ఈ కార్యక్రమానికి కేంద్ర చట్ట, న్యాయ శాఖ సహాయ మంత్రి (స్వతంత్ర హోదా), పార్లమెంటరీ వ్యవహారాల శాఖ సహాయ మంత్రి శ్రీ అర్జున్ రామ్ మేఘ్‌వాల్ అధ్యక్షత వహించి, పోటీలో ప్రతిభాపాటవాలను కనబరిచిన పాఠశాల విద్యార్థులకు బహుమతులను అందజేస్తారు. ఈ సందర్భంగా,  ఢిల్లీ పీతంపురా పర్వానా రోడ్డు ప్రాంతంలో గల బాల భారతి పబ్లిక్ స్కూల్ విద్యార్థులు ‘‘యూత్ పార్లమెంట్ సిటింగ్’’ను పునఃప్రదర్శించనున్నారు. ‘2025-26 సంవత్సరానికి 58వ యూత్ పార్లమెంట్ పోటీ’ని ఢిల్లీ ఎన్‌సీటీ ప్రభుత్వ విద్యా డైరెక్టరేట్, ఎన్‌డీఎమ్‌సీ విద్య విభాగ పరిధిలోని పాఠశాలల విద్యార్థులకు నిర్వహించగా, బాల భారతి పబ్లిక్ స్కూల్ విద్యార్థులు  ప్రథమ స్థానంలో   నిలిచారు.
ఢిల్లీ నేషనల్ క్యాపిటల్ టెరిటరీ (ఎన్‌సీటీ) లోని పాఠశాలలకు యూత్ పార్లమెంట్ పోటీలను పార్లమెంటరీ వ్యవహారాల మంత్రిత్వశాఖ గత 60 సంవత్సరాలుగా నిర్వహిస్తోంది.  ఢిల్లీ ఎన్‌సీటీ ప్రభుత్వ విద్య డైరెక్టరేట్‌తో పాటు ఎన్‌డీఎమ్‌సీ విద్య విభాగ అధికార పరిధిలోని పాఠశాలలకు యూత్ పార్లమెంట్ పోటీ కార్యక్రమంలో భాగంగా  ఈ సిరీస్ లోని 58వ పోటీని 2025-26 సంవత్సరానికి గాను ఢిల్లీ నేషనల్ క్యాపిటల్ టెరిటరీలో ఏర్పాటు చేశారు.
యువతరంలో స్వీయ క్రమశిక్షణ, వివిధ అభిప్రాయాలను ఆదరించడం, అభిప్రాయాలను పక్షపాత రహితంగా తెలియజేయడం, ప్రజాస్వామిక మార్గాల్లో జీవించే విధానం, తదితర సద్గుణాలను పెంపొందింప చేయడమే ఈ యూత్ పార్లమెంట్ పథకం ముఖ్యోద్దేశం. దీనికి తోడు, పార్లమెంట్ పద్ధతులు, ప్రక్రియలు, చర్చ, వాదోపవాదాల మెలకువలను  విద్యార్థులకు  ఈ పథకం పరిచయం చేస్తుంది. అలాగే వారిలో ఆత్మవిశ్వాసం, నాయకత్వ సామర్థ్యం, చెప్పదలుచుకున్న విషయాలను ప్రభావవంతంగా చెప్పే కళ, నేర్పు.. వీటిని కూడా అలవరుస్తుంది.
పోటీలో ఢిల్లీ పీతంపురా పర్వానా రోడ్డు ప్రాంతంలోని బాల భారతి పబ్లిక్ స్కూలు ప్రథమ స్థానంలో నిలిచినందున ఆ స్కూలుకు జీవీ మావలంకర్ పార్లమెంటరీ షీల్డును, ట్రోఫీని అందజేస్తారు. పోటీలో మొదటిసారి పాల్గొన్న పాఠశాలల్లో ప్రథమ స్థానం దక్కించుకున్న స్కూలుకు ఇచ్చే ట్రోఫీని కూడా ఢిల్లీ పీతంపురా పర్వానా రోడ్డు ప్రాంతంలోని బాల భారతి పబ్లిక్ స్కూలుకే ఇస్తున్నారు. పోటీలో శ్రేష్ఠ ప్రదర్శనలిచ్చిన ఈ కింది 11 పాఠశాలలకు మెరిట్ ట్రోఫీలను ఇవ్వనున్నారు.