെട്ടിപ്പടുക്കുകയും അവരുടെ അന്തസ്സ് വർധിപ്പിക്കുകയും ചെയ്യുന്നു. അവർ പഠിച്ച സ്കൂളിന്റെയും കോളേജിന്റെയും അന്തസ്സ് വർധിക്കുന്നു. അദ്ദേഹത്തിന്റെ ജില്ലയുടെയും സംസ്ഥാനത്തിന്റെയും വ്യക്തിത്വം കൂടുതൽ ശക്തമാകുന്നു. അതായത് ആ കായികതാരത്തിന്റെ പേരിൽ ലോകം ആ നഗരത്തെയോ സംസ്ഥാനത്തെയോ തിരിച്ചറിയാൻ തുടങ്ങുന്നു. ഇത്തരം നിരവധി വിജയങ്ങൾ ആഗോള കായിക ഭൂപടത്തിൽ ഒരു പ്രദേശത്തെ തിളക്കമുള്ളതാക്കുമ്പോൾ ആ നഗരത്തോടുള്ള ലോകത്തിന്റെ കാഴ്ചപ്പാടും മാറുന്നു. ഇന്നത്തെ പരിപാടിയിൽ രാജ്യത്തെ നൂറുകണക്കിന് ജില്ലകളിൽ നിന്നുള്ള കായികതാരങ്ങൾ ബന്ധപ്പെട്ടിരിക്കുന്നു. ലോക കായിക ഭൂപടത്തിൽ തിളങ്ങാനുള്ള കരുത്ത് ഓരോ ജില്ലയ്ക്കുമുണ്ട്. ഈ കരുത്ത് മനസ്സിലാക്കിക്കൊണ്ട് നമ്മൾ ഈ സംവാദ പരിപാടി മുന്നോട്ട് കൊണ്ടുപോകണം.

സുഹൃത്തുക്കളേ,

ഇത്തവണ ചെങ്കോട്ടയിൽ വെച്ച് കായികരംഗവുമായി ബന്ധപ്പെട്ട വളരെ വലിയൊരു വെല്ലുവിളിയിലേക്കും ഞാൻ രാജ്യത്തിന്റെ ശ്രദ്ധ ക്ഷണിക്കുകയുണ്ടായി. ഈ വെല്ലുവിളി ഒളിമ്പിക്സുമായി ബന്ധപ്പെട്ടിരിക്കുന്നു. ഒളിമ്പിക്സിലെ വ്യത്യസ്തങ്ങളായ കായിക ഇനങ്ങളിൽ പകുതിയിൽ മാത്രമാണ് ഇന്ത്യൻ ടീമുകൾ പങ്കെടുക്കുന്നത് എന്നതാണ് ഒരു കൈപ്പേറിയ സത്യം. അതായത്, മെഡൽ പട്ടികയുടെ വളരെ വലിയൊരു ഭാഗത്തിനായി നമ്മൾ മത്സരിക്കുന്നു പോലുമില്ല. ദശാബ്ദങ്ങളായി ഇത് തുടർന്നുപോരുകയാണ്. 2012-ലെ ഒളിമ്പിക്സിൽ ഇന്ത്യ വെറും 13 കായിക ഇനങ്ങളിൽ മാത്രമാണ് പങ്കെടുത്തത്. ഇരുപതിലധികം കായിക ഇനങ്ങളിൽ ഇന്ത്യയ്ക്ക് പങ്കാളിത്തം ഉണ്ടായിരുന്നില്ല. ഈ ഇരുപതിലധികം കായിക ഇനങ്ങളിൽ പലതും രാജ്യത്തെ ജനങ്ങൾ അവരുടെ പേരുകൾ പോലും കേട്ടിട്ടുണ്ടാകാനിടയില്ലാത്തവയാണ്. മറ്റ് രാജ്യങ്ങൾ ആ കായിക ഇനങ്ങളിൽ മെഡലുകൾ നേടുന്നു, നമ്മൾ പങ്കെടുക്കുകപ്പോലും ചെയ്യുന്നില്ല. നമ്മുടെ മെഡൽ പട്ടിക ഉയർത്തണമെങ്കിൽ ആ കായിക ഇനങ്ങളിലും നമ്മൾ മേധാവിത്വം നേടേണ്ടതുണ്ട്. ഉദാഹരണത്തിന്, സർഫിംഗും സ്‌പോർട്സ് ക്ലൈംബിംഗും - നമുക്ക് വലിയൊരു തീരദേശവും വിസ്തൃതമായ പർവ്വത മേഖലയുമുണ്ട്, അവിടെ സ്വാഭാവികമായും ഇത്തരം കായിക ഇനങ്ങളോട് താല്പര്യം ഉണ്ടാകാം. വാട്ടർ സ്‌പോർട്സിനും വിന്റർ സ്‌പോർട്സിനും അനുയോജ്യമായ ജനസംഖ്യയും ഭൂമിശാസ്ത്രപരമായ സാഹചര്യങ്ങളും നമുക്കുണ്ട്. എന്നിട്ടും ആഗോളതലത്തിൽ ഇത്തരം കായിക ഇനങ്ങളിൽ നമ്മൾ ദൃശ്യമാകുന്നില്ല. അതിനാൽ, ഒരു പ്രത്യേക കായിക ഇനത്തിനായി ഒരു ആവാസവ്യവസ്ഥ വികസിപ്പിക്കാൻ കഴിയുന്ന വ്യത്യസ്ത ജില്ലകളിലെ സാധ്യതകൾ നമ്മൾ കണ്ടെത്തണം. ഇതിൽ ഇന്നത്തെ പരിപാടിക്ക് വളരെ വലിയൊരു പങ്കുണ്ട്.

സുഹൃത്തുക്കളേ,

2036-ലെ ഒളിമ്പിക്‌സിനുള്ള തയ്യാറെടുപ്പിനെക്കുറിച്ച് സംസാരിക്കുമ്പോൾ 2036-ൽ വിവിധ കായിക ഇനങ്ങളിൽ മത്സരിക്കാനും യോഗ്യത നേടാനും സാധ്യതയുള്ള കളിക്കാരെ നമ്മൾ ഇന്ന് തന്നെ തയ്യാറാക്കണം എന്നതായിരിക്കണം നമ്മുടെ ശ്രദ്ധ. അതുകൊണ്ടാണ് 5 നും 15 നും ഇടയിൽ പ്രായമുള്ള കളിക്കാരെ കണ്ടെത്തുന്നതിനായി വലിയൊരു ടാലന്റ് ഹണ്ട് ക്യാമ്പയ്ൻ ചെങ്കോട്ടയിൽ വെച്ച് ഞാൻ പ്രഖ്യാപിച്ചത്. ഇതിലും ഏത് കുട്ടിക്കാണ് ഏത് കായിക ഇനത്തോട് താല്പര്യമുള്ളതെന്ന് മാത്രം നോക്കിയാൽ പോരാ, മറിച്ച് ഏത് കുട്ടി ഏത് കായിക ഇനത്തിന് അനുയോജ്യമെന്നും നമ്മൾ കണ്ടെത്തണം. അതനുസരിച്ച് നമ്മൾ കുട്ടിയെ പരിശീലിപ്പിക്കണം. ഗവൺമെന്റിൽ നിന്ന് എന്ത് പിന്തുണയാണോ ആവശ്യമായി വരുന്നത്, ഗവൺമെന്റ് നിങ്ങളോടൊപ്പം തോളോട് തോൾ ചേർന്ന് പ്രവർത്തിക്കുമെന്ന് ഞാൻ നിങ്ങൾക്കെല്ലാവർക്കും ഉറപ്പുനൽകുന്നു.

സുഹൃത്തുക്കളേ,

ഇന്ത്യയിൽ 21-ാം നൂറ്റാണ്ടിലെ ഒരു നൂതന കായിക ആവാസവ്യവസ്ഥ കെട്ടിപ്പടുക്കുന്നതിന് നമ്മുടെ ഗവൺമെന്റ് പൂർണ്ണമായും പ്രതിജ്ഞാബദ്ധമാണ്. ഇന്ന് കായിക സർവ്വകലാശാലകൾ മുതൽ ആധുനിക പരിശീലന കേന്ദ്രങ്ങൾ വരെ കഴിവുകൾ കണ്ടെത്തുന്നതിൽ നിന്ന് തുടങ്ങി അവരെ ലോക വേദിയിൽ എത്തിക്കുന്നത് വരെയുള്ള ഓരോ ഘട്ടത്തിലും പിന്തുണ ലഭ്യമാകുന്ന ഒരു സംവിധാനം രാജ്യത്ത് സൃഷ്ടിക്കപ്പെടുന്നു. കായിക ശാസ്ത്രം, പരിശീലനം, ശിക്ഷണം, അനുഭവങ്ങൾ എന്നിവ പങ്കുവെക്കുന്നതിനായി ലോകത്തിലെ മറ്റ് രാജ്യങ്ങളുമായുള്ള സഹകരണവും നമ്മൾ മെച്ചപ്പെടുത്തിവരികയാണ്.

സുഹൃത്തുക്കളേ,

​ഗവൺമെന്റ് കായികരംഗത്തെ എത്രത്തോളം ഗൗരവമായി കാണുന്നുവെന്നതിന് ഈ ഒരു പരിപാടി തന്നെ ഉദാഹരണമാണ്. ഖേലോ ഇന്ത്യ സംവാദ് എന്നത് കായികരംഗത്തെക്കുറിച്ച് സംസാരിക്കാനുള്ള വെറുമൊരു പരിപാടി മാത്രമല്ല. ഓരോ ആശയത്തിനും രാജ്യത്തിന്റെ കായിക വീക്ഷണത്തിന് പുതിയൊരു ദിശ നൽകാൻ കഴിയുന്ന ഒരു സംവാദ വേദിയാണത്. ഇതിനോടൊപ്പം തന്നെ ഇവിടെ നടക്കുന്ന യുവജന സംവാദം നിങ്ങളുടെ ആശയങ്ങളെയും അഭിലാഷങ്ങളെയും രാജ്യത്തിന്റെ സ്വപ്നങ്ങളുമായി ബന്ധിപ്പിക്കുന്നതിനുള്ള മികച്ചൊരു മാധ്യമമാണ്. ഈ പരിപാടിയിൽ കായിക ആവാസവ്യവസ്ഥ, നൈപുണ്യ വികസനം, ഭരണനിർവ്വഹണം, വികസിത ഭാരതം എന്നിവയെക്കുറിച്ച് യുവാക്കൾ എന്ത് ചിന്തിക്കുന്നു, അവരുടെ നിർദ്ദേശങ്ങൾ എന്തൊക്കെയാണ് - ഇവ കേൾക്കുകയും നയരൂപീകരണ പ്രക്രിയയിൽ ഉൾപ്പെടുത്തുകയും ചെയ്യും. അതിനാൽ, ഈ വേദി പരമാവധി അർത്ഥവത്തായ രീതിയിൽ ഉപയോഗപ്പെടുത്താനും പുതിയ ആശയങ്ങൾ മുന്നോട്ട് കൊണ്ടുവെക്കാനും ഞാൻ നിങ്ങളോടെല്ലാവരോടും അഭ്യർത്ഥിക്കുന്നു. യുവശക്തിയുടെ ഈ പുതിയ ആശയങ്ങൾ ഒരു വികസിത ഭാരതം കൈവരിക്കുന്നതിനുള്ള ശക്തിയായി മാറും.

സുഹൃത്തുക്കളേ,

ആരോഗ്യകരമായ ഒരു സമൂഹത്തിനും നല്ലൊരു കുടുംബ സംവിധാനത്തിനും മികച്ചൊരു തൊഴിൽ സംസ്‌കാരത്തിനും സ്പോർട്സ്മാൻ സ്പിരിറ്റ് വളരെ അനിവാര്യമാണെന്ന് നമ്മൾ പലപ്പോഴും കേൾക്കാറുണ്ട്. കായിക മൈതാനത്തേക്ക് ഇറങ്ങാതെ ഈ സ്പോർട്സ്മാൻ സ്പിരിറ്റ് പഠിച്ചെടുക്കുക എന്നത് വളരെ പ്രയാസമുള്ള കാര്യമാണ്. വിജയികളാകാൻ മാത്രമല്ല കായികരംഗം നമ്മെ പഠിപ്പിക്കുന്നത്, മറിച്ച് മികച്ച മത്സരാർത്ഥികളാകാനും അത് നമ്മെ പഠിപ്പിക്കുന്നു. ഉയരാനും വീഴാനും വീണതിന് ശേഷം വീണ്ടും ഉയരാനും - കായികരംഗം നമ്മളിൽ ഈ വീര്യം ഉണർത്തുന്നു.

സുഹൃത്തുക്കളേ,

കായികരംഗം എങ്ങനെയാണ് ജീവിതത്തെ മാറ്റുന്നത് എന്നതിന്റെ വലിയൊരു ഉദാഹരണമാണ് നമ്മുടെ പാരാ-അത്‌ലറ്റുകൾ. മൈതാനത്ത് ഒരു പാരാ-അത്‌ലറ്റിനെ കാണുമ്പോൾ, ജീവിതത്തോടുള്ള ഒരാളുടെ കാഴ്ചപ്പാട് തന്നെ മാറുന്നു. അവർ എന്തെങ്കിലും നേടുമ്പോൾ, ആ അത്‌ലറ്റിനൊപ്പം അവരുടെ മുഴുവൻ കുടുംബത്തിനും ഒരു പുതിയ ജീവിതം ലഭിക്കുന്നു. ആദ്യ നാളുകളിൽ തങ്ങളുടെ കുട്ടി കഷ്ടപ്പെടുന്നത് കണ്ട മാതാപിതാക്കൾക്കും സഹോദരീസഹോദരന്മാർക്കും ആ ഭിന്നശേഷിയുള്ള കായികതാരത്തിന്റെ വിജയം അവരുടെ സ്വപ്നങ്ങൾക്കും ധൈര്യത്തിനും ഒരു പുതിയ ഉയരം നൽകുന്നു.

സുഹൃത്തുക്കളേ,

എനിക്കും ഇത്തരം കളിക്കാരിൽ നിന്ന് എപ്പോഴും പ്രചോദനം ലഭിച്ചിട്ടുണ്ട്. ഉദാഹരണത്തിന്, നിങ്ങളെല്ലാവരും ഈ പേര് കേട്ടിട്ടുണ്ടാകും - അമ്പെയ്ത്തിൽ മികച്ച കായികതാരമായ നമ്മുടെ മകൾ, ആ പേര് നിങ്ങൾക്ക് അറിയാമോ? ശീതൾ. പാരാലിമ്പിക്സിൽ അവൾ മെഡൽ നേടിയപ്പോൾ ജമ്മു കശ്മീർ മുഴുവൻ, ഇന്ത്യ മുഴുവൻ അഭിമാനം കൊണ്ട് നിറഞ്ഞു. അതുപോലെ, പാരാലിമ്പിക്സിൽ രണ്ട് തവണ മെഡലുകൾ നേടിയ നമ്മുടെ മകൾ അവനി ലേഖറ. അവനിയെ കണ്ടുമുട്ടുമ്പോഴെല്ലാം എനിക്ക് വലിയ അഭിമാനം തോന്നും. സുമിത് ആന്റിൽ ആകട്ടെ, നിതീഷ് കുമാർ ആകട്ടെ, അല്ലെങ്കിൽ അടുത്തിടെ നമ്മുടെ ഝണ്ഡു കുമാറിന്റെ പേര് നിങ്ങൾ കേട്ടിട്ടുണ്ടാകും - ഇത്തരം പാരാ-അത്‌ലറ്റുകൾ, ഇവർ നമ്മെയും പ്രചോദിപ്പിക്കുന്നു.

സുഹൃത്തുക്കളേ,

ഒരു മികച്ച ജീവിതത്തിനുള്ള ഉറപ്പാണ് കായികരംഗം. മെച്ചപ്പെട്ടൊരു ജീവിതം നയിക്കാൻ കായികരംഗം നമ്മെ പ്രാപ്തരാക്കുന്നു, നമ്മുടെ ജീവിത നിലവാരം ഉയർത്തുന്നു. ഫൗജ സിംഗ് ജിയെക്കുറിച്ച് നമുക്കെല്ലാവർക്കും അറിയാം. കഴിഞ്ഞ വർഷം 100 വയസ്സിലധികം പ്രായമുള്ളപ്പോൾ ഫൗജ സിംഗ് ജി അന്തരിച്ചു. കായികരംഗത്തോടുള്ള സ്നേഹവും ഫിറ്റ്നസും - അത് ജീവിതകാലം മുഴുവൻ എങ്ങനെ തുടരുന്നു എന്നതിന് ഉദാഹരണമായിരുന്നു ഫൗജ സിംഗ് ജി. കായികരംഗവും ജീവിത നിലവാരവും തമ്മിൽ എങ്ങനെ ബന്ധപ്പെട്ടിരിക്കുന്നുവെന്ന് കാണിച്ചുതരുന്ന വലിയൊരു പ്രചോദനമാണ് അദ്ദേഹത്തിന്റെ ജീവിതം.

സുഹൃത്തുക്കളേ,

കായികരംഗത്തിന്റെ വളരെ വലിയ മറ്റൊരു നേട്ടം എന്തെന്നാൽ യഥാർത്ഥ കളിക്കാർ മയക്കുമരുന്നുകളിൽ നിന്നും ലഹരിവസ്തുക്കളിൽ നിന്നും അകന്നുനിൽക്കാനുള്ള ഇച്ഛാശക്തി വളർത്തിയെടുക്കുന്നു എന്നതാണ്. ഇന്ന് ലഹരിയുടെ വലിയൊരു വെല്ലുവിളി യുവാക്കൾക്ക് മുന്നിലുള്ളപ്പോൾ ഇതിലും കായികരംഗം വളരെ അർത്ഥവത്തായ ഒരു പങ്കുവഹിക്കുന്നു.

സുഹൃത്തുക്കളേ,

ഇന്ന് ഇന്ത്യയിൽ കായികരംഗം ഒരു മികച്ച തൊഴിൽ മേഖലയായി ഉയർന്നുവന്നതിൽ എനിക്ക് സന്തോഷമുണ്ട്. കായികരംഗത്തോടുള്ള സമൂഹത്തിന്റെ കാഴ്ചപ്പാട് മാറിയിരിക്കുന്നു. നമ്മുടെ നാട്ടിലെ ആളുകൾ ട്രയാത്ത്‌ലണുകളിൽ (triathlons) പങ്കെടുക്കുന്നത് ഇന്ന് നിങ്ങൾക്ക് കാണാൻ സാധിക്കും, 5K, 10K ഓട്ടമത്സരങ്ങളിൽ പങ്കെടുക്കുന്നു. ഹൈറോക്സ് (Hyrox) പോലുള്ള വെല്ലുവിളികൾ പൂർത്തിയാക്കാൻ സുഹൃത്തുക്കൾ ഒത്തുചേരുന്നു. ഒരാൾ ആദ്യമായി ഹെഡ്സ്റ്റാൻഡ് ചെയ്യുന്നത് ആഘോഷിക്കുന്നു, ഒരാൾ സുഹൃത്തുക്കളോടും കുടുംബത്തോടും ഒപ്പം പിക്ക്ൾബോളും ബാഡ്മിന്റണും കളിക്കുന്നു. ഇവ ചെറിയ കാര്യങ്ങളാണ്, എന്നാൽ വലിയൊരു കാഴ്ചപ്പാടോടെ നിങ്ങൾ അവയെ നോക്കിക്കാണുകയാണെങ്കിൽ വലിയൊരു മാറ്റം നിങ്ങൾക്ക് കാണാൻ കഴിയും. കായികരംഗം ഇപ്പോൾ നമ്മുടെ ജീവിതത്തിന്റെ ഭാഗമായി മാറുന്നു എന്നതാണ് ആ മാറ്റം. പഠനത്തിനും ഔദ്യോഗിക ജീവിതത്തിനുമായി ടൈംടേബിളുകൾ തയ്യാറാക്കുമ്പോൾ ദിനചര്യയിൽ കായികരംഗത്തിനും ഒരിടം ലഭിക്കുന്നു. ഈ മാറ്റം കാരണമാണ്, ഈ പരിവർത്തനം കാരണമാണ് ഇന്ത്യയുടെ കായിക ഭാവിയെക്കുറിച്ചുള്ള വിശ്വാസം വർധിക്കുന്നത്.

സുഹൃത്തുക്കളേ,

സാധാരണക്കാരായ ആളുകൾ അതിലേക്ക് ബന്ധപ്പെടുമ്പോൾ മാത്രമാണ് രാജ്യത്ത് ഒരു കായിക സംസ്കാരം രൂപപ്പെടുന്നത്. കായിക പിരീഡുകളെ പാഠ്യേതരമായിട്ടല്ല, മറിച്ച് ജീവിതത്തിന്റെ ഭാഗമായിത്തന്നെ സ്‌കൂളുകൾ പരിഗണിക്കുമ്പോഴാണത്. ഇത് സംഭവിക്കുമ്പോൾ കളിക്കാരുടെ കഴിവുകൾ വർധിക്കുകയും കായികരംഗത്തെ ഒരു കരിയറായി എടുക്കാൻ ആഗ്രഹിക്കുന്ന കുട്ടികൾക്ക് അവരുടെ കുടുംബങ്ങളിൽ നിന്ന് പിന്തുണ ലഭിക്കുകയും ചെയ്യുന്നു. അതുകൊണ്ടാണ് ഞാൻ പറയുന്നത് - സ്‌ക്രീനുകളേക്കാൾ പ്രധാനം സ്‌പോർട്സ് സെന്ററുകളാണ്. പ്ലേസ്റ്റേഷനേക്കാൾ പ്രധാനം കളിസ്ഥലമാണ്. നിങ്ങളെല്ലാവരും ഈ സമീപനം മുന്നോട്ട് കൊണ്ടുപോകുമ്പോൾ മാത്രമായിരിക്കും ഇത് സംഭവിക്കുക.

സുഹൃത്തുക്കളേ,

ഇന്ത്യയുടെ യുവശക്തിയുടെ കഴിവിലും വിജയത്തിലും എനിക്ക് വളരെയധികം വിശ്വാസമുണ്ട്. രാജ്യത്തെ യുവാക്കളോട് എനിക്ക് പറയാനുള്ളത് - കായിക മൈതാനത്തായാലും സമൂഹത്തിലായാലും നിങ്ങളുടെ പങ്കാളിത്തമാണ് ഇന്ത്യയുടെ കരുത്ത്. നിങ്ങൾ കായികരംഗത്തെ സ്നേഹിക്കുന്നുവെങ്കിൽ അതിലേക്ക് ബന്ധപ്പെടുന്നതിനായി നിരവധി വഴികൾ തുറക്കപ്പെടുന്നുണ്ട്. ഇപ്പോൾ പുതിയ കായിക ഉപകരണങ്ങൾ എത്തിച്ചേർന്നിരിക്കുന്നു, പുതിയ സാങ്കേതികവിദ്യകൾ വന്നിരിക്കുന്നു. പരിശീലനത്തിന്റെയും ശിക്ഷണത്തിൻ്റെയും രീതികൾ മാറിയിരിക്കുന്നു. കായിക വിനോദങ്ങൾ സംഘാടനം നടത്തുന്നതിന്റെയും മത്സരങ്ങളുടെയും വിവിധ ഇനങ്ങളുടെയും ആവശ്യകതകൾ മാറിയിരിക്കുന്നു. എക്യുപ്‌മെന്റ് ഡിസൈൻ, സ്‌പോർട്സ് ടെക്‌നോളജി, സ്‌പോർട്സ് മെഡിസിൻ, ന്യൂട്രീഷ്യൻ, സൈക്കോളജി, അനലിറ്റിക്സ് - ഈ മേഖലകളിലെല്ലാം യുവാക്കൾക്കായി പുതിയ അവസരങ്ങൾ സൃഷ്ടിക്കപ്പെടുന്നു. ഈ അവസരങ്ങൾ നിങ്ങൾ പാഴാക്കരുത്. അതിനാൽ ഈ സംവാദത്തിൽ നിങ്ങളുടെ ആശയങ്ങൾ തുറന്ന് അവതരിപ്പിക്കുക. യുവശക്തിയുടെ ഈ പങ്കാളിത്തമാണ് വികസിത ഭാരതത്തിന്റെ ഏറ്റവും വലിയ കരുത്ത്. ഒരിക്കൽ കൂടി എല്ലാ യുവ സുഹൃത്തുക്കൾക്കും ഞാൻ എന്റെ ആശംസകൾ നേരുന്നു.

നന്ദി.

വന്ദേമാതരം.

നിരാകരണം: ഇത് പ്രധാനമന്ത്രിയുടെ പ്രസംഗത്തിന്റെ ഏകദേശ പരിഭാഷയാണ്. യഥാർത്ഥ പ്രസംഗം ഹിന്ദിയിലായിരുന്നു നടത്തിയത്.

***

SK